Category: Otro

Posted on

Elekshon Futuro Pais Kòrsou

Djabièrnè 27 di ougùstùs ta bai tin elekshon na Kòrsou. E elekshon aki lo ta un elekshon históriko paso den e elekshon aki e pueblo lo disidí ken lo ta e gobernante nan ku lo ta na kabes di pais Kòrsou. Tin un total di 10 partido ku lo tuma parti na e elekshon aki. E partido nan ta:

  1. Partido Laboral
  2. Frente Obrero
  3. Movementu Futuro Korsou
  4. Niun Paso Atras
  5. Partido pa Adelanto i Inovashon Soshal
  6. PAR
  7. Partido Democraat
  8. Pueblo Soberano
  9. MAN
  10. Partido Nashonal di Pueblo

Pa kortesia di registro sivil Deporte Awe! a logra haña e lista di e kandidato nan ku lo partisipá den e elekshon próksimo. Klik riba e siguiente link pa e lista di Kandidato nan pa Elekshon

Partido Laboral

Despues di no a partisipá den e elekshon di parlamento na yanüari 2010, Partido Laboral tei bek i ta bai partisipá den elekshon pa pais Kòrsou. E último biaha ku Partido Laboral a partisipá na elekshon ta na aña 2007 kaminda nan a logra optené un kantidat di 1227 voto. For di e promé biaha ku Partido Laboral a partisipá na elekshon e partido aki a bin ta pèrdè voto. Den e siguiente tabla bo por mira e voto nan ku Partido Laboral a optené atraves di aña nan.

Aña Voto
1998 13665
1999 11938
2002 9695
2003 8785
2006 4293
2007 1227

Si nos kompará e kantidat di voto ku Partido Laboral a haña na 2007 ku e dato nan di e elekshon ku tabata tin na yanüari 2010, bo por konkluí ku Partido Laboral lo a haña 0 asiento. Den e kaso ku nos usa e dato nan di elekshon na yanüari 2010 e kiesdeler lo tabata 3533 voto. Si Partido Laboral ke forma parti di e promé gobièrnu pa pais Kòrsou e partido aki pa promé biaha den su historia mester bai dilanti na voto, nan mester bai dilanti ku por lo ménos 2306 voto.

Frente Obrero

Frente Obrero a partisipá den e elekshon di parlamento na yanüari 2010, pero den e elekshon aki Frente Obrero no a logra saka asiento. Den elekshon aki Frente Obrero a logra optené 4354 voto, esaki ta e kantidat mas abou di voto ku a partido aki a yega di haña den e último 8 elekshon nan. Den e tabla siguiente bo por mira kuantu voto Frente Obrero a haña for di aña 1995 te ku 2010.

Aña Voto
1995 6841
1998 10225
1999 12631
2002 18383
2003 22745
2006 9582
2007 7648
2010 4354

Si kue a dato nan di elekshon na yanüari 2010 e kiesdeler lo tabata 3533, esei ta nifiká ku si Frente Obrero mantené e kantidat di voto ku e a haña na e elekshon di yanüari 2010 nan lo logra sigur 1 asiento. Pero Frente Obrero tin ku tene masha kuidou paso for di elekshon na 2003 e partido aki a bin ta pèrdè voto i si e partido aki bai atras den e elekshon aki ku un kantidat di mas òf ménos 821 voto nan ta kore e rísiko di saka 0 asiento. Si Frente Obrero ke saka 2 asiento riba su mes forsa den e elekshon aki nan tin ku bai dilanti ku mas òf ménos 2712 voto.

Movementu Futuro Korsou

Movementu Futuro Korsou ta bai partisipá den nan promé elekshon dia 27 di ougùstùs 2010. Gerrit Schotte e lider polítiko di Movementu Futuro Korsou a yega di partisipá den dos elekshon promé ku e elekshon di 27 di ougùstùs 2010. Den e tabla siguiente bo por mira e kantidat di voto ku Gerrit Schotte a logra optené den e dos elekshon nan previo.

Aña Voto
2007 2370
2010 9313

Si Gerrit Schotte logra mantené e kantidat di voto ku e a haña na e elekshon di parlamento na yanüari 2010 e partido aki por konta ku sigur 2 asiento. E 2 asiento nan aki no ta tene na kuenta e sobra voto nan ku e partido por haña for di e demas miembro nan. Si Movementu Futuro Korsou ke garantisá 3 asiento riba nan mes forsa e ora ei e sobra miembro nan di partido tin ku sòru pa un mínimo di mas òf ménos 1286 voto. Esaki ta nifiká ku e sobra kandidato nan riba lista di Movementu Futuro Korsou tin ku sòru pa un averahe di mas òf ménos 65 voto kada un.

Niun Paso Atras

Niun Paso Atras a partisipá den e elekshon di parlamento na yanüari 2010 huntu ku e Lista di Kambio. E último biaha ku Niun Paso Atras a partisipá na elekshon tabata na aña 2007. Den tur elekshon ku Niun Paso Atras a partisipá nan a logra bai dilanti na voto. Den e tabla siguiente bo por mira e kantidat di voto ku Niun Paso Atras a yega di haña.

