Di 4 Edishon di The Eagles Championship

WILLEMSTAD — Den fin di siman ku ta tras di lomba klup di atletismo The Eagles, den estrecho kooperashon ku Curaçaose Atletiek Bond (CAB), a organisá su di 4 edishon di kareda di pista na stadion Ergilio Hato titulá “The Eagles Championship”. Un kantidat grandi di 190 atleta di 8 klup di atletismo a kompetí den e evento grandi aki. Mayoria atleta tabata di Kòrsou pero tabatin partisipashon individual tambe di tres atleta di Bèlgika i un atleta di Boneiru.

The Eagles por mira bèk riba un kompetensia sumamente eksitoso, ku 9 rèkert nashonal nobo den atletismo di atletanan di diferente klup. Asina The Eagles huntu CAB ta siguí engrandesé e deporte di atletismo na Kòrsou, ku bon yudansa di boluntarionan i spònsernan di e evento (RBC i Sportspot Sta. Maria). The Eagles ta gradisí CAB i tur spònser, boluntario, ofisialnan, atleta i klup pa nan partisipashon i kontribushon kual tabata hopi importante pa e kompetensia aki bira un éksito. Entre e boluntarionan tabatin mayornan di atletanan i Brigada di Siguridat kualnan a hasi un hopi bon trabou.

The Eagles mes a disfrutá di un tremendo prestashon di su mes atletanan ku a gana 30 medaya en total durante e evento. Entre esakinan tin Jeronn-Jeevan Tilé ku a destaká ku 5 medaya di oro i ku a kibra 3 rèkert nashonal di U11. Zion Sambo (U15) tambe a gana 3 medaya di oro. Aldrich Jack (Senioren), Tyler Otto (U17) i Rivka Goede (U17) a gana 2 medaya di oro kada unu den eventonan ku tabatin 3 atleta of mas kompetiendo. Tambe tabatin medaya di oro pa Elgemar Laker i Milicent Lauffer. The Eagles ta felisitá tur su atletanan pa nan partisipashon i prestashon, tantu esnan ku a gana medaya komo esnan ku no a gana medaya.

Invitashon Terser Kompetensia di Atletismo 2022: “Kompetensia di klup The Eagles”

WILLEMSTAD — Curaçaose Atletiek Bond (CAB), ke invitá boso na e terser kompetensia di atletismo pa e aña 2022 ku e klup di atletismo The Eagles lo organisá.

Dia: Djabièrnè 8 di aprel 2022
Orario: 18.10 – 20.50

Dia: Djasabra 9 di aprel 2022
Orario: 9.15 – 10.50 i 14.00 – 18.00

E resultadonan i e siguiente informashon por mira riba atletiek.nu

  • Kantidat di atletanan ku ta partisipá
  • Tur e eventonan ku lo tuma lugá
  • E orarionan ku tur e eventonan lo tuma lugá
  • Historia di e atletanan nan prestashon
  • Bou di “statistieken”por haña informashon di e kantidat di kada klup su atletanan i repartishon hende muhé i hòmber
  • Por haña e resultadonan live pa mira. Esaki por mira bou di “uitslagen”

LIVE STREAMING

Por siguí e kompetensia aki riba sport.cw

Promé edishon di ‘Dia di Waaigat’ na okashon di e ‘Relevo di Waaigat 2017’

WILLEMSTAD — Djadumingu 17 di sèptèmber 2017 e promé edishon di Dia di Waaigat ta tuma lugá, organisá pa Fundashon Waaigat den kooperashon estrecho ku Curaçaose Atletiek Bond. E idea original tabata ‘Relevo di Waaigat’ ku karedanan rondó di Waaigat, pues pustamentu na pia entre miembronan di klupnan di atletismo, gruponan uniformá, empresa kontra empresa, pero tambe representantenan di bario kontra otro.

Curaçaose Atletiek Bond su karedanan lo keda e evento prinsipal durante e programa di Dia di Waaigat. Komo tal Relevo Waaigat 2017 ta bai bira e krèm de la krèm di e aktividatnan durante di Dia di Waaigat. Curaçaose Atletiek Bond ta aspirá pa Relevo Waaigat bira internashonal. Pero, mirando ku ya ta trata di Dia di Waaigat e evento ta di un magnitut muchu mas grandi. Na final mester logra ku e interes pa atletismo den Kòrsou i prinsipalmente den barionan ta bira grandi i mas hende ta djòin atletismo i bira aktivo den e ramo di deporte aki.

