Otro Archives | Page 4 of 38

March 20, 2017

SOV BRANDWEER KU TREMENDO FIREFIGHTERS WALK 2017

WILLEMSTAD — Ya pa di tres aña konsekutivo, Sport en Ontspannings Vereniging di Brandweer Korsou ta organisa e kaminata ku ta hiba di nomber “Firefighters Walk”. Aña pasa mas di 2000 persona a partisipa durante di e kaminata organisa pa miembronan di Brandweer Korsou i a kana for di Post di Brandweer na Steenrijk pasa den kayanan di Punda i Otrobanda i termina na Playa Parasasa. SOV Brandweer a komplase tur esnan ku a pidi pa hasi e ruta mas largu I nos lo tin un ruta di 10KM ku lo pasa via di Brug Juliana. Tur partisipante ku skohe pa e ruta di 10KM lo krusa Brug Juliana na pia kanando for di Punda pa bai Otrobanda.

Durante Firefighters Walk, SOV Brandweer lo malkria tur su partisipantenan ku e tremendo servisio ku ja nan a kustumbra kune durante di e kaminata aki. Anto pa no papia mes, na momentu ku nan yega na final na Playa Parasasa lo tin fruta, juice, sopi, awa, masashi gratis I diferente kos mas ku nan lo risibi serka nos bomberonan. Karchinan ja ta optenibel serka tur bomber I ta kosta solamente 15 florin. Dado kaso un persona no konose kualkier bombero, por pasa tur dia, for di 9or di mainta te ku 9or di anochi non-stop na Kazerne di Brandweer na Mundu Nobo pa kumpra bo karchi pa 15 florin ku ta inklui un bunita tshirt I tambe bo konsumo.

Repartishon di tshirt lo tuma luga dia 29 I 30 di Mart 2017, for di 6or – 9or pm na Roodeweg. Pa kualkier informashon of benta di karchi pa Firefighters Walk 2017 lo por tuma kontakto ku 693 – 4666 of 529-2222. Of tambe por like nos Facebook page di SOV Brandweer unda lo por risibi tur informashon di Firefighters Walk 2017.

March 20, 2017

Xaverianan ta dal Stakamahakchi 3-0 den semi final di klase maskulino superior

WILLEMSTAD — Den seri di semi final a kontinuá ayera tardi den Sala Errol Rooi ku weganan di klase superior i klase A.

Primeramente de klase A Maskulino, e ekipo di Titus i Green Tigers a enfrentá otro pa di tres bia den e seri aki i Titus ta derota GreenTigers ku skore di 2-1 (12-25,25-23,15-12) di e forma aki Titus ta pasa pa e seri final di klase A pa enfrentá Wata ku tin un par di dia wardando riba nan.

Den Femenino Superior, Shuatanari ta logra e di dos viktoria riba Hurricane e bia aki ku skore di 25-22,25,16 i 25-12 i ta pasa pa final kontra di Stakamahakchi ku a gana Watakeli ayera ku skore di 3-0 (25-19,26-24,2-17) Pues Staka i Shuata atrobe den e lucha pa e título máksimo di Kòrsou.

Den klase maskulino, Xaverianan a zona un kampanaso ora nan a dominá Stakamahakchi ku skore di 3-0. Quinten Anthony tabata e estrea di Xaverianen asera. Anthony a sobre sali tantu den defensa i atake pa e team di Suffisant. E seri aki ta empatá na 1 i e wega desisivo lo tuma lugá djárason awor.

Den e último wega di ayera, Watakeli a derota Green Tigers ku skore di 3-1 (25-15,25-18,22-25 i 25-20) Watakeli di e forma aki ta gana e derecho pa hunga den e seri final wardando e seri di Staka/Xaverianen terminá. Djarason awor lo ta e próksimo fecha di Vòlibòl ku ta sigui hanja bon asistensia di públiko.

March 14, 2017

Resultado di Vòli

WILLEMSTAD — Xaverianen a bini desidido i a empatá e seri ora ku nan a derota Stakamahakchi den e di dos wega di play-off semi final. E wega a kuminsá ku un promé set ku a terminá 27-25 na fabor di Staka pero Xaverianen ta bin bek den e di dos set i ta gana esaki 25-18 i den di tres set nan a mantené e preshon riba nan kontrinkante i ta gana e set final 15-9 i ta forsa un wega desisivo djadumingu awor.

