Category: Futbòl

Posted on

Kòrsou por yega mundial 2014?

Dia 30 di yüli 2011 na Rio de Janeiro a tuma lugá e loteria pa asina repartí e diferente selekshon nan nashonal ku ta miembro di FIFA i asina kuminsá e kaminda pa mundial di futbòl Brazil 2014. Despues ku ya sinku miembro ku ta forma parti di CONCACAF a kai afó, Kòrsou porfin sa kontra ken e ta bai kuminsá su trayektoria pa Brazil 201kuater. Huntu ku esaki ta bin e pregunta: Kòrsou por yega Brazil 2014?

Tur kos ta posibel semper, pero si e ta probabel ta algu diferente. Kòrsou su problema pa yega Brazil 2014 no ta pa falta di hungadó i/òf talento, tampoko pa falta di Direktor Tékniko i tampoko no ta pa falta di Federashon Futbòl Kòrsou (FFK). E problema ku Kòrsou tin i mayoria pais den CONCACAF ta a manera ku FIFA ta organisá e kompetensia klasifikatorio pa mundial den CONCACAF.

CONCACAF tin 35 federashon ku ta forma parti di dje i ku ta den kontienda pa bai mundial Brazil 2014. Promé ku e loteria a tuma lugá dia 30 yüli 2011, e 10 ekipo nan ku ta di renk mas malu den CONCACAF a hunga kontra otro. E sinku ganadó nan di e partido nan aki a pasa pa forma parti di e loteria huntu ku e otro 19 ekipo nan ku ta di renk mas malu i ku no ta forma parti di e 10 nan ku a hunga kaba.

Kiko FIFA ta hasi e ora ey? E sinku ganadó nan di e partido nan ku a tuma lugá promé ku e loteria ta bai den un pochi huntu ku e ekipo ku ta di renk mas malu di e 19 ekipo nan restante. E seis ekipo nan aki ta e promé nan ku ta wòrdu di lòt i nan ta number kuater den kada grupo. Den e pochi dos bo ta haña e seis ekipo nan ku ta di renk mas malu di e 18 ekipo nan restante. E seis ekipo nan aki ta wòrdu di lòt number dos i nan ta number tres den kada grupo. Den pochi tres bo ta haña e seis ekipo nan ku ta di renk mas malu di e 12 ekipo nan restante. E ekipo nan aki ta wòrdu di lòt number tres i nan ta number dos den kada grupo. Por último a keda seis ekipo ku ta wòrdu di lòt último i nan ta number 1 den kada grupo. Den otro palabra e sistema ta diseñá pa e ekipo nan mas malu hunga kontra e ekipo nan mas mihó.

Grupo F

FIFA CONCACAF Renk

Orden di Lot

Haiti

12

4

Antigua i Barbuda

13

3

Kòrsou

21

2

US Virgin Islands

33

1

E ganadó di kada grupo ta pasa pa e siguiente buèlta. Kiko FIFA ta hasi den e buèlta aki? Den e buèlta aki FIFA ta dividí e ekipo nan den tres grupo di kuater ekipo kada un. Pa hasi e repartishon aki atrobe FIFA ta parti e ekipo nan den pochi. Den pochi unu bo ta haña e tres ekipo nan mihó di renk pa FIFA den CONCACAF kual ta Merka, Mexico i Hondúras, nan ta wòrdu di lòt último i ta bin na kabes di kada grupo. Den pochi dos  bo ta haña e di kuater, di sinku i di seis ekipo nan mihó di renk den CONCACAF, kual ta Jamaica, Costa Rica i Cuba. E ekipo nan den pochi dos ta wòrdu di lòt number dos i konsekuentemente ta number dos den kada grupo. Por último den pochi tres bo ta haña e seis ganadó nan di e buèlta anterior, ku en realidat ta e seis ekipo ku ta di renk mas malu ku e keda den e kompetensia. Nan ta wòrdu di lòt promé i ta number tres i kuater den kada grupo. Un biaha mas bo ta haña un sistema diseñá pa e ekipo nan mas malu hunga kontra e ekipo nan mas mihó.

