E presidente di UEFA Michel Platini no ta favoresé ningun ekipo pa yega e final di e kompetensia, pero a atmití ku un partido entre e dos grandi nan di Spaña lo ta hopi atraktivo. Platini a sigui bisando, ku no por deskartá e ekipo nan Ingles i esun nan Italiano ku tambe ta den kompetensia ainda.
Barcelona ya tin un pia den kuart final despues di un viktoria di 3 -1 den e promé buèlta kontra Bayer Leverkussen, miéntras ku Real Madrid a tabla 1 – 1 kontra CSKA Moscow faltando e partido di buèlta djarason aki na Santiago Bernabeu.
E dos ekipo nan aki a topa otro aña pasa den e semi final di Liga di Kampion, kaminda Barca a sali viktorioso ku un saldo di gol di 3 – 1.
Zurich tabata e esenario pa e promé evento mundial grandi di futbòl, kaminda djaluna 9 di yanüari tabata tin e FIFA Ballon d’Or 2011 Gala.
Den e evento aki FIFA lo otorgá e premio Ballon d’Or na e mihó hungadó di aña 2011, tambe lo premia e mihó coach i e mihó gol di 2011.
E strea di Santos, Neymar a gana e premio di mihó gol pa su gol sensashonal ku e la anotá kontra Flamengo. Neymar a gana tantu Lionel Messi i Wayne Rooney pa e mihó gol di aña 2011.
Pep Guardiola di FC Barcelona a gana e premio di coach di aña den futbòl maskulino. Norio Sasaki coach di e selekshon Hapones femenino a bira coach di aña den futbòl femenino.
Por último FIFA a otorgá e Ballon d’Or pa e mihó hungadó nan di 2011. Den e sekso femenino e premio a bai pa e hungadó Hapones, Homare Sawa. Den futbòl maskulino e premio di mihó hungadó pa aña 2011 a bai pa Lionel Messi. Esaki ta e di tres aña konsekutivo ku Messi ta wòrdu nombra komo e mihó di mundu. Ku esaki Messi dupliká e rèkòrt di Michel Platini ku tambe a logra gana e premio di Ballon d’Or Franses na tres okashon konsekutivo.
Awe Kòrsou e hunga su último partido pa loke ta trata e klasifikatorio pa mundial Brazil 2014. E partido aki a wòrdu hunga entre e selekshon di Kòrsou i e selekshon di Isla Virgenes na Stadion Ergilio Hato na Kòrsou. Un biaha mas e selekshon Kurasoleño a hasi loke tabata su kustumber durante di e klasifikatorio aki i bai ariba promé den e markadó. Den tur e seis partido nan ku e ekipo di Kòrsou a hunga, ta den e partido kontra Antigua na Kòrsou, so e selekshon Kurasoleño no a logra bai ariba promé i ta e úniko biaha ku Kòrsou no ta hinka gol. Den e partido di awe Kòrsou a hinka seis gol i a permití un gol. E gol nan di Kòrsou a wòrdu anotá pa Shanon Carmelia (33’, 78’), Richmar Silberie (39’, 85’), Everon Espacia (73’) i Angelo Cijntje (89’). Keda pendiente pa den e próksimo dia nan un análisis kompletu di e selekshon Kurasoleño di e klasifikatorio pa mundial 2014.
E selekshon di futbòl di Kòrsou a gana su promé wega den e klasifikatorio pa mundial di futbòl Brazil 2014. Despues di a pèrdè e promé tres partido nan i empatá den e di kuater partido kontra Haiti, Kòrsou ta drenta kolumna di viktoria. E viktoria aki a bin den e partido di Kòrsou kontra Islas Virgenes i tur e gol nan a bin den promé mitar di e partido. Na di ocho i di 13 minüt Richmar Silberie ta manda Kòrsou ariba dos pa nada. Djis un ratu despues na di 26 minüt Sendley Bito ta anotá un gol pa hasi e skor tres pa nada. Ku e viktoria aki Kòrsou ta haña kuater punto faltando un partido mas. Kòrsou ya a wòrdu eliminá for di klasifikashon pa mundial 2014 pero ku e viktoria nan ta garantisá ku nan ta finalisá e klasifikatorio na di tres lugá.
