Kampionato Nashonal di Ekipo Bola 8

WILLEMSTAD — Awe diahuebs Federashon Biyar Korsou ta ranka sali ku su Kampionato Nashonal di Ekipo Bola 8. E evento lo konta ku partisipashon di 4 ekipo , Curadise , Maishi Tigers , Breaking Bad y The Biesheuvel Friends. Na House of Billiard Play den Landhuis Granbeeuw tur e weganan lo tuma lugar solamente riba tur diahuebs pa 8or di anochi. Un invitashon ta bai na tur fanatiko pa bin apoya bo ekipo faborito. E prome enkuentronan lo ta Maishi Tigers vs The Biesheuvel Friends y Breaking Bad vs Curadise. E evento aki ta patrosina pa Montana Bierhuis.

KURSO FAMILIARISA KU AWA PA MUCHA DI 3 KU 4 AÑA

WILLEMSTAD — Direktiva di Swim Club Orca Curaçao ta partisipá ku djasabra dia 06 di ougùstùs 2022 lo kuminsá ku kurso pa muchanan di 3 i 4 aña familiarisá (kustumá) ku awa. E kurso tin un durashon di tres (3) luna i dos (2) biaha pa siman tin treinen. Riba djasabra treinen ta di 16:00 or pa 17:00 or i djadumingu treinen ta di 10:00 or pa 11:00 or na Pisina Bennie Leito.

Meta di e kurso aki ta pa e muchanan di 3 i 4 aña familiarisá/kustumá ku awa, di moda ku nan por manehá fásil den awa. Ora nan tin 5 aña nan por partisipá na e kurso pa diploma “A” sin problema. Na final di e kurso lo tin un tèst i e muchanan ku partisipá na e tèst lo risibí un sertifikado.

Kabando e kurso aki no ta nifiká ku e mucha sa landa, sino ku e por defendé su mes. Semper e mester tin “gordel”/vèst bistí i e mester ta huntu ku su mayor ora e ta kantu di un pisina òf laman.

E kurso ta kosta fl. 60,00 pa luna.

Pa inskripshon i mas informashon por WhatsApp sra. Norin Bolhuis na number di telefòn: +5999 5614062.

Tuma bon nota ku, No por inskribí na Pisina dia lès kuminsá. Inskripshon ta solamente via di e WhatsApp ariba menshoná.

E kantidat di lugá pa e kurso aki ta limitá.

FDOK SU SIMAN OLÍMPIKO KÒRSOU 24 – 31 di yüli 2022

WILLEMSTAD — Djaduming awor 24 di yuli  2022 Federashon Deporte i Olímpiko Kòrsou (FDOK) ta bai  tin su apertura huntu ku tur e federashonnan ku ta partisipa na  e promè SIMAN OLIMPIKO KORSOU di 24 pa 31 di yüli 2022.

Un total di 16 federashon miembro di FDOK lo partisipa na e Siman Olímpiko Kòrsou kual ta: Atletismo, Baseball, Basketbòl, Biyar, Futbòl ,Futbòl di Sala, , Dam, Domino, Yudo, Karate, Sailing, Sòftbòl, Taekwondo, Tennis di Mesa, Vòlibòl i Natashon

Tur federahon i nan deportistanan lo reuni na Buurcentrum Sentro di Bario Brievengat pa 12.30 or  kaminda huntu ku Brassband PCD lo kana den un desfile bai velt di Sam Buntin Ballpark.

E siman Olímpiko Kòrsou lo konsistí di kompetensianan den hopi ramonan di deporte. Meta di e evento aki ta pa stimulá i motivá nos hende nan partisipa en general na deporte kompetitivo. Alabes sera e temporada di vakashon aki ku un grandioso siman di deporte.Tambe pa gradisi nos deportistanan ku a saka kara di Kòrsou engrande.

Esaki lo sosode den koperashon ku Fundashon Desaroyo Deportivo Kòrsou (FDDK); parti mainta i merdia FDDK lo tin su aktividatnan pa hobenan (plan di vakansi) i parti anochi FDOK lo tin e parti kompetitivo dor di su diferente ramonan di deporte afilia na FDOK.

Lo trata pa por tin transporte pa públiko kada ora di 24 di yüli pa 31 di yüli 2022 ku ta sali di Otrobanda pa SDK.

