Atletismo Archives | Page 3 of 11

September 19, 2016

Eksitoso Siman di Atletismo

WILLEMSTAD — Den siman di 11 te ku di 18 sèptèmber a tuma lugá e Siman di Atletismo. E aktividatnan tabata den kuadro di 50 aña di eksistensia di federashon di atletismo i e preparashonnan pa Carifta Games ku lo tuma lugá den aprel 2017 aki na Kòrsou.

E siman a konosé un klousura festivo dia 18 di sèptèmber ku karedanan di estafèt na Waaigat den Punda. Tantu atletanan lokal komo empresanan a tuma parti. Tabatin un tremendo ambiente na Waaigat i Bar 27 Curacao spesialmente pa e okashon a habri su portanan pa risibí e atleta- i empresanan. Willem Cordilia, presidente di Federashon di Atletismo, ta mira bek riba un siman hopi intensivo pero eksitoso. “Tabata un bon selebrashon di nos 50 aniversario i awor nos por dal e siguiente pasonan pa sigui traha riba desaroyo di nos atletanan”, segun e presidente a bisa.

E ganadónan dje karedanan di estafèt:

U-9: The Eagles A
U-11: The Eagles B
U-13: Trupial E
U 15: The Eagles D
Junior: The Eagles E
Senior: The Eagles H

Empresanan: Rafana BV ku komo kapitan Jacqueline Hol.

Un dje puntonan di mas atenshon tabata e seremonia riba djabièrnè 16 di sèptèmber na Hilton Hotel, kaminda den presensia di Promé Minister Ben Whiteman a tuma lugá firmamentu di kòntrakt entre NACACAA (North American, Central American and Caribbean Athletics Association), Curaçaose Atletiek Bond i e fundashon lokal ku ta enkargá ku Carifta. C.A.B. ta hopi kontentu ku e konkurensia di media, partnernan, gobièrnu i spònsernan i sigur tambe pa presensia dje diferente atletanan talentoso i prometedor ku tabata presente.

“Churandy Martina a yega Kòrsou djabièrnè i tabata presente na e seremonia. E ta un gran ehèmpel pa nos atletanan hoben i p’esei nos ta hopi orguyoso dje hecho ku e tabata presente na un momento asina importante. Tambe otro atletanan manera Liemarvin Bonevacia, Hensley Paulina i Terence Agard a hasi akto di presensia i nos ta hopi kontentu ku esei”, segun Cordilia a bisa mas aleu.

Dirigente di NACACAA a trese dilanti ku Carifta Games 2017 por bira esun di mas mihó den historia i awor ta keda na Kòrsou pa hasi esaki bira realidat den koperashon ku gobièrnu, media, atletanan, partnernan i spònser.

Meskos tambe e ‘cross country’ na lanthùis Wechi, presentashon dje pelikula “Churandy, the road to China” i e “Sport-A-Ton” di FDDK ku partisipashon di atletanan tabata bon bishitá i un éksito pa e federashon.

Ku e rekoudashon di tur e aktividatnan relashoná ku 50 aniversario di C.A.B. lo realisá un programa di guia intensivo pa hoben atletanan.

August 23, 2016

Douglas Direktor Tekniko Deportivo Carifta 2017

WILLEMSTAD — Komo preparashon pa Carifta Games 2017, e komité organisadó “Stichting Organisatie Atletiek Evenementen” (StOA), ta organisando diferente reunion ku e gruponan di tarea asigná. Djasabra último, 20 di ougùstùs, e eks atleta olímpiko Caimin Douglas, kende ta e Direktor tékniko deportivo pa CARIFTA 2017, a duna un presentashon na e demas gruponan di tarea.

For di algun luna atras e fundashon organisadó StOA a asigná señor Caimin Douglas komo e persona responsabel pa henter e parti tékniko deportivo pa loke ta e weganan ku ta tuma lugá den SDK, kual ta enserá e programa pa e diferente disiplinanan, huradonan, e boluntarionan riba pista di atletismo i e kordinashon pa tur evento start na ora.

