Category: Futbòl

Posted on

Kòrsou ku Wega Importante Kontra Antigua!

Djabièrnè 7 di òktober e wega nan klasifikatorio pa mundial Brazil 2014 ta kontinuá. Un biaha mas Kòrsou ta hunga kontra Antigua i Barbuda, e úniko diferensia entre e wega aki i esun anterior ta ku Kòrsou ta hunga na kas i ta un wega ku Kòrsou mester gana.

Sinseramente no nesesariamente Kòrsou mester gana djabièrnè, un empate tambe ta tene Kòrsou na bida aunke ku un empate e kos ta omplika hopi. Dikon Kòrsou no por permití di pèrdè den e siguiente partido? Pa un ekipo pasa pa e siguiente buèlta di klasifikashon pa mundial e mester gana su grupo, ku otro palabra Kòrsou mester sali na promé lugá den e grupo ku e ta ku Haiti, Antigua i Isla Virgenes. Si Kòrsou pèrdè kontra Antigua e mester gana tur su siguiente 3 partido nan i spera ku Antigua ta pèrdè tur su 3 siguiente partido nan pa asina forsa un empate na 9 punto ku Antigua. Pero pa Antigua pèrdè tur 3 di su siguiente partido nan ta nifiká ku Haiti ta gana por lo mínimo 2 partido. Ku Haiti ganando e 2 partido nan aki ta sufisiente pa nan yega 12 punto i asina gana e grupo.

Den e promé partido kontra Antigua, Kòrsou a pèrdè ku skor di 5 pa 2, apesar di esaki tòg e situashon ta mustra alentador pa Kòrsou. E wega nan ku Kòrsou a hunga par di siman pasa kontra Sürnam ta hopi importante. Sürnam ta un selekshon na nivel di Antigua, tur 2 ekipo a wòrdu di lòt number 2 den nan respektivo grupo pues tur 2 ekipo ta e di 2 mihó ekipo den nan grupo (lesa Korsou por yega mundial 2014?). Kontra Sürnam, Kòrsou a pèrdè 1 partido i empatá e siguiente partido, importante di esaki ta ku Kòrsou a empatá kontra Sürnam na Sürnam ku solamente su hungadó nan lokal. Na momentu ku Kòrsou hunga djabièrnè kontra Antigua, Kòrsou lo no konta solamente ku su hungadó nan lokal pero lo konta tambe ku refuerso di hungadó nan ku ta hunga den eksterior.

E wega di Kòrsou lo tuma lugá djabièrnè awor dia 7 di òktober, 8’or di anochi ora lokal di Kòrsou na Sentro Deportivo Kòrsou. Entrada pa e wega lo ta NAF 15,-pa hende grandi i 7.50 pa mucha i 60 plùs. Kumpra bo karchi for di tempran na entre otro Beep Beep Rio Canario, Pòmp di gasolin Jansen nan Sta. Maria, SDK I ofisina di FFK na Brievengat.

Posted on

CIBC FirstCaribbean ta Hasi Entrega Ofisial di Ròlstul na Glennon Haynes!

CIBC First Caribbean International Bank un biaha mas ta duna kontenido na su promesa pa enrikesé bida di un suidadano di nos isla ora ku e banko a hasi entrega ofisial di un ròlstul kompletamente adiestrá na e nesesidat di e suidadano.

Glennon Haynes a keda limitá na un ròlstul despues di a sufri un aksidente den pleno kompetensha di futbòl.  CIBC FirstCaribbean resientemente a entreg’é ofisialmente un ròlstul nobo, algun siman despues di a sorprendé “live” durante di un edishon di e programa popular na televishon “Hòmber” ku e promesa ku e banko lo perkurá pa un ròlstul pe.

E ròlstul, kompletamente adiestrá na su nesesidat, resientemente a yega Kòrsou i FirstCaribbean a hasi entrega ofisial di e stul na Sr. Haynes, komo muestra di rekonosementu di su kontinuo aktitut positivo ante bida i su espíritu empresarial.

E seremonia a tuma lugá na e ofisina prinsipal di CIBC FirstCaribbean durante di un enkuentro ameno huntu ku famia Haynes, empleadonan i prensa.