Aña Voto
2003 3819
2006 3851
2007 6304

Si Niun Paso Atras logra mantené e kantidat di voto ku nan a haña na 2007 e ora ei e partido aki lo logra sigur 1 asiento i kisas 1 restzetel meskos ku na aña 2007. Pero pa e partido aki logra esaki no ta bai ta asina fásil ya komo ku e partido aki no ta e mesun partido di aña 2007. Ta bini aserka tambe, ku e miembro nan di e partido aki ku tabata riba e Lista di Kambio na yanüari 2010, a sòru pa solamente pa 1939 voto di kual 1859 voto tabata pa Nelson Pierre ku ya no ta forma parti di e partido. Ku e kantidat di voto aki sigur e partido Niun Paso Atras lo no logra saka asiento.

Partido pa Adelanto i Inovashon Soshal

Partido pa Adelanto i Inovashon Soshal ta bai partisipá den nan promé elekshon dia 27 di ougùstùs 2010. Apesar di esaki e lider polítiko Alex Rosaria ya a partisipá na dos elekshon. Den e tabla siguiente tin e kantidat di voto ku Alex Rosaria a haña den e 2 elekshon nan ku e a partisipá.

Aña Voto
2006 533
2007 731

Na tur e dos elekshon nan ku Alex Rosaria a partisipá e a logra haña e mayor kantidat di voto pa e partido despues di e “lijsttrekker” òf e number unu riba lista. Si tene na kuenta ku normalmente ora bo ta number unu riba lista di partido bo ta haña mas voto ku e sobra persona nan riba lista, e partido aki sigur tin e posibilidat di saka sigur 1 asiento. Si nos wak bek na aña 2007 Humprey Davelaar tabata number tres riba lista i a logra haña 389 voto, na 2010 Davelaar tabata number unu riba lista i a logra 3406 voto. Meskos Helmin Wiels tabata number dos riba lista na aña 2003 i e a haña 468 voto, na 2006 e tabata number unu riba lista i e a haña 2945 voto. Na aña 2003 Emily de Jongh-Elhage tambe tabata number dos riba lista i logra 2890 voto i na 2006 e a bira number unu riba lista i a logra 12382 voto. Por último na 2002 Charles Cooper tabata number 19 riba lista i a haña 105, na 2003 e a bira number unu riba lista i a haña 4242 voto. E úniko diferensia entre e ehèmpel nan menshoná i Alex Rosaria ta ku tur e persona nan aki tabata aktivo den polítika na momentu ku nan a pasa pa number unu riba lista.

PAR

PAR a partisipá den e elekshon di parlamento na yanüari 2010. Den e elekshon aki PAR a resultá di ta e partido di mas grandi na Kòrsou, kaminda nan a haña 26662 voto. E kantidat di voto aki ta e mas tantu ku e partido a logra den e último 8 elekshon nan. Den e tabla siguiente bo por tuma nota di e kantidat di voto nan ku PAR a risibí den e último 15 aña nan.

Aña Voto
1995 24055
1998 18606
1999 15948
2002 16443
2003 13710
2006 18187
2007 20862
2010 26662

Si usa e dato nan di elekshon di parlamento na yanüari 2010, PAR lo saka sigur 7 asiento riba su mes forsa i probablemente 1 te 2 restzetel. Den e último 15 aña nan e biaha ku PAR a bai mas tantu dilanti ta na e elekshon di parlamento na yanüari 2010, aki nan e partido a krese ku 5800 voto. Den e último 15 aña nan e biaha ku PAR a bai mas tantu atras tabata na aña 1998 kaminda nan a pèrdè 5449 voto. Si den e elekshon di 27 ougùstùs PAR pèrdè 5449 voto ainda PAR lo optené nèt 6 asiento.

Partido Democraat

Partido Democraat a partisipá den e elekshon di parlamento na yanüari 2010, pero e partido no a logra saka asiento. Den e elekshon aki Partido Democraat a saka 1823 voto, ku ta e kantidat di voto di mas abou ku e partido aki a yega di haña den último 15 aña nan. Den e tabla siguiente bo por mira e kantidat di voto nan ku Partido Democraat a haña den e último 15 aña nan.

Aña Voto
1995 4654
1998 8469
1999 2931
2002 1903
2003 2519
2006 2638
2007 3813
2010 1823

Partido Democraat tin e posibilidat pa saka sigur 1 asiento den e próksimo elekshon dia 27 ougùstùs. Esaki mirando e hecho ku e partido a pasa den un transformashon kompletu i tin un lider polítiko nobo den persona di Norberto Ribeiro. Noberto Ribeiro a yega di partisipá na dos elekshon den pasado. Den e tabla siguiente bo por mira e kantidat di voto ku Norberto Ribeiro a haña.

Aña Voto
2002 582
2003 2510

Si sali for di e punto di bista ku un kandidato ta haña mas voto ora e ta number unu riba  lista ku ora e ta riba otro puesto, bo por konkluí ku Norberto Ribeiro tin e kapasidat pa kue sigur mas ku 2510 ku e a haña na 2003. Si nos konta e 2510 voto ku Norberto Ribeiro a haña na 2003 ku e 1823 voto ku Partido Democraat a haña den último elekshon, bo por bisa ku e partido tin e posibilidat di haña sigur 4333 voto sin konta e voto nan di e sobra kandidato nan riba lista. Un kantidat di 4333 voto ta bon pa sigur 1 asiento.

Pueblo Soberano

Pueblo Soberano a partisipá den e elekshon di parlamento na yanüari 2010, aki nan e partido a logra haña un kantidat di 10785 voto. E kantidat di voto aki ta e kantidat di mas tantu ku e partido aki a yega di haña den su historia. Den e tabla siguiente bo por opservá e kantidat di voto ku Pueblo Soberano a yega di haña.

