Korsou rumbo pa Mundial 2014

Dia 30 di yüli 2011 na Rio de Janeiro a tuma lugá e loteria pa asina repartí e diferente selekshon nan nashonal ku ta miembro di FIFA i asina kuminsá e kaminda pa mundial di futbòl Brazil 2014. Despues ku ya sinku miembro ku ta forma parti di CONCACAF a kai afó, Kòrsou porfin sa kontra ken e ta bai kuminsá su trayektoria pa Brazil 2014. Kòrsou a kai den Grupo F huntu ku Haiti, Antigua i Barbuda i US Virgin Islands.

E promé wega di e selekshon di Kòrsou lo ta dos di sèptèmber kontra di e selekshon di Antigua i Barbuda. Ainda no ta konosí si e partido aki lo tuma lugá na Kòrsou òf na Antigua I Barbuda. E di dos partido ku Kòrsou lo hunga lo ta dia seis di sèptèmber kontra Haiti. Pa despues dia shete di òktober Kòrsou hunga un biaha mas kontra Antigua i Barbuda. Un dia despues di selebrá un aña di pais Kòrsou, dia 11 di òktober Kòrsou lo hunga su di dos partido kontra Haiti. Nèt un luna despues, dia 11 di novèmber Kòrsou lo hunga su promé partido kontra US Virgin Islands. Dia 15 di novèmber Kòrsou lo hunga su di dos partido kontra US Virgin Islands i asina konkluí e fase aki di klasifikatorio pa Mundial 2014.

GRUPO F

FECHA PARTIDO
2-9-2011 Antigua i Barbuda – Kòrsou
6-9-2011 Kòrsou – Haiti
7-10-2011 Kòrsou – Antigua i Barbuda
11-10-2011 Haiti – Kòrsou
11-11-2011 US Virgin Islands – Kòrsou
15-11-2011 Kòrsou – US Virgin Islands

Solamente e ganadó di e grupo ta pasa pa e siguiente buèlta. Den pasado ainda komo Antia Hulandes, Kòrsou a hunga shete biaha konta Antigua i Barbuda i a sali viktorioso na tres okashon i a empatá na dos okashon. Di e shete okashon nan ku Kòrsou a hunga kontra Antigua i Barbuda, na seis okashon tabata den e klasifikatorio pa Mundial i un biaha tabata den un partido amistoso. E último biaha ku Kòrsou a hunga kontra Antigua i Barbuda tabata na 2004 den e klasifikatorio pa Mundial Alemania 2006. Esaki tabata un partido dramátiko kaminda Kòrsou a kai vensí dos pa nada na Antigua i a bin bek i gana e partido na Kòrsou tres pa nada i asina pasa pa e siguiente buèlta.

Kontra Haiti, Kòrsou tin un historia bastante largu. Loke ta remarkabel ta ku no ta promé biaha ku Kòrsou ta hunga kontra Haiti bou di bandera di Kòrsou. Na aña 1950 i na aña 1957 Kòrsou a hunga dos partido amistoso kontra Haiti bou di bandera di Kòrsou. Na tur e dos okashon nan aki Kòrsou a kai vensí. Na tur  Kòrsou a hunga un kantidat di 13 partido kontra Haiti, di kual shete biaha tabata den klasifikatorio pa Mundial. Di e 13 biaha ku Kòrsou a hunga kontra Haiti, Kòrsou a kai vensí na nuebe okashon, empatá na tres okashon i a gana na un okashon. E último biaha ku Kòrsou a hunga kontra Haiti tabata den e klasifikatorio pa Mundial Sur Afrika 2010. Den e enkuentro nan aki Kòrsou a empatá na sero den e promé partido na Haiti pa despues kai vensí ku skor mínimo na Kòrsou.

Kòrsou no a yega di hunga ningun partido kontra US Virgin Islands, dia 11 di novèmber lo bira e promé biaha ku e dos ekipo nan aki ta topa otro. Loke ta interesante di US Virgin Islands ta ku na mart nan tabata di renk number 33 den CONCACAF i Kòrsou number 21. Den un periodo di kuater luna US Virgin Islands a logra baha di number 33 i yega puesto 23. Den e mesun periodo di tempu Kòrsou a bai di puesto 21 pa puesto 25. Haiti tambe a bai atras kaminda nan a move di puesto 12 i bai puesto 15. Di mesun manera Antigua i Barbuda a kita di puesto 13 i bai puesto 11.