Señor Douglas a enfatisá ku pa logra un evenementu di atletismo eksitoso, bo mester di un grupo grandi di boluntario. Esakinan ta sumamente nesesario i importante den henter e proseso di un evento, tantu pa e preparashon promé, durante i na final di kada evento i guiando e atletanan den e proseso pa bin i bai na e respektivo akomodashonnan deportivo. “Ta sumamente importante aworakí, pa mas pronto posibel, buska un grupo di boluntario entusiasmá ku lo ser entrená riba sierto spesialidat spesífiko. Mester di diferente miembronan di hurado pa e disiplinanan di sprent, bulamentu haltu, bulamentu leu, tiramentu di sper, tiramentu di disko i pushamentu di bala. Banda di esaki mester di boluntarionan ku ta avisá e atletanan pa ta na ora na e respektivo disiplina ku nan mester kompetí na dje”, Segun Caimin Douglas a sigui enfatisá.

E inskripshon pa boluntarionan i patrosinadornan pa e ‘Carifta Games 2017’ ya a habri i por hasi esaki via e wèpsait di e organisashon (www.carifta2017.com). E komité organisadó ta hasi un yamada na un i tur ku di bèrdat ta interesá pa duna un man, pa inskribí mas pronto posibel i asina duna un sosten na e weganan. Carifta Games 2017 lo tuma lugá e fin di siman di Pasku di resurekshon den Sentro Deportivo Kòrsou (SDK) na Kòrsou.

Carifta games” ya pa años ta ser konsiderá komo e kuna di e futuro kampionnan olímpiko di e aria di Karibe. Un ehèmpel klásiko di esaki ta e atleta Usain Bolt, ku te ainda, ta esun ku tin e rèkert riba 200 meter den Carifta Games. Un kantidat promedio di 450 atleta, prosedente di e area di Karibe, ta partisipá anualmente na e weganan aki.

August 11, 2016

TEKNIKO DI NACAC POSITIVO PA KU ORGANISASHON CARIFTA

WILLEMSTAD — Kòrsou ta organisá e weganan di CARIFTA otro aña, un evento regional ku ta tuma lugá tradishonalmente den e dianan di Pasku di Resurekshon.

Den kuadro di e preparashonnan siman pasa sr. Garth Gayle (Jamaica) a bishita Kòrsou. E tékniko aki ta forma parti di e direktiva di NACAC i tin 30 aña di konosementu i eksperensia pa sostené e organisashon lokal.

Garth Gayle tabata hopi kontentu riba e entusiasmo di e tim lokal, i alabes riba e logronan ya kaba logra dor di e Komité Organisadó. “Dado kaso e CARIFTA Games tin ku tuma lugá aki 2 luna, téknikamente esaki lo ta posibel” segun e tékniko di NACAC.

E enkuentro ku Minister Presidente Ben Whiteman tabata un momento importante. Gobièrnu di Kòrsou a duna di konosé di sostené e evento, i sr. Gayle a bisa ku no ta tur biaha téknikonan ta wòrdu invitá pa reunion den e fase tempran asina. “Esaki ta nifiká ku Kòrsou ta un ehèmpel pa sobra di region di Karibe, i ku e envolvimentu ku deporte ta grandi. Atletismo ta haña mas i mas atenshon, i fuera di e impakto pa e organisashon i patrosinadornan, esaki tambe ta di gran importansia pa e hóben atletanan, ku por sigui desaroyá”.

Pa Kòrsou atletismo i deporte ta riba e agènda. Esaki ta sumamente importante pa e desaroyo di e isla; na momentu ku mas hende ta praktiká deporte, esaki ta resultá den un komunidat mas salu, i ménos hende ku ta sufri di p.e. obesitas. Deporte tambe ya kaba a prueba di ta instrumental pa kombatí violensia i problemanan bou di hóben.

Fuera di e bishita di kortesia ku Minister Presidente, e tékniko a bishita e stadion SDK, pa analisá tur aspekto importante. E la wòrdu kompañá dor di Caimin Douglas, un atleta Olímpiko konosí, ku ta direktor di e kompetensia durante e Carifta Games. Garth a bai di akuerdo ku e plannan, i a bisa ku “ta plasentero pa traha ku un eks atleta ku sa kiko atletanan ta eksperensia durante un evento asina. Esaki ta fasilitá tur e trabounan ku tin ku wòrdu hasi”, segun Garth Gayle.

NACAC i su tékniko(nan) ku lo bin Kòrsou den e lunanan benidero lo duna e asistensia nesesario, i tambe ta responsabel pa e aspektonan tékniko durante e evento. Esakinan tur lo sosodé segun e kriterio di IAAF (International Association of Athletics Federations).