Aña Voto
2006 3357
2007 5494
2010 10785

Ta opvio ku for di dia Pueblo Soberano a partisipá pa promé biaha den elekshon na aña 2006 e partido aki a bin ta krese. Si Pueblo Soberano logra mantené e kantidat di 10785 voto, e partido aki lo tin sigur 3 asiento. Si Pueblo Soberano ke garantisá 4 asiento nan tin ku haña mas òf ménos 14132 voto, ku ta 3347 voto mas ku elekshon pasa. E kresementu aki no ta imposibel pa Pueblo Soberano mirando e echo ku na 2010 e partido a krese ku 5291 voto, e úniko kos ta ku nan a logra e kresementu aki den 3 aña. Esei ta nifiká ku e partido a krese ku un kantidat di 1764 voto pa aña. Ta di wak ku Pueblo Soberano por krese ku 3347 voto den 7 luna di tempu.

MAN

Den e elekshon di parlamento na yanüari 2010 MAN a partisipá huntu ku e Lista di Kambio. E último elekshon ku MAN a partisipá bou di nòmber MAN tabata na aña 2007. Aki nan MAN a logra haña 13923 voto. For di aña 2002 kaminda MAN a haña 4174 voto, e partido a bin ta krese. Den e tabla siguiente bo por mira e kantidat di voto ku MAN a haña den último 15 aña nan.

Aña Voto
1995 19561
1998 8468
1999 6851
2002 4174
2003 6274
2006 13123
2007 13923

Si MAN logra mantené e kantidat di voto ku nan a haña na aña 2007, e partido aki lo garantisá sigur 3 asiento i faltando kisas nèt un par di voto pa yega 4 asiento. Den e elekshon di parlamento na yanüari 2010 e miembro nan di MAN ku tabata riba Lista di Kambio a sòru pa un kantidat di 20143 voto. Si MAN por logra mantené e kantidat di voto aki e ora ei MAN lo haña sigur 5 asiento den e elekshon próksimo. Pero loke MAN tin ku tene kuenta kuné ta e echo ku 9313 di e 20143 voto nan a bin di Gerrit Schotte ku ya no ta forma parti di MAN mas. Esei ta nifiká ku si nos kita e 9313 voto ku Gerrit Schotte a kontribuí kuné, MAN ta keda ku solamente 10830 voto, ku ta bon pa  3 asiento.

Partido Nashonal di Pueblo

Partido Nashonal di Pueblo a partisipá den e elekshon di parlamentu na yanüari 2010, den e elekshon aki Partido Nashonal di Pueblo a haña 6506 voto. E kantidat di voto ku Partido Nashonal di Pueblo a haña den e elekshon di yanüari 2010 ta e kantidat di mas abou ku e partido aki a haña den último 15 aña nan. Den e tablá siguiente bo por mira e kantidat di voto nan ku Partido Nashonal di Pueblo a haña e último 15 aña nan.

Aña Voto
1995 11906
1998 14641
1999 15616
2002 10706
2003 7153
2006 7768
2007 7558
2010 6506

Si Partido Nashonal di Pueblo mantené e kantidat di voto ku nan a haña na yanüari 2010 e ora ei e partido aki lo garantisá sigur 1 asiento. Pa Partido Nashonal di Pueblo logra 2 asiento nan tin ku krese ku mas òf ménos 560 voto. For di aña 2006 Partido Nashonal di Pueblo a bin ta pèrdè voto kier men nan mester kibra e tendensia aki si nan ke haña 2 asiento. Pa Partido Nashonal di Pueblo haña 0 asiento nan tin ku bai atras ku mas òf ménos 2973 voto. Esaki no ta algu imposibel mirando e echo ku na aña 2002 Partido Nashonal di Pueblo a bai atras ku 4910 voto.

Asiento

Mas serka e dia di elekshon mas bo ta tende komentá kuantu asiento kada partido lo saka. Pa e motibu aki ma usa e dato nan di elekshon di parlamento na yanüari 2010 pa ilustrá e kantidat di voto ku un partido mester haña pa saka e kantidat di asiento menshoná. Kòrda bon ku e sifra nan aki ta un estimashon i nan no ta pretu riba blanku. E kantidat di voto pa asiento ta dependé di loke pasa den e elekshon dia 27 di ougùstùs.

9 Asiento

Pa un partido por saka 9 asiento riba su mes forsa esei kier men sin niun restzetel e partido aki mester haña mas òf ménos 31797 voto. E kantidat di voto aki niun partido no a logra haña den e último 8 elekshon nan.

8 Asiento

Pa un partido por saka 8 asiento riba su mes forsa e partido aki mester haña mas òf ménos 28264 voto. E kantidat di voto aki tampoko niun partido a logra haña den e último 8 elekshon nan.

7 Asiento

Pa un partido por saka 7 asiento riba su mes forsa e partido aki mester haña mas òf ménos 24731 voto. E úniko partido ku a logra haña mas di 24731 voto den e último 8 elekshon nan ta PAR den e elekshon di parlamento na yanüari 2010.

6 Asiento

Pa un partido por saka 6 asiento riba su mes forsa e partido aki mester haña mas òf ménos 21198 voto. Den e último 8 elekshon nan solamente 4 biaha un partido a logra pasa riba 21198 voto. Frente Obrero a hasi esaki na 2003, Lista di Kambio a hasié na 2010 i PAR a hasié na 1995 i 2010.