Futbòl ta un di e deportenan mas popular riba nos isla.  Haynes, kende tabata defendé di e ekipo di Centro Dominguito, a kompetí den e divishon mas haltu di nos futbòl.  Tabata durante di kampeonato regular na 2005 ku Haynes sufri un aksidente serio.  Hopi deportista i otronan, ku a sufri tipo di aksidentenan serio asin’aki, a keda inspirá pa e ehèmpel duna dor di Sr. Haynes.  Maske ku ela keda desabilitá, dor di e aksidente aki, tòg Haynes a keda mantené e mes un prinsipionan di un deportista i espíritu kombativo ku e tabatin promé ku ela sufri e aksidente.

Desafortunadamente e ròlstul, ku Haynes tabata usa, tabata strob’é di move i tabata un opstákulo den su funshonamentu.  Pa e motibu aki e tabatin mester di un ròlstul speshal adaptá na su sirkunstansha.

E donashon di CIBC FirstCAribbean di un ròlstul speshalmente prepará pa

Sr. Haynes mester keda konsiderá komo un muestra di e banko su kompromiso pa sigui enrikesé nos komunidat.  Managing Director, Pim van der Burg, na okashon di anunsio di kompra di e ròlstul, a enfatisá en bista di e aktitut semper optimista riba bida di Glennon Haynes, e forma determiná ku e ta enfrentá su retonan i su espíritu empresarial.  Esaki segun van der Burg mester sirbi komo un ehèmpel pa nos tur den komunidat.

Lysaira Arvelo-Ortela, Marketing Manager di CIBC FirstCaribbean na Kòrsou ta hasi entrega ofisial di rolstul na Glennon Haynes.
Posted on

Kòrsou ta empatá den di dos partido kontra Sürnam!

E selekshon di Kòrsou a biaha pa Paramaribo, Sürnam, kaminda lo hunga dos wega amistoso komo preparashon pa e siguiente kompromisonan den e buèlta eliminatorio pa yega Mundial 2014. Den un komunikado emití, F.F.K. ta trese dilanti ku e selekshon a hasi e biahe bou di direkshon tékniko di e argentino Manuel Bilches i su asistente lokal Gersley Gijsbertha.

Den e promé partido ku Kòrsou hunga kontra Sürnam riba djabièrnè 23 di sèptèmber, Kòrsou a pèrdè ku e skor di 2 pa 0. Na di 25 minüt di e promé tempu e ekipo di Sürnam a bai ariba 1 pa 0 ku gol di Stefano Rijssel. Djis despues di e komienso di e di dos mitar Milton Pinas ta anotá pa hasi e skor 2 pa 0.

Awe Kòrsou a hunga su di dos wega di training kontra Sürnam i a empatá den e partido aki. Na di 14 minüt Sürnam a bai ariba ku gol di Evani Esperance, e bentaha aki no a dura muchu ya komo ku den promé mitar mes Mirco Colina Jr. ta empatá e partido pa Kòrsou. Den di dos mitar un biaha mas Sürnam ta bai ariba 2 pa 1 riba un tira liber di Giovanni Drenthe. Un biaha mas Mirco Colina Jr. ta sali na defensa di Kòrsou i ta empatá e partido na 2, ku alabes a bira e resultado final.

Posted on

Kòrsou a pèrdè den wega di training na Sürnam!

E selekshon di Kòrsou a biaha pa Paramaribo, Sürnam, kaminda lo hunga dos wega amistoso komo preparashon pa e siguiente kompromisonan den e buèlta eliminatorio pa yega Mundial 2014. Den un komunikado emití, F.F.K. ta trese dilanti ku e selekshon a hasi e biahe bou di direkshon tékniko di e argentino Manuel Bilches i su asistente lokal Gersley Gijsbertha.

Den e promé partido ku Kòrsou hunga kontra Sürnam riba djabièrnè 23 di sèptèmber, Kòrsou a pèrdè ku e skor di 2 pa 0. Na di 25 minüt di e promé tempu e ekipo di Sürnam a bai ariba 1 pa 0 ku gol di Stefano Rijssel. Djis despues di e komienso di e di dos mitar Milton Pinas ta anotá pa hasi e skor 2 pa 0. E siguiente partido di training lo tuma lugá dia 25 di sèptèmber.