Tantu e ganadó komo e promé finalista di kada grupo ta pasa pa e siguiente buèlta. Den e buèlta aki ta bai tin un grupo di seis ekipo. E tres ekipo nan ku puntuashon mas haltu ta pasa pa Brazil 2014, miéntras ku e di kuater ekipo ku puntuashon mas haltu mester hunga den e playoff inter-kontinental.

Kòrsou por yega mundial 2014? Tur kos ta posibel pero e no ta mustra masha probabel. Prinsipalmente teniendo na kuenta ku FIFA konsientemente ta protehé e mihó e ekipo nan den CONCACAF. Konsientemente FIFA ta laga e ekipo nan mas malu enfrentá gigante nan den futbòl ku e konsekuensia ku kasi semper pa no bisa semper e ekipo nan aki ta kai chikí. Mester bin un kambio den e manera ku e klasifikatorio pa mundial ta tuma lugá, prinsipalmente den CONCACAF anto e ora ey kisas Kòrsou tin un chèns mas realístiko pa yega mundial.

Posted on

Bòkseo Despues di Wega

Despues ku e partido di semifinal entre Paraguay i Venezuela a kaba pa via di pinalti, ta parse ku ainda e hungadó nan tabata tin energia. Pa e motibu aki nan a disidí di tira algu moketa despues di e partido aki, kaminda Paraguay a sali viktorioso for di pinalti ku un skor di 5-3.

[youtube 3jBJSQMxgl0]

[youtube B9wDnLHuKc]

Posted on

Aruba ku Bista Riba Rusia 2018

E kaminda pa mundial di futbòl Brazil 2014 ta bai kuminsá. Concacaf kual ta e konfederashon den kua Kòrsou tambe ta forma parti tin e primisia pa kuminsá e kaminda pa Brazil 2014. Den e promé parti di e kompetensia di Concacaf e 10 ekipo nan di Concacaf ku puntuashon mas abou den e “ranking” di FIFA lo hunga kontra otro.

Pa e motibu aki Aruba ta kuminsá hunga dia ocho di yüli kontra St. Lucia i dia 12 di yüli Aruba lo hunga e partido di regreso kontra St.Lucia. E sinku ganadó nan den e buèlta aki lo topa e otro 19 (inkluyendo Kòrsou) ekiponan di Concacaf den e siguiente etapa di e kompetensia klasifikatorio pa mundial 2014.

Den e promé partido di dia ocho di yuli na Kompleho Deportivo Guillermo Prospero Trinidad na Aruba, Aruba a logra gana di St. Lucia ku skor di 4 pa 2. Pa Aruba e gol nan a wòrdu anotá pa Erik SANTOS DE GOUVEIA (13′), Maurice ESCALONA (46′), Frederick GOMEZ (74′) i David ABDUL (84′). Pa St. Lucia tabata Kevin EDWARD (19′) i Kurt FREDERICK (46′).

Den e di dos partido dia 12 di yüli na Castries Mindoo Philips Park na St. Lucia, Aruba ta kai vensí den pinalti despues di pèrdè e partido 4 pa 2. Pa St. Lucia e gol nan a wòrdu anotá pa Jamal JOSEPH (14′ 29′ 71′) i Kurt FREDERICK (74′). Pa Aruba tabata Frederick GOMEZ (37′ 76′).

Ku e resultado aki Aruba su kaminda pa mundial di Futbòl Brazil 2014 a yega na su fin I nan tin ku kuminsá prepará pa mundial di Futbòl Rusia 2018. Kòrsou tin ku warda te 30 di yüli 2011 pa por sa kontra ken e ta bai kuminsá su trayektoria históriko, rumbo pa Brazil 2014. Dia 30 yüli 2011 na Rio de Janeiro, Brazil, FIFA lo saka e grupo den kua kada un di e 24 ekipo nan di Concacaf lo forma parti dje.

Posted on

Manchester United FC òf FC Barcelona?