5 Asiento

Pa un partido por saka 5 asiento riba su mes forsa e partido aki mester haña mas òf ménos 17665 voto. PAR a logra surpasá e kantidat di voto aki 5 biaha den e último 8 elekshon nan. Frente Obrero a logra esaki 2 biaha den último 8 elekshon nan. MAN a logra esaki 1 biaha den último 8 elekshon nan i Lista di Kambio tambe a logra esaki.

4 Asiento

Pa un partido por saka 4 asiento riba su mes forsa e partido aki mester haña mas òf ménos 14132 voto. PAR a logra surpasá e kantidat aki na 7 okashon den último 8 elekshon nan. Partido Nashonal di Pueblo i Frente Obrero a logra esaki 2 biaha den último 8 elekshon nan. MAN i Lista di Kambio 1 biaha den último 8 elekshon nan.

3 Asiento

Pa un partido por saka 3 asiento e partido aki mester haña mas òf ménos 10599 voto. E kantidat di voto aki a wòrdu surpasá 22 biaha den e último 8 elekshon nan.

2 Asiento

Pa un partido saka 2 asiento e partido aki mester haña mas òf ménos 7066 voto. E kantidat di voto aki a wòrdu surpasá 32 biaha den e último 8 elekshon nan.

1 Asiento

Pa un partido por logra 1 asiento e mester saka mas òf ménos 3533 voto. E kantidat di voto aki a wòrdu surpasá 47 biaha den último 8 elekshon nan.

Posted on

Análisis elekshon parlamento 2010

E último elekshon di parlamento ta tras di lomba, mané bo mes por a mira mi pronóstiko no a kompletamente ku e resultado final, partido PAR i FOL sigur a sorprendé mi. Mi no a spera ku PAR lo haña tantu voto asina i mi no a spera ku FOL lo a kai bo di 1 asiento. Den mi pronóstiko ma bisa ku no tin niun partido ku ta bai benefisiá kompletamente di e 1 asiento ku ta representá “e persona ku no sa pa ken vota”. Pero esaki tabata e fout den e pronóstiko paso manera mi ta analisá PAR ta e partido ku a kue e votadó nan aki. Den e tabla siguiente mi ta bai pone e kantidat di voto ku mi a pronostiká e partido nan lo a haña.

PARTIDO VOTO
PS 10250
PPE 527
PNP 6132
PAR 19749
MSI 525
DP 2484
FOL 5285
LK 22537
PERSONA KU NO SA PA KEN VOTA 7577
TOTAL 75066

Mi a hasi un análisis chikí riba e resultado di e elekshon di parlamento i tambe ma kuminsá wak un tiki den direkshon di elekshon di konseho insular 2010.

Análisis

Pueblo Soberano

Pueblo Soberano a logra optené 10789 voto, ku ta bon pa 2 asiento. Pueblo Soberano a krese ku 96% kompará ku elekshon anterior. PS ta e partido ku e krese mas tantu den e elekshon aki. Pa ami esaki no ta un sorpresa, manera ma menshoná den mi pronóstiko e partido aki ta bai siguí krese i mi ta kere ku si e partido aki siguí manera e ta bai lo e sigui krese tambe. Manera mi ta analisá si elekshon di konseho insular tabata awe PS lo logra 3 asiento.

Partido un Pueblo Emansipá

Partido un Pueblo Emansipá a logra optené  311 voto, ku ta bon pa 0 asiento. Pa ami e resultado aki no ta un sorpresa i mi ta kere ku PPE no mester a bai e elekshon aki. PPE mester a wak si e por a inkorporá su mes den un di e partido nan ku mes un ideologia kuné. Nos mester kuminsá realisá ku no ta fásil manera ta mustra pa logra asiento den elekshon i sigur no den elekshon di parlamento kaminda e kiesdeler ta hopi haltu. Tambe tin ku tene kuenta ku e echo  ku promé ku elekshon tur hende ta bisabu ku nan ta vota pa bo pero ora nan yega tras di e mashin di voto nan ta hasi otro. Si elekshon di konseho insular tabata awe tampoko e partido aki lo no a logra asiento.

Partido Nashonal di Pueblo

Partido Nashonal di Pueblo a logra optené 6494 voto, ku ta bon pa 1 asiento. PNP a bai atras ku 14% kompará ku elekshon anterior. Manera ma pronostiká PNP ta siguí bai atras, mi ta kere un di e kos nan ku sigur a afektá PNP ta e retiro ku dos miembro di e partido a tuma den porta di elekshon. PNP sigur mester bai bek den nan seno i analisá. Si elekshon di konseho insular tabata awe PNP lo a logra 1 asiento.

Partido Antia Restrukturá

PAR a logra optené 26641 voto, ku ta bon pa 5 asiento i 1 restzetel,pa un total di 6 asiento. PAR a bai dilanti ku  27% kompará ku elekshon anterior i ta e partido ku mas a krese den e elekshon aki despues di Pueblo Soberano. PAR sigur tabata un sorpresa pa mi, paso e forsa di PAR sigur no tabata bisto riba kaya, ni den enkuesta nan. Manera mi a bisa anterior si PAR gana e elekshon aki e sla lo ta mortal pa oposishon. Sigur PAR tin e “momentum” awor aki i si nan mantené esaki nan lo ta kla pa elekshon di eilandsraad tambe. Si elekshon di konseho insular tabata awe PAR lo a saka 7 asiento mas 1 restzetel ku ta bon pa 8 asiento.

