E. Evertsz, redaktor pa Deporte Awe

February 24, 2016

Andruw Jones ta drenta Salon di Fama di Atlanta Braves

MERKA — E ekipo di Atlanta Braves a anunsia ku nan lo admiti Andruw Jones den Salon di Fama di e ekipo. Esaki lo sosode dia 19 di ougustus durante di e seremonianan prome ku e partido kontra Washington Nationals. Huntu ku Andruw, presidente di Atlanta Braves John Schuerholz tambe lo keda admiti den Salon di Fama di e ekipo.

Andruw tabata un di e miho outfieldernan den historia di Atlanta Braves. E pelotero di Korsou a keda firma na aña 1993 pa e ekipo i ya na ougustus di 1996 e pelotero a debuta den Liga Grandi. Dos luna despues, Jones a bira e pelotero di mas hoben ku a konekta honron den Seri Mundial ora ku e la konekta dos honron den e Seri Mundial di 1996 kontra New York Yankees.

Durante di su 12 temporada ku Atlanta, Andruw a gana 10 Wante di Oro konsekutivo i a keda nombra pa e ekipo di Tur-Strea na sinku okashon. Adishonalmente, den 2005 e la gana e premio di Silver Slugger, Hank Aaron Award den Liga Nashonal i tambe hunga di Liga Grandi di aña. Jones a finalisa su karera di Liga Grandi ku 1933 hit, 1289 kareda empuha i 434 honron.

February 24, 2016

Djadumingu awor “Real Street Legal y Real Street Outlaws 2016”

WILLEMSTAD — FAC y su Komishon Organisadó ta yama pueblo, fanátiko i koredornan masha danki pa e respòns duna nos aktividat nan di 2015. Ketu bai ta sigui drenta reakshon nan positivo tantu lokal komo internashonal rondó di nos aktividat nan. Y e aña aki ta selebrashon di 45 aña Drag Racing aki na Kòrsou i 20 aña Curaçao International Raceway na Ronde Klip.

Djadumingu awor 28 di febrüari 2016 lo bai tin e di promé aktividat di 2016, ku ta forma e total di 9 aktividat pa e aña aki di “Real Street Legal”, RSL.

Reglanan

Vehíkulo mester tin “keurings kaart” / karchi di kùr pa por kompetí.

Street tires y SEMI slicks lo wòrdu aseptá. E tire mester tin grove ( liña ) pa por kore den awa! Pues si bo no por kore den áwaseru kuné, e no ta legal!

Motosaikel nan mester tin e vestuario apropiá. (full pak, sapatu, hèlm) y ta riba Street Tires òf riba Semi Slicks.

Scooter nan mester tin hèlm I ta konsehá un jacket.

Lo konsehá tur driver / shofùr ku ta kore bou di 13.99 pa bisti hèlm.

Pa 16.45 / 4.45 di atardi tur koredó ku ta partisipá ku e lista di e mihó 10 nan, mester ta presente i pa pasa nan challenge / reto pa e “Race Master”, pa asina ku ta 17.00 / 5’or kuminsá ku e “Match Race” nan.

Pe eventonan aki LO NO PONE TRACTION COMPOUND! Entrada general ta Ang. 5,= pa Adulto i mucha bou di 12 aña ta kontribuí ku Ang. 1,=.

Pa e promé aktividat aki tur outo lo kore pa registrá nan mihó tempu pa asina nan subi di puesto riba e lista nan di e kategoria basa riba e tempu nan ku nan e registrá. Pues e vehíkulo ku mihó tempu lo subi nan number 1 i basa di e tempu lo sigui riba e lista te ku number 10.