Dia 31 di yüli FDOK ta bai klousura su selebrashon Siman Olímpiko en grande. FDOK ta bai organisá su di 5 kaminata riba djadumingu 31 di yúli pa 6’ or di mainta ku ta sali  for di e parkeerplaats di SDK na Brievengat i regresa SDK bek.

E lema di e kaminata ta: “BAN SOSTENE DEPORTE”.

E kaminata aki ta pa pueblo di Kòrsou en general hunto ku FDOK su miembronan di tur e federashonnan afiliá na FDOK i mayornan di nos deportistanan. Karchi pa e kaminata ta optenibel na kantor di FDOK; situá na Roodeweg 92A – edifisio blou ku blanku –  2e piso t/o Colon na Otrobanda. Tambe por haña karchi serka tur nos federashonnan miembro. Preis pa e kaminata ta kosta fl. 17.50.

Dia 31 di yüli 2022 anochi FDOK lo klousura e SIMAN OLÍMPIKO KÒRSOU ku Broche di Oro ku un partido di Beisbol  di 2 selekshon ku ta tuma lugà na stadion Johnny Vrutaal (Rif ).

FDOK ta hasi un apelashon na pueblo di Kòrsou pa partisipá na e kaminata aki di manera bo por kontribuí na moveshon deportivo ku tin komo lema : “BAN SOSTENE DEPORTE”. E Siman Olímpiko Kòrsou di deporte aki  ta net na klousura di temporada di vakashon eskolar.

Bini uni bini tur bin sostene nos deportistanan i laga e muchanan sera nan vakashon mirando i hasiendo deporte.

Alabes ta dia ku lo homenagia nos deportistanan ku a saka kara di Kòrsou en grande e aña aki.

DUNA BOS NA NOS ANSESTRONAN: REKONOSE , DISKULPA , REPARA 9 DI YULI 2022

WILLEMSTAD — Den kuadro di Dia di Emansipashon , Fundashon Museo Tula ta organisá un enkuentro hopi signifikativo ku mester a tuma lugá di promé di yüli  na mangasina di Lanthùis Kenepa (Museo Tula) ku yama “ Duna Bos na nos ansestronan, kibrando silensio”.

Debí na inseguridat pa ku e mal tempu ku a premirá djárason siman pasa mester a posponé e aktividat aki.

Fundashon Museo Tula pa medio di e komunikado aki ke informá na tur invitado i na pueblo en general ku enkuentro importante aki lo sigui djasabra awor dia 9 di yüli di 10.00 di mainta pa 01:00  di mèrdia na Lanthùis Kenepa.

Siman pasá dia promé di yüli ta un dia ku a laga un marka importante den e proseso di emansipashon di nos pueblo ora ku a tuma lugá e reunion importante di Parlamento di Kòrsou kaminda a invitá Plataforma di Sklabitut i Herensia di Sklabitut  pa duna un presentashon di herensia di sklabitut den kuadro di e proseso di emansipashon.

E importansia di e enkuentro aki ta ku huntu ku integrantenan di Plataforma di Sklabitut i Herensia di Sklabitut i representantenan di pueblo ku seriedat a analisá e problema di herensia di sklabitut i su konsekuensia pa nos komunidat ku te awe ta hopi visibel .  Ku esaki nan a alsa konsiensia bou di pueblo ku promé di yüli ku nos ta selebrá ta danki na lucha balente hiba pa nos ansestronan ku a habri e kaminda largu di emansipashon.  Pero konsiente di e hecho ku ainda tin mas pa bai pa kibra e restonan di desigualdat ekonómiko i sosial eksistente ku a keda persiguié hopi yu di Kòrsou komo herensia di sklabitut.  Parlamentu i Fundashon Konsenshi Históriko ku esaki a hisa pone riba mesa e tres enkargo pa logra den e di 160 aña di abolishon di sklabitut. Rekonosé  Diskulpá  i Ripará. Tarea ta na pueblo di Kòrsou pa ku yudansa di Komishon Nashonal i Gobièrnu mobilisá pa bai para tras di e enkargo aki huntu i asina duna forsa na e enkargo di parlamentu . Ku esaki pueblo di Kòrsou lo pone un base fuerte pa awor yega na emansipashon polítiko  kompleto di nos pueblo;  loke ta anhelo di tur pueblo ku ta stima su libertat.