Den e otro banda di e semi final klase A Femenino. Shuatanari ta kaba ku tur speransa di Watakeli ora nan a gana ku skore di 2-0 (26-15, 25,15) Shutanari ta pasa pa e seri final di klase A pendiente di nan kontrinkante ku tin ku bira sea Xaverianen of Stakamahakchi.

Den klase A Maskulino tambe ta tin bon bataya ayera ora ku Titus ku ta dilanti den e seri a sufri un derota sensibel na man di e hóben ekipo di Green Tigers ku a empatá e seri i wega desisivo lo tuma lugá den fin di siman entrante skore final 2-1 (25-20,16-25 i 15-13 den e ultimo enkuentro di ayera, Wata ta pasa pa e seri final ku un viktoria fásil riba Xaverianen ku skore di 2-0 (25-5, 25-19).

E kampionato ta kontinuá djarason ku 2 wega di semi final den klase superior. Shuatanari lo enfrentá Hurricane i Watakeli lo topa Green Tiges . Ámbos wega ta programa pa kuminsá 19:45.

March 9, 2017

Resultado di Voli

WILLEMSTAD — Hurricane ta forsa un wega desisivo ora nan a gana Green Jewels den straight set 25-18, 25-15, 25-25. Hurricane a realisá ku no tin mañan i a apoderá di e wega i nan no e duna e hóben ekipo di GreenJewels niun chèns pa bini bek den wega. E seri pa un puesto den e play-off semi final ta empatá awor i djadumingu e kontrinkante di Shuatanari, ku a sali #1 den e buèlta regular, lo bira konosí .

Den e wega di klase A Femenino ku a tuma lugá ayera entre Xaverianen i Stakamahakchi, tabata Stakamahakchi ku a sali di e porta grandi pero papa soda paso e wega tabata realmente bon bringa pero al final Stakamahakchi a sa di skore e puntonan final. (27-25, 25-22) E seri aki ku ta mihó di 3 lo kontinuá djaluna awor den sala Errol Rooi.

E kampionato lo kontinuá djadumingu awor ku un kalendario kompleto kuminsando for 15.30 ku e siguiente weganan.

Fem Superior Hurricane v/s Green Jewels na mes momento Shuatanari lo enfrentá Watakeli. Mas lat lo tin e wega #1 di semi final klase A Maskulino entre GreenTiger v/s Titus i tambe Wata kontra Xaverianen

E último dos weganan lo bai entre Stakamahakchi i Watakeli den klase femenino Superior i Xaverianen v/s Stakamahakchi den klase Maskulino superior. Djadumingu lo kuminsá kobra un kos chikí pa wak e weganan GRANDI nan aki.

March 7, 2017

Resultado di Voli

WILLEMSTAD — E kampionato di Vòlibòl a kontinuá ayera nochi den sala Errol Rooi ku e siguiente resultado; den klase A Femenino, Shuatanari ta derota Hurricane ku skore di 2-0 (25-20 ,25-18) i den Maskulino A Titus ta derota Xaverianen 2-0 (25-11) (27-25).

Den klase Femenino Superior, Green Jewels ta gana Hurricane ku skore di 3-1 (22-25, 25-20, 25-14, 25-15). Ku e viktoria aki Green Jewels ta pika dilanti den e seri mihó di 3 wega pa e puesto #4 di e play-off.Diarason e wega #2 di e seri aki lo tuma lugá huntu ku e promé wega di semi final femenino di klase A.

March 6, 2017

Aviandrie Kastablank Kampion Infantil di Ahedres 2017 den kategoria U10

WILLEMSTAD — Resientemente Federashon di Ahedres Kòrsou (FEDAKO) a tene su kampionato infantil di ahedres 2017 den kategoria U10. Durante e kampionato di ahedres U10 ku tambe a tuma lugá serka e patrosinadó, Trupial Inn & Casino, kada partisipante ta tin 30 minüt pa pensa durante kada wega.

Manera tabata di spera e faboritonan den e kategoria di edat aki tabata Frederic Simonis i Aviandrie Kastablank, kendenan tin 9 aña di edat. E dos rivalnan aki a enfrentá otro den e kuater buèlta, na momentu ku tur dos tabata invikto ainda.