Ku aserkamentu di Erwin Raphaëla di programa Bario pa Bario pa yuda den promoshon di Relevo di Waaigat 2017, a bini un kambio den e sentido ku a agregá un momento den e programa pa duna rekonosementu na eks bankero di Banco di Caribe señor Eduardo “Eddie” de Kort, kende ta e pionero i luchadó inkansabel pa subi kalidat i drecha e higiena di Waaigat.

Señor Eduardo “Eddie” de Kort ta e persona ku kompletamente di su propio boluntat algun aña pasá a tuma e enkargo pa laga realisá un limpiesa riguroso den e ‘Binnenwater’ aki, laga pone un otro brùg ku ta konektá Scharloo ku Punda i konstruí un restorant pa trese bida den e área aki. Eddie de Kort su aspirashon tabata pa kombertí Waaigat den un haf pa yatenan por drenta i mara, prueba ta deliberashonnan ku señor de Kort a hiba via Fundashon Desaroyo Waaigat ku gobièrnu i otronan, anto diseñonan ku el a laga produsí di un Waaigat
kompletamente nobo i moderno. Na okashon di e promé edishon di Dia di Waaigat ta na su lugá duna homenage na e gran suidadano aki.

Raymond Begina ta esun ku a trese padilanti ku ta mihó organisá Dia di Waaigat, utilisando e ‘Binnenwater’ kompletu, kombiná ku aktividatnan tantu rondó komo den Waaigat mes. Señor Begina a drenta den kontakto ku konosedónan di aktividatnan riba laman, anto asina ei a pone kontakto ku un di esnan ku a inisiá Fuikdag, esta señor Eduard “Dito” de Kort, kende mesora a haña e enkargo pa ta esun ku lo tin kordinashon di aktividatnan den Waaigat na su enkargo.

Ku e ideanan aki a sigui reunionnan ku Curaçao Ports Authority (C.P.A), anto for di e entusiasmo ku resultadonan di e kombersashon ku CPA a generá a disidí definitivamente ku Dia di Waaigat ta bira realidat. Licores Maduro, agente di Polar ta e promé ku a duna un kontesta positivo pa sostené e evento fasilitando ku tur sorto di ekipahe i provishonnan nesesario.

Eduard “Dito” de Kort a duna su palabra pa hasi tur esfuerso di manera ku lo tin sufisiente boto pa drenta Waaigat en konekshon ku selebrashon di dia di e ‘Binnenwater’ aki. Djei e grupo di trahadónan ku ta asesorá e plan pa ‘boost’ Waaigat, huntu ku representantenan di Curaçaose Atletiek Bond i demas presentenan, bou di guia di Raymond Begina, a hinka un programa den otro.

Pa 12or ta kuminsá ku entrada di botonan ku ta pasa via brùg Emma, sigui bin paden via brùg L.B. Smith òf mara na Kleine Werf si ta botonan muchu grandi pa drenta Waaigat, nan ta mara na Kleine Werf. Botonan mas chikitu ta drenta pasando di brùg L.B. Smith, brùg di Scharloo, brùg Amalia i sigui bini den Waaigat pa mara. Ta traha ainda riba e posibilidat pa tene algun pustamentu den laman of demostrashon di kualke partikularidat. Mas lat lo tin un show espektakular di drones, outonan di e klup di wabi tambe lo tei pa keda atmirá huntu ku e desfile di e organisashon grandi di doñonan di motosaikel ku nan vehíkulonan. Aktividatnan pa mucha mas ku klaro lo tin sufisiente, pero tambe nan lo por subi bouncer pa deleitá nan mes. Entre 15.45 or pa 16.30 or lo tene e resèpsi ku invitadonan spesial pa duna rekonosementu na Eddie
de Kort.