Fundashon Museo Tula dia 9 di yüli awor ta organisá e aktividat ku ta duna inisio na preparashon di e di 160 aña ku un akto di hopi nifikashon i ku mester ta e komienso komo ku ta ei tur kos a kuminsá.

E dia aki lo gradisí nos ansestronan pa tur loke nan mester a pasa aden, nan sanger , sodó i lágrima ku a kore i tòg mantené nan dignidat komo hende i nan determinashon di ke ta liber. Yama nan danki pa e diferente luchanan ku nan a hiba pa otro aña nos por selebrá 160 aña di libertat.

E akto simbóliko lo ta den forma di yama nòmber di  e 140 personanan ku pa promé biaha por a gosa di e derecho di ta siudadano muhé i hòmber ku nòmber i fam. Liberá for di kadenanan di sklabitut dia promé di yüli.

E mainta lo kontené ademas diskurso di  Minister (di Enseñansa, Siensia, Kultura i deporte) , kanto , baile , poesia i testimonio di hóbennan di awe.

E aktividat di djasabra 9 yüli na Lanthùis Kenepa ta grátis. Pueblo ta bon bini.  Por reservá via WhatsApp (+5999) 686-2255.

FDOK SU SIMAN OLÍMPIKO KÒRSOU 24 – 31 di yüli 2022

WILLEMSTAD — Den ultimo siman di vakashon Federashon Deporte i Olímpiko Kòrsou ta bai organisá pa di promé bia su SIMAN OLIMPIKO KORSOU di 24 pa 31 di yüli 2022.

E siman Olímpiko Kòrsou lo konsistí di kompetensianan den hopi ramonan di deporte. Meta di e evento aki ta pa stimulá i motivá nos hende nan partisipa en general na deporte kompetitivo. Alabes sera e temporada di vakashon aki ku un grandioso siman di deporte.

Esaki lo sosode den koperashon ku Fundashon Desaroyo Deportivo Kòrsou (FDDK); parti mainta i merdia FDDK lo tin su aktividatnan pa hobenan (plan di vakansi) i parti anochi FDOK lo tin e parti kompetitivo dor di su diferente ramonan di deporte afilia na FDOK.

Lo trata pa por tin transporte pa públiko kada ora di 24 di yüli pa 31 di yüli 2022 ku ta sali di Otrobanda pa SDK.

Un total di 17 federashon miembro di FDOK lo partisipa na e Siman Olímpiko Kòrsou kual ta: Atletismo, Baseball, Basketbòl, Biyar, Boxeo, Futbòl di Sala, Futbòl, Dam, Domino, Yudo, Karate, Sailing, Sòftbòl, Taekwondo, Tennis di Mesa, Vòlibòl i Natashon.

Dia 31 di yüli FDOK ta bai klousura su selebrashon Siman Olímpiko Kòrsou ku e.o. su di sinku (5) kaminata anual. Despues di 2 aña pa motibu COVID -19 esaki a ser kansela, FDOK ta bai organisá un tremendo kaminata riba djadumingu dia 31 di yúli próksimo pa 6 or di mainta ku ta sali na e parkeerplaats di SDK na Brievengat i regresa SDK bek. E lema di e kaminata ta: “BAN SOSTENE DEPORTE”.

E kaminata aki ta pa pueblo di Kòrsou en general hunto ku FDOK su miembronan di tur e federashonnan afiliá na FDOK i  mayornan di nos deportistanan. Karchi pa e kaminata ta bai ta optenibel entrante djaluna 11 di yúli awor na kantor di FDOK; situá na Roodeweg 92A – edifisio blou ku blanku –  2e piso t/o Colon na Otrobanda.     Tambe por haña karchi serka tur nos federashonnan miembro i na algun puntonan di benta. Preis pa e kaminata ta kosta fl. 17.50.

FDOK ta hasi un apelashon na pueblo di Kòrsou pa partisipá na e kaminata aki di manera bo por kontribuí na moveshon deportivo ku tin komo lema : “BAN SOSTENE DEPORTE”. E Siman Olímpiko Kòrsou di deporte aki  ta net na klousura di temporada di vakashon eskolar.

Bini uni bini tur bin sostene nos deportistanan i laga e muchanan sera nan vakashon mirando i hasiendo deporte.

Dia 31 di yüli 2022 anochi FDOK lo klousura e SIMAN OLÍMPIKO KÒRSOU ku Broche di Oro.

Kompetí i dibertí, pasobra deporte ta dushi

WILLEMSTAD — Dia 26 di yüni próksimo Fundashon Desaroyo Buena Vista (FunDeBu) ta organisá un ‘mini olimpiada’ titulá: “Kompetí i dibertí, pasobra deporte ta dushi”.

FunDeBu ta un fundashon ku primordialmente ta organisá aktividat-/eventonan sosial i deportivo ku ta kontribuí na desaroyo di tantu nos hóben- komo adultonan.

Praktiká deporte ta kontribuí na kurpa i mente sano. Ademas deporte ta uni hende i trese union den pais.

Basá riba e filosofia aki nos ta organisá i kordiná e dia di deporte na vèlt di Buena Vista i den skol Juan Pablo Duarte. Tur esaki ku kolaborashon di e diferente federashonnan di deporte.

Nos lo transformá e aria den unu olímpiko.

Nos aspirashon ta pa riba e dia en kuestion, bishitantenan sera konosí ku e diferente ramonan di deporte na Kòrsou. Ademas federashonnan por propagá i duna informashon spesífiko di nan ramo i asina purba motivá i konvensé hóbennan pa afiliá na un tim. Pues un oportunidat di “ganá-ganá”.

Mas o ménos 13 diferente federashon di deporte lo partisipá riba e dia aki. Nan ta garantisá presentashon na nivel haltu di parti di nan deportistanan.

E siguiente ramonan di deporte lo partisipá n’e evento aki:

  • ‘Denksporten’: Dam, Dominó, ‘Schaken’
  • ‘Vecht-/Zelfverdedigingsporten’: Yudo, Karate, Taekwondo
  • ‘Balsporten’: Futbòl,  Basketbal, Ping Pong, Bola’s
  • Atletismo: Maratòn, ‘Hardlopen’ Triatlon
  • Subi flie

APERTURA DI “LUNA DI KOLEKTA” NA BRIONPLEIN

WILLEMSTAD — Djasabra 4 di yüni 2022 Federashon Deporte i Olímpiko Kòrsou (FDOK) a tene su apertura di e luna di kolekta pa deporte ku a tuma lugá riba Brionplein.

Presidente di FDOK sr. Rignaal “Jean” Francisca a habri e atardi ku un diskurso den kua e la informá ku meta di e kolekta aki ta pa rekoudá fondo pa diferente proyekto i plannan ku FDOK tin pa engrandese deporte aki na Kòrsou. Tambe miembronan di direktiva FDOK huntu ku Komishon di kolekta pa deporte a hiba palabra.

Riba e dia aki tabatin 13 federashonnan miembro di FDOK ku tabata presente kaminda nan a duna demostrashon i informashon di nan deporte. Curacao National  Anti-Doping Organization (C-NADO) tambe a uni pa duna splikashon di Anti-doping.

E ambiente tabata unu deportivo i sosial kaminda henter famia por a bishita.

Tabatin músika pa entretené e públiko presente.

FDOK ta yama un danki special na Minister di Ekonomia Sr. Ruisandro Cijntje i tambe na Parlamentario Rennox Calmes ku tabata presente i a duna aporte na e proyekto.

Despues di e apertura di dia 4 di yüni, direktiva i miembro nan di FDOK ta hasi uso di e oportunidat aki pa pidi Pueblo di Kòrsou pa sigui duna nan aporte durante e luna di yüni aki.

Diferente deportista / atleta i tambe coach i dirigentenan di deporte lo ta presente na diferente sitionan, aktividatnan i establesimentunan na Kòrsou ku e buzonnan pa asina komunidat kompletu por hasi su donashon durante di e luna aki.

Bo por hasi bo donashon tambe via di kuentanan bankario di FDOK:

  • MCB: #22791707
  • BDC: #33107701

Marnix i Radulphus College ta gana di torneo eskolar di ahedres

WILLEMSTAD — Djadumingu 5 yüni 2022, Curacao Youth Chess Institute a organisá su kompetensia eskolar di ahedres anual dedika na memoria di e baluarte sr. Omalio Merien (dfm) kende durante su bida a duna un aporte grandi na desaroyo i promoshon di ahedres aki na Korsou.

Hopi ta esnan ku konese sr. Omalio Merien komo inisiado di e karnaval organisá ku nos tur konose awendia, pero poko sa ku sr. Merien su gran pashon tabata e wega noble di ahedres. Sr. Merien tabata praktika ahedres na di klup di ahedres Capablanca unda e a fungi entre otro komo presidente di direktiva. Na final di añanan ‘70 Omalio Merien a lanta su skol ‘Agedres na plaka chiki’ pa mucha i den dekada ’80 sr. Merien tabata organisa hopi torneo di reto pa tantu hoben komo adulto na SDK. Tambe sr. Merien a kuminsa na febuari 1981 ku su programa di televishon ‘Agedres na paka chiki’ ku a pasa mas ku 10 aña largu tur siman na TeleCuracao. Mirando e aporte grandi di sr. Omalio Merien na desaroyo i promoshon di ahedres na Kòrsou, Curacao Youth Chess Institute a dedika e torneo eskolar 2022 na su honor.

Na e torneo eskolar 2022 a partisipa un total di 46 alumno di 21 diferente skol. Entre e 46 alumnonan ta tin tambe 4 ahedresista di Liseo Boneriano ku tambe a bin Kòrsou spesial pa por partisipa. E kompetensia di ahedres a keda organisá den dos grupo apart pa separa alumnonan di skol di fundeshi for di e alumnonan di skol avansa. E hobenan a bataya fuertisimo durante 5 buelta di 10 minut pa banda den nan respektivo grupo i e resultado di weganan a mustra un diferensia di skor minimo na final. Mester a aplika sistemanan di tie-break den ambos grupo pa por a saka e siguiente resultadonan:

Grupo di skolnan avansa overall:

  1. Rishab Anandbadoer    Radulphus College                4 pto
  2. Dylan Léañez        Vespucci College                4 pto
  3. Johan van Delden        Juan Pablo Duarte                4 pto

Grupo di skolnan di fundeshi overall:

  1. Jie-Peng Wu        Marnixschool                    4.5 pto
  2. Björn Elisa            Vigdis Jonckeer Mensing            4.5 pto
  3. David Augusta        Marnixschool                    4 pto

Miho damitanan di skolnan avansa:

  1. Diantheley Pourier    Gouverneur Laufferschool            4 pto
  2. Esther Carolina        Marnix VSBO                    2 pto
  3. Tamaris Pikeur        Liseo Boneriano                1 pto

Miho damitanan di skolnan di fundeshi:

  1. Liana Pieter        Prins Bernardschool                3.5 pto
  2. Sharidania Suart        Glorieux College                3 pto
  3. Chalendriënsley Cristina    Kolegio Iris Bruyning            2 pto

Sr. Gibi Merien kende ta ruman di e baluarte Omalio Merien a representa famia Merien, kendenan a soru pa e bunita trofeonan pa ganadornan, i a entrega e premio na e ganadornan overall di skol di fundeshi i ganadornan overall di skol avansa.

Curacao Youth Chess Institute ta felisita e ganadornan i ta enkurasha tur nos hoben ahedresistanan femenina pa kuminsa prepara pa un gran kompetensia femenino ku lo tuma luga djis despues di fakansi grandi.

BAN YUDA NOS KARGA DEPORTE NA KORSOU

WILLEMSTAD — Federashon Deporte i Olímpiko Kòrsou (FDOK) ta organisá pa promé bes luna di kolekta pa deporte. E meta di e kolekta aki ta pa rekoudá fondo pa diferente proyekto i plannan ku FDOK tin pa engrandese deporte aki na Kòrsou. E luna di kolekta pa deporte lo tuma lugá den henter e luna di yüni. Lo kuminsá ku un apertura ofisial riba 4 di yüni 2022 i lo terminá ku un klousura riba 30 di yüni 2022.

Siman Olímpiko Korsou

Un di e proyektonan ku FDOK tin programa ta e siman Olímpiko Kòrsou 2022 ku ta pone pa tuma lugá di 24 pa 31 di yüli próksimo. Meta di e proyekto aki ta pa krea un esfera olímpiko na kòrsou kaminda kada federashon lo organisá nan propio kompetensia lokal den un esfera estilo Weganan Olímpiko. Tur esakinan bou di guia i kordinashon di FDOK i den “partnership” ku FDDK.

Plan di desaroyo di topsport 2022 – 2026

Tambe FDOK ke ehekutá e plan di desaroyo di topsport ku tin komo meta pa den un término kòrtiku, medio largu i tambe largu krea deportistanan ku por destaká riba nivel internashonal i asina posishoná Korsou den e tòp 15 na e Weganan Sentro Amerikano i Karibe 2026 ku lo tuma lugá na Sto. Domingo.

Plan Stratégiko 2022-2024

FDOK huntu ku stakeholders ku yudansa di Innovatie & Ontwikkeling Adviesbureau a traha riba un plan stratégiko pa e temporada di 2022 pa 2024.

Pa hasi e proyektonan ariba menshoná posibel i kumpli ku e plannan, FDOK a bini ku diferente manera pa generá fondo. Un di e manera nan aki lo ta den forma di un luna di kolekta.

Apertura di e luna di kolekta pa deporte ta tuma lugá djasabra 4 di yüni 2022 di 3‘or di atardi pa 7ór di anochi riba Brionplein. Lo bai tin músika pa entretené e públiko presente. Lo bai tin tambe diferente federashonnan miembro di FDOK ku lo ta presente pa asina duna informashon di nan deporte. E ambiente lo ta unu deportivo i sosial kaminda henter famia por bishita.

Pueblo di Korsou por duna su aporte den e siguiente formanan:

  • Riba djasabra 4 di yüni por akudí na Brionplein pa depositá bo kontribushon.
  • Despues di e apertura di 4 di yüni, diferente deportista/ atleta i tambe coach i dirigentenan di deporte lo ta presente na diferente sitionan i establesimentunan na Korsou ku nos buzonnan pa asina komunidat kompletu  por hasi su donashon durante di e luna aki.
  • I si ta deseá di hasi un donashon via di kuentanan bankario di FDOK, esaki tambe ta posibel riba kuenta MCB: #22791707 i BDC: #33107701.

FDOK ta hasi un petishon na henter pueblo di Korsou pa kontribuí pa asina konhuntamente nos sigui yuda engrandese deporte riba nos isla.

Di antemano danki i FDOK ta konta ku boso sosten.

Torneo Eskolar di Ahedres 2022 Dedika na Honor di Sr. Omalio Merién

WILLEMSTAD — Despues di a rekonose i rekorda sr. Jozef “Boy” Plaate den aña 2021 pa su aporte na desaroyo di ahedres lokal, Curaçao Youth Chess Institute lo dedika e torneo eskolar di ahedres di aña 2022 na otro baluarte di felis memoria: sr. Omalio Cesareo Merién.

Mayoria hende konose sr. Merién komo esun ku a lidera era nobo di Karnaval na Korsou. Pero sr. Merién tabata tambe un ahedresista pashona ku a duna hobenan les di ahedres den diferente bario na Korsou i pa 10 aña largu a presenta e programa `Ahedres na Plaka Chiki` na TeleCuraçao. Sr. Merién a sostene ahedres den area administrativo den diferente funkshon. E tambe tabata para tras di organisashon anual di e famoso Amstel Schaaktoernooi ku tabata konta ku partisipashon internashonal durante dekada 70 i 80.

Curaçao Youth Chess Institute lo honra sr. Omalio Merien pa su gran aporte, dedikando e torneo eskolar di ahedres pa alumnonan di skolnan basiko i avansa na su memoria.

Fecha: Djadumingu 5 di yuni
Luga: Frater Aurelio SBO (Pietermaai).
Registrashon: 13:30-13:50 `or i inskripshon ta fl. 5,- pa persona.

Di e forma aki, Curaçao Youth Chess Institute ta sigi duna rekonesementu na nos baluartenan di ahedres lokal, pa nan keda rekorda. Gradisimentu ta bai na famia Merién ku a sponsor e trofeonan pa nos kompetensia eskolar.

Pa mas informashon por tuma kontakto ku sr. Jimmy Izijk na: 512 0007