Durante di e temporada 1955/56, UEFA a krea e kompetensia di futbòl di klup ku pa hopi awe ta esun di mas prestigioso na mundu. Na 1955/56 UEFA a yama e kampionato aki “Kopa Klup nan Kampion Europeo”, na aña 1992 UEFA a kambia e nòmber aki pa “UEFA Liga di Kampion nan”.

E aña aki e ekipo di Manchester United FC ta bai topa FC Barcelona pa asina determiná ken lo bai ku e titulo di kampion pa e temporada 2010/2011. Hopi ta esnan ku ya ta preparando pa e partido aki i hopi ta esnan ku ta purba predesi e ganadó. Promé bo predesi ken abo ta kere ta bai gana mañan tene na kuenta e siguiente análisis.

Ekipo nan di Spaña i Italia ta e 2 pais nan mas eksitoso den e final di Liga di Kampion nan, kada un di nan a gana e kompetensia 5 biaha. Spaña a logra su 5 titulo nan den kompetensia aki den 8 partisipashon ku nan tabata tin. For di esaki por konkluí ku ekipo nan spañó tin un porsentahe di wega gana di 62.5%. Pero si analisá esaki for komienso di e kompetensia aki e ora ey ekipo nan spañó a logra e titulo 12 biaha den 21 aparensia, esaki ta hiba ekipo nan spañó na un porsentahe di wega gana di 57.1%.

Ekipo nan di Inglatera di otro banda a hunga e final di Liga di Kampion nan na 7 okashon. Di e 7 okashon nan aki solamente 3 biaha ekipo nan ingles a logra bai ku e titulo. Esaki ta hiba ekipo nan ingles na un porsentahe di wega gana di 42.8%. Si konsiderá e rekòrt di ekipo nan ingles for di komienso di e kampionato aki, ekipo nan ingles a gana 11 biaha den 17 aparishon. Esaki ta duna ekipo nan ingles un porsentahe di wega gana di 64.7%.

Tantu FC Barcelona komo Manchester United FC a gana nan promé titulo di e Kopa Klup nan Kampion Europeo na e antiguo stadion di Wembley i tur 2 ta bai bringa pa nan di 4 titulo, e biaha aki na e stadion di Wembley nobo . E último biaha ku e 2 ekipo nan aki a topa den e final di Liga di Kampion nan tabata na 2009, kaminda FC Barcelona a gana 2 pa nada.

Esaki lo bira e di 11 final di Kopa Europeo den kua un ekipo ta hunga den nan mes pais. Na 7 okashon e ekipo di kas a sali viktorioso. Den e 7 viktoria nan aki bo tin 1 di Manchester United FC na aña 1968. FC Barcelona ta un di e ekipo nan ku a pèrdè na kas, esaki na aña 1986.

For di aña 1955 FC Barcelona a partisipá 6 biaha den final i a logra e titulo na 3 okashon. Di e 3 biaha nan ku FC Barcelona a logra bai ku e titulo, 2 biaha tabata kontra ekipo nan ingles. Manchester United FC a pasa pa final na 4 okashon i logra bai ku e titulo 3 biaha. E úniko biaha ku Manchester United FC a pèrdè un final tabata kontra FC Barcelona.

Manchester United FC a yega di hunga 9 biaha na e Wembley nobo i 5 di nan partido nan a bai pinalti. Den e 9 partido nan aki Manchester United FC a logra gana 6 partido i pèrdè 3. Manchester United FC a yega di hunga 40 partido kontra di ekipo nan spañó i a logra gana 11 i pèrdè 16.

Por lo general FC Barcelona tin bon resultado kontra ekipo nan ingles, na tur nan a hunga 62 biaha kontra ekipo nan ingles i nan a gana 23 i pèrdè 16. FC Barcelona a yega di hunga 27 biaha, no na kas kontra di ekipo nan ingles. Den e 27 partido nan aki FC Barcelona a logra gana 6 biaha, tabla 8 i pèrdè 13 biaha.