E aktividat sentral di e dia lo ta ‘Relevo di Waaigat’, pustamentu na pia entre empresanan, gruponan uniformá, klupnan di atletismo i representantenan di bario kontra bario ku lo tèrminá ku entre di kopa, entre kua ‘kopa rotativo Bario pa Bario’. Trámitenan ta andando pa atraé algun disk djòki pa animá e públiko riba vlòt posishoná den laman di Waaigat. Lo tin bandanan musikal pa atraé públiko. Pero e ambiente total lo ta den un esfera plasentero ku hopi muzik, kuminda krioyo i eksótiko pa saboriá. Dia di Waaigat lo ta di 12 or pa 20.00 or

Ta di dos biaha despues di hopi aña ku Curaçaose Atletiek Bond ta organisá Relevo di Waaigat. E intenshon di Relevo di Waaigat ta pa alsa interes i entusiasmo pa atletismo un banda i trese Waaigat den sentro di atenshon komo sitio pa mas evento deportivo. Ku Relevo Waaigat ta e idea pa krea un aktividat ku ta ‘boost’ e parti aki di Punda i lanta e interes di manera ku atletismo ta krese ainda mas na Kòrsou. Esaki lo ta ku partisipashon di diferente kategoria, esta U-11, U-13, U-15, junioren, senioren etcetera. Tambe lo tin partisipashon di gruponan uniformá, empresanan i representantenan di empresanan ku finalmente tambe barionanan kontra di otro. Despues di e karedanan lo tin entrega di medaya i kopanan na e partisipante i ganadónan.

Komplasiendo ku sentenáres di pedido for di públiko a disidí entre tantu di lanta fundashon Waaigat. Djaluna 4 di sèptèmber 2017 e akta ofisial a keda firmá na ofisina di notario mr. Myron Hu-A-Ng, ku e meta di Fundashon Waaigat pa traha di manera ku Waaigat ta bira un di e áreanan aquatiko i rekreativo di mas renombre i atraktivo den Karibe. E “Binnenwater” aki den bista di direktiva di Waaigat lo mester brinda e posibilidat pa eventonan deportivo, edukativo, sosial, rekreativo i kultural di taya pa aportá na subi popularidat di Kòrsou tantu paden komo pafó den eksterior.

Danki na Curaçao Ports Authority (C.P.A) pa e konfiansa i ku sin un solo momento di duda a sostené e idea. Danki na Licores Maduro, agente di Polar ku di un forma manera ta trata di famia a habri tur posibilidat pa nos. Danki na Bureau Telecommunicatie & Post, UTS, MCB i tambe Refineria Isla pa e koperashon.

Homenage na atletanan di Age Group di Trupial – Auto City

WILEMSTAD — Den e kompetensia di djasabra i djadumingu último klup di atletismo Trupial – Auto City a logra konkista 5 di e 8 lugá nan ku tabata den disputa pa forma parti di e selekshon di Kòrsou pa kampionato di NACAC Age Group na Trinidad & Tobago dia 14 i 15 di juni próksimo.

Tambe 3 di e 4 atletanan di reserva ta di Trupial – Auto City. Ku e resultado aki klup di atletismo Trupial – Auto City a demostrá su superioridat riba e otro klup nan di Kòrsou.

E atletanan selektá ta:

U 13 femenino

1 Mehaydi Isabella

2 Mariendely Casper

 

U13 maskulino

1 Rythemsley Daal

2 Rodiensly Ignecia

 

U15 femenino

1e Vanessa Mercera

 

Atleta di reserva ta

U13 femenino

3e lugá Joëlla Mathilda

 

U13 maskulino

3e lugá Savir Faneyte

 

U15 maskulino

3e lugá Dayveno Daal

Ku e logra aki direktiva di klup di atletismo Trupial – Auto City ta organisá un homenage na e atletanan aki i e entrenadó nan ku a hasi un bon trabou ku nos atletanan.

E homenage lo tuma lugá mayan 5.30 na Rust & Burg.

Direktiva di Trupial – Auto City ta felisitá e atletanan aki i ta yama un danki na nos coach nan ku a hasi un bon trabou. Un pabien ta bai tambe na e mayornan ku a konfia nan yu nan den nos organisashon ku awor nan por mira e bon trabou di nos organisashon. Un danki tambe ta bai na tur miembro di direktiva i tur spònser ku sa kontribuí ku nos organisashon. En espesial nos spònser mayó Auto City ku ta 100  0/0 nos tras. Tambe nos ta informá ku pa djárason awor 24 mei lo Sali un delegashon di 5 atleta  di Kòrsou pa Cuba pa un kompetensia internashonal Barientos. Di e 5 atletanan aki 3 ta di klup di atletismo Trupial – Auto City

Joshua-Benjamin Phelipa riba tira disko. Rekort nashonal riba e evento aki;

Jaden Bernabela riba bula haltu. Medajista di plata den Carifta Games 2017 na Kòrsou;

Glenka Antonia, Bula haltu femenino. 4e lugá riba bula haltu na Carifta Games 2017.

