Den e mundu di deporte nos tur tin nos ekipo nan favorito pero di otro banda tambe tin ekipo nan ku nos no ta gusta. Tin diferente motibu dikon un hende por laga di gusta òf odia un ekipo di deporte. E simpel echo ku un ekipo ta rival di un ekipo ku bo ta favoresé por ta un motibu di esaki. Tambe por ku un sierto ekipo ta simplemente demasiado eksitoso i ta parse ku semper nan ta viktorioso. Tin biaha tambe nos ta yalurs paso e ekipo ku nos ta favoresé no ta eksitoso manera otro ekipo.
Un di e ekipo nan di mas odia den e mundu deportivo ta e ekipo di New York Yankees òf mihó konosí bou di esnan ku no ta gust’é komo “the Evil Empire.” Si bo puntra e hende nan aki dikon nan ta odia Yankees mayoria di nan lo bisabu: Yankees ta gasta muchu sèn òf Yankees no ta traha ekipo, sino nan ta kumpra nan ekipo. Tambe tin otro nan ku no ta bisabu nada, pero nan simplemente no ta gusta e echo ku Yankees a gana Seri Mundial 27 biaha.
FC Barcelona tin un kantidat grandi di fanátiko. Segun e página di Facebook di FC Barcelona, nan tin 13.849.535 persona ku simpatisá ku e ekipo. Di otro banda New York Yankees tin 3.645.055 fanátiko riba nan página di Facebook. Esaki ta mustrabu ku FC Barcelona tin sigur 4 biaha mas tantu fanátiko ku New York Yankees. Esaki ta nifiká ku e chèns ta grandi ku tin sierto persona ku ta simpatisá ku FC Barcelona pero no New York Yankees. Ku esaki den mente mi a yega na e siguiente pregunta: bo por stima FC Barcelona pero odia Yankees?
Segun un estudio hasi pa Sportingintelligence e ekipo di FC Barcelona a sali e ekipo ku ta paga mihó den deporte mundial. Barcelona a sali riba nan rival Real Madrid ku ta na di dos lugá i a kita New York Yankees for di e promé lugá. FC Barcelona su average salarial ta $7.910.737 pa aña. Di otro banda e ekipo di New York Yankees tin un average salarial di $6.756.301 pa aña.
Si nos kompará salario di hungadó individual, New York Yankees tin e hungadó di mas mihó paga den Liga Grandi. Alex Rodriguez lo kobra $31.000.000 e aña aki komo parti di e kontrakt di $275.000.000 ku e la firma ku New York Yankees pa 10 aña.
FC Barcelona no tin e hungadó mihó paga den futbòl pero si nan tin e hungadó di tres mihó paga den futbòl. Segun Forbes.com Lionel Messi di FC Barcelona a gana $32.000.000 den aña 2010. Na 2010 Messi a kobra $16.000.000 pa su servisio na e ekipo di FC Barcelona i e la haña $16.000.000 adishonal for di su spònser nan manera Adidas, Lay’s, Konami i Air Europa. Na puesto number un tin komo e hungadó mihó den futbòl David Beckham, ku un entrada di $40.000.000 den 2010. Na puesto number dos ta Cristiano Ronaldo di Real Madrid, ku un entrada di $38.000.000. Ta importante pa menshoná ku si nos wak e salario ku e hungadó a risibí di su respektivo ekipo sin konta entrada di spònser, e ora ey Cristiano Rolando ta e hungadó mihó paga, ku un salario di $19.500.000 ku e ta risibí di Real Madrid.
Hopi hende ku ta odia New York Yankees ta bisabu Yankees no ta traha nan ekipo pero nan ta kumpra nan ekipo. Ku esaki e fanátiko di deporte ku ta odia Yankees kiermen ku Yankees en bes di usa hungadó di nan “farm system” pa traha un ekipo kampion, New York Yankees ta kumpra e hungadó nan aki riba merkado. Si nos analisá e roster di 25 di New York Yankees, Yankees tin 11 (44%) hungadó ku a debutá den Liga Grandi ku Yankees. Di otro banda e ekipo di FC Barcelona tin nuebe (43%) hungadó di e 21 hungadó nan ku ta forma parti di e ekipo básiko ku a debutá ku FC Barcelona.
Na mart 1903 e frankisia di New York e tempu ey bou di e nòmber New York Highlanders a wòrdu establesé na Manhattan, New York. For di 1903 te ku 2011 New York Yankees a logra gana 27 titulo di Seri Mundial, 40 biaha nan a sali kampion di Liga Amerikano i 16 biaha nan a gana e titulo di divishon ost. Kuater aña promé na 1899, Hans Gamper a funda Futbol Club Barcelona. Den e 112 aña di eksistensia di Barcelona a gana mayoria kompetensia di futbòl, ku eksepshon di e Kopa Intercontinental òf Kopa Toyota.
Na tres okashon FC Barcelona a gana UEFA Liga di Kampion, 25 biaha Kopa Spañó, 20 biaha e Kampionato di Liga Spañó, 9 biaha e Super Kopa Spañó, tres biaha nan a gana e Super Kopa Europeo i un biaha nan a gana e Mundial di Klup FIFA.
Esaki ta trese dilanti atrobe e pregunta: bo por stima FC Barcelona pero odia New York Yankees? Si e motibu dikon bo ta odia New York Yankees ta pa un di e rason nan ariba menshoná, probablemente bo no por stima FC Barcelona. No tin masha diferensia entre Yankees i FC Barcelona kiermen ku sea bo ta stima tantu New York Yankees i FC Barcelona òf bo ta odia tur dos.