Den kampionato nan organisá pa UEFA tin 15 biaha ku ekipo nan ingles a topa ekipo nan spañó den final. Di e 15 partido nan aki, ekipo nan spañó a logra e viktoria na 8 okashon. Den e 8 okashon nan aki FC Barcelona a sali viktorioso na 2 okashon, miéntras ku Manchester United FC a Sali viktorioso na 1 okashon. Di e 7 biaha nan ku ekipo nan ingles a gana, 3 di nan viktoria nan tabata kontra FC Barcelona.

FC Barcelona ta e ekipo ku mas gol anotá den e kompetensia, ku 27. Lionel Messi ta e hungadó ku mas gol den e kompetensia ku 11 gol, 7 gol mas tantu ku e strea di Manchester United, Javier Hernandez. Pero di otro banda Manchester United FC a konsedé solamente 4 gol den e kompetensia, esaki ta hasi nan e ekipo ku ménos gol permití den e kompetensia.

Kontra ekipo nan ingles FC Barcelona a hunga 57 partido den kua nan a gana 23, pèrdè 16 i tabla 18. Miéntras ku Manchester United FC a hunga 40 partido kontra ekipo nan spañó, di esaki nan e la gana 11, pèrdè 12 i tabla 17. Hungando na kas kontra ekipo nan spañó Manchester United FC tin un rekòrt di 8 wega gana, 2 pèrdí i 9 wega tabla. FC Barcelona tin un rekòrt di 6 wega gana, 12 pèrdí i 8 tabla ora e ta hunga kontra ekipo nan ingles for di kas. Den final kontra ekipo nan ingles FC Barcelona a yega di gana 2 biaha i pèrdè 2 biaha. Manchester United FC den final kontra ekipo nan spañó e yega di gana 1 i pèrdè 1.

Den historia di e 2 ekipo nan aki nan a yega di hunga 10 biaha kontra otro. Tur 2 ekipo a gana 3, pèrdè 3 i tabla 4. Hungando komo ekipo di kas Manchester United FC a gana 2 biaha, pèrdè 0 i tabla 2 biaha. FC Barcelona hungando komo bishitante kontra Manchester United FC, nunka no a gana i a tabla 2 biaha i pèrdè 2 biaha. Na 2 okashon e 2 ekipo nan aki a topa den final i tur 2 a gana 1 biaha.

Posted on

Kòrsou tin ku warda miéntras Aruba su destino pa mundial Brazil 2014 ta kuminsá pronto.

E kaminda pa mundial di futbòl Brazil 2014 ta bai kuminsá. Dia tres di yüni FIFA ta ranka sali ku e promé partido nan pa asina determiná kua ta e diferente pais nan ku lo partisipá den e mundial di futbòl Brazil 2014.

Concacaf kual ta e konfederashon den kua Kòrsou tambe ta forma parti tin e primisia pa kuminsá e kaminda pa Brazil 2014. Den e promé parti di e kompetensia di Concacaf e 10 ekipo nan di Concacaf ku puntuashon mas abou den e “ranking” di FIFA lo hunga kontra otro.

Pa e motibu aki Aruba ta kuminsá hunga dia tres di yüni kontra St. Lucia i dia shete di yüni Aruba lo hunga e partido di regreso kontra St.Lucia. E sinku ganadó nan den e buèlta aki lo topa e otro 19 (inkluyendo Kòrsou) ekiponan di Concacaf den e siguiente etapa di e kompetensia klasifikatorio pa mundial 2014.

Kòrsou tin ku warda te 30 di yüli 2011 pa por sa kontra ken e ta bai kuminsá su trayektoria históriko, rumbo pa Brazil 2014. Dia 30 yüli 2011 na Rio de Janeiro, Brazil, FIFA lo saka e grupo den kua kada un di e 24 ekipo nan di Concacaf lo forma parti dje.

Loke ta sigur ta, ku dia shete di yüni ya Aruba sa su destino pa mundial 2014, sea nan ta pasa pa forma parti di e 24 ekipo nan di Concacaf ku ta sigui lucha pa logra yega Brazil 2014 òf Aruba tin ku kuminsá pensa riba Rusia 2018.

Posted on

Mundial di futbol femenino

Aki algu mas ku un luna ta kuminsá e kampionato mundial di futbòl femenino. Despues ku FIFA a kuminsá ku e kampionato aki na 1991, Alemania lo ta e anfitrion di e di seis kampionato di futbòl femenino.