2016: KAMBIONAN PE SEKSHON DI “REAL STREET OUTLAWS”

OUTONAN: lo wòrdu parti den 2 kategoria

HEAVY STREET: outonan ku ta kore bou di 13.99 sekònde: < 13.99
EASY STREET: outonan ku ta kore riba 14.00 sekònde: >14.00
EASY STREET OUTO: e outonan ku ta kore Challenges, lo kore HEADs UP, pero ku e BREAKOUT RULE. Si nan kore mas lihé ku 14.00 nan ta pèrd’é. Outomátikamente nan ta bai over pe kategoria HEAVY STREET

POINT SERIES:

Lo otorgá punto n’e TOP 10 di kada kategoria (inkluyendo bikes)
1e logá lo haña 100 punto, 2 à 9, 3 à 8, 4 à 7, 5 à 6, 6 à 5, 7 à 4, 8 à 3, 9 à 2, 10 à 1
Best Reaction Time / Mihó Reakshon na Lus: den kada kategoria lo otorgá 10 punto p’e vehíkulo ku den e Challenges pone e Best RT.

LANES: e outonan ku lo kore Challenges mester para riba lanes #1 y #2 n’e staging lanes; e Bikes mester ta riba lane #4.
Lanes # 3 ta keda pa e outo nan ku ta keda kore pa nan propio training.

Challenge nan di “Real Street Outlaws” lo bai sigun orario. Lo tin 3 buèlta kuminsando pa 5’or (17:00). Pues pa 5:00PM (17:00) ta start ku e promé buèlta , di dos buèlta ta 6.00PM (18:00), di tres y último buèlta pa 7.00PM (18:00) Den e 3 buèlta nan aki ta kore 5 challenge/reto pa kategoria. Pues pa 5:00PM lo kore 5 kareda (challenges) di motosaikel y 10 kareda (challenges) di outo: 5 HEAVY STREET y 5 EASY STREET. Esaki ta ripití riba tur e otro orarionan ku lo sigui. A hasi esaki pa usa e tiki tempu ku nos tin mas mihó, I no stroba esnan ku no ta partisipá ku RSO.

Lo bai pone un bòrchi disponibel pa e koredó nan den e kategoria di RSO, pa por wak kua ta nan siguiente kareda òf challenge/reto, I ken ta na kua posishon. E lista aki lo wòrdu updated kada bes durante e evento.

Lo bai harma bari mas o ménos for di e bògt di staging lane pa indiká e outo nan motosaikel nan den RSO pa nan ta den e liña korekto pa kore e challenge/reto nan.

Regla pa skùter:
Skuter nan ku ke kore anochi MESTER tin LUS PATRAS!

E evento nan di RSL lo keda organisá mané ta kustumber di 4’or te ku 8’or di anochi. Durante e evento, despues di 5’or lo kuminsá ku e karedanan di e lista di e mihó 10 nan. Koredornan ku no ta partisipá den e lista di e mihó 10 nan, por keda kore te ora solo baha. Meta di e lista di e mihó 10 nan aki ta pa tin e 10 vehíkulonan di mas lihé AKTUALMENTE den kaya! Na final di temporada lo tin un entregá di trofeo na e final evento pa e 1 ku di 2 di kada kategoria. Pues nos ta bai kore e 10 mihó outo nan, e 10 mihó motosaikel nan I e 10 mihó scooter nan.

Prosedura

Na yegada tur koredó ta haña un formulario di inskripshon yena, òf ta wòrdu yena pa nan.

Pa 5’or e “Race Master” lo yama tur esnan ku tin ku kore pa presentá den e staging lane apropiá pa 10 “Match Race” nan.

Drivers / Shofùr nan no por ninga un challenge / reto di un otro driver / shofùr. Si ninga ta pèrdè e puesto outomátikamente

“Race Master” ta prepará e kareda nan di ken kontra ken.

Na momentu ku “Race Master” tin e kareda kla di prepará, tur koredó ta haña 3 yamada separá dor di 2 minüt pa presentá na liña. Esun ku no presentá / “No show up” ta pèrdè e / su puesto di e momentu ei!

“Coin flip” lo dikta ken tin “lane choice”.

Tur match / kareda ta 1 race. Win / loose.

Subi òf Move riba e lista di e mihó 10 nan:

Pa subi e lista di e mihó 10 nan mester challenge / reto e “GATE KEEPER” (#10). Esaki por tin múltiple challenge / reto riba un dia di kareda. Ta kore e karedanan na sekuensia di esun ku registrá promé na e “RACE MASTER”.