E skedjel di partido pa e di 20 Kopa Mundial di FIFA a wòrdu anunsiá awe 20 di òktober na Zurich, Suisa. 12 suidat na Brazil lo ta anfitrion di e 64 partido nan ku lo tuma lugá den e kopa. Sao Paulo lo ta testigu di e partido di apertura riba 12 di yüni 2014, miéntras ku Rio de Janeiro lo ta e lugá di enkuentro pa e final di torneo mas prestigioso di futbòl mundial.
E anfitrion Brazil lo wòrdu di lòt komo A1 i konsekuentemente nan lo hunga e wega di apertura na Sao Paulo dia 12 di yüni, 16.00 ora lokal di Kòrsou. Nan siguiente partido lo ta djamars 17 di yüni na Fortaleza, 18.00’or di atardi. Por último Brazil ta sera e ròndu di grupo djaluna 23 di yüni, 12.00’or di mèrdia na Brasilia.
Adishonal e orario di komienso di e diferente partido nan lo ta lo siguiente (orario lokal di Kòrsou):
Partido di Apertura: 16.00 Partido nan di Grupo: 12.00, 15.00, 18.00, 21.00 Ròndu di 16 / Kuart-final: 12.00, 16.00 Semi-final: 16.00 Partido pa di tres lugá: 16.00 Final: 15.00
Aunke Kòrsou a keda matemátikamente eliminá for di e kontienda pa yega mundial Brazil 2014 despues di e partido ku Kòrsou a pèrdè kontra Antigua dia 7 di òktober tòg a keda tres partido pa e ekipo di Kòrsou hunga. Un di a partido nan ei tabata awe kontra Haiti kaminda Kòrsou a empatá na 2 gol. Den e partido aki Kòrsou a bai ariba 2 pa nada ku gol nan di Richmar Silberie na di shete minüt di promé tempu i shete minüt despues ku gol di Sendley Bito. Kòrsou no por a wanta e bentaha aki i na di 25 minüt Haiti ta haña un pinalti i hasi e partido 2 pa 1. Den di 60 minüt Kòrsou no ta logra mantené e bentaha i ta permití e gol di empate.
Despues di kuater partido den e klasifikatorio pa mundial Brazil 2014 tin un kos ku Deporte Awe! por señalá komo e denominadó komun pa loke ta trata e selekshon Kurasoleño i esei ta e echo ku Kòrsou no por logra mantené nan bentaha. Ku eksepshon di un partido, tabata tin tres partido ku Kòrsou a bai ariba promé pero no ta logra wanta e bentaha. Na dos okashon Kòrsou ta pèrdè despues di ta ariba i na un okashon empatá.
Kon kos lo tabata si nos por a wanta e bentaha nan aki? Si Kòrsou por a logra esaki, awe e selekshon Kurasoleño lo tabata tin tres wega gana i un wega pèrdí ku ta bon pa 9 punto, faltando dos partido kontra Isla Virgenes. Den e senario aki Kòrsou lo tabata empatá ku Antigua na 9 punto komo lider di Grupo F. E resultado aki lo a faboresé Kòrsou enormemente teniendo na kuenta ku Antigua lo hunga su último dos nan kontra Haiti. Lástimamente esaki lo keda simplemente un nostalgia pa hopi di nos.
Apesar di esaki tòg e empate di awe kontra Haiti di awe ta duna tòg un tiki satisfakshon. Ku e empate di awe Kòrsou ta hinka Haiti den un buraku. Ku e empate aki Haiti tin kuater wega hunga ku 10 punto i faltando dos wega kontra Antigua. Antigua a gana su partido kontra Isla Virgenes i konsekuentemente ta komandá Grupo F ku 12 punto, faltando dos wega.
Kòrsou ta bolbe pèrdè ku skor di 1 pa nada kontra Antigua den un wega ku Kòrsou mester a gana. Den e promé partido kontra Antigua Kòrsou a pèrdè ku skor di 5 pa 2. Ku e wega pèrdí aki Kòrsou tin un rekòrt di sero wega gana i tres wega pèrdí. Faltando tres partido mas esaki ta nifiká ku Kòrsou no ta pasa pa e siguiente ròndu di klasifikashon pa mundial Brazil 2014. Pa logra pasa pa e siguiente buèlta di e klasifikatorio pa mundial bo mester gana bo grupo.