Movementu Solushon Isla

MSI a logra optené 195 voto, ku ta bon pa 0 asiento. Si elekshon di konseho insular tabata awe MSI lo no a logra asiento.

Partido Demokrat

Partido Demokrat a logra optené 1815 voto, ku ta bon pa 0 asiento. E partido aki a bai atras ku 52% kompará ku elekshon anterior, esaki ta e partido ku a bai mas atras den e elekshon aki. Aunke mi a pronostiká ku DP lo no saka asiento den e elekshon aki mi no a spera ku nan lo a bai dje atras aki. Mi ta kere sigur e echo ku DP no a fiha un posishon kla pa loke ta trata strukturá estatal a afektá nan. Si elekshon di konseho insular tabata awe tampoko DP lo no a logra asiento.

Frente Obrero i Liberashon 30 di Mei

FOL a logra optené 4373 voto, ku ta bon pa 0 asiento. FOL a bai atras ku 43% kompará ku elekshon anterior. Pa ami esaki sigur tabata un sorpresa paso ma kere ku sigur FOL lo logra 1 asiento. Apesar di esaki tòg FOL tin speransa ainda paso si elekshon di konseho insular tabata awe FOL lo a logra 1 asiento. Kiermen FOL mester bai analisá anto wak kon nan ta bai amplia esun asiento aki den e siguiente elekshon.

Lista di Kambio

Lista di Kambio a logra optené 23552 voto, ku ta bon pa 4 asiento mas 1 restzetel pa un total di 5 asiento. Mi ta kere ku sigur esaki ta un sla duru pa LK aunke mi no a keda sorpresa pa e kantidat di voto, ma kere ku sigur a base di e moveshon nan riba kaya i den enkuesta nan ku LK tabata tin e kapasidat pa ta e partido di mas grandi. Pero manera mi a bisa kaba PAR simplemente a krese ku e okashon i a kue mas voto ku mi a spera. Mi ta kere si ku e kombinashon di MAN, FORSA KORSOU i NIUN PASO ATRAS a minimalisá a daño ku e partido nan aki lo a haña si nan a bai nan so. Si elekshon di konseho insular tabata awe i si LK bai e elekshon ey nan lo a logra 6 asiento mas 1 restzetel ku ta bon pa 7asiento.

Elekshon Konseho Insular 2010

Si elekshon di konseho insular a tuma lugá awe e partido nan di PAR, PNP i FOL lo a logra 11 asiento i PS i LK lo a logra 10 asiento. Den e elekshon aki e aktuashon di FOL i PNP lo bai ta sumamente importante pa PAR. Dikon? Paso manera mi a analisá PS a haña su voto nan for di FOL i DP. FOL i DP a bai atras ku un kombinashon di 5237 voto i PS a krese ku 5295 voto. Si PS logra kue mas voto di FOL i PNP bai un tiki mas atras, FOL ta kai na 0 asiento den elekshon di konseho insular i PS lo logra kue esun restzetel ku PNP lo a haña. Den e kaso ey PAR i PNP lo logra 10 asiento huntu i PS i LK lo logra 11 asiento. Pa oposishon PS lo bai ta hopi importante, paso manera ma splika kaba PS por hòrta un restzetel for di PNP ku ta pone ku oposishon ta haña 11 asiento. Klaro ku tin mas posibilidat pero mi ta warda e parti aki pa mas serka di elekshon.

PARTIDO ASIENTO ASIENTO (inkl. Restzetel)
PS 3 3
PPE 0 0
PNP 1 2
PAR 7 8
MSI 0 0
DP 0 0
FOL 1 1
LK 6 7
TOTAL 18 21

Resúmen elekshon parlamento 2010

Partido Voto Asiento
PS 10789 2
PPE 311 0
PNP 6494 1
PAR 26641 6
MSI 195 0
DP 1815 0
FOL 4373 0
LK 23552 5
TOTAL 74170 14
Posted on

Pronóstiko elekshon Parlamento 2010

Mayan dia 22 di yanüari ta bai tin Elekshon pa parlamento di Antia i manera mi a anunsiá kaba lo mi hasi un pronóstiko riba e resultado di elekshon. Mi mester kuminsá na rekonosé ku no tabata fásil pa hasi e predikshon aki, pero tòg mi a purba di hasié mas presis posibel. Mi ta atmití ku tin un chèns ku mi predikshon ta kompletamente robes, kisas e ta mitar robes anto porta ku e ta korekto tambe.

Pronóstiko

1. Pueblo Soberano

E partido aki ta un partido ku sigur mi ta kere ta bai siguí krese den e elekshon aki, Pueblo Soberano (PS) lo bira e partido di tres mas grandi den e elekshon aki. Pueblo Soberano ta para nèt na e porta di 2 asiento, kiko mi ke bisa ku esaki? Ku esaki mi kiermen ku PS porta ta haña 1 asiento pero lo yega hopi serka di 2 asiento òf PS ta logra habri porta bin paden i kue tur 2 asiento. A base di mi análisis mi ta kere ku PS ta bai kue 2 asiento riba su mes forsa.

2. Partido un Pueblo Emansipá

PPE lo logra 0 asiento den e elekshon di mañan.

3. Partido Nashonal di Pueblo

PNP ta un partido ku un trayektoria largu den polítika di Kòrsou, apesar di esaki e partido aki na mi pareser ta siguí bai atras den e elekshon aki. Partido Nashonal lo haña 1 asiento den e elekshon di mañan. Mi mester menshoná ku segun mi pronóstiko Nashonal ta logra surpasá e kiesdeler i kue e asiento aki pero no pa masha voto.