Pa move di puesto riba e lista, MESTER challenge / reta e kontrinkante riba bo ( pues #10 ta challenge / reta #9 etc etc) I pone e “RACE MASTER” na altura di esaki. Mester challenge / reta esun riba bo pa por avansá riba e lista. #10 no por challenge / reta #7 b.v. E mester challenge / reta #9 promé. Gana esei I sigui pa #8. I e ora ei pas e por challenge / reta #7 pa su puesto. “RACE MASTER” tin e lista di tur kareda pendiente.

No por ninga challenge / reto bou di niun sirkunstansia. Si bo no por aseptá, bo ta baha di puesto.

SI bo a pèrdè, bo no por challenge / reta e koredó ei mas pa e puesto ei riba e dia ei. Por hasié na e siguiente evento.

Si e puesto (ban bisa #9) wòrdu okupá dor di un otro koredó (esun ku tabata #9, a gana e #8 ) bo por challenge / reta e driver / shofùr ei (èks #8 aworakí #9), pa e puesto ei ( #9 )den e mesun evento.

Bar y kushina ta bon surti i ku preis nan pa un y tur.

Ta estriktamente prohibí pa drenta e fasilidat nan di Curaçao International Raceway ku propio konsumo. Lo bai na kontrolá tur vehíkulo na entrada pa ku drentamentu ku konsumo di tantu pa kome komo pa bebe.

Danki ta bai na Auto City, ARPO Body shop, EMS Dyno, AVF Antiliaanse Verf Fabriek, Star Motors, Curoil, Monster, Napa Auto & Truck Parts, Alcolado Glasial, Kuzeta, IEPA Agencies ku LS2300.

Pa mas informashon y foto di e aktividat di Real Street Legal, Ronde Klip Shootout, Drag Fest 2016 i kareda nan lokal i internashonal por bishita nos website nan ofisial: www.curacaodrag.com, www.dragactioncuracao.com, www.tcobcur.com, www.adrena-zine.com, www.rpmaruba.com, www.racejunkies.com, www.radicalcompetition.com huntu ku nan página di FaceBook y tambe riba FaceBook like page di BoyzToyz i speedoutlawscuracao.

February 24, 2016

KORSOU TIN 7 ARBITRO MAS BON PREPARA PA FUTURO ARBITRAHE DI BEISBOL

WILLEMSTAD — Sala di ABVO tabata senario djaweps 18 di febrüari na momentu ku árbitronan a festehá graduashon di 7 árbitro mas pa beisbòl.

Curaçao Baseball Development Foundation i Refineria Isla huntu ku Febeko tabata e instanshanan kardinal ku a inisiá reklutamentu i organisamentu di árbitro i anotadonan.

Instruktor Franklin Gijsbertha huntu ku nos árbitronan lokal huntu a analisá i a presentá un plan di mas aña pa reskatá arbitrahe na Kòrsou. E plan aki a trese na bida e organisashon Umpire & Scorers Assosiation Curaçao ( USAC) ku lo bai traha pa trese un fundeshi sólido pa arbitrahe aki na Kòrsou.

E grupo di e 7 árbitronan aki ta un dje promé frutanan di e struktura ku USAC kier trese pa arbitrahe.

Minister Presidente sr. Whiteman den un spich elokuente a indiká den tur sentido di palabra kiko arbitrahe ta nifiká, i ku deporte ta un dje instrumentonan ku hopi ta keda insentivá pa Gobièrnu komo esaki ta baha gastunan den salubridat públiko.

Sr. Gijsbertha di Refineria Isla un biaha mas ku e sosten di Refineria a mustra ku Refineria tin kurashon pa komunidat kargando gastunan di kurso pa krea mas árbitro.

Presidente di Febeko, Sr. Konket, i Distric Administrator di Curaçao Little League a elogiá ku a bin un organisashon pa deal ku e problemanan di arbitrahe den nos beisbòl.

Finalmente Presidente di Curaçao Baseball Development Foundation, sr. Elhage tambe a elogiá esnan ku a traha riba e plan di mas aña i ku tambe a felisitá tur e graduádonan i e promé direktiva di USAC enkabesá pa sr. Roald Gijsbertha.

