PORT CHARLOTTE, Florida – E ekipo di Baltimore Orioles a anunsiá ku nan a opta Jonathan Schoop pa nan ekipo di tripel A na Norfolk, Virginia. Schoop a hunga den tres partido di Spring Training ku e ekipo di Orioles. Den e partido nan aki e tabata tin seis turno nan bate for di kua kuater hit, un honron i kuater kareda empuhá.
Miéntras ku Schoop ta bai tripel A, ainda Jair Jurrjens ta den kontienda pa e di sinku lugá den rotashon di Orioles. Den Jurrjens su último partido e la drenta komo relevo i a gana ku skor di 6-3 kontra Tampa Bay Rays. Jurrjens a drenta den relevo di Steve Johnson i a picha sinku ining sin permití kareda. Banda di esaki Jurrjens a permití dos hit, poncha tres i no a bolea ningun batido.