E. Evertsz, redaktor pa Deporte Awe

February 27, 2013

Jürgen Locadia ta hiba PSV final di Kopa KNVB

ZWOLLE, Hulanda – E ekipo di Eindoven a logra posishoná nan mes den e final di e Kopa KNVB despues di gana ku un skor di 3-0 riba e ekipo di PEC Zwolle. PSV por a konta ku Jürgen Locadia ku a karga e ekipo i hink’é den final.

PSV a bai ariba for di den e promé mitar ku dos gol. Na di 16 minüt Locadia a habri e markadó pa PSV ku asistensia di Georginio Wijnaldum. Locadia ta bolbe anotá un biaha mas kua asistensia di Wijnaldum na di 34 minüt. Den di dos mitar, Oscar Hiljemark ta pasa e bala den buraku kual ta laga Locadia liber dilanti di gol i esaki na su turno ta logra haña gol pa di tres biaha i asina kompletá e ‘hat-trick’.

PSV lo topa ku AZ Alkmaar den e final di Kopa KNVB riba 9 di Mei den stadion De Kuip na Rotterdam.

February 27, 2013

Refineria Isla Ta Entregá Tio Daou Ball Park Superfisie Ku Yerba Artifisial

WILLEMSTAD – Fundashon Tio Daou Ball Park i deporte di beisbòl en general di Kòrsou ta sumamente gradesí pa e aporte balioso ku Refineria Isla, den kuadro di su filosofiá Isla: Ku kurason pa komunidat, a duna pa despues di hopi aña di esfuerso i perseveransia awe Kòrsou porfin tin su parke di yerba pa deporte di beisbòl. Asina Presidente di Fundashon Tio Daou Ball Park, Philip ‘Lipo’ Elhage a duna di konosé djamars atardi na okashon di e entrega ofisial. “Nos sa ku Refineria Isla a bin ta invertí sumanan kuantioso den nos deporte riba nos isla. I awe mi ta gradisí di kurason gerensia di Refineria Isla, Sr. Manuel Medina i Kenneth Gijsbertha en partikular, pa e konfiansa den nos direktiva. Ta ku satisfakshon enorme mi por bisa awe ku un invershon di kasi 1.5 mion florin awor Kòrsou tin su parke di yerba pa beisbòl”.

Durante un aktividat djamars atardi na Parke di beisbòl Tio Daou na Sta. Rosa presentenan por a tuma nota di e presiosidat di e superfisie kubrí ku yerba. Direktor gerente di Refineria Isla, Manuel Medina, di forma simbóliko a traves di ‘un mosaiko di yerba artifisial’ a hasi entrega ofisial di superfisie di yerba na Fundashon Tio Daou Ball Park. Segun Sr. Medina, Refineria Isla ta komprometé ku komunidat di Kòrsou. Ademas e direktor gerente a bisa: “Dunando kontenido real na su filosofia: “Isla: ku kurason pa komunidat” i su programa di Invershon Sosial, Refineria Isla a bin ta duna su granito na desaroyo i adelanto di Kòrsou”. Segun e direktor, deporte ta un medio sano pa enkuentro sosial i amistoso di hende pa hende i ta alabes bon pa mantené un mente sano den un kurpa sano. Sr. Medina a pidi pa komunidat di Kòrsou kuida e loke tin i a hasi un apelashon na Fundashon Tio Daou Ball Park i dirigentenan di deporte di beisbòl en general pa kòrda tambe riba e parti di mantenshon pa por sigui disfrutá di fasilidatnan den bon kondishon pa tempu largu.

Segun Lipo Elhage, awor no solamente beisbòl dòbel A ta probechá, pero Tio Daou Ball Park, awor kubrí ku yerba, ta keda usá intensivamente pa skolnan parti mainta, beisbòl Little League parti mèrdia pa atardi i despues di 5or pa beisbòl di adultonan. Awor nos por invitá beisboleronan di Grandes Liga tambe bin hunga weganan di demostrashon na Kòrsou.

Minister Rubia Bitorina di enseñansa, siensia, kultura i deporte, a gradisí refineria Isla pa su responsabilidat sosial korporativo, pa regalá Kòrsou i beisbòl en partikular un superfisie kubri ku yerba artifisial. Esaki mester kontribuí pa yuda alsa nivel di e deporte riba nos isla.