Kòrsou pabien ku e promé direktiva di USAC i e 7 umpayernan ku a gradua.

February 24, 2016

Inselair Interinsulair 2016 aki na Kòrsou dianan 11 i 12 di mart

WILLEMSTAD — Kòrsou lo ta anfitrion di un selebrashon deportivo e fin di siman di 11 i 12 di mart próksimo. Ya pa algun aña kaba, Aruba, Bonèiru i Kòrsou ta kompetiendo. Aña pasá, FDDK a logra partisipashon di St. Maarten proksimamente despues di a invitá St. Maarten pa un impreshon di e interinsular na Kòrsou. St. Maarten lo kuminsá partisipá na Kòrsou ku aspirashon pa partisipashon na e otro islanan i mas ku klaro, pa e tres islanan kompetí nan St. Maarten tambe.

Deportenan ku lo forma parti di e kompetensia proksimamente ta:

Basketbòl, skol di fundeshi
Vòlibòl, skol di fundeshi i skol avansá mucha muhé i mucha hòmber

Despues di Kòrsou, lo sigui ku e kompetenshanan interinsular na Aruba i tambe Bonèiru na aprel próksimo.

Pues ya bo sa, dianan 11 i 12 di mart Sala Errol Rooi aya na Stadion Ergilio Hato SDK lo ta yená ku hóbennan di e diferente islanan kompetiendo. Entrada ta kompletamente grátis, asina dunando pueblo hinter, speshalmente nos hóbennan e oportunidat pa bai apoyá i atmirá nos hóbennan.

Danki speshal na Inselair, ku ta kere den deporte i ta mira su importansia pa nos hubentut.

Pa keda na altura di tur loke ta pasando i lo pasa durante di Inselair Interinsulair 2016, chèk e página di Facebook di FDDK.

February 22, 2016

Un Dia den Bida: Didi Gregorius

WILLEMSTAD — E ekipo di produkshon di video di New York Yankees tabata na Kòrsou algu dia pasa. Durante nan bishitá nan a produsí un video riba kon Didi Gregorius ta pasa su dia na Kòrsou.

Video kortesia di: New York Yankees / MLB.com

February 19, 2016

Liga MCB Promé i Segundo divishon ta bai kuminsá

WILLEMSTAD — Despues di un tremendo Kampionato aña pasa, FFK i MCB ta anunsiá e gran apertura di Liga MCB Promé Divishon ku ta tuma lugá djadumingu, 6 di mart binidero den Stadion Ergilio Hato (SDK) 6or di atardi.

E dos ekiponan ku lo mira akshon den e gran apertura di Liga MCB Promé Divishon lo ta e ekipo kampion di Liga MCB Promé Divishon 2015, Centro Dominguito i e ekipo di Jong Colombia.

E aña aki Liga MCB ta wòrdu dediká na e siguiente baluartenan; Sr. Ruben Brandborg (eks hungadó), Sr. Edgar Meulens (eks hungadó), Wilbert Martijn (eks hungadó), Sr. Keneth Brigitha (rèfri) i Sr. Erwin Rekondi (eks dirigente). E persona nan aki ta tin un kontribushon enorme na e desaroyo di e deporte rei, futbòl. P’esei nan lo wòrdu homenahiá i FFK lo dediká e kampionato di e aña aki na nan.

Porta nan lo ta habri for di 4or di atardi i karchinan lo ta optenibel na lokèt di FFK promé ku wega. E entrada pa e wega di apertura ta kosta 6 florin pa adulto miéntras mucha te ku 12 aña i 60+ ta kosta fl.2.50 i animashon musikal lo ta na enkargo di un DJ.

E partidonan di Liga MCB Promé Divishon lo tuma lugá den Stadion Stadion Ergilio Hato (SDK) i den Stadion Antoine Maduro (SUBT). Weganan ta wòrdu hunga den wikènt esta, djabièrnè, djasabra i djadumingu. Na momento ku un wega keda kanselá lo reprogramá e wega aki durante di siman. E parti di seguridat ta den man di CVD, Cops i Kuerpo Polisial i tur e weganan lo wòrdu dirigí pa árbitronan afiliá na FFK.