Den un partido ku a desaroya igual, Aviandrie Kastablank ta logra sera un Alfil di Frederic Simonis pa despues kaptura esaki i drenta e parti final di wega ku un bentaha di material ku tabata sufisiente pa bai ku e viktoria.

Aviandrie a logra kaba e kampionato den forma invikto komo kampion Nashonal kategoria U10 ku 5 punto for di 5 wega. Na di dos lugá a sali Frederic Simonis ku 4 punto i na di tres lugá a termina Gilian Justiana ku 3 punto for di 5 wega.

FEDAKO a keda hopi satisfecho kon e muchanan a partisipá i disfrutá di e evento i tambe gradesido debí ku Trupial Inn Hotel a trit tur e partisipante i e mayornan presente un sukulente pizza i refresko di nan tremendo restorant. Mas aleu a parti un regalito tambe na tur e muchanan ku a partisipá promé ku nan a regresá nan kas.

FEDAKO ta sigui hasi su esfuersonan pa eksponé nos hóbennan na kompetensia sano i ta kontinuá djasabra 11 di mart próksimo ku su di tres i último kampionato infantil pa loke ta trata 2017. E último kampionato infantil lo ta den e kategoria U12 i lo tuma na sentro di bario Janwe. Durante e evento aki tur mucha bou di 12 riba 1 yanüari 2017 por partisipá.

Pa mas informashon por yama 512-0007 of por bishitá e paginá di Federashon di Ahedres di Kòrsou riba Facebook.

March 6, 2017

Resultado di Vòlibòl

WILLEMSTAD — Vòlibòl a kontinuá ayera tardi den sala Errol Rooi na SDK despues di e break di karnaval ku poko partido hopi interesante.

Den Klase A Maskulino, Xaverianen a lucha fuerte pa gana e hóben nan di Watakeli Nagico ku skore di 2-1(25-21,17-25 i 16-140).

Green Tigers tambe ta tin mester di 3 set pa gana Titus ku skore di 21-25,26-24 i 15-9.

Den kategoria Femenino klase A, Xaverianen ta gana Titus 2-1 25-20,21-25 I 16-15 I Watakeli Nagico ta sali viktorioso riba Hurricane 25-16,25-14.

E úniko wega den klase superior ajera a bai entre Green Jewels – Hurricane . E wega a sali 3-2 na fabor di Hurricane 15-25,25-22,10-25,26-24 i 15-12.

Awe djaluna e moveshon nan den Vòli ta sigui ku tres wega. 19.45 Den klase A Maskulino Xaverianen lo Sali kontra di Titus i na mes momento Shuatanari lo midi forsa ku Hurricane den klase Femenino A.

Pa 21.00 lo tin e promé wega di e seri mihó di tres entre Green Jewels i Hurricane pa determina e puesto #4 pa e wega nan di semi final den klase femenino Superior.

February 23, 2017

Promé Torneo di Tènis di Mesa

WILLEMSTAD — Djamars último 21 di Febrüari FTMK a start ku su promé torneo di tènis di mesa den Sala Rekreo Irene Moreno na Muizenberg. Tabata trata di e Torneo Donic ku tur aña bèk ta riba kalendario. Otro aña Donic aki na Kòrsou komo organisashon ta selebrá 30 aña loke su dirigente sr. Franklin Mathilda a informá na ora di entrega di premio.

E torneo ku ta un Men Single Event, e biaha aki tabatin 17 inskripshon i a ser hungá pa medio di un knock-out system. Tabatin diferente partido na hopi bon nivel kaminda a lucha tambe pa un posishon bo for di tempran riba e ranking ku ta determiná na final di aña e MVP.

Mester hasi menshon ku Jaysron Mathilda ku al final ta bira un di e 2 finalistanan a pasa den masha pèrta den 2 partido sigui. Tantu kontra Erwin Sophia komo Henny Metry e ta kai atras 2-0 pa bin bèk despues ganando e partidonan. Di otro banda Dimitri Leon tabata ganadó su partidonan den gran forma sin muchu doló di kabes.

