Prospekto Nasya Ramirez no por partisipá mas na Flow Carifta Games 2017

WILLEMSTAD — Manera ya kaba konosí, Kòrsou ta organisadó di e Flow Carifta Games 2017. E evento di atletismo mas grandi di Caribe aki, lo tuma lugá di dia 15 pa 17 di aprel 2017.

Tin un grupo grandi di atleta hóben di Kòrsou, ku ya ta preparando pa un periodo largu pa e Carifta Games. Lamentablemente e Asosiashon di Atletismo (C.A.B) huntu ku e Komité Organisadó (StOA) ta partisipá ku e prospekto Naysa Ramirez no por partisipá mas pa motibunan médiko ku a presentá na un momento inesperá. Nasya ta un talento enorme den e disiplina bulamentu leu, i tabata nominado pa atleta di aña 2016.

Representante di e organisashonnan menshoná a bishitá Naysa resientemente na e kinderafdeling di SEHOS, i a desey’e un pronto rekuperashon.

E embahador di Carifta Games, sra Ruthline Koeiman, tambe a bishitá Naysa.

Nos ta deseá Nasya un pronto rekuperashon, i hopi mas éksito ku su karera deportivo.

Klup di atletismo Trupial – Auto City a regresá Kòrsou ku vários premio for di Puerto Rico

WILLEMSTAD — Djadumingu 5 di mart último klup di atletismo Trupial – Auto City a regresá for di Puerto Rico ku vários medaya. Ku un delegashon di 17 atleta di 6 pa 13 aña nan a gana 12  medaya di oro, 8 di plata i 5 di bròns. Ku esaki e delegashon a sali na di dos lugá komo ekipo i a gana un bunita Trofeo.

Na aeropuerto e delegashon a wòrdu risibí pa presidente di klup Trupial – Auto City, Ruthsel Martina, 2e sekretaria i vários mayor i famia di e atletanan. Tabata un momento di alegria ora e atletanan infantil a sali for di e porta di yegada. Pa vários di e atleta nan aki ta pa promé bia nan a bai un kompetensia internashonal.

Delegado Aishel Florentina tabatin bon palabra pa ku kompensashon di e atletanan. Tur mayor ku a bia ku e delegashon a duna un bon man i e ekipo di Cupey Track a trata nan hopi bon. Coach Sheldon Drummond tabatin palabra di elogio pa e atletanan ku a hasi nan bèst mei mei di e atletanan di Puerto Rico.

Tabatin 15 ekipo di Puerto Rico, 1 di St. Croix i 1 di Kòrsou pa un total di 17 ekipo ku a partisipá na e kompetensia aki. Direktiva, i mayornan ta felisitá e ateistanan aki i ta spera ku nan lo sigui ku mis un ánimo den nan deporte stima, atletismo.

Atletanan Lokal ku lo Partisipá den Flow Carifta Games 2017 a Realisá un Tèst Médiko

WILLEMSTAD — Manera ta konosí, Kòrsou ta organisadó di e Flow Carifta Games 2017. E evento di atletismo mas grandi di Caribe, ku ta tuma lugá di dia 15 pa 17 di aprel 2017 próksimo.

Awe djadumingu 5 di mart, pa 8.30 mainta, un grupo di 34 hóben atleta di Kòrsou, ku ya ta preparando pa un periodo largu pa e Carifta Games, a pasa un tèst médiko. Ta asina ku tur e hóbennan ku lo partisipá na e Carifta Games i esnan ku ta tratando pa klasifiká pa por partisipá, mester a presentá na ofisina di Dokter van de Huls na Mahaai, pa asina realisá un chekeo médiko kompleto.

Representante di e organisashon di Carifta 2017, huntu ku mayornan di e 34 hóbennan, tabata presente pa wak kon tur kos ta kana ku e chekeo médiko. A trata aki di un chekeo médiko basta profundo, unda ku a a kontrolá e parti físiko i mental di kada atleta i asta a kue muestra di sanger pa manda laboratorio. Durante e mainta aki mes a tèst e hóbennan pa uso di droga tambe i tur nos atletanan tabata limpi. Tur atleta mester a yena un formulario unda nan ta indiká si nan ta sufri di kualke malesa i si nan ta usando kualke tipo di remedi (Pa kontrolá i evitá ku nan lo ta usando kualke supstansia prohibí).

Meskos e kuerpo médiko a kontrolá e hóbennan riba nan fleksibilidat i posibel leshon i kaminda tabatin mester a rekomendá e tratamentu nesesario. Mester remarká ku tur kos a kana hopi bon i un danki spesial ta bai na e kuerpo médiko i spesialmente na Dòkter van de Huls ku a kooperá ku nan lokalidat i nan konosementu, pa a realisá e chekeo médiko aki di nos atletanan. Meskos un danki na tur mayor i nos atletanan ku a sòru di ta na ora pa e programa por a kana segun planiá.

