WILLEMSTAD — Dia 9 pa 12 di febrüari 2 dirigente deportivo den forma di Ruthsel Martina visepresidente di Federashon Deporte i Olímpiko Korsou (FDOK) huntu ku sr. Edsel Cominencia sekretario di federashon di Vòlibòl di Kòrsou (Fevoko) a sigui un kurso pa bira Doping Control Officer (DCO) na Aruba. Tin ku bisa ku nan a konkluí esaki ku éksito. Un DCO ta un persona ku tin ku realisá e proseso di tumamentu di oriná di un atleta pa despues pòst esaki pa un di e laboratorio nan rekonosé pa e World Anti-Doping Agency (WADA).
E DCO nan den nos aria di Caribe ta kai bou di e ofisina di anti-doping di Caribe RADO ku ta establesé na Barbados.
Mirando e diferente skandalnan ku tin den mundu di deporte pa loke ta trata mal uso di supstansianan i/o métodonan prohibí pa haña mas bentaha riba un otro deportista, ta sumamente importante pa kada pais hasi tèst regular di su deportistanan di haltu rendimentu i tambe esnan den un selekshon ku ta representá su pais den eksterior. Pa kumpli ku reglanan internashonal FDOK a lanta un komishon di anti-doping ku tin komo tarea e formamentu di e komishon ofishal di anti-doping di Korsou. Den e kuadro aki a presentá un oportunidat pa sigui un kurso pa bira DCO na Aruba i nos a probechá i a manda 2 persona pa sigui e kurso aki.
Pronto FDOK lo kuminsá informá tur su miembronan riba e importansia di anti-doping den deporte i lo kuminsá informá nos deportistanan riba diferente detayenan ku nan mester sa, ora nan yega na nivel di un deportista internashonal. E parti di informá i eduká nos deportistanan i tambe nos skolnan ta hopi importante pa un bon desaroyo di nos hubentut. Tin vários produkto i remedi ku ta kontené supstansianan prohibí. Ta bon pa kada deportista tene su mes bon informá i pa semper konsulta serka su coach, federashon òf dòkter promé ku e tuma kualke supstansia. Un di e reglanan ta ku e deportista ta esun responsabel pa loke e tuma promé, durante o despues di un entrenamentu òf kompetensia.
FDOK ta felisitá e dos dirigentenan aki ku e logro i ta yama un danki spesial na komité olímpiko di Aruba ku a permití nos partisipá na e kurso aki. FDOK ta pidi pa keda pendiente pasombra pronto lo bini mas informashon pa nos federashonnan i deportistanan lokal.