Dikon Kòrsou ta keda eliminá? Tantu Haiti komo Antigua a gana tur tres di nan promé partido nan i konsekuentemente nan tin 9 punto kada un. Ainda Kòrsou falta hunga tres partido pero ku e wega pèrdí kontra Antigua, Kòrsou mester gana tur su siguiente tres partido nan i spera ku Antigua ta pèrdè tur su tres siguiente partido nan pa asina forsa un empate na 9 punto ku Antigua. Pero pa Antigua pèrdè tur tres di su siguiente partido nan ta nifiká ku Haiti ta gana por lo mínimo dos partido, teniendo na kuenta ku Antigua ta hunga kontra Haiti nan último dos partido nan di klasifikatorio pa mundial 2014. Ku Haiti ganando por lo mínimo e último dos partido nan ta sufisiente pa nan yega 12 punto i asina gana e grupo. Meskos ta konta den e kaso ku Haiti pèrdè su último tres partido nan, e ora ei Antigua ta gana por lo mínimo dos i asina gana e grupo.
Djabièrnè 7 di òktober e wega nan klasifikatorio pa mundial Brazil 2014 ta kontinuá. Un biaha mas Kòrsou ta hunga kontra Antigua i Barbuda, e úniko diferensia entre e wega aki i esun anterior ta ku Kòrsou ta hunga na kas i ta un wega ku Kòrsou mester gana.
Sinseramente no nesesariamente Kòrsou mester gana djabièrnè, un empate tambe ta tene Kòrsou na bida aunke ku un empate e kos ta omplika hopi. Dikon Kòrsou no por permití di pèrdè den e siguiente partido? Pa un ekipo pasa pa e siguiente buèlta di klasifikashon pa mundial e mester gana su grupo, ku otro palabra Kòrsou mester sali na promé lugá den e grupo ku e ta ku Haiti, Antigua i Isla Virgenes. Si Kòrsou pèrdè kontra Antigua e mester gana tur su siguiente 3 partido nan i spera ku Antigua ta pèrdè tur su 3 siguiente partido nan pa asina forsa un empate na 9 punto ku Antigua. Pero pa Antigua pèrdè tur 3 di su siguiente partido nan ta nifiká ku Haiti ta gana por lo mínimo 2 partido. Ku Haiti ganando e 2 partido nan aki ta sufisiente pa nan yega 12 punto i asina gana e grupo.
Den e promé partido kontra Antigua, Kòrsou a pèrdè ku skor di 5 pa 2, apesar di esaki tòg e situashon ta mustra alentador pa Kòrsou. E wega nan ku Kòrsou a hunga par di siman pasa kontra Sürnam ta hopi importante. Sürnam ta un selekshon na nivel di Antigua, tur 2 ekipo a wòrdu di lòt number 2 den nan respektivo grupo pues tur 2 ekipo ta e di 2 mihó ekipo den nan grupo (lesa Korsou por yega mundial 2014?). Kontra Sürnam, Kòrsou a pèrdè 1 partido i empatá e siguiente partido, importante di esaki ta ku Kòrsou a empatá kontra Sürnam na Sürnam ku solamente su hungadó nan lokal. Na momentu ku Kòrsou hunga djabièrnè kontra Antigua, Kòrsou lo no konta solamente ku su hungadó nan lokal pero lo konta tambe ku refuerso di hungadó nan ku ta hunga den eksterior.
E wega di Kòrsou lo tuma lugá djabièrnè awor dia 7 di òktober, 8’or di anochi ora lokal di Kòrsou na Sentro Deportivo Kòrsou. Entrada pa e wega lo ta NAF 15,-pa hende grandi i 7.50 pa mucha i 60 plùs. Kumpra bo karchi for di tempran na entre otro Beep Beep Rio Canario, Pòmp di gasolin Jansen nan Sta. Maria, SDK I ofisina di FFK na Brievengat.