Preparashon pa Trupial – Auto City Classic 2017 dia 7,8 i 9 di juli ta den ful preparashon.

RESULTADO DI KOMPETENSIA PRE-SELEKSHON PA NACAC AGE-GROUP CHAMPIONSHIP NA TRINIDAD

WILLEMSTAD– Nos muchanan a demostra nan tremendo potential durante di otro kompetensia di atletismo ku a tuma lugá durante di e fin di siman tras di lomba. E enkuentro aki tabata pa determiná primeramente ken lo bira e mihó nan di Kòrsou pa bai representa nos bandera durante e kampeonato di NACAC Age Group Championship ku lo tuma lugá dianan 17 i 18 di yüni na Trinidad. Banda e esaki e kompetensia a sirbi pa saka e mihó altletnan ku lo por kompetí den kampeonato lokal di atletismo riba dianan 24 i 25 di yüni proksimo

E kompetensia a desaroyá di forma tremendo i e publiko presente por a disfruta di atletismo di kalidat. Nos atletanan a marka diferente resultado impreshonante, kaminda e atleta Matthew Kurt Sophia (14) di e ekipo di The Glory Runner ta pone un marka nashonal nobo di 11.57 sec. riba 80 meter ku obstakulo. Kurt sigur ta un di nos gran talentonan ku Kòrsou i mundu henter lo por sigui tende di dje.

Awor e preparashon di nos atletanan pre-selekta lo mass intensivo pa asina pa nos atletanan ta mihó prepara pa saka kara di nos dushi Kòrsou.

Athunto e resultado di e mihonan den kada kategoria.

Event # 1 GIRLS 7-8 U-9 CAC Quadrathon

Names                Bib#    Age    Team    Points

1 Balentien, Keona         368     8     TNR     1081pts

2 Martis, Tahirah         334     8     EAG     1068pts

3 Merencia, Raymelienne     274     8     TRU     1045pts

 

Event # 6 BOYS 7-8 U-9 CAC Quadrathon

Names                Bib#    Age    Team    Points

1 Rijke, Davey-Jay         283     7     TRU     1496pts

2 Abath, Giovany         337     8     SPA     1264pts

3 Barbara, Jayvean         345     7     SPA     1220pts

 

Event # 11 GIRLS 9-10 U-11 CAC Quadrathon

Names                Bib#    Age    Team    Points

1 Lemmens, Zaila         199     10     TNR     1828pts

2 Franse, Zsa-zsa         198     9     TNR     1688pts

3 Lacroes, Deyoni         147     10     EAG     1612pts

 

Event # 16 BOYS 9-10 U-11 CAC Quadrathon

Names                Bib#    Age    Team    Points

1 Antonia, Aryan         42     9     OLY     1667pts

2 Fahnbulleh, Adama         241     10     TRU     1650pts

3 Alfonso, Maxim         41     10     OLY     1483pts

 

Event # 21 GIRLS 11-12 U-13 CAC Pentathlon

Names                Bib#    Age    Team    Points

1 Isabella, Mehaydi         255     11     TRU     2192pts

2 Casper, Mariendely         223     12     TRU     2097pts

3 Mathilda, Joella         269     11     TRU     1923pts

 

Event # 27 BOYS 11-12 U-13 CAC Pentathlon

Names                Bib#    Age    Team    Points

1 Daal, Rhytemsley         228     12     TRU     2631pts

2 Ignecia, Rodiensly         254     12     TRU     2588pts

3 Faneyte, Savir         243     12     TRU     2527pts

 

Event # 33 GIRLS 13-14 U-15 CAC Heptathlon

Names                Bib#    Age    Team    Points

1 Mercera, Vanessa         273     13     TRU     3751pts

2 Diaoen, Liana         47     13     OLY     3519pts

3 Benita, Joanna         83     14     SPA     3499pts

 

Event # 41 BOYS 13-14 U-15 CAC Heptathlon

Names                Bib#    Age    Team    Points

1 Sophia, Matthew Kurt    190     14     TGR     4678pts

2 de Pool, Quinton         101     14     SPA     4109pts

3 Daal, Dayveno         227     13     TRU    3893pts

Fecha Adishonal pa Benta di Karchi Flow Carifta Games 2017

WILLEMSTAD — Manera ta konosí, Kòrsou ta organisadó di e Flow Carifta Games 2017. E evento di atletismo mas grandi di Caribe, ku ta tuma lugá di dia 15 pa 17 di aprel 2017 próksimo.