Klup di atletismo Trupial – Auto City a biaha pa Puerto Rico

WILLEMSTAD — Djárason 1 di mart klup di atletismo Trupial – Auto City a realisá un biahe pa Puerto Rico kaminda su atletanan infantil di 6 pa 13 aña lo kompetí den e di 16e kompetensia “Invitacional Atletismo Cupey Track 2017” djasabra awor 4 mart riba e pista Complejo Deportivo de Cupey Alto den Municipio de San Juan.

E kompetensia aki ta forma parti di e maneho di klup di atletismo Trupial – Auto City di kual tur aña nan ta organisá un òf mas interkambio deportivo den un pais den nos área. E tipo di interkambio aki a demostrá ku e ta duna un empuhe na mehorashon di resultado di su atletanan. Tur atleta di Trupial – Auto City ku e bira bon atleta a pasa den e trayektorio aki.

E delegashon ta konsistí di 17 atleta 2 lider/coach i 11 mayor ku lo yuda guia e atletanan aki. Mayoria di e atletanan aki ta kompetí pa promé bes den eksterior. E klup Cupey Track di Puerto Rico ta e promé klup ku a kuminsá 24 aña pasa ku interkambio aki i ámbos klup ta mira su probecho.

Di otro banda partisipashon na kompetensia nan den otro pais ta stimulá e klupnan aki pa bin partisipá den e kompetensia internashonal di Trupial – Auto City ku ta Trupial – Auto City Classic i Festival di Relevo. E aña aki e kompetensia lo tuma lugá dia 7, 8 i 9 di Juli den SDK. Ya tin 7 pais ku a konfirmá nan partisipashon kaba.  Dirigentenan di Trupial – Auto City ta trahando riba 2 pais nobo pa 2017.

E kompetensia di Trupial – Auto City Classic pa 2017 lo ta e di 25e edishon i tin kos nan grandi na kaminda. Ta verwacht un partisipashon grandi di e klupnan invitá. Direktiva, mayor, i rumannan di e atleta ku a bai Puerto Rico ta deseá nos atleta nan tur klase di éksito. E delegashon lo regresá Kòrsou bek djadumingu 5 mart.

Diferente Billboard pa Promove Carifta Games 2017 a Keda Instala

WILLEMSTAD — Den kuadro pa promové e evento deportivo, Carifta Games 2017, e komité organisadó “Stichting Organisatie Atletiek Evenementen” (StOA), a logra haña koperashon di algun instansia pa promové e evento i nos atletanan, riba diferente ‘billboard’ ku ta situá na diferente sitio kantu di nos kareteranan di Kòrsou. Algun di e sitionan ku ya por apresiá e promoshon aki ta na Palu Blanku, Santa Rosaweg, Caracasbaaiweg i den SDK mes. Si tin kualke instansia ku ke koperá i ke yuda promové e evento pa medio di spònser un ‘billboard’ òf ke sede un espasio pa nos por publiká algu di Carifta Games 2017, nan por hasi esaki libremente via di “Stichting Organisatie Atletiek Evenementen” (StOA), yamando señora Virginia Evers-Kleinmoedig na e number di telefòn 5103612 òf por tuma kontakto tambe mandando un ‘email’ na marketing@carifta2017.com .

Nos ke asentuá tambe riba e inskripshon pa boluntarionan i patrosinadornan pa e ‘Carifta Games 2017’, ku por hasi esaki via e wèpsait di e organisashon (www.carifta2017.com). E komité organisadó ta hasi un yamada na un i tur ku di bèrdat ta interesá pa duna un man, pa inskribí mas pronto posibel i asina duna un sosten na e weganan. Carifta Games 2017 lo tuma lugá e fin di siman di Pasku di resurekshon den Sentro Deportivo Kòrsou (SDK) na Kòrsou.

Carifta games” ya pa años ta ser konsiderá komo e kuna di e futuro kampionnan olímpiko di e aria di Karibe. Un ehèmpel klásiko di esaki ta e atleta Usain Bolt, ku te ainda, ta esun ku tin e rèkert riba 200 meter den Carifta Games. Un kantidat promedio di 450 atleta, prosedente di e area di Karibe, ta partisipá anualmente na e weganan aki.

Por sigui tur informashon i detaye pa loke ta e preparashonnan i tambe desaroyonan di e ‘Carita Games 2017’ via nos wèpsait www.carifta2017.com.

Freewinds ta dona buki edukativo na presidente di klup di atletismo Trupial

WILLEMSTAD — Den kuadro di nan kontribushon pa un bon desarojo di hubentut di Korsou, Port Capitan di e barku Freewinds Ken Webber a hasi entrega di algun buki edukativo na presidente di klup di atletismo – Auto City Trupial Ruthel Martina pa reprarti bou di nan miembronan. Ja e organisashon di Trupial – Auto City a disfurta di e temanen den e buki riba un CD na ingles. Awor a saka e boki “E Kaminda pa Felisidat” na papiementu.