Preis pa kampionato regular ta 6 florin general i 60+ i mucha te ku 12 aña ta kosta fl.2.50.

E ekiponan ku lo partisipá na Liga MCB Promé Divishon ta lo siguiente:

Centro Dominguito
CSD Barber
Hubentud Fortuna
Victory Boys
Undeba
Jong Holland
Scherpenheuvel
SUBT
Jong Colombia
Vesta

Liga MCB Promé Divishon lo wòrdu hunga di e siguiente manera;

E promé fase lo konsistí di dos buèlta regular den kua kada ekipo ta enfrentá otro na dos okashon ku ta suma un total di 90 wega. Den e segundo fase (buèlta di 6),e promé 6 ekiponan despues di e buèlta nan regular ta klasifiká pa e play off entre di seis klup den kua kada ekipo ta enfrentá otro na un okashon ku ta lo suma un total di 15 wega. Den e terser fase (buèlta di 4), e promé kuater ekiponan den e play off di 6 klup ta klasifiká pa sigui den e play off entre di 4 klup den kua kada ekipo ta enfrentá otro na un okashon ku ta un total di 6 wega i den e delaster fase (Final), e dos promé ekiponan den e play off di 4 klup ta klasifiká pa e wega final di e kampionato pa mira ken ta titulá nan mes kampion di Liga MCB Promé Divishon.

Liga MCB Segundo Divishon ta kuminsá djaluna dia 7 mart 2016. E promé partido di Liga MCB Segundo Divishon ta tuma lugá na tereno di FFK mitar di 8 di anochi. E promé partido lo ta entre e ekipo di Fc.Sithoc ku Indekor.

E sistema di kampionato ta keda hungá mesun kos ku esun di Promé Divishon.

E ekiponan ku ta partisipá na Liga MCB Segundo Divishon ta lo siguiente:

FC Sithoc
Inter Willemstad
U.D. Tera Kòrá
Marquita
C.H. Mahuma
Indekor
De Koning
NewSong
Sta Cruz
Atomic

E kampionato di Segundo Divishon ta wòrdu hunga manera esun di Promé Divishon i entrada pa e partidonan aki lo ta grátis.

Un yamada ta bai na hinter e pueblo di Kòrsou pa asistí na e gran apertura di Liga MCB Promé i Segundo Divishon ku ta ranka sali 6 i 7 di mart próksimo. Bin pasa un ratu ameno den kompania di bo famia i disfrutá di bo deporte preferí e deporte rei, futbòl

February 17, 2016

Kòrsou tin su promé 2 Doping Control Officer

WILLEMSTAD — Dia 9 pa 12 di febrüari 2 dirigente deportivo den forma di Ruthsel Martina visepresidente di Federashon Deporte i Olímpiko Korsou (FDOK) huntu ku sr. Edsel Cominencia sekretario di federashon di Vòlibòl di Kòrsou (Fevoko) a sigui un kurso pa bira Doping Control Officer (DCO) na Aruba. Tin ku bisa ku nan a konkluí esaki ku éksito. Un DCO ta un persona ku tin ku realisá e proseso di tumamentu di oriná di un atleta pa despues pòst esaki pa un di e laboratorio nan rekonosé pa e World Anti-Doping Agency (WADA).

E DCO nan den nos aria di Caribe ta kai bou di e ofisina di anti-doping di Caribe RADO ku ta establesé na Barbados.

Mirando e diferente skandalnan ku tin den mundu di deporte pa loke ta trata mal uso di supstansianan i/o métodonan prohibí pa haña mas bentaha riba un otro deportista, ta sumamente importante pa kada pais hasi tèst regular di su deportistanan di haltu rendimentu i tambe esnan den un selekshon ku ta representá su pais den eksterior. Pa kumpli ku reglanan internashonal FDOK a lanta un komishon di anti-doping ku tin komo tarea e formamentu di e komishon ofishal di anti-doping di Korsou. Den e kuadro aki a presentá un oportunidat pa sigui un kurso pa bira DCO na Aruba i nos a probechá i a manda 2 persona pa sigui e kurso aki.