Posted on

Selekshon di Korsou ku Wega di Training na Surnam

E selekshon di Korsou a biaha pa Paramaribo, Sürnam, kaminda lo hunga dos wega amistoso komo preparashon pa e siguiente kompromisonan den e buèlta eliminatorio pa yega Mundial 2014. Den un komunikado emití, F.F.K. ta trese dilanti ku e selekshon a hasi e biahe bou di direkshon tékniko di e argentino Manuel Bilches i su asistente lokal Gersley Gijsbertha.

Dia 7 di òktober awor aki na Kòrsou nos selekshon lo risibí Antigua, miéntras ku dia 11 di òktober nan lo mira akshon na Port-Au-Prince, Haiti. F.F.K. ta trese dilanti ku último dos simannan e kipernan Marcelo Pisas, Raymond Rivierre i Rugenio Josephina a hiba training fuerte bou di mando di e entrenadónan Ruud Koopmans i Jozef Nivellac.

E partidonan na Sürnam lo tuma lugá riba djabièrnè 23 di sèptèmber i djadumingu 25.

E hungadónan ku a hasi e biahe ta:

Kiper: Raymar Revierre, Marcello Pisas, Rugenio Josephia.

Defensa: Joel Victoria, Jervine Mook, Viylison Lake, Glenciene Gregoria.

Mediokampo: Jeramiel Cleofa, Mirco Colina Jr., Shurvey Delando, Richinel Doran, Ferly Servania, Leonard Isenia, R. Santroma.

Delantero: Jamian de Kaster, Daymon Lodovica, Reginal Martina, Charles Martina.

Hefe di delegashon ta Stanley Coffy i e kuerpo tékniko ta formá pa: Manuel Blches, Gersley Gijsbertha, Jozef Nivellac. Masahista Clinton Locadia i dirigente Raynold Mercera tambe ta forma parti dje delegashon.

Kortesia di: www.extra.an

Posted on

E motibu prinsipal dikon Kòrsou no ta yega mundial Brazil 2014!

Deporte Awe! a tuma nota di hopi komentario i te asta desgusto serka hopi hende despues ku nos selekshon nashonal di futbòl a pèrdè nan promé dos wega nan di klasifikashon pa mundial Brazil 2014. E dos wega pèrdí nan aki ta hasi hopi doló, teniendo na kuenta ku práktikamente Kòrsou a laga dos partido slep bai. Den tur e dos partido nan aki Kòrsou a kue bentaha promé i den e partido kontra Haiti, Kòrsou tabata ariba na dos okashon. E echo ku Kòrsou no por a mantené su bentaha ta kousa hopi doló, pa Deporte Awe! e pió kos ku por a sosodé ta ku Kòrsou ta sali for di e dos partido nan aki ku un empate.

Ounke e dos wega pèrdí nan aki ta hasi doló, Deporte Awe! mester rekonosé ku esaki no tabata un sorpresa pa Deporte Awe!. Dikon esaki no tabata un sorpresa pa Deporte Awe!? Algu mas ku un luna pasa Deporte Awe! a analisá henter e struktura di klasifikashon pa mundial Brazil 2014 i yega na e konklushon ku e struktura aktual di klasifikashon pa mundial den CONCACAF ta faboresé ekipo nan ku ta mihó di renk i desfaboresé ekipo nan ku ta di renk mas malu.

CONCACAF tin 35 federashon ku ta forma parti di dje i ku ta den kontienda pa bai mundial Brazil 2014. Promé ku e loteria a tuma lugá dia 30 yüli 2011, e 10 ekipo nan ku ta di renk mas malu den CONCACAF a hunga kontra otro. E sinku ganadó nan di e partido nan aki a pasa pa forma parti di e loteria huntu ku e otro 19 ekipo nan ku ta di renk mas malu i ku no ta forma parti di e 10 nan ku a hunga kaba.

Kiko FIFA ta hasi e ora ey? E sinku ganadó nan di e partido nan ku a tuma lugá promé ku e loteria ta bai den un pochi huntu ku e ekipo ku ta di renk mas malu di e 19 ekipo nan restante. E seis ekipo nan aki ta e promé nan ku ta wòrdu di lòt i nan ta number kuater den kada grupo. Den e pochi dos bo ta haña e seis ekipo nan ku ta di renk mas malu di e 18 ekipo nan restante. E seis ekipo nan aki ta wòrdu di lòt number dos i nan ta number tres den kada grupo. Den pochi tres bo ta haña e seis ekipo nan ku ta di renk mas malu di e 12 ekipo nan restante. E ekipo nan aki ta wòrdu di lòt number tres i nan ta number dos den kada grupo. Por último a keda seis ekipo ku ta wòrdu di lòt último i nan ta number 1 den kada grupo. Den otro palabra e sistema ta diseñá pa e ekipo nan mas malu hunga kontra e ekipo nan mas mihó.