Mirando e interes kresiente pa kompra di karchi, a disidí ku lo brinda e oportunidat na pueblo di Kòrsou, pa kumpra karchi djabièrnè awor 14 di aprel (Djabièrnè Santu) tambe. Esaki lo ta posibel únikamente na SDK, i e orario ku por hasi esaki ta entre 10’or di mainta pa 3’or di atardi. E preisnan ta varia entre 9 i 20 florin, i kòrda tambe ku den e sekshonnan general, tur mucha bou di 13 aña ta drenta grátis, basta nan ta kompañá pa un adulto.

Durante e dianan aki por sigui kumpra karchi normalmente na e puntonan di benta ku ta “24 uur uit de muur”, “Mensing’s Caminada” i “Samsom”. Na SDK tambe bo por kumpra karchi den oranan di ofisina na e lokètnan usual di SDK. Tuma bon nota ku despues di ora di ofisina tambe bo por kumpra bo karchi na SDK, pero lo bo mester hasi esaki na e bar ku ta situá den e patio di SDK.

Nos atletanan ta konta ku e sosten di nos kada un, manera un bon yu di Kòrsou.

‘Kickoff’ Flow Carifta Games 2017

WILLEMSTAD — Manera ta konosí, Kòrsou ta organisadó di e Flow Carifta Games 2017. E evento di atletismo mas grandi di Caribe, ku ta tuma lugá di dia 15 pa 17 di aprel 2017 próksimo.

Durante fin di siman último, djasabra pa ta mas eksakto, e komishon organisadó (StOA) di e Carifta Games 2017 di forma ofisial a organisá un tremendo ‘’Kickoff’, kual a duna inisio di forma ofisial na e siman di aktividatnan pa loke ta Carifta Games 2017. Un kantidat di invitado tabata presente den stadion Ergilio Hato na SDK, pa a presensia e aktividat aki. E aktividat a kuminsá ku e parti di kantamentu di nos himno nashonal kompañá pa e hisamentu di nos bandera. Seguidamente e presidente di e komishon organisadó ku ta Sr Igor Cijntje a hiba palabra na tur presente i a sigui un kantidat di aktividat programa riba e dia aki. Presidente di CAB, Sr Willem Cordilia, a hiba su disertashon na esnan presente i a gradisí tur esnan enbolbí den e realisashon di e gran evento aki. Tabata interesante tambe pa a duna rekonosementu na e diferente patrosinadornan ku a kontribuí en grandi pa e aktividat aki por a tuma lugá.

Nos minister di enseñansa Sra Maurina-Esprit-Maduro tambe a hiba palabra durante di e aktividat aki rekordando su periodo komo atleta. Un parti sumamente emotivo i importante tabata e huramentashon di e atletanan. E atletanan Kamese Halstead i Jaden Bernabela tabata esnan ku a huramentá na nòmber di e atletanan i despues a sigui e parti di entrega di e bandera di Kòrsou ku e delegashon lo kana kuné durante e desfile di apertura. Esaki a keda entregá di parti minister di enseñansa Sra Maurina-Esprit-Maduro na e atletanan Kamese Halstead i Jaden Bernabela. A hasi uzo tambe di e aktividat aki pa e fundashon StOA firma un akuerdo ku e Fundashon FDDK. Tabata Sr. Thakai Doran (FDDK) huntu ku Sr. Igor Cijntje (StOA) ku a firma e akuerdo aki. Despues di e parti ofisial tur esnan presente por a disfrutá un ratu ameno ku otro i por a tuma nota tambe di e reparashonnan i ahustenan ku a keda apliká na stadion Ergilio Hato. Pues ofisialmente nos a drenta e siman krusial i awor ta toka turno na e pueblo di Kòrsou ku mester sostené i apoyá nos atletanan durante e dianan 15, 16 i 17 di aprel próksimo.