Pronto FDOK lo kuminsá informá tur su miembronan riba e importansia di anti-doping den deporte i lo kuminsá informá nos deportistanan riba diferente detayenan ku nan mester sa, ora nan yega na nivel di un deportista internashonal. E parti di informá i eduká nos deportistanan i tambe nos skolnan ta hopi importante pa un bon desaroyo di nos hubentut. Tin vários produkto i remedi ku ta kontené supstansianan prohibí. Ta bon pa kada deportista tene su mes bon informá i pa semper konsulta serka su coach, federashon òf dòkter promé ku e tuma kualke supstansia. Un di e reglanan ta ku e deportista ta esun responsabel pa loke e tuma promé, durante o despues di un entrenamentu òf kompetensia.

FDOK ta felisitá e dos dirigentenan aki ku e logro i ta yama un danki spesial na komité olímpiko di Aruba ku a permití nos partisipá na e kurso aki. FDOK ta pidi pa keda pendiente pasombra pronto lo bini mas informashon pa nos federashonnan i deportistanan lokal.

February 15, 2016February 15, 2016

Shairon Martis tambe ta regresa ku Lincoln Saltdogs

MERKA — E Asosiashon Amerikano di Beisbòl Profeshonal Independiente a anunsiá ku Shairon Martis a yega na un akuerdo ku e ekipo di Licoln SaltDogs. Shairon temporada pasa ya a picha ku e ekipo aki. Na e momentu ey Shairon a logra un rèkert di 6-3 den 17 aparishon ku un efektividat di 3.73.

Luna pasa Curt Smith tambe a yega na un akuerdo ku e ekipo di Licoln SaltDogs. Curt temporada pasa ku e ekipo di Lincoln a logra un averahe di .294 ku 12 honron, 22 doblete, 4 tripel i 61 kareda empuha.

February 15, 2016

Kurso di Refri 1 Maart 2016

WILLEMSTAD — Departamentu di refri di FFK ta bai organisa su di prome kurso basiko pa e anja aki, Nivel 2. Esaki ta pa tur hende for di 14 anja y mas grandi pa dirigi entre otro hubenil te ku U-20 y 3er divishon.

E kurso lo inisia 1 Mart y lo finalisa 23 April ku un eksamen.

Edifiso Mordy Maduro na Bonam lo sirbi komo luga di kurso, e orario lo ta 18.00 – 20.00 riba Diamars y Diahuebs.

Por inskribi te ku Dia 29 February 2016.

Refereeing Department Curaçao referee@ffk.cw of via telefon: 7365057, 5112915, 5128617, 5202587.

Pa mas informashon tuma kontakto ku Departamento di Refri.

February 14, 2016February 14, 2016

Jair Jurrjens a firma ku Uni-President 7-Eleven Lions

TAIWAN – Jair Jurrjens a yega na un akuerdo pa hunga beisbòl na Taiwan. Segun informashonnan ku nos ta disponé di dje, Jair e yega na un akuerdo ku e ekipo di Uni-President 7-Eleven Lions na Taiwan. E ekipo di Lions no ta deskonosí pa peloteronan yu di Kòrsou, mirando ku na 2014, Shairon Martis tambe a picha ku e ekipo aki.

Temporada pasa e èks-picher All-Star di Liga Grandi a picha den Tripel A ku e ekipo di Albuquerque Isotopes. Ku e ekipo afiliá na Colorado Rockies, Jurrjens a logra un rèkert di 2-5 ku un efektividat di 6.88 den 17 aparishon.

Jair ku awor tin 30 aña di edat a firma ku e ekipo di Detroit Tigers tempu e tabata tin 17 aña. Despues na 2002 e picher yu di Kòrsou a pasa pa Atlanta Braves den un kambio. Ku Atlanta Jair a pasa mayor di su tempu den Liga Grandi. Despues di esaki e picher a forma parti di entre otro e organisashon di Baltimore Orioles, Cincinnati Reds, Detroit Tigers i por último Colorado Rockies.