Kompará ku mundial di futbòl maskulino, e mundial di futbòl femenino no ta haña mesun tantu atenshon. Pero segun FIFA e mundial di futbòl femenino di aña aki lo bai tin un kobertura sin presedente. Esaki lo bira e kobertura di mas grandi den historia di futbòl femenino, segun Niclas Ericson, Direktor di FIFA TV.

E diferente selekshon nan ku lo forma parti di e mundial aki ta kasi similar na e mundial maskulino. Bo ta haña selekshon nan manera: Alemania, Nigeria, Fransia, Mexico, Inglatera, Merka i Brazil. Loke ta interesante den e mundial aki ta ku despues di kuater aparishon den mundial di futbòl maskulino, e selekshon di Colombia ta bai partisipá pa promé biaha den mundial di futbòl femenino.

Tambe den mundial aki bo por tuma nota di e hungadó di Brazil, Marta Vieira da Silva. Marta ta loke ami ta konsiderá e vershon femenino di Ronaldinho. Ta realmente un plaser pa bo sinta wak e mucha muhé aki hunga futbòl i mi ta tribi di bisa ku e ta mihó futbolista ku hopi hungadó maskulino. Kiermen si bo no ta interesá na wak e partido nan den e mundial femenino mi ta sugerí bo pa hasi un esfuerso i wak maske ta un wega di e mucha muhé aki.

Klip kortiku di Marta den Mundial na 2007 na China.
[youtube ibBT-_2ubbM]

Posted on

Bo por stima FC Barcelona pero odia New York Yankees?

Den e mundu di deporte nos tur tin nos ekipo nan favorito pero di otro banda tambe tin ekipo nan ku nos no ta gusta. Tin diferente motibu dikon un hende por laga di gusta òf  odia un ekipo di deporte. E simpel echo ku un ekipo ta rival di un ekipo ku bo ta favoresé por ta un motibu di esaki. Tambe por ku un sierto ekipo ta simplemente demasiado eksitoso i ta parse ku semper nan ta viktorioso. Tin biaha tambe nos ta yalurs paso e ekipo ku nos ta favoresé no ta eksitoso manera otro ekipo.

Un di e ekipo nan di mas odia den e mundu deportivo ta e ekipo di New York Yankees òf mihó konosí bou di esnan ku no ta gust’é komo “the Evil Empire.” Si bo puntra e hende nan aki dikon nan ta odia Yankees mayoria di nan lo bisabu: Yankees ta gasta muchu sèn òf Yankees no ta traha ekipo, sino nan ta kumpra nan ekipo. Tambe tin otro nan ku no ta bisabu nada, pero nan simplemente no ta gusta e echo ku Yankees a gana Seri Mundial 27 biaha.

FC Barcelona tin un kantidat grandi di fanátiko. Segun e página di Facebook di FC Barcelona, nan tin 13.849.535 persona ku simpatisá ku e ekipo. Di otro banda New York Yankees tin 3.645.055 fanátiko riba nan página di Facebook. Esaki ta mustrabu ku FC Barcelona tin sigur 4 biaha mas tantu fanátiko ku New York Yankees. Esaki ta nifiká ku e chèns ta grandi ku tin sierto persona ku ta simpatisá ku FC Barcelona pero no New York Yankees. Ku esaki den mente mi a yega na e siguiente pregunta: bo por stima FC Barcelona pero odia Yankees?

Segun un estudio hasi pa Sportingintelligence e ekipo di FC Barcelona a sali e ekipo ku ta paga mihó den deporte mundial. Barcelona a sali riba nan rival Real Madrid ku ta na di dos lugá i a kita New York Yankees for di e promé lugá. FC Barcelona su average salarial ta $7.910.737 pa aña. Di otro banda e ekipo di New York Yankees tin un average salarial di $6.756.301 pa aña.