Den final ku si tabata un partido di miho di 7 fanátikonan por a mira wega ku hopi rèli largu i por a disfrutá di nan. Jaysron a sali masha bon mes ku tremendo wega, kaminda Dimtiri no por a hasi mucho kayendo atras 3-0. Na e skore di 3-1 Jaysron por a kaba e wega, kaminda e tabatin bentaha di 10-8, pues ku un Match Point. Aki gasolin a kaba ku Jaysron, kaminda falta di sufisiente kondishon a hunga un ròl. Dimitri ta sa di gana e wega aki pa despues gana e siguiente 2 nan i bai ku e título. Skore final 4-3 ku parsialnan: 8-11, 8-11, 11-13, 11-7, 12-10, 11-5, 11-6.

February 22, 2017

Domeinbeheer a Duna Inisio Ofisial Na Konstrukshon Di E Área Di Rekreashon I Deporte Na Kas Grandi

WILLEMSTAD — Djaweps 16 di febrüari Minister Suzy Camelia – Römer i Domeinbeheer a duna inisio na trabounan di konstrukshon di e área di rekreashon i deporte na Kas Grandi. Tambe presente tabata habitantenan di e área, representantenan di Plataforma Bándariba i representantenan di Fundashon Kompleho Deportivo Casa Grande (KODEKAG).

Representantenan di MNO Vervat, Curaçaose Wegenbouw Maatschappij, Aliansa Civil & Roadworkers BV i LB Constructie, ku ta bai traha riba e proyekto, a splika ku e proyekto tin gran balor tantu pa e komunidat di Kas Grandi komo pa nan komo kontratista mes. Pa nan e proyekto ta un oportunidat mas pa kontratistanan lokal uni i yuda ku desaroyo di Kòrsou.

Domeinbeheer ta desaroyadó prinsipal di e proyekto aki i den koperashon ku Lyongo Architecture a logra yega na un diseño adekuá pa e área di rekreashon. Despues ku a tene un anochi di informashon na luna di yüli aña pasá, unda Domeinbeheer a presentá e konsepto di e proyekto di desaroyo i risibí remarkenan konstruktivo serka habitantenan di e área, a yega porfin na komienso di e fase di konstrukshon. CCM Engeneering ta e kompania enkargá ku kordinashon di e proyekto.

Minister Suzy Camelia – Römer, Domeinbeheer huntu ku kontratistanan i algun habitante di e área, a duna inisio na e konstrukshon di forma ofisial ku un akto simbóliko i un selebrashon ameno. Komo akto simbóliko a desvelá e bòrchi di proyekto situá dilanti di e área di rekreashon i deporte, kual ta mustra imágen di e plan di desaroyo. Esaki ta un di e proyektonan mas ku ta forma parti di Domeinbeheer su trayekto di optimalisashon ‘Rumbo pa Ekselensia’.

February 21, 2017

Kampionato Infantil di Ahedres

WILLEMSTAD — Djasabra awor 25 febrüari Federashon di Ahedres Kòrsou (FEDAKO) ta sigui ku su di dos kampionato di grupo infantil pa loke ta trata 2017.

E djasabra aki ta e muchanan di kategoria U10 ta toka turno pa kompetí na Hotèl Trupial Inn.

Manera ta konosí kaba, e aña aki ta Trupial Inn Hotèl ta patrosinadó i anfitrion pa e kampionatonan Infantil di ahedres.

Durante e evento di e wikènt aki pa grupo U10, por partisipá esnan ku riba e fecha di 1 di yanüari 2017 ta tin 9 aña òf tabata mas hóben di edat.

E evento di djasabra awor lo bira hopi interesante, debí ku den e grupo U10 tin bários bon prospekto ku lo partisipá i e ganadónan di U8 tambe lo tei pa midi nan forsa den e grupo U10. Tempu pa pensa pa gruponan infantil lo ta 30 minüt pa kada mucha durante kada wega i no ta nesesario pa hasi anotashon di wega.

Partisipantenan mester ta presente 09:30 ‘or na Hotèl Trupial Inn pa registra i paga fl. 5,– di inskripshon. Lo tin diferente premio pa

partisipantenan i tambe posibilidat pa klasifiká pa e próksimo kampionato di un grupo di mas edat.

Un invitashon ta bai na un i tur pa pasa mira nos muchanan den akshon. Pa mas informashon por yama 512 0007 of manda un whatsapp.