WILLEMSTAD – Wikènt tras di lomba por a konta ku sinku partido den Federashon Futbòl Kòrsou su kampionato di Promé Divishon. E promé partido tabata djabièrnè entre Hubentut Fortuna i UNDEBA. UNDEBA ku a bin buska su promé punto nan den e kampionato a pika dilanti un pa nada ku gol di Edelmar La Crus na di 11 minüt. E ekipo di UNDEBA no a sa di mantené a bentaha aki i ku dos gol di Lisandro Trinidad, Hubentut Fortuna a sa di bai ku e viktoria di 2-1 riba UNDEBA.
Riba djasabra tabata tin e partido entre SUBT i Sithoc i tambe Jong Colombia kontra Jong Holland. Den e partido di SUBT i Sithoc, e barika hel nan a sa di Sali viktorioso ku skor mínimo di 1-0. E gol di SUBT a wòrdu anotá pa Geryon Alberto. Ku e viktoria aki SUBT ta bai na seis punto riba tabla di posishon, lagando Sithoc ku tres punto.
Den e di dos partido e ekipo di Jong Holland a sa di sali viktorioso riba Jong Colombia ku skor di 3-0. Ku e viktoria Jong Holland ta subi bai kuater punto riba tabla di posishon miéntras ku Jong Colombia ta keda ku un punto. Pa Jong Holland e gol nan wòrdu anotá pa Shuremy Filomena, Charles Martina i Jerome Jemeiron.
Djadumingu tambe tabata tin dos partido i e promé tabata entre Centro Dominguito i Centro Barber. Den e partido aki Centro Dominguito a bai ku e tres punto nan ganando di Barber ku skor di 4-0. Pa Dominguito Ashar Bernardus a sa di haña e gol na dos okashon, miéntras ku Ivany Calvenhoen i Kemoy Rein a hañ’é na un okashon. Ku e viktoria aki Centro Dominguito ta bai kuater punto riba tabla di posishon miéntras ku Centro Barber ta keda ku tres.
E di dos partido a bai entre Victory Boys i Vesta. Ámbos ekipo tabata buskando nan promé punto nan di e kampionato i Victory Boys a logra esaki ganando ku skor di 1-0. E gol di Victory Boys a wòrdu anotá pa Randel Winklaar.