Eddie Daou, yu di Tio Daou, a gradisí na nòmber di famia pa e bunita gesto i honor duna na su tata. Segun Eddie Daou, su tata di felis memoria, mester ta hopi kontentu ku e parke ku ta karga su nòmber ta un parke ku awor por kompetí ku kualke parke den nos region.

Na final, Eddy Daou ku a bini speshalmente for di Aruba pa e akto aki, a trese dilanti ku awor e ta spera e invitashon di Lipo Elhage pa e bin hunga beisbòl riba e superfisie kubri ku yerba artifisial.

February 26, 2013

Hulanda ta bolbe gana

TAICHUNG, Taiwan –E selekshon Hulandes ku ta preparando pa e Klásiko Mundial di Beisbòl ta blankeá Industrial All Star i asina gana ku skor di 6-0. Esaki ta e di dos blankeo ku e selekshon Oraño ta logra den último dia nan. Djadumingu último den otro wega di preparashon e selekshon Hulandes a blankeá Cuba 5-0.

Esaki ta promé wega di preparashon ku e ekipo Hulandes a hasi den kua tur su hungadó nan tabata presente. Awe mainta Jonathan Schoop i Shairon Martis tabata e último dos hungadó nan ku a añadí nan mes na e selekshon. Schoop a mira akshon awe mes ora ku e la hunga segunda base, miéntras ku Martis si no a mira akshon ainda.

Den di dos ining Curt Smith a manda Hulanda ariba 2-0 ku un doblete ku a empuhá Wladimir Balentien i Xander Bogaerts. Hulanda ta oumentá e bentaha den di kuater ining ku un single empuhador di un kareda un biaha mas di Curt Smith. Andruw Jones a hasi e partido 6-0 ku un honron di un kareda.

E aliniashon di Hulanda tabata: Andrelton Simmons, shortstop; Jonathan Schoop, segunda base; Roger Bernadina, center field; Wladimir Balentien, right field; Andruw Jones, batido designa; Xander Bogaerts, tersera base; Curt Smith, primera base; Kalian Sams, left field; Dashenko Ricardo, kècher; Rob Cordemans, picher.

Hulanda ta hunga nan último wega di preparashon djaweps. Djasabra 7:30 AM (ora lokal di Kòrsou) Hulanda ta hunga nan promé partido kontra Sur Korea.

February 26, 2013February 25, 2013

Josep Guardiola ta spioná hungadó

BARCELONA – Segun e wepsait “El Confidencial” di Spaña, Josep Guardiola den su tempu komo direktor tékniko di Barcelona tabata spioná Gerard Piqué, Samuel Eto’o, Ronaldihno i Deco pa asina konosé nan bida priva

El Confidencial ta bisa ku Guradiola a kontratá e agensia di investigadó “Metodo 3”. Parse ku Guardiola tabata yama na kas di su hungadó nan pa asina sa ku di bèrdat nan tabata na kas òf si nan ta riba kaya ta kore paranda.

“E tabata opseshoná pa su hungadó nan mantené un bida priva ordená i pa nan no sali for di òrdu paso di otro forma nan no ta presta bon riba kancha di wega”, El Confidencial ta duna di konosé.

E investigashon nan hasi riba bida priva di e hungadó nan ta un di e motibu nan dikon Deco, Eto’o i Ronaldihno a keda for di e plan di trabou Josep Guardiola. Segun fuente nan Guardiola a asta pidi pa Barcelona bende Piqué despues ku su relashon ku Shakira a sali den publisidat.

February 25, 2013February 24, 2013

Brian Farley ta bandoná selekshon Hulandes

WILLEMSTAD – Brian Farley bench coach di e selekshon Hulandes ku aktualmente ta na Taiwan preparando pa e Klásiko Mundial di Beisbòl. Segun e Asosashon di Beisbòl i Softball Hulandes, Farley a bandoná e selekshon pa motibu nan personal i esaki no tin di aber ku asuntu nan di beisbòl. Robert Eenhoorn ta remplasá Farley komo bench coach di e selekshon Hulandes.