June 28, 2016

Bon prestashon di atletanan di klup Trupial – Auto City na Trinidad & Tabogo

WILLEMSTAD — Den e weekent di 24 pa 26 di juni klup di atletismo Trupial a partisipa ku 7 atleta na e kampionato nashonal di atletismo 2016 di Trinidad & tabago ku hopi bon resultado. Partisipashon di e atletanan aki ta den kuadro di e programa di enterkambio deportivo ku Trupial tin ku varios Isla den Karibe pa mehora e kalidat kompetitivo di su atleta nan. Ku e kompetenshanan aki e atleta nan ta hanja mas eksperensia i oportunidat pa kompeti ku kompetidornan mas miho ku nan.

E resultadonan mas sobresaliënte ta lo siguiente:

Glenka Antonia 3e luga riba bula haltu. 1.70 m. medalia di brons.

Krishona Juliana 1e luga bula leu 5.76 m medalia di oro. Tambe Krishona a kibra su rekort personal riba bula haltu ku 1.70 m. Qyone Antersijn 2e luga riba 1500 m medalia di plata. Lionel St Jacobs 3e luga riba 1500 m medalia di brons. Jaden Bernabela 3e luga riba bula haltu 1.95 m medalia di bronse i 7 m riba bula leu kibrando su rekort personal. Jaden tin 16 anja.

Total e delegashon ta regresa Korsou ku 1 madalia di oro, 1 di plata i 3 di brons. Un pabien ta bai na tur e atletanan aki i nan coach Nabi Wallace ku a hasi un bon trabou ku e atletanan aki. Nos ta spera ku e atletanan aki lo sigui persevera den e deporte di atletismo. Un danki ta bai na tur ku a hasi posibel pa e biahe por a wordu realisa. E siguiente kompetensia ta dia 8 i 9 juli den SDK ku e elektrisante Tupial – Auto City Classic Internashonal ku partisipashon di atletanan for di Sint. Maarten, Trinidat & Tobago, Surnam, Jamaica, Aruba, Boneiru i tur klup di Korsou.

Prome ku esaki klup di atletismo Trupial Auto City ta invita pueblo di Korsou pa bin mira nan galeria di potret i festival di kuminda dia 2 juli dia di Bandera den edifisio di FDOK na Rodeweg 92a dilante Colon.

Entreda ta gratis. Por hasi un donashon pa e atletanan di Trupial por sigui praktika den nan deporte stima.

May 23, 2016May 23, 2016

KEVIN PHILBERT TA ESTABLESÉ RÈKORT NOBO DEN SALTO TRIPEL

WILLEMSTAD — Kevin Philbert (21) a sa di establesé un marka nashonal nobo riba salto tripel ora ku durante di kampeonato amerikano di NCAA Junior College el pone un marka nobo di 15.50 meter. Ku e hazaña aki Kevin ta kita e marka anterior di 15.18 ku tabata riba nòmber di Ellsworth “Nanzi” Manuel for di 1997.

Kevin ta ganadó di dos medaya di plata di Carifta pa Kòrsou, ora ku na tantu na 2013 i komo 2014 el a bula e distansia di 7.36 meter riba e disiplina di bula leu. Riba mesun distansia aki Kevin tin e rèkert establesé! Un pabien ta bai pa Kevin Philbert ku awor tin dos rèkert riba su nòmber!

Kevin na e momentunan aki ta terminando du promé aña di estudio na Cloudt County Community na Florida. Huntu ku e disiplina di salto tripel Kevin ta praktikando tambe bula leu i 400 meter; e ta terminá su promé aña eskolar ku un bulada di 7.43 meter i un tempu di 50.74 sec. Riba e dos eventonan aki.

Kevin Philbert ta invitá henter pueblo di Kòrsou pa bin wak’é den akshon durante di e próksimo kampeonato MCB di Kòrsou ku lo tuma lugá dia 10 i 11 di yüni próksimo den stadion Ergilio Hato.

May 17, 2016May 17, 2016

ATLETISMO DEN KOMPETENSIA PREPARANDO PA KAMPEONATO MCB 2016

WILLEMSTAD — Despues ku siman pasa a toka turno na nos chikitinnan pa selebra dia internashonal di atletismo, fin di siman tras di lomba a toka turno na spechalmente esnan mas grande.