4. Partido Antia Restrukturá

Mi mester rekonosé ku PAR ta un di e partido nan ku tabata hopi difísil pa mi hasi un pronóstiko riba dje, pero apesar di esei tòg mi ta bai tira mi pronóstiko. Mi ta kere ku PAR lo bira e partido di dos mas grandi den e elekshon aki. Par lo logra 3 asiento den e elekshon aki, mester rekonosé ku PAR ta para hopi serka di logra 4 asiento. Apesar di esaki mi ta pronostiká ku PAR ta bai keda ku 3 asiento.

5. Movementu Solushon Isla

MSI lo no logra asiento den  e elekshon di mañan.

6. Partido Demokrat

PD tampoko lo no logra asiento den e elekshon di mañan.

7. Frente Obrero i Liberashon 30 di Mei

Frente Obrero ta un di e otro partido nan ku ta siguí bai atras kompará ku elekshon nan anterior. FOL tambe ta un di e partido nan ku tabata difísil pa pronostiká e resultado di elekshon. Segun mi pronóstiko FOL ta para nèt na 1 asiento, pero FOL fásilmente por kai na 0 asiento. Mi ta kere ku FOL lo logra kue un kantidat di voto for di e grupo ku no sa pa ken vota i asina logra para na 1 asiento.

8. Lista di Kambio

Lista di Kambio na mi pareser lo logra e viktoria den e elekshon di mañan i bira e partido di mas grandi. Mi ta pronostiká ku LK lo logra 4 asiento den elekshon mañan.

9. Persona ku no a disidí

Mi ta pronostiká ku e personanan ku no sa pa ken vota lo tin un balor di 1 asiento. Pero mi no ta kere ku tin niun partido ku lo benefisiá kompletamente di e asiento aki. Mi ta kere ku PS lo kinipí for di e asiento aki pa logra nan 2 asiento meskos ku FOL lo kinipí pa logra nan 1 asiento. LK, PAR i PNP tambe lo haña algun voto di e grupo aki.

Repartishon di restzetel

Mi ta pronostiká ku lo bai tin 3 restzetel pa repartí. Segun mi pronóstiko LK lo haña solamente 1 restzetel pa yega na un total di 5 asiento. Partido PAR lo logra optené 2 restzetel pa un total di 5 asiento tambe. Kasi sigur lo bo ta puntra bo mes dikon LK ta gana elekshon i haña 1 restzetel so i PAR ta Sali number 2 i e ta haña 2 restzetel? Esaki ta difisil pa splika pero e tin di aber ku e kantidat di voto ku PAR i LK ta haña.

Den e repartishon di restzetel PS lo ta krusial, paso si PS logra optené un tiki mas voto di loke mi ta pronostiká lo e logra hòrta e di dos restzetel for di PAR. Pero segun mi pronóstiko mi ta kere ku e gobièrnu aktual lo tin un total di 7 asiento i oposishon tambe lo tin un total di 7 asiento. Den kaso ku PS logra hòrta e di dos restzetel for di PAR lo bo haña ku koalishon ta keda ku 6 asiento i oposishon lo tin 8 asiento. Pues mi ta kere ku PS lo ta klave den e elekshon di mañan pa oposishon. Mi ta kere ku oposishon no tin nada di pèrdè mañan i den tur dos senario ku mi a pinta nan lo sali bentahoso. Di otro banda aunke mi no ta pronostiká esei, un viktoria di PAR mañan lo ta mortal pa oposishon.

Resúmen

Partido Asiento Asiento (incl. Restzetel)
PS 2 2
PPE 0 0
PNP 1 1
PAR 3 5
MSI 0 0
FOL 1 1
LK 4 5
TOTAL 11 14

Mi kier a gradisí un i tur ku a mustra interes den e artíkulo aki, si tin kualke pregunta òf komentario sintibu liber di mandami un e-mail of laga un “comment” riba e artíkulo. Mi ke rekordábu un biaha mas ku ta simplemente un pronóstiko i tin chèns ku mi predikshon ta kompletamente robes, kisas e ta mitar robes anto porta e ta korekto tambe. Kòrda referí e site na tur bo konosí nan ku ta interesá den e materia i keda pendiente pa despues di elekshon un análisis di elekshon tambe. Un kordial saludo i por último kòrda hasi uso di bo derechi i bai vota!

Posted on

Pendiente pronostiko elekshon Staten 2010

Mi a tuma nota di diferente pronostiko ku tin riba resultado di elekshon di djabierne. Pero ta riba e site aki so bo ta bai haña e pronostiko kompletu. Esei kiermen kumi ta bai dunabu kuantu asiento kada partido ta kue riba nan mes forsa, tambe lo mi pronostika kon e repartishon di restzetel ta bai. Lo mi pronostika ken ta e ganado di eleskhon, ken ta e di dos i di tres partido mas grandi. Porta asta mi menshona e kantidat di voto ku kada partido lo haña, kiermen ta bai tin hopi informashon. Tur e informashon aki lo keda publika 7’or di anochi (ora di Korsou), djaweps 21 di yanuari.

Posted on

Elekshon Staten 2010

Ku tur probabilidat dia 22 di januari 2010 lo tin e ultimo elekshon pa Staten di Antias. En konekshon ku esaki mi ta bai sali un tiki for di deporte i e siman prome ku elekshon lo mi trese mi pronostiko riba e resultado di elekshon, pues keda pendiente pa esaki.