Nos ke rekordá un i tur ku por kumpra karchi na e puntonan di benta ku ta “24 uur uit de muur”, “Mensing’s Caminada” i “Samsom”. Na SDK tambe por kumpra karchi den oranan di ofisina na e parti kaminda e bar ta situá.

E preisnan ta varia entre 9 i 20 florin, kaminda mucha bou di 13 aña por drenta grátis, basta nan ta kompaña pa un adulto.

Nos atletanan ta konta ku e sosten di nos kada un, manera un bon yu di Kòrsou.

Klup Di Atletismo Trupial – Autocity A Invitá 2 Kampion Olímpiko Di Cuba Pa E Festival Di Relevo 2017

WILLEMSTAD — Dia 7, 8 i 9 di yüli próksimo klup di atletismo Trupial – AutoCity ta organisá e di 25e Trupial – AutoCity Classic/Refineria Isla Festival di Relevo 2017 den stadion di SDK. Komo atrakshon pa e evento i e atletanan ku ta bini e evento, tur aña Trupial – AutoCity ta invitá un èks atleta olímpiko òf un entrenadó internashonal, pa duna un charla o training na e atleta nan ku lo partisipá na e evento. E aña aki e dirigentenan di Trupial – AutoCity a logra invitá 2 gigante for di Cuba:

  1. Lisensiado Maria de Caridad Colon Ruenes, promé hende muhé di latino kampion olímpiko riba tira sper. Tambe miembro di komishon di atleta hende muhé internashonal di IAAF.
  2. Javier Sotomayor Sanabria kampion olímpiko i ainda ku rekòr mundial riba bula haltu ku un haltura di 2.45m.

Ámbos estrea deportivo di Cuba i di mundu, lo ta na Kòrsou pa duna un charla riba hende Muhé den deporte i klínika di tira sper i bula haltu na nos atleta i entrenadó nan di Kòrsou.

Tambe klup Trupial – AutoCity a logra haña un tim di Master i un hubenil di Santo Domingo pa bin partisipá na evento di 2017. Ku partisipashon di Santo Domingo den 2017  e paisnan internashonal ku ta partisipá ta bira 9. Ku Kòrsou aden ta bira 10. Ya nos tin konfirmashon di Puerto Rico, Sint Maarten, Trinidad & Tobago, Sùrnan, Colombia, Jamaica, Aruba, Boneiru i tur klup di atletismo di Kòrsou. Despues di e magno evento di Flow Carifta Games 2017 aki na Kòrsou dia 15 pa 17 di aprel próksimo, lo bini un konferensia dia prensa, den kual lo duna tur informashon di e diferente aktividatnan ku ta bai tin henter siman. For di dia 2 di juli dia di bandera ta kamisa ku e relevo di flambeu pa bai kaba na Brion Plein, te ku 9 di juli ku un mini máratòn o kaminata di 5 km den Punta. Keda pendiente.

Kòrsou ku delegashon di 39 atleta den Flow CARIFTA Games 2017

WILLEMSTAD — Manera ta konosí, Kòrsou ta organisado di e Flow Carifta Games 2017. E evento di atletismo mas grandi di Caribe, ku ta tuma lugá di dia 15 pa 17 di aprel 2017 próksimo.

Un kantidat di 39 atleta ta forma parti di e delegashon di Kòrsou pa CARIFTA 2017. E kuerpo di coachnan di federashon di atletismo, CAB, enkabesá pa coach Rudsel van Lamoen, riba djaluna 19 di mart a sinta pa evaluá e resultadonan registrá entre prinsipio di desèmber 2016 te ku fin di siman di 18-19 di mart último.

A base di e prestashonnan a selektá un kantidat di atleta huntu ku esnan ku a logra e marka mínimo, pa disidí kua ta e atletanan ku lo kompetí dianan 15-16-17 di aprel dilanti di nan mes públiko.

Entre e trintinuebe atletanan ta figurá 3 hóben ku lo bini for di Hulanda. T’asina ku den añanan resien tabata un kustumber ku ta selektá atleta yu di Kòrsou òf nasé na Hulanda ku mayor(nan) yu di Kòrsou pa kompetí pa nos pais. Ademas di e atletanan for di Hulanda, lo bini tambe 2 coach ku lo duna klínika di ‘pole vault’ i ‘hurdles’ na coach i atletanan lokal. Un di e coachnan, Hans Coolen, lo forma parti di e team di coach di Kòrsou pa coach e atleta Glenn Kunst den Carifta, konsiderando ku lokalmente no tin coach ku ta dominá e disiplina di ‘pole vault’.