E atletanan ta saliendo awor’ki for di e fase di transishon pa nan drenta bèk den e fase kompetensia pa asina nan ta den un konsishon optimo pa kampeonato di Korsou; pues no tabata un kompetensia kaminda ku nan lo a kompetí riba 100% di nan kapasidat. E kompetensia aki tòg a laga markanan sumamente remarkabel atras i te hasta rèkort nobo a keda poné. Tabata e atleta multi-talentoso, Keiji Lorens (14) di Trupial ku a sa di tira e bala di baseball riba un distasia di 87.12 meter! Ku e hanzaña aki e ta pone e marka nashonal na 5.47 mas leu.

Elgin Sommer di Sparta tambe a sa di pone e tempu di mas skèrpi di atletismo den 2016 riba e distansia di 100 meter ora ku el a para e oloshi na 10.81 sec ku esaki e ta laga Rachmil van Lamoen i Prince Kwidama su tras ku a kore respektivamente 10.83 i 10.88.

Bientu na Kòrsou semper tabata un obstakulo pa nos atletanan riba e distansia di 200 i 400 meter. Pa loke ta 2016 nos atletanan poko poko pero sigur ta jegando 50 sec. riba e pista Mondo na SDK. Pa kampeonato di Korsou nos tin sigur atletanan markando tempu di 47 seconde.

Riba e distansia di 800 meter ku un elektrisante final e atleta Jordan Philbert (16) di Cheetah ta bai laga Rashid Rosalina (21) di The Eagles ku un diferensia di 8 sentisimo seconde. No lo por ferwagt hopi di ambos atleta durante di e proksimo kampeonato di Kòrsou.

E kompetensia di fin di siman aki a konose partisipashon di un kantidat rèkort di lansado. Hopi di nan tabata hobennan ku a keda reklutá speshalmente pa Carifta 2017. E atleta nobato di e ekipo di Deportivo San Kristòf a sa di duna un kompetensia fuerte. Nataniel Komen den su prome kometensia a di tira e sper riba un distansia di mas ku 42 meter! Asina tin hopi bon prospekto mas pa den futuro.

Bob Esprit i tambe Eduard “Watty” Pourier (Boneiru), dos atleta di renombre di den pasado tambe hasi presensia bèk durante di e kompetensia di atletismo ora nan a kompeti den pusha bala di heru i disko. Den bala di heru Bob ta pusha 12.30 i Watty 11.62 meter. Nan a inspirá hopi di nos hobennan.

E miho 8 atletana di e kategorianan bou di 14 aña; tambe tabata den kompetensia.

Serka nos damitanan di 7/8 aña ta Zsa-zsa Frans di The New Revolution a gana komodamente. Serka e mucha hòmbernan Anton Pietersz di The Eagles ta sali ku maksimo puntuashon. Den e kategoria 9/10 Mehaydi Isabella (Trupial) i Jeneul Doran (Deportivo San Kristòf) ta bolbe score mas haltu. Vanessa Mercera i Gerander Melfor di Trupial ta bira ganado den e kategoria di 11 i 12 aña. Serka nos atletanan di 13 aña14 aña ta Nashwena Jonge (Deportivo San Kristòf) i Suehandric Paulina ta gana komodamente ku un bon saldo di puntuashon den e eventonanan kombiná.

Atletismo di Kòrsou ta sigui dia 10 i 11 di yuni proksimo ora ku nos atletnan sali den e Kampeonato MCB di Atletismo 2016.

Ta fèrwagt ku mas 200 atleta den e kompetensia maksimo di atletismo di Kòrsou.

May 14, 2016May 14, 2016

DIA INTERNASHONAL DI ATLETISMO PA NOS ATLETANAN GRANDI

WILLEMSTAD — Siman pasa tabata nos atletanan bou di 15 aña i e biaha aki ta toka na nos atletanan riba 15 aña lo selebrá dia internashonal di atletismo.

Un total di 10 klup afiliá na e federashon di atletismo di Kòrsou a djòin otro pa un total di 60 atleta femenino i 88 atleta maskulino. Huntu ku e atletanan aki lo tin e 8 mihónan di kada kategoria ku a kompetí siman pasa.