E video a wordu trata na un kampamentu di entrenamentu ku Trupial tabatin na anja 2015, ku ta traha diferente tema ku e hoben i adulto mester sa pa tin un miho bida. Sigun Ruthel a kompronde ku polis Colombiano tin un aporte grandi den realisashon di e boki aki, kual a wordu usa den diferete bario na Colombia. Por bisa ku e barionan aki a bira hopi mas trankil ku menos violensia bou di e hubentut. Ruthsel Martina ta rekomenda tur organisashon di Korsou pa aseka Freewinds (tan ten tin na stok) pa risibi gratis algun di e boki aki i tratanan bou di boso miembronan. Direktiva, miembronan i nan mayornan ta gradisi Freewinds pa e bunita gesto aki.

Kambio di fecha pa APC Run & Walk 2016

WILLEMSTAD — Relashoná ku e pasamentu di tormenta/ orkan Matheeu djabièrnè awor, direktiva di klup di atletismo Trupial a postpone e kareda/kaminata APC Run 2016 pa djadumingu 16 di òktober próksimo. Start I final ta keda mis kos na e luga di stashoná outo di SSK na schouburweg 44.

Inskripshon via internet ta sigui riba https://runsignup.com

Inskripshon físiko lo tuma lugá dia 10 pa 14 òktober na edifisio di APC, Kooyman Zeelandia I Auto City Salinja durante ora di trabou. Tur hende ku a inskribí kaba por pasa ku nan karchi i tuma nan T-shirt riba e fechanan aki na edifisio di APC na Schouwburgweg.

Kareda/Kaminata APC Run 2016

WILLEMSTAD — Despues di a solushoná algun problema chikitu, entre otro e kandela ku a surgi na Sentro Pro Arte tur kos ta kla pa nos ranka sali ku e di 14e Kareda/Kaminata APC Run 2016.

Informashonnan i Kambionan mas importante ta lo siguiente:

  1. E evento ta start i kaba riba e lugá di stashoná outo di SSK Schouburgweg 44. Djis serka di Sento Pro Arte.
  2. E ruta ta keda mesun kos. E start i e final so ta skùif
  3. Registrashon ta kuminsá for di 5’or di mainta, riba e lugá di stashoná outo di SSK
  4. E kaminata di 5 i 10 Km ta start 6 or di mainta.
  5. Tin 3 pòst di awe. na 3 Km. ( Kentucky saliña) 6 km.(Centrum Supermarket) i 9 km. (Snipweg promé ku krusada na Biesheuvel).
  6. E kareda di 5 i 10 k ta start 6.30 riba mes un ruta.
  7. E kareda di e muchanan ta start 7.30 un tras di otro.
  8. Premiashon ta tuma lugá 9.00 ‘or  na mes un sitio.

Inskripshon a start:

  1. Djaluna 26 sèptèmber te djaweps 8.30 – 17.00 na edifisio di APC, Schouwburweg
  2. Djaluna 26 sèptèmber te djaweps 8.30 – 17.00 na kantor di Auto City, Saliña.
  3. Djamars 27 sèptèmber di 17:00 – 19:00 na SDK na entrenamentu di Trupial klup
  4. Tur dia te ku djabièrnè 30 sèptèmber 8 or di anochi via internèt na https://runsignup.com/Race/Register
  5. Djasabra 1 òktober di 09:00 – 17.00 na lugá di stashoná outo di SSK.
  6. Esaki ta únikamente pa esnan ku ta kana liber. Inskripshon pa e kompetensia di kana òf kore ta sera via internèt djabièrnè 8’or di anochi.

Pa mas informashon por yama Ruthsel Martina na telefòn 5615236

Gerensia di Auto City a pone un outo na disponilidat di e atleta Liemarven Bonivacio

WILLEMSTAD — Komo gesto pa e logronan di nos atleta yu di Korsou Liemarven Bonivacia den 2016, direktor di Auto City Sr. Frank Dorego, ku interveshon di Sr. Ruthsel Martina presidente di klup di atletismo  Trupial – Auto City, a pone un outo disponibel pa e atleta kore pa e dianan ku e ta na Korsou.

E petishon aki a  bini dor di Sr. Thakai Doran direktor di FDDK ku huntu ku UTS a bin ta realisa un kampaña di promoshon pa Liemarven komo un atleta modelo pa nos hubentut.

Den 2016 Liemarven a partisipa na Wega Olimpiko bou di Bandera Hulandes i a kore e prome  400m den  45.49 sekonde. Den semi-final e la koré den 45.03 sekonde. Un siman despues e la sali na di 3e luga den Diamontligue na Lousant. Awor Liemarven lo bai sigiu su preparashon pa 2017 na Puerto Rico. Liemarven a kumisa su entrenamentu di atletismo den e ekipo di Trupial – Auto City.

Despues e la bai sigi su estudio na Univerisidat Une na Puerto Riko. Awor e ta kore bou di Bandera Hulandes.

Auto City ta desea Liemarven tur klase di eksito den su karera deportivo pa futuro.