Grupo F FIFA CONCACAF Renk Órden di Lòt
Haiti 12 4
Antigua i Barbuda 13 3
Kòrsou 21 2
US Virgin Islands 33 1

E ganadó di kada grupo ta pasa pa e siguiente buèlta. Kiko FIFA ta hasi den e buèlta aki? Den e buèlta aki FIFA ta dividí e ekipo nan den tres grupo di kuater ekipo kada un. Pa hasi e repartishon aki atrobe FIFA ta parti e ekipo nan den pochi. Den pochi unu bo ta haña e tres ekipo nan mihó di renk pa FIFA den CONCACAF kual ta Merka, Mexico i Hondúras, nan ta wòrdu di lòt último i ta bin na kabes di kada grupo. Den pochi dos  bo ta haña e di kuater, di sinku i di seis ekipo nan mihó di renk den CONCACAF, kual ta Jamaica, Costa Rica i Cuba. E ekipo nan den pochi dos ta wòrdu di lòt number dos i konsekuentemente ta number dos den kada grupo. Por último den pochi tres bo ta haña e seis ganadó nan di e buèlta anterior, ku en realidat ta e seis ekipo ku ta di renk mas malu ku e keda den e kompetensia. Nan ta wòrdu di lòt promé i ta number tres i kuater den kada grupo. Un biaha mas bo ta haña un sistema diseñá pa e ekipo nan mas malu hunga kontra e ekipo nan mas mihó.

Tantu e ganadó komo e promé finalista di kada grupo ta pasa pa e siguiente buèlta. Den e buèlta aki ta bai tin un grupo di seis ekipo. E tres ekipo nan ku puntuashon mas haltu ta pasa pa Brazil 2014, miéntras ku e di kuater ekipo ku puntuashon mas haltu mester hunga den e playoff inter-kontinental.

Deporte Awe! ta reiterá un biaha mas ku e motibu prinsipal ku Kòrsou lo no yega mundial Brazil 2014 no ta pa falta di hungadó i/òf talento, tampoko pa falta di Direktor Tékniko i tampoko no ta pa falta di Federashon Futbòl Kòrsou (FFK). E problema ku Kòrsou tin i mayoria pais den CONCACAF ta a manera ku FIFA ta organisá e kompetensia klasifikatorio pa mundial den CONCACAF.

Deporte Awe! mester menshoná si ku e motibu prinsipal aki no ta kita for di e echo ku mester bin un otro maneho i/òf vishon pa loke ta trata nos futbòl lokal i internashonal. Deporte Awe! ta di pensamentu ku aunke mundial di futbòl ta algu fenomenal pa Kòrsou na e momentu nan aki no ta algu realístiko pa nos mek riba dje. Deporte Awe! ta di pensamentu ku FFK mester kuminsá mek riba kompetensia nan internashonal den nos region tantu na nivel di klup komo selekshon nashonal i di aki sigui krese. Den futuro Deporte Awe! lo amplia mas riba e punto aki.

 

 

 

Posted on

Karchi pa e wega eliminatorio di nos Selekshon Nashonal di Futbòl kontra di Haiti ta kla!

Entrante djarason 31 di ougùstùs lo kuminsá ku benta di karchi pa e wega eliminatorio Mundial 2014. E wega, sumamente importante pa nos Selekshon Nashonal di Futbòl, ta tuma lugá djamars 6 sèptèmber den Stadion Ergilio Hato (S.D.K.). Riba e fecha aki e Selekshon Nashonal di Futbòl di Kòrsou lo topa ku e selekshon di Haiti. Esaki ta bai bira e revancha di 2008 i e promé di e 3  weganan eliminatorio pa Mundial 2014 Brazil ku nos selekshon lo hunga na Kòrsou (na KAS).