Si nos kompará salario di hungadó individual, New York Yankees tin e hungadó di mas mihó paga den Liga Grandi. Alex Rodriguez lo kobra $31.000.000 e aña aki komo parti di e kontrakt di $275.000.000 ku e la firma ku New York Yankees pa 10 aña.

FC Barcelona no tin e hungadó mihó paga den futbòl pero si nan tin e hungadó di tres mihó paga den futbòl. Segun Forbes.com Lionel Messi di FC Barcelona a gana $32.000.000 den aña 2010. Na 2010 Messi a kobra $16.000.000 pa su servisio na e ekipo di FC Barcelona i e la haña $16.000.000 adishonal for di su spònser nan manera Adidas, Lay’s, Konami i Air Europa. Na puesto number un tin komo e hungadó mihó den futbòl David Beckham, ku un entrada di $40.000.000 den 2010. Na puesto number dos ta Cristiano Ronaldo di Real Madrid, ku un entrada di $38.000.000. Ta importante pa menshoná ku si nos wak e salario ku e hungadó a risibí di su respektivo ekipo sin konta entrada di spònser, e ora ey Cristiano Rolando ta e hungadó mihó paga, ku un salario di $19.500.000 ku e ta risibí di Real Madrid.

Hopi hende ku ta odia New York Yankees ta bisabu Yankees no ta traha nan ekipo pero nan ta kumpra nan ekipo. Ku esaki e fanátiko di deporte ku ta odia Yankees kiermen ku Yankees en bes di usa hungadó di nan “farm system” pa traha un ekipo kampion, New York Yankees ta kumpra e hungadó nan aki riba merkado. Si nos analisá e roster di 25 di New York Yankees, Yankees tin 11 (44%) hungadó ku a debutá den Liga Grandi ku Yankees. Di otro banda e ekipo di FC Barcelona tin nuebe (43%) hungadó di e 21 hungadó nan ku ta forma parti di e ekipo básiko ku a debutá ku FC Barcelona.

Na mart 1903 e frankisia di New York e tempu ey bou di e nòmber New York Highlanders a wòrdu establesé na Manhattan, New York. For di 1903 te ku 2011 New York Yankees a logra gana 27 titulo di Seri Mundial, 40 biaha nan a sali kampion di Liga Amerikano i 16 biaha nan a gana e titulo di divishon ost. Kuater aña promé na 1899, Hans Gamper a funda Futbol Club Barcelona. Den e 112 aña di eksistensia di Barcelona a gana mayoria kompetensia di futbòl, ku eksepshon di e Kopa Intercontinental òf Kopa Toyota.

Na tres okashon FC Barcelona a gana UEFA Liga di Kampion, 25 biaha Kopa Spañó, 20 biaha e Kampionato di Liga Spañó, 9 biaha e Super Kopa Spañó, tres biaha nan a gana e Super Kopa Europeo i un biaha nan a gana e Mundial di Klup FIFA.

Esaki ta trese dilanti atrobe e pregunta: bo por stima FC Barcelona pero odia New York Yankees? Si e motibu dikon bo ta odia New York Yankees ta pa un di e rason nan ariba menshoná, probablemente bo no por stima FC Barcelona. No tin masha diferensia entre Yankees i FC Barcelona kiermen ku sea bo ta stima tantu New York Yankees i FC Barcelona òf bo ta odia tur dos.

Posted on

Korsou riba ranking di FIFA!

Pa promé biaha den historia Kòrsou ta paresé den e ranking ofisial di FIFA (www.fifa.com). Aktualmente Kòrsou ta di rank na puesto 146 i Kòrsou ta number 21 den e federashon regional CONCACAF. Na tur yu di Kòrsou prinsipalmente mi amigu Sr. Rignaal “Jean” Francisca i Federashon di Futbòl Kòrsou (FFK) pabien ku e logro aki. Ban biba ku nos ekipo nashonal di futbòl i sostené den bon i den malu, mustra ku bo ta un berdadero Yu di Kòrsou. Klik riba e potrèt pa mir’é mas grandi. E potret nan ta kortesia di: www.fifa.com

Korsou ta di rank na puesto 146
Korsou riba FIFA.com
Posted on

Dikon Federashon di Futbòl Kòrsou (FFK) por ta miembro di FIFA

Últimamente hopi di nos prinsipalmente esun nan yega na deporte ta diskutí riba henter e asuntu di Kòrsou i su rekonosimentu den deporte internashonal. Manera ta konosí tin Federashonnan Internashonal di deporte ku no ta akseptá Kòrsou komo miembro ya komo ku Kòrsou no ta un pais independiente.

