Author: E. Evertsz

Posted on

FIFA ta rechasá petishon di Costa Rica pa anulá partido

ZURICH, Suisa – E Federashon di Futbòl di Costa Rica a entrega un keho na FIFA riba 24 di mart pidiendo pa hunga e partido di klasifikashon di Kopa Mundial kontra Estádos Unídos di nobo. Costa Rica a pèrdè e partido aki ku skor di 1-0. Segun Costa Rica e kondishon nan di wega no tabata óptimo pa hunga un partido di futbòl.

FIFA a eksaminá e petishon di Costa Rica pero a konstatá ku e punto nan ku Costa Rica a trese dilanti no ta sufisiente pa kuminsá un protesta ofisial. Ku esaki e resultado di e partido di 22 di mart ta keda para.

Posted on

Roger Bernadina ku honron kontra Miami Marlins

JUPITER, Florida – Den e partido kontra Miami Marlins, Roger Bernadina a bai di 2-2 inkluyendo un honron. Bernadina a drenta komo pinch runner pa Denard Span den di sinku ining. Den mesun ining Bernadina ta logra nota riba un eror di Miami Marlins. Ku sero out den kabes di shete ining Bernadina a konektá un honron pa right field.

Posted on

Jurickson Profar asigná pa Tripel A

SURPRISE, Arizona – Despues di hopi deliberashon e ekipo di Texas Ranger a disidí di manda Jurickson Profar pa nan ekipo di Tripel A, Round Rock. Profar ta wòrdu konsiderá un di e mihó prospekto nan den beisbòl profeshonal.

Segun e “general manager” di Texas Rangers, Jon Daniels, “e desishon pa manda Profar tripel A no tabata fásil. Profar a impreshoná tur hende pero Rangers a disidí ku e mester haña e oportunidat di hunga tur dia.”

Texas Rangers ta di opinion ku si Profar keda den Liga Grandi lo e tin ku sinta banki miéntras ku Elvis Andrus i Ian Kinsler ta kubri shortstop i segunda base.

Posted on

Xander Bogaerts asigná pa Liga Menor

SARASOTA, Florida – Xander Bogaerts ku hopi ta konsiderá e tòp prospekto di Boston Red Sox a wòrdu asigná pa liga menor despues ku e ekipo di Red Sox a kai kontra Baltimore Orioles. Bogaerts no a hunga masha ku e ekipo di Res Sox den Spring Training dor ku e tabata forma parti di e selekshon di Reino ku a hunga den Klásiko Mundial di Beisbòl. No ta konosí ainda ku kua ekipo di liga menor Bogaerts lo kuminsá e temporada pero tur kos ta mustra ku lo ta e ekipo di Dòbel A Portland.

Posted on

Karchi nan pa partido Hulanda – Rumania blòkia

ZEIST, Hulanda – Un kantidat di mas òf ménos 275 karchi pa e partido di klasifikashon pa Mundial di Futbòl entre Hulanda i Rumania a wòrdu blòkia. Esaki ta karchi nan ku ta konosí pa Federashon di Futbòl Hulandes (KNVB) di a wòrdu bende riba merkado pretu. Benta di karchi di e forma aki no ta pèrmití pa e Federashon di Futbòl Hulandes.

Si bo tin karchi pa e enkuentro aki, bo ta wòrdu konsehá pa e Federashon pa chek si bo karchi ta blòkia riba wepsait www.onsoranje.nl. Den kaso ku bo ta di opinion ku bo karchi a wòrdu blòkia inhustamente bo por tuma kontakto ku Federashon di Futbòl Hulandes na e number di telefon 0900-3200010. Tambe e federashon ta konsehá ku si bo tin karchi blòkia bai tuma bo sèn bek na e kaminda ku bo a kumpr’é promé ku e partido. Federashon di Futbòl Hulandes no ta responsabel pa e karchi nan aki, tampoko nan no ta duna sèn bek.

Posted on

Andruw Jones su kasa ta pidi kustodia di nan yu

LAWRENCEVILLE, Georgia – Nicole Jones, kasa di pelotero Andruw Jones ta pidiendo pa e keda ku kustodia di nan yu hòmber. Andruw Jones ta bisa ku e ta un mihó mayor pa e yu i pa e motibu ei, e mester haña kustodia di e yu.

Andruw i Nicole Jones ta den proseso di divorsio despues ku Andruw ta wòrdu sospecha di violensia doméstiko na desèmber di 2012. Den e dokumento nan di korte, Nicole ta pidi pa kustodia primario di nan yu hòmber di nuebe aña i tambe anulashon di nan akuerdo nan pre matrimonial.

Den e dokumento nan di korte, Andruw ta bisa, ku no solamente e mester haña kustodia di e yu pero tambe e no ta haña ku e mester paga niun depchi pa Nicole kuida e yu.

E kaso di divisorio di Jones ta siguí djaluna 29 di aprel i lo wòrdu trata pa hues Tom Davis.

Posted on

Resultado nan futbòl Promé Divishon

WILLEMSTAD – Wikènt tras di lomba por a konta ku sinku partido den Federashon Futbòl Kòrsou su kampionato di Promé Divishon. E promé partido tabata djabièrnè entre Hubentut Fortuna i UNDEBA. UNDEBA ku a bin buska su promé punto nan den e kampionato a pika dilanti un pa nada ku gol di Edelmar La Crus na di 11 minüt. E ekipo di UNDEBA no a sa di mantené a bentaha aki i ku dos gol di Lisandro Trinidad, Hubentut Fortuna a sa di bai ku e viktoria di 2-1 riba UNDEBA.