Manera semper ta e kaso den atletismo lo tin karedanan di diferente distansia kuminsando for 100 meter te ku 3000 meter. Tambe lo tin e kareda di 100 i 110 meter ku opstákulo. Despues di hopi aña atletismo di Kòrsou lo tin mas 30 atleta kompitiendo riba e distansia di 100 meter. Miéntras ku riba e distansianan di 800, 1500 i 3000 meter nos lo tin mas ku 25 atleta kompitiendo. Rashid Rosalina ku ke pone un marka nobo riba e distansia di 800 meter tambe lo ta den kompetensia.

Den eventonan di salto haltu, largu i tripel e biaha aki nos lo tin diferente partisipante. Entre nan nos lo tin Nasya Ramirez di 14 aña i Jaden Bernabela di 16 aña ku kada un kaba di establesé un rèkert serka nos atletanan bou di 18 aña den respektivamente bula leu i bula haltu durante di Carifta Games na Grenada.

Pa loke ta trata nos lansadonan di bala di heru, sper i disko, e biaha aki lo tin un kantidat rekort di partisipante; kuminsando for di 14 aña miéntras ku esun di mas grandi lo tin 73 aña. Esaki ta un indikashon bon kla ku atletismo tá e deporte mama.

Entre e partisipantenan aki lo tin tambe presensia di e veterano Bob Esprit riba bala di heru. E veterano di Boneiru Eduard “Watty” Pourier tambe ta na Kòrsou sali kontra di nos atletanan master. E evento di pushamentu di bala di heru lo ta djabièrnè 07:00or den SDK. Lansamentu di sper i disko lo ta djasabra 14 di mei riba e fasilidat pariba di SDK di 2or pa 5or di atardi.

E kompetensia aki lo sirbi tambe komo preparashon di nos atletanan ku lo ta den Kampeonato MCB Atletismo Kòrsou ku lo tuma lugá dia 10 i 11 di yüni próksimo.

E evento lo ta djabièrnè 13 i djasabra 14 di mei den Stadion Ergilio Hato di SDK. Ámbos dia e kompetensia lo ranka sali 5.30or di atardi i lo terminá 9:30or di anochi. Na final di ámbos dia lo tin diferente kareda di relevo.

Entrada pa públiko en general lo ta dos (2) florin pa persona. Karchi lo ta optenibel na entrada di stadion Ergilio Hato.

Nos atletanan ta konta ku Kòrsou su apoyo.

May 12, 2016

ATLETISMO KU CHARLA DI PLANIFIKASHON DEPORTIVO

WILLEMSTAD — Planifikashon deportivo ta di mayor importansia di den preparashon di un deportista. Atletismo di Kòrsou den kuadro di un formashon pa su coachnan ta organisando un serie di tres charla pa trata e tema tan interesante aki. E tres charlanan aki lo ser duna pa personan ku eskperensia amplio den e materia aki. Ayera tabatin e prome charla ku tabata na enkaro di coach Wendell Prince ku tin mas ku 40 anja di ekspernsia komo coach i ku a sa di entrena diferente atleta riba nivel mundial. E seshon ku a trata temanan hopi interesante tabata bon bishitá.

Djaluna awor dia 16 di mei, ta toka turno na Dr. Walid Elhage pa duna otro charla riba planifikashon, pero e biaha aki for di punto di bista di un mediko. Dr. Walid Elhage, sientifiko deportivo, bon konosí na Kòrsou i di renombre mundial lo amplia riba e aspekto fisiko di e deportista i kiko tin ku hasi pa preveni leshon ora ta planifiká.

Dialuna di 23 di mei lo tin e ultimo di e serie di tres charla ku lo ta na enkargo di coach Luis Varona Moret. Un cubano ku ta aki na Korsou pa preprashon di nos atletanan ku lo tin ku partisipa na Carifta Games ku lo tuma lugá aki na Kòrsou otro aña. Coach Luis tambe di hopi aña di eksperensia ta spesialisá den preprashon di atletanan di lansamentu. El a prepará diferente atleta ku a alkansa nivelnan mundial den diferente disiplina di atletismo. Coach Luis a traha komo coach na akademia deportivo na Cuba i a presta serviso na diferente part di mundu. Coach Luis lo tin na su enkargo otro aspektonan di planifikashon.