E partido nan ku ta forma parti di e elekshon aki na Korsou ta lo sigiuente:

1.   Pueblo Soberano (PS)

2.   Partido un Pueblo Emansipa (PPE)

3.   Partido Nashonal di Pueblo (PNP)

4.   Partido Antia Restruktura (PAR)

5.   Movementu Solushon Isla (MSI)

6.   Partido Democraat (PD)

7.   Frente Obrero i Liberashon 30 di Mei (FOL)

8.   Lista di Kambio (LK)

Posted on

Ministerio Publiko ta kontradesi su mes

Ku hopi atenshon mi a tuma nota di e kaso di desaparishon di James Hogan. Tambe mi por a tuma nota di tur e esfuerzo nan k uta wordu hasi pa logra enkontra James Hogan. Mi ta kontentu tambe ku ta hasi tantu kos asina aki pa mas rápido posible enkontra e persona aki. Pero a pesar di tur esaki mi no ta kontentu ku e forma di opera di Ministerio Publiko.

E motibu pa esaki ta lo sigiente: manera nos tur sa ya pa basta tempu kaba tin un persona di nomber Shuresca Fermina ku ta perdi. Den pasado ya kaba a surgi e diskushon dikon no a hasi esfuerzo nan manera den kaso di Marlies van der Kouwe pa logra enkontra sra. Fermina. Riba e punto aki Ministerio Publiko a bisa ku bo no por kompara e dos kaso nan, ya komo ku e kaso di Marlies a kuminsa komo un akto kriminal i esun di sra. Fermina ta nada mas ku un desaparishon. Chek e sigiente link http://www.youtube.com/watch?v=R6WPcqjM3Yk&feature=channel_page . Pone hopi atenshon riba loke ta wordu menshona na 1 minut i 44 sekonde.

Mi pregunta pa Ministerio Publiko ta: e kaso Hogan no ta un desaparishon tambe? Ministerio Publiko a kontesta e pregunta aki kaba. Den e puntonan di konferensha di prensa Polis/OM riba kaso Hogan ta bin dilanti “Ta tene kuenta ku tur senario. Úniko loke ta sigur ta ku sr. Hogan ta pèrdí”! Den otro palabra e kaso ta wordu atende komo un desaparishon. Esaki ta wordu konfirma tambe den e sigiente link http://www.youtube.com/watch?v=zBmo9mucJzs&feature=channel_page .

Kiko a wordu hasi pa ekontra James Hogan?

• Djabièrnè mainta reshèrshi di Kuerpo di Polis Kòrsou (KPC) ta start ku un búskeda
• Djabièrnè mèrdia Ministerio Públiko huntu ku polis ta lanta e asina yama ‘Team Grootschalig Onderzoek’ (TGO) . E team ta start su trabou den kareda di 15:00-16:00 or ku loke reshèrshe a akumulá te na e momentunan ei
• TGO ta un team ku ta konsistí di alrededor di 15 pa 20 persona
• Na kas di Sr. Hogan tabata konosí ta kua ruta e ta kana semper. A listra e ruta ei kompleto. E área ta konosí komo Toni Koenchi
• A hasi un investigashon di bario (buurtonderzoek) i a skucha famia i konosínan
• Búskeda ta konsentrá su mes den e área aki. Búskeda tambe riba laman. Búskeda ta inkluí Warda Kosta, Marina Real, i Navy di Estádos Unídos. Den e área sambuyadónan di Marina Real a buska bou di laman
• Djadumingu a manda paña i muestra di sanger pa Nederlands Forensisch Instituut (NFI) na Ulanda
• Djadumingu a yega for di Ulanda 4 kachó spesialisá den búskeda di hende morto i nan ‘doghandler’ pa yuda den e búskeda.
• A tapa e lugá di investigashon ku un tènt pa evitá ku áwaseru òf otro situashon por daña e área
• Tin un koperashon ku Ulanda i Estádos Unídos den e búskeda
• E investigashon ta un asina yama ‘breed spectrum onderzoek’

Den un komunikado di prensa ku a sali resientement Ministerio Publiko ta duna di konose lo sigiente: “Relashoná ku e kaso di desaparishon di sr. James Hogan, visekònsùl di Estádos Unídos, Ministerio Públiko di Antia Ulandes ta deklará lo siguiente:

Na e momentunan aki por konfirmá ku a base di un petishon hasi dor di Prokurador General di Antia Ulandes na Kònsùl General di Estádos Unídos a pidi asistensia di dos investigador. Entretantu djaluna atardi 1 funshonario di FBI i 1 funshonario di State Department a keda inkluí den e tim di investigashon.

Ministerio Públiko ta enfatisá ku na e momentunan aki te ainda e punto di salida ta ku ta trata di un kaso di desaparishon. Ta tene kuenta ku tur senario, inkluso un akto kriminal.

Mientrastantu e investigashon den e kaso aki a sigui. A pidi Ulanda via di e kanalnan formal pa mas ayudo tékniko. Esaki mientrastantu a keda aprobá. Via di Ministerio di Defensa ta bai yega Kòrsou loke nan ta yama ‘defensiemiddelen’ den forma di sambuyadó, eksperto i material. Djarason ta yega Kòrsou un aparato sofistiká pa listra den fondo di laman. Awe tardi a yega Kòrsou ya kaba 4 persona pa manehá esaki.