Karchinan lo ta na benta na S.D.K., Beep Beep Rio Canario, Pòmpstashon Sta.Maria i ofisina di F.F.K. Preis di karchi pa sekshon general ta Fl.25,00 i pa sekshon speshal ta Fl.150,00. Pa motibunan di seguridat lo NO tin benta di karchi na porta S.D.K. riba e fecha ku e weganan eliminatorio ta tuma lugá. F.F.K., Deporte Awe! i  tur miembro di nos Selekshon Nashonal di Futbòl ta invitá pueblo di Kòrsou pa bin animá i sostené nos selekshon. Ta HUNTU i ku UN META nos ta bai apoyá NOS Selekshon Nashonal pa nan luchá i defendé nos Bandera ku KARAKTER.

Entretantu nos Selekshon Nashonal di Futbòl ta sigui entrená fuerte en espera di algun yu di Kòrsou, ku ta hunga futbòl profeshonal i/òf amatùr den eksterior, pa reforsá nos selekshon. Nos Promé kompromiso pa Mundial 2014 Brazil ta djabièrnè 2 di sèptèmber na Antigua kontra di e selekshon di Antigua.

Posted on

Centro Barber vs. Hubentut Fortuna = Tajikistan vs. Siria?

Último dia nan tin hopi diskushon na Kòrsou riba e partido final di FFK ku a wordu hunga enter Centro Barber i Hubentut Fortuna. Segun Centro Barber e ekipo di Hubentut Fortuna a hunga ku hungadó ku no tabata tin derechi pa hunga den e partido. E apelashon aki a hiba kuné ku e Komishon di Arbitrahe a disidí ku e partido entre Centro Barber i Hubentut Fortuna mester wòrdu hunga di nobo. Si esaki ta un bon desishon òf no Deporte Awe! no sa, ya komo nos no ta disponé di e statuto nan di FFK. Pero loke si Deporte Awe! por hasi ta trese dilanti un kaso similar i su resultado.

Meskos ku Kòrsou ta bai kuminsá su trayektoria pa Mundial 2014, ya Siria a kuminsá esaki den luna di yüli. Riba 23 i 28 di yüli, Siria a hunga kontra di e selekshon di Tajikistan i a sali viktorioso for di nan. Esaki a trese kuné ku Tajikistan a wòrdu eliminá for di e klasifikatorio pa Mundial 2014.

Dia 17 di ougùstùs último e Komishon Disiplinario di FIFA a reuní i a disidí ku Siria ta pèrdè tur dos partido pa motibu ku nan a hunga ku un hungadó ku no tabata tin derechi di hunga den e partido nan ei. E Komishon Disiplinario a basa su desishon a base di Artíkulo 7 di e regulashon nan pa Mundial Brazil 2014.

Esaki a trese komo konsekuensia ku:

  1. Siria ta wòrdu eliminá for di e kompetensia.
  2. Tajikistan ta drenta e kompetensia bek na lugá di Siria.

Segun artíkulo 3di e regulashon nan pa Mundial Brazil 2014 e desishon nan aki no por wòrdu kambia, ni tampoko  apelá e desishon.

 

Posted on

Selekshon Kòrsou Mundial 2014

Esaki ta e lista di hungadó nan ku ta forma parti di e selekshon nashonal di Kòrsou. E informashon aki ta bin di korant Extra.

Kenneth Cicilia

Jerzinho Constancia

Yort Berghuis

Eugene Martha

Elfried Wijman

Soranley Tomsjansen

Benjamin Martha

Rhendeson Tomasa

Vilyson lake

Charles Martina

Bryan Anastacia

Rowendy Sumter

Fernando Zimmerman

Stallone Isenia

Glenciene Gregoria

Shurwedel Roosje

Mirco Colina Jr.

Raymar Rivierre

Joel Victoria

Ramiro Griffith

Ashar Bernardus

Kenneth Kunst

Gedeon Poppen

Ivanny Calvenhoven

Luigino Hoyer

Riengelo Nivillac

Jamian de Kaster

Shurvey Delando
Posted on

Korsou rumbo pa Mundial 2014

Dia 30 di yüli 2011 na Rio de Janeiro a tuma lugá e loteria pa asina repartí e diferente selekshon nan nashonal ku ta miembro di FIFA i asina kuminsá e kaminda pa mundial di futbòl Brazil 2014. Despues ku ya sinku miembro ku ta forma parti di CONCACAF a kai afó, Kòrsou porfin sa kontra ken e ta bai kuminsá su trayektoria pa Brazil 2014. Kòrsou a kai den Grupo F huntu ku Haiti, Antigua i Barbuda i US Virgin Islands.