CIBC First Caribbean International Bank un biaha mas ta duna kontenido na su promesa pa enrikesé bida di un suidadano di nos isla ora ku e banko a hasi entrega ofisial di un ròlstul kompletamente adiestrá na e nesesidat di e suidadano.
Glennon Haynes a keda limitá na un ròlstul despues di a sufri un aksidente den pleno kompetensha di futbòl. CIBC FirstCaribbean resientemente a entreg’é ofisialmente un ròlstul nobo, algun siman despues di a sorprendé “live” durante di un edishon di e programa popular na televishon “Hòmber” ku e promesa ku e banko lo perkurá pa un ròlstul pe.
E ròlstul, kompletamente adiestrá na su nesesidat, resientemente a yega Kòrsou i FirstCaribbean a hasi entrega ofisial di e stul na Sr. Haynes, komo muestra di rekonosementu di su kontinuo aktitut positivo ante bida i su espíritu empresarial.
E seremonia a tuma lugá na e ofisina prinsipal di CIBC FirstCaribbean durante di un enkuentro ameno huntu ku famia Haynes, empleadonan i prensa.
Futbòl ta un di e deportenan mas popular riba nos isla. Haynes, kende tabata defendé di e ekipo di Centro Dominguito, a kompetí den e divishon mas haltu di nos futbòl. Tabata durante di kampeonato regular na 2005 ku Haynes sufri un aksidente serio. Hopi deportista i otronan, ku a sufri tipo di aksidentenan serio asin’aki, a keda inspirá pa e ehèmpel duna dor di Sr. Haynes. Maske ku ela keda desabilitá, dor di e aksidente aki, tòg Haynes a keda mantené e mes un prinsipionan di un deportista i espíritu kombativo ku e tabatin promé ku ela sufri e aksidente.
Desafortunadamente e ròlstul, ku Haynes tabata usa, tabata strob’é di move i tabata un opstákulo den su funshonamentu. Pa e motibu aki e tabatin mester di un ròlstul speshal adaptá na su sirkunstansha.
E donashon di CIBC FirstCAribbean di un ròlstul speshalmente prepará pa
Sr. Haynes mester keda konsiderá komo un muestra di e banko su kompromiso pa sigui enrikesé nos komunidat. Managing Director, Pim van der Burg, na okashon di anunsio di kompra di e ròlstul, a enfatisá en bista di e aktitut semper optimista riba bida di Glennon Haynes, e forma determiná ku e ta enfrentá su retonan i su espíritu empresarial. Esaki segun van der Burg mester sirbi komo un ehèmpel pa nos tur den komunidat.
Lysaira Arvelo-Ortela, Marketing Manager di CIBC FirstCaribbean na Kòrsou ta hasi entrega ofisial di rolstul na Glennon Haynes.
E selekshon di Kòrsou a biaha pa Paramaribo, Sürnam, kaminda lo hunga dos wega amistoso komo preparashon pa e siguiente kompromisonan den e buèlta eliminatorio pa yega Mundial 2014. Den un komunikado emití, F.F.K. ta trese dilanti ku e selekshon a hasi e biahe bou di direkshon tékniko di e argentino Manuel Bilches i su asistente lokal Gersley Gijsbertha.
Den e promé partido ku Kòrsou hunga kontra Sürnam riba djabièrnè 23 di sèptèmber, Kòrsou a pèrdè ku e skor di 2 pa 0. Na di 25 minüt di e promé tempu e ekipo di Sürnam a bai ariba 1 pa 0 ku gol di Stefano Rijssel. Djis despues di e komienso di e di dos mitar Milton Pinas ta anotá pa hasi e skor 2 pa 0.
Awe Kòrsou a hunga su di dos wega di training kontra Sürnam i a empatá den e partido aki. Na di 14 minüt Sürnam a bai ariba ku gol di Evani Esperance, e bentaha aki no a dura muchu ya komo ku den promé mitar mes Mirco Colina Jr. ta empatá e partido pa Kòrsou. Den di dos mitar un biaha mas Sürnam ta bai ariba 2 pa 1 riba un tira liber di Giovanni Drenthe. Un biaha mas Mirco Colina Jr. ta sali na defensa di Kòrsou i ta empatá e partido na 2, ku alabes a bira e resultado final.