Esaki pues ta un bon okashon pa tur coach bin amplia nan konosementu di planifikashon. E seshonan ta tuma lugá di 7:30 – 9:00 di anochi den sala di reunion na SDK i lo ta kompletamente gratis. Sea asina bon di registra bo mes na cab.2008@gmail.com i bini ku bo propio stul.

April 23, 2016

Atletiek Vereniging Sparta (A.V. Sparta) i Scouting Antiano a uni pa rekoudá fondo

WILLEMSTAD — Dia 26 di aprel próksimo, riba Freewinds ta bai tin un tremendo konsierto pa rekoudá fondo pa atletanan di AV Sparta ku ta bai kompetí dia 19-22 mei próksimo na Colombia i tambe pa e hóben nan di Scouting Antiano ku tin ku biaha den luna di yüli próksimo.

E konsierto aki ta unu bon balansa ku artistanan lokal di taya ku a pone nan mes gratuitamente disponibel huntu ku Freewinds Band pa deleitá tur ku aportá na e dos organisashonnan aki ku ta traha na bienestar di nos hóbennan. E artistanan ku ta presentá e anochi ei ta Melania Van der Veen, Vonetta Lauffer, Veanira Reed, Ebony-Gwen i Reinier Lijfrock. Ta algu espektakular, pa por haña tantu artista di taya huntu un anochi pa solamente 15 florin pa persona. P’esei e dos organisashonnan ta invitá pueblo di Kòrsou pa hasi uso di oportunidat di disfrutá abordo di Freewinds i mesora aportá na un bon kousa.

Karchi ta optenibel tantu seka e atletanan, direktiva di Sparta (540-2414) i tambe direktiva di Scouting Antiano (5683040/5694418) .

Lo tin karchi optenibel na porta pero e kantidat lo ta limitá.

Na final di e konsierto e hóbennan; atleta i patfender lo pasa un kolekta pa asina por logra nan meta.

Pa mas informashon relashoná ku e Proyekto di AV Sparta i/o pa hasi un donashon por tuma kontakto ku sr. Raymond Jansen na telefon 5402414 òf por hasi un depósito riba number di kuenta Giro 1114422 Atletiek Vereniging Sparta ku e spesifikashon donashon “Proyekto: “Kompetensia Colombia 2016”

April 7, 2016

ATLETISMO TIN MESTER DI BRASANAN FUERTE DI BEISBOL I SOFTBOL

WILLEMSTAD — Luis Varona Moret, coach cubano ku ta spesialisá den ‘throw events’ (speer, disko i pusha bala di heru) finalmente a yega Kòrsou. Pa algun luna kaba Federashon di Atletismo (CAB) tabata en espera di yegada di e coach cubano ku mester bin duna bida bek na e disiplinanan di atletismo ariba menshoná.

Luis Varona Moret ta un coach di amplio eksperensha ku a traha na e.o. kontinente afrikano i na paisnan den Karibe. Apenas el a yega dia 1e di aprel último, ku ya ayera tardi e tabata riba velt di SDK kaminda el a kuminsá ku un trabou interesante. E meta ta pa Kòrsou tin algu atleta medayista den ‘throw events’ den e kampionato di Carifta ku lo tuma lugá otro aña aki na Kòrsou.

Reklutashon di posibel prospektonan:

Awor ku e coach cubano a yega, Federashon di Atletismo ta organisá 3 djasabra mainta durante kua ta bai reklutá hóbennan ku lo hiba un training intensivo pa prepará nan pa Carifta 2017. E meta ta pa gana medaya i bini na remarke pa haña ‘scholarship’ na Merka.

Federashon di Atletismo ta invitá tur hóben ku e aña’ki ta entre 14 pa 18 aña di edat, pa djasabra awor tuma parti na un seshon durante kua lo test hóbennan ku por bini na remarke pa sigui training pa lansa speer, tira diskus of pusha bala di heru.

Ken ta bini na remarke: Tur hóben entre 14 pa 18 aña, pero prinsipalmente esnan ku ta hunga beisbòl i sòftbòl. Esaki ta inkluí esnan ku kurpa balente (p.e. kèchernan), hóbennan ku bon brasa (outfielders) i ku ademas di beisbòl i sòftbòl, ke hasi un deporte ku ta yuda nan den progreso di netamente e dos deportenan ei.

Pues tur e hóbennan ei ta bon biní djasabra awor, mainta di 9’or pa 11’or den e area di parti pariba pafó di S.D.K.