Riba djasabra tabata tin e partido entre SUBT i Sithoc i tambe Jong Colombia kontra Jong Holland. Den e partido di SUBT i Sithoc, e barika hel nan a sa di Sali viktorioso ku skor mínimo di 1-0. E gol di SUBT a wòrdu anotá pa Geryon Alberto. Ku e viktoria aki SUBT ta bai na seis punto riba tabla di posishon, lagando Sithoc ku tres punto.

Den e di dos partido e ekipo di Jong Holland a sa di sali viktorioso riba Jong Colombia ku skor di 3-0. Ku e viktoria Jong Holland ta subi bai kuater punto riba tabla di posishon miéntras ku Jong Colombia ta keda ku un punto. Pa Jong Holland e gol nan wòrdu anotá pa Shuremy Filomena, Charles Martina i Jerome Jemeiron.

Djadumingu tambe tabata tin dos partido i e promé tabata entre Centro Dominguito i Centro Barber. Den e partido aki Centro Dominguito a bai ku e tres punto nan ganando di Barber ku skor di 4-0. Pa Dominguito Ashar Bernardus a sa di haña e gol na dos okashon, miéntras ku Ivany Calvenhoen i Kemoy Rein a hañ’é na un okashon. Ku e viktoria aki Centro Dominguito ta bai kuater punto riba tabla di posishon miéntras ku Centro Barber ta keda ku tres.

E di dos partido a bai entre Victory Boys i Vesta. Ámbos ekipo tabata buskando nan promé punto nan di e kampionato i Victory Boys a logra esaki ganando ku skor di 1-0. E gol di Victory Boys a wòrdu anotá pa Randel Winklaar.

Posted on

Jonathan Schoop pa tripel A Norfolk

PORT CHARLOTTE, Florida – E ekipo di Baltimore Orioles a anunsiá ku nan a opta Jonathan Schoop pa nan ekipo di tripel A na Norfolk, Virginia. Schoop a hunga den tres partido di Spring Training ku e ekipo di Orioles. Den e partido nan aki e tabata tin seis turno nan bate for di kua kuater hit, un honron i kuater kareda empuhá.

Miéntras ku Schoop ta bai tripel A, ainda Jair Jurrjens ta den kontienda pa e di sinku lugá den rotashon di Orioles. Den Jurrjens su último partido e la drenta komo relevo i a gana ku skor di 6-3 kontra Tampa Bay Rays. Jurrjens a drenta den relevo di Steve Johnson i a picha sinku ining sin permití kareda. Banda di esaki Jurrjens a permití dos hit, poncha tres i no a bolea ningun batido.

Posted on

Jair Jurrjens i Jonathan Schoop ku bon prestashon

PORT CHARLOTTE, Florida – Jair Jurrjens a drenta komo relevo den e partido ku Baltimore Orioles a gana ku skor di 6-3 kontra Tampa Bay Rays. Jurrjens a drenta den relevo di Steve Johnson i a picha sinku ining sin permití kareda. Banda di esaki Jurrjens a permití dos hit, poncha tres i no a bolea ningun batido.

Mènedjer, Buck Showalter a bisa: “Esaki ta e mihó ku mi a yega di mir’é. No ta importá kua batido e tabata enfrentá, e tabata den kontròl. Esei ta hopi bon. Tur su bala nan tabata keda abou, ku un par di eksepshon. Hopi impreshonante.”

Jonathan Schoop tambe a mira akshon den e partido aki, su promé partido despues di regresá for di e Klásiko Mundial di Beisbòl. Schoop a hunga shortstop i a konektá tres hit den kuater turno, di kua un honron i tres empuhá.

“Esaki ta promé biaha ku mi a mir’é bon. E ta un hòmber grandi,” Showalter a bisa. “E ta eksitá pa hunga. ‘Ma puntr’é ayera kuantu dia mas e mester promé ku e ta kla pa hunga?’ E la bisa, ‘mi ta kla pa hunga awor aki. Mi tin gana di hunga awor aki.’ “

Posted on

Sorteo Champions League tilda di wòrdu di feks

MADRID, Spaña – Segun eks rèfri internashonal Ahmet Cakar, UEFA a feks e sorteo di e partido nan di kuart final. Cakar ta bisa ku e motibu pa esaki ta pa elevá e nivel di kompetensia den e ròndu nan final di e torneo.

No ta solamente e sorteo di Champion League UEFA a manipulá pero esun di Europa League tambe, Cakar a bisa.

Segun e rèfri e feksmentu den Champions League ta pa evitá ku ekipo nan di mesun pais ta enfrentá otro den kuart final i tambe pa evitá ku ekipo nan favorito pa logra e titulo ta hunga kontra otro. Supuestamente segun e rèfri, UEFA a usa bala nan ku ta vibra pa asina por diferensia di e bala nan na momentu di e sorteo.

E sorteo a duna e siguiente resultado: Málaga CF (Spaña) lo hunga kontra Borussia Dortmund (Alemania). Real Madrid CF (Spaña) kontra Galatasaray AS (Turkia). Paris Saint-Germain FC (Fransia) lo bai kontra FC Barcelona (Spaña). FC Bayern München (Alemania) ta enfrentá Juventus ( Italia).

Ainda UEFA no a komentá riba e asuntu aki pero ta spera un komentario pronto.

Facebook Twitter Instagram Youtube
© 2025 Deporte Awe. Tur derechi reservá. Diseñá pa E² Media