February 24, 2013

Jair Jurrjens den promé aparishon pa Orioles

WILLEMSTAD – Despues di a wòrdu laga den libertat pa e ekipo di Bravos di Atlanta, Jair Jurrjens a debutá awe pa e ekipo di Orioles di Baltimore. Jurrjens a picha kontra e ekipo di Toronto Blue Jays i a pèrmití un kareda i kuater hit den dos ining di picheo.

Jurrjens a retirá e promé sinku batido ku e la enfrentá, pa despues e pèrmití un single kontra J.P Arencibia, un base por bola kontra Colby Rasmus i despues un single empuhador di un kareda kontra Mark Derosa.

February 24, 2013

Hulanda ta gana Cuba den preparashon pa Klásiko Mundial di Beisbòl

WILLEMSTAD – E wega nan di preparashon pa Klásiko Mundial di Beisbòl ta siguí pa e selekshon Hulandes. Despues di pèrdè nan promé partido di preparashon kontra Taichung All Stars djasabra e ekipo Hulandes a bin bon prepará pa enfrentá Cuba.

Hulanda a logra un viktoria di 5-0 kontra e selekshon Kubano ku tambe ta preparando pa nan presentashon den e Klásiko Mundial di Beisbòl otro siman.

Den e partido aki e selekshon Hulandes por a konta ku honron di Wladimir Balentien i un bon presentashon riba montikulo di Diegomar Markwell. Markwell a picha sinku ining fuerte, permitiendo solamente kuater hit. Kevin Heijstek, Jonathan Baletina i Leon Boyd a drenta den relevo pa asina kompletá nuebe ining.

Banda di e honron di Balentien, Hulanda a konta ku tres hit di Hainley Statia, dos di Kalian Sams i Curt Smith.

Djaluna Roger Bernadina, Xander Bogaerts, Shairon Martis, Jonathan Schoop i Andrelton Simmons ta añadí nan mes na e selekshon i asina kompletá e selekshon di hungadó nan pa e ekipo Hulandes.

February 22, 2013

El Salvador ta gana Kòrsou 2-1

WILLEMSTAD – E representashon di Kòrsou na e klasifikatorio pa Mundial FIFA U20 tabata tin mester por lo mínimo un empate pa asina keda ku speransa di por pasa pa e siguiente buèlta. Pero esaki no a logra na momentu ku e selekshon di Kòrsou a kai ku skor di 2-1 kontra di El Salvador.

Na di 10 minüt di wega e selekshon Kurasoleño a krea un bon oportunidat di gol na momentu ku Derwin Marina ta saka un hungadó salvadoreño kantu di liña i krusa e bala pa Rigino Cicilia ku na su turno ta kabesá esaki den man di e kiper di Salvador.

Oliver Ayala na di 25 minüt ta hiba El Salvador ariba. E partido a keda ku e skor di 1-0 te na di 65 minüt kaminda mal komunikashon entre Shuremy Felomina i kiper Zeus de la Paz ta laga Romel Mejia kontrolá e bala i anotá e di dos gol pa Salvador.

Vidarell Merencia ta kòrtá e bentaha i trese speransa nobo den e selekshon Kurasoleño na di 76 minüt na momentu ku e ta kurva e bala pafó di e área penal di Salvador i hinka esaki den gol. Faltando 3 minüt pa finalisá e partido Kòrsou ta kobra un tiru liber i ta dal e bala den pal’i gol.

Ku e derota aki e selekshon di Kòrsou U20 ta keda eliminá for di e klasifikatorio pa Mundial FIFA U20 na Turkia.

February 22, 2013

Selekshon Hulandes pa Klásiko Mundial di Beisbòl ta konosí

WILLEMSTAD – E 28 hungadó nan ku lo representá Hulanda den e Klásiko Mundial di Beisbòl bou di mando di Hensley Meulens ta konosí. Manera a anunsiá kaba e selekshon hulandes lo hunga kuater wega mas di preparashon promé ku nan partido kontra Sur Korea 2 di mart.

E selekshon Hulandes lo hunga na promé partido di fogeo djasabra kontra Taichung All Stars, djadumingu kontra Cuba, djamars otro siman kontra Industrial All Star i último djaweps kontra Taichung University All Stars.

Pa e promé dos partido nan di entrenamentu na Taiwan e ekipo Hulandes por konta ku 23 di e 28 hungadó nan. E otro sinku