E promé wega di e selekshon di Kòrsou lo ta dos di sèptèmber kontra di e selekshon di Antigua i Barbuda. Ainda no ta konosí si e partido aki lo tuma lugá na Kòrsou òf na Antigua I Barbuda. E di dos partido ku Kòrsou lo hunga lo ta dia seis di sèptèmber kontra Haiti. Pa despues dia shete di òktober Kòrsou hunga un biaha mas kontra Antigua i Barbuda. Un dia despues di selebrá un aña di pais Kòrsou, dia 11 di òktober Kòrsou lo hunga su di dos partido kontra Haiti. Nèt un luna despues, dia 11 di novèmber Kòrsou lo hunga su promé partido kontra US Virgin Islands. Dia 15 di novèmber Kòrsou lo hunga su di dos partido kontra US Virgin Islands i asina konkluí e fase aki di klasifikatorio pa Mundial 2014.

GRUPO F
FECHA PARTIDO
2-9-2011 Antigua i Barbuda – Kòrsou
6-9-2011 Kòrsou – Haiti
7-10-2011 Kòrsou – Antigua i Barbuda
11-10-2011 Haiti – Kòrsou
11-11-2011 US Virgin Islands – Kòrsou
15-11-2011 Kòrsou – US Virgin Islands

Solamente e ganadó di e grupo ta pasa pa e siguiente buèlta. Den pasado ainda komo Antia Hulandes, Kòrsou a hunga shete biaha konta Antigua i Barbuda i a sali viktorioso na tres okashon i a empatá na dos okashon. Di e shete okashon nan ku Kòrsou a hunga kontra Antigua i Barbuda, na seis okashon tabata den e klasifikatorio pa Mundial i un biaha tabata den un partido amistoso. E último biaha ku Kòrsou a hunga kontra Antigua i Barbuda tabata na 2004 den e klasifikatorio pa Mundial Alemania 2006. Esaki tabata un partido dramátiko kaminda Kòrsou a kai vensí dos pa nada na Antigua i a bin bek i gana e partido na Kòrsou tres pa nada i asina pasa pa e siguiente buèlta.

Kontra Haiti, Kòrsou tin un historia bastante largu. Loke ta remarkabel ta ku no ta promé biaha ku Kòrsou ta hunga kontra Haiti bou di bandera di Kòrsou. Na aña 1950 i na aña 1957 Kòrsou a hunga dos partido amistoso kontra Haiti bou di bandera di Kòrsou. Na tur e dos okashon nan aki Kòrsou a kai vensí. Na tur  Kòrsou a hunga un kantidat di 13 partido kontra Haiti, di kual shete biaha tabata den klasifikatorio pa Mundial. Di e 13 biaha ku Kòrsou a hunga kontra Haiti, Kòrsou a kai vensí na nuebe okashon, empatá na tres okashon i a gana na un okashon. E último biaha ku Kòrsou a hunga kontra Haiti tabata den e klasifikatorio pa Mundial Sur Afrika 2010. Den e enkuentro nan aki Kòrsou a empatá na sero den e promé partido na Haiti pa despues kai vensí ku skor mínimo na Kòrsou.

Kòrsou no a yega di hunga ningun partido kontra US Virgin Islands, dia 11 di novèmber lo bira e promé biaha ku e dos ekipo nan aki ta topa otro. Loke ta interesante di US Virgin Islands ta ku na mart nan tabata di renk number 33 den CONCACAF i Kòrsou number 21. Den un periodo di kuater luna US Virgin Islands a logra baha di number 33 i yega puesto 23. Den e mesun periodo di tempu Kòrsou a bai di puesto 21 pa puesto 25. Haiti tambe a bai atras kaminda nan a move di puesto 12 i bai puesto 15. Di mesun manera Antigua i Barbuda a kita di puesto 13 i bai puesto 11.

Facebook Twitter Instagram Youtube
© 2025 Deporte Awe. Tur derechi reservá. Diseñá pa E² Media