Den próksimo dianan nos komunidat lo tende i lesa hopi di nos atletanan, kendenan ku gran orguyo lo karga bandera di Kòrsou na laria den Carifta.

Atleta Disiplina Kategoria
Nashwena Jonge 100 / 200m / 4×100 U-18
Joachima Jonis 100 / 200m / 4×100 U-18
Jeannery Wederfoort 400m / 4×100 U-18
Tanisha Dall 400m / 4×400 U-18
Maysoun Juliana 800m / 4×400 U-18
Shurianty Mathilda 800m / 4×400 U-18
Krishona Juliana Long / triple jump U-18
Kamese Halstead Shot put U-18
Gianisa Olbino Shot put / javelin U-18
Rishmylady Felicia 4×100 U-18
Keyla Sambo 4×400 / Res. 800 U-18
Joanna Benita 4×100 U-18
Qyone Antersijn 800 / 1500 U-20
Glenka Antonia High / long jump U-20
Kemisha Halstead Discus U-20
Joshua Bekman 100 / 200m / 4×100 U-18
Elgemar Laker 100 / 4×100 U-18
Aldrich Jack 200 / 400 / 4×100 U-18
Andrew de Pool 800 U-18
Jordan Philbert 400 / 800 U-18
Jaden Bernabela Long / high jump U-18
Tahir Boeldak Shot put U-18
Daniel Balentina Discus / shot put U-18
Isan van Lamoen Discus U-18
Nattaniel Koomen javelin U-18
Kgevin Kook Javelin / high jump U-18
Suehandric Paulina 4×100 U-18
Arjelison Damoen 4×100 U-18
Jean-Andre Denisia 100m /4×100 U-20
Gedyonne Augusta 200m / 4×100 U-20
Shuraimy Bito 100 / 200 / 4×100 U-20
Germain Jansen 400m U-20
Ramsey Angela 400 / 400H / 4×100 U-20
Elmer Pieter 800/1500 U-20
Yohance Valks 1500/5000 U-20
Daan de Grauw Long / high jump U-20
Georgegino Eisden Shot put U-20
Glenn Kunst Pole vault / discus U-20
Shaquille Boeldak 4×100 U-20
Ofisialnan
Rudsel van Lamoen Head coach
Wendell Prince coach
Nephtaly de Boer coach
Luis Varona Moret coach
Johannes Coolen coach
Mercedes Daantje Hefe

AV Sparta kla pa sostené CURADOET boluntariamente

WILLEMSTAD — Djasabra próksimo atletanan, dirigentenan i mayornan di e tim di atletismo AV Sparta ta partisipá na un di e proyektonan di CURADOET.

E famia di AV Sparta lo ta huntu ku empleadonan di Domeinbeheer na Sta. Familia School for di 8or di mainta pa fèrf e lokalnan di e skol parti paden.

Esaki ta prome? biaha ku AV Sparta ta partisipa? na CURADOET i ta kombensi? ku lo no ta e u?ltimo biaha. Partisipando na un aktividat asina aki, e tim di atletismo AV Sparta ta konsientisa? primeramente e atleta, pero tambe e mayor i e famia di AV Sparta den su totalidat ku ta importante pa por yuda? boluntariamente na bienestar di nos komunidat. Ademas Sparta ta eduka? e ho?bennan tambe ku hopi biaha komunidat ta aporta? na nos atletanan kumprando un karchi di fundraising o ta hasi donashon balioso pa nos atletanan por sea partisipa? den kompetensianan den eksterior o pa yuda na ve?lt; Partisipando na CURADOET e atletanan ta duna bek na komunidat.

Pues, aparte di ta train i guia e atletanan riba ve?lt pa ku e deporte di atletismo, semper AV Sparta a sa di kontribui? na formashon sosial i edukativo tambe di su miembronan.
For di aki, AV Sparta ke kurasha? mas organisashon deportivo i/o hóbennan pa djo?in CURADOET i aporta? positivamente na nos Komunidat.