Author: E. Evertsz

E ekipo nashonal di Antia Hulandes ta gana nan prome wega den e Mundial di beisbol na Suesia. Antia Hulandes a enfrenta Suesia awe dilanti un publiko di 1200 fanatiko. Antia Hulandes a habri e wega den kabes di 9 inning, anotando 6 kareda di kual 4 kareda tabata riba un grand slam di Jair Josepha pa bai ariba 10 pa 2. Den bom di 9 inning e ekipo di Suesia ta bin bek i anota 6 kareda. Finalmente e ekipo di Antia ta gana 10 pa 8.

Despues di e wega di awe 30 di ougustus, e tim di Washington Nationals a kambia e infielder Ronnie Belliard pa Los Angeles Dodgers. Den e kambio aki e tim di Nationals lo risibi e picher di klase A Luis Garcia i otro hungado ku lo keda menshona despues.

Belliard di 34 aña tabata batiendo .247 di average ku un “on base percenage” di .297 den 203 turno e aña aki. Belliard ta den su ultimo aña di e kontrakt di 3.5 million ku ela firma na 2007.

Korsou a enfrenta awe e ekipo di Saudi Arabia den e Little League World Series na Williamsport, PA. E ekipo di Korosu a sa di sali nota 2 kareda den bom di prome inning pa asina bai ariba 2 pa 0. Den kabes di 4 inning e tim di Saudi Arabia a sa di nota 3 biaha pa bai ariba ku e skor di 3 pa 2. Mesora den bom di 4 inning e ekipo di Korsou ta responde ku un kareda pa asina tabla e wega na 3. Den bom di 5 inning Junters Dossett ta kibra e empata ku un honron di 2 kareda. E partido aki por a konta ku un bon picheo di Jardel Martina, ku a picha 5 inning, permiti 2 hit i 3 kareda. Mester menshona ku niun di e 3 karedanan no tabata “earned”. Asina aki Korsou ta pasa pa e siguiente rondu di e kampionato ku 3 wega gana i 0 wega perdi.

Den e di dos enkuentro na Williamsport, PA, e ekipo di Korsou ta laga Japon den tereno pa asina gana e partido i pone un pia den e di dos rondu den Little League World Series. E partido aki a kuminsa ku Japon ariba 5 pa 0 den kabes di prome, den bom di prome inning e ekipo di Korsou ta bin bek pa hasi e wega 5 pa 4 na fabor di Japon. Den kabes di dos Japon ta añadi 2 kareda pero Korsou ta responde bek ku 3 kareda den bom di dos inning pa asina empata e partido na 7. Japon ta anota 2 kareda mas den kabes di kuater inning pero Korsou ta bolbe responde bek ku 2 pa mantene e partido empata na 9. Den di sinku Japon ta hasi e wega 10 pa 9 pero mesora un biaha mas den bom di sinku Korsou ta empata bek na 10. Japon ta anota atrobe den kabes di seis pa bai ariba 11 pa 10 i faltando solamente tres out pa gana e partido. Pero e ekipo di Korsou no ta entrega i ta anota 2 kareda den bom di seis pa asina bai ariba pa prome biaha den e partido i tambe laga Japon den tereno.

Den tur e aña nan partisipando den Little League World Series esaki ta solamente e di dos biaha ku e ekipo di Korsou ta gana di Japon, e ekipo di Japon a yega di gana Korsou 11 biaha. Sigur sigur e batenan di e  ekipo di Korsou a los den e partido aki i si no tabata pa base por bola, wild pitch i eror, Korsou lo a gana fasil di Japon.

Den e enkuentro aki Japon a nota 11 kareda, dal 5 hit i komete tres eror. E Ekipo di Korsou a nota 12 kareda, dal 15 hit i komete 6 eror.

Awe tabata tin e prome wega di e ekipo di Korsou den Little League World Series na Williamsport, PA. E ekipo di Korsou a enfrenta e ekipo Latino Amerikano ku ta wordu representa pa Venezuela. Ambos ekipo a hunga un bon wega i mas bien tabata un duelo di picheo. E picher habrido venzolano a permiti solamente 2 hit, poncha 8 i permiti 2 kareda. Kaminda e picher yu di Korsou Claycandy Hariquez a picha e partido kompleto permitiendo 1 kareda, 2 hit i ponchando 13 hungado. Banda di un tremendo trabou riba montikulo Claycandy a sa di anota e prome kareda di e partido i den di 4 inning Claycandy ta konekta un doblete i asina empuja Junters Dosset, ku finalmente a resulta e kereda di viktoria.