Eksitoso Siman di Atletismo

WILLEMSTAD — Den siman di 11 te ku di 18 sèptèmber a tuma lugá e Siman di Atletismo. E aktividatnan tabata den kuadro di 50 aña di eksistensia di federashon di atletismo i e preparashonnan pa Carifta Games ku lo tuma lugá den aprel 2017 aki na Kòrsou.

E siman a konosé un klousura festivo dia 18 di sèptèmber ku karedanan di estafèt na Waaigat den Punda. Tantu atletanan lokal komo empresanan a tuma parti. Tabatin un tremendo ambiente na Waaigat i Bar 27 Curacao spesialmente pa e okashon a habri su portanan pa risibí e atleta- i empresanan. Willem Cordilia, presidente di Federashon di Atletismo, ta mira bek riba un siman hopi intensivo pero eksitoso. “Tabata un bon selebrashon di nos 50 aniversario i awor nos por dal e siguiente pasonan pa sigui traha riba desaroyo di nos atletanan”, segun e presidente a bisa.

E ganadónan dje karedanan di estafèt:

  • U-9: The Eagles A
  • U-11: The Eagles B
  • U-13: Trupial E
  • U 15: The Eagles D
  • Junior: The Eagles E
  • Senior: The Eagles H

Empresanan: Rafana BV ku komo kapitan Jacqueline Hol.

Un dje puntonan di mas atenshon tabata e seremonia riba djabièrnè 16 di sèptèmber na Hilton Hotel, kaminda den presensia di Promé Minister Ben Whiteman a tuma lugá firmamentu di kòntrakt entre NACACAA (North American, Central American and Caribbean Athletics Association), Curaçaose Atletiek Bond i e fundashon lokal ku ta enkargá ku Carifta. C.A.B. ta hopi kontentu ku e konkurensia di media, partnernan, gobièrnu i spònsernan i sigur tambe pa presensia dje diferente atletanan talentoso i prometedor ku tabata presente.

“Churandy Martina a yega Kòrsou djabièrnè i tabata presente na e seremonia. E ta un gran ehèmpel pa nos atletanan hoben i p’esei nos ta hopi orguyoso dje hecho ku e tabata presente na un momento asina importante. Tambe otro atletanan manera Liemarvin Bonevacia, Hensley Paulina i Terence Agard a hasi akto di presensia i nos ta hopi kontentu ku esei”, segun Cordilia a bisa mas aleu.

Dirigente di NACACAA a trese dilanti ku Carifta Games 2017 por bira esun di mas mihó den historia i awor ta keda na Kòrsou pa hasi esaki bira realidat den koperashon ku gobièrnu, media, atletanan, partnernan i spònser.

Meskos tambe e ‘cross country’ na lanthùis Wechi, presentashon dje pelikula “Churandy, the road to China” i e “Sport-A-Ton” di FDDK ku partisipashon di atletanan tabata bon bishitá i un éksito pa e federashon.

Ku e rekoudashon di tur e aktividatnan relashoná ku 50 aniversario di C.A.B. lo realisá un programa di guia intensivo pa hoben atletanan.