Den e siman ku a pasa mi a tuma nota ku Federashon di Futbòl Kòrsou (FFK) a wòrdu akseptá komo miembro di FIFA. Esaki ta nifiká ku Kòrsou lo kompetí den e mundu di futbòl komo pais Kòrsou ku su propio bandera i himno. Pa logra esaki e nòmber FFK a ser kambia den Liga di Futbòl General. Esaki a habri e kaminda pa den un otro reunion general di Nederlands Antilliaanse Voetbal Unie (NAVU) e delegadonan di NAVU unánimamente bai di akuerdo pa kambia e nòmber di NAVU den FFK.

Tur esaki nan a hasi mi kurioso pa sa ku si FFK no a usa e táktika ariba menshoná i a hasi mané otro federashonnan di deporte na Kòrsou, nan lo por a bira miembro di FIFA tòg? E kontesta riba e pregunta aki ta SI. Awor kasi sigur lo bo ta puntra bo mes kon porta si Kòrsou no ta un pais independiente. Pa komprondé esaki bo tin ku wak kiko ta e rekisito nan pa un pais bira miembro di FIFA.

Kiko ta e rekisito nan pa un pais bira miembro di FIFA?

1.       Kualke asosashon ku ta responsabel pa organisá i supervisá futbòl den su pais por bira miembro di FIFA. Den e   konteksto aki “pais” ta referí na un pais independiente rekonosé pa e komunidat internashonal.

2.       Miembresia ta wòrdu permití solamente si un asosashon tabata un miembro provishonal di un Konfederashon (por ehèmpel, CONCACAF) pa por lo ménos 2 aña.

3.       Kualke asosashon ku ta deseá di bira miembro di FIFA mester  apliká riba papel mandando un karta pa e sekretariado general di FIFA.

4.       E statuto nan di e asosashon mester ta huntu ku e aplikashon di miembresia i e mester kontené e siguiente provishon nan:

a.        semper kumpli ku e Statuto, regulashon i desishon nan di FIFA i su Konfederashon;

b.      kumpli ku e regla nan di wega na vigor;

c.       rekonosé Korte di Arbitrahe pa Deporte.

5.       Kada un di e kuater asosashon nan Britániko ta wòrdu rekonosé komo miembro separá di FIFA.

6.       Un asosashon den un region ku no a yega na independensia ainda por apliká pa atmishon na FIFA, ku outorisashon di e asosashon den e pais ku e ta dependiente di dje.

7.       Statuto nan di FIFA ta regulá e detaye nan relashoná ku e prosedura di atmishon.

8.       E artíkulo aki lo no afektá e status di miembro nan eksistente.

Mirando e punto number 6 den e rekisito nan ku mester kumpli kuné pa bira miembro di FIFA mi por konkluí ku di tur manera FFK por a bira miembro di FIFA. Úniko kos ku esaki ta trese kuné ta ku kisas nos mester a warda e dos aña nan manera ta stipulá den e punto number 2 pa nos bira miembro. Esaki ta nifiká ku e táktika ku NAVU i despues FFK a usa ta un táktika ku a duna Kòrsou miembresia na FIFA di forma inmediato. Pero si esaki lo no a logra tòg Kòrsou lo tabata tin un otro manera pa bira miembro.

Posted on

Mundial Fifa 2010

Tur loke bo ke sa di Mundial di Futbol na Sur Afrika den menos ku 1 ora riba www.livestream.com/evertsz. Si bo no por wak e kompletu den un biaha bo por klik riba e clipnan ku tin abou anto mira esun clip ey so.

Facebook Twitter Instagram Youtube
© 2025 Deporte Awe. Tur derechi reservá. Diseñá pa E² Media