Loke ta konosí kaba ta ku a pidi NFI yudansa den forma di investigashon di laboratorio. For di djadumingu a yega miembronan di e ‘Landelijke Team Forensisch Opsporing’. Ta trata di 2 doghandler, 4 kachó spesialisá pa buska morto i 4 spesialista pa kolekta material forensiko. Tambe Prokurador-general di Antia Ulandes a hasi awe un petishon na Konsulado Merikano pa asistí ku sambuyadó i material pa yuda den e búskeda.

E material ku Ministerio di Defensa ta pone disponibel ta: sambuyadó spesialisá (kikvorsmannen) ku por sambuya na profundidat di 15-30 meter. Tambe nan ta pone disponibel botonan konosí komo Boston Whalers i un asina yamá REMUS-team ku tin na nan disposishon un ‘Autonomous Underwater Vehicle’ (AUV) ku 4 tékniko pa listra den fondo di laman.”

Kiko a wordu hasi pa enkontra Shuresca Fermina?

E uniko informashon kumi a logra obtene riba e pregunta aki ta ku Ministerio Publiko a papia ku diferente testigu i a hasi sierto investigashon den e bisindario di sra. Fermina. http://www.youtube.com/watch?v=8ueUHcosHmE&NR=1 .

Loke mi no por kaba di kompronde ta dikon pa sr. Hogan ta hasiendo tantu kos asina anto pa sra. Fermina praktikamente no hasi net net nada. Ta miedu Ministerio Publiko tin di Departamento di Estado Merikano? Ministerio Publiko mester korda ku no ta Departamento di Estado Merikano ta nan doño di trabou i ta paga nan salario, ta DEPARTAMENTO di YU’I KORSOU CITIZEN ta hasi esaki. Ministerio Publiko ta traha pa ami i abo. No ta posibel ku ta hasi tantu kos asina aki ku ami i abo su sen anto ora tin ku investiga kos pa ami i abo ta draai riba un estilo di spaar sen.

Gran parti di hende ku ta traha na Ministerio Publiko ta YU’I KORSOU, ta asina aki nos tin ku trata nos mes hendenan, lubidando ku e sra. Fermina por ta bo famia tambe? Ban serio Ministerio Publike bosnan ta hopi robes bezig! Mi ke enfatisa un biaha mas, kumi no tin ningun problema ku ta hasi tur e kos nan aki pa enkontra sr. Hogan pero si bo ta hasie pa sr. Hogan bo tin ku hasi mesun of mas tantu esfuerzo pa e YU’I KORSOU. Lei pa un Lei pa tur tog Ministerio Publiko?

Posted on

Aresto Stanley Ignacio

Algun siman pasa Stanley Ignacio a wordu aresta i tabata wordu akusa di ta envolvi den krimen organisa ku ta trafika paranan eksotiko entre Cuba, Korsou i Hulanda. E aresto a tuma luga na kas di Stanley su mama, na momentu ku Stanley a wordu di setop pa bin na e luga enkuestion.

Akinan ta sigi e sigiuente preguntanan: No tabata por a pidi Stanley presenta na warda di polis i areste einan? Kon OM ta permiti tipo di praktikanan aki tuma luga bou di nan jurisdikshon?

Den e kaso aki kasi sigur OM lo bisa ku a aresta Stanley na kas di su mama paso eynan e ta inskribi. Pero no por a pidi Stanley bin warda di polis, Stanley ta konosi rond Korsou  i mi no ta kere ku Stanley lo a, ni por a keda skondi pa justisia largu si ela disidi di no presenta na warda. No ta importa ku ta Stanley of ta otro persona, ni si e persona ta e kriminal di mas grandi of esun di mas chiki, bo no ta setop un persona pa areste dilanti di su mama manera a wordu hasi den e kaso aki.

E vishon di OM ta lo sigiuente: “De visie van het OM is, dat het Openbaar Ministerie er voor zorgt dat zaken objectief en professioneel worden beoordeeld, dat het beheer van de publieke middelen efficiënt en transparant is en dat de toepassing van het strafrechtelijk arsenaal (straffen en maatregelen) effectief en creatief is.” (http://www.gov.an/ccg/home.nsf/vContentW/Justitie–Visie+en+Missie+Openbaar+Ministerie!Opendocument)

Mi tin gana di sa si e aresto di Stanley ta objectief en professioneel manera e vishon di OM ta spesifika.

Ta manda Stanley Hulanda pa e investigashon, pa bai Hulanda tabata tin ticket nechi regla. Investigashon ta kaba anto awo ta Stanley mes mester buska manera pa kumpra ticket pa bin Korsou bek. Atrobe no ta importa si ta Stanley of otro persona, pero mi pregunta ta “KON POR TA?”

Despues di e kos aki tur no mandatarionan ta sali puntra “kon por ta?”, “ku ta asina ta trata ku hende?”, pero nos mandatarionan mester a sali kuestiona for di dia di e aresto kon OM ta permiti paar di reshershi hulandes bin Korsou bin setop un hende pa areste dilanti su mama malu.

Chek e siguente link nan, kaminda Stanley mes ta splika riba su aresto.
http://www.youtube.com/watch?v=eQLMV4qAeLo&feature=channel_page
http://www.youtube.com/watch?v=R3Rh5qnNUWg&feature=channel_page

Facebook Twitter Instagram Youtube
© 2022 Deporte Awe. Tur derechi reservá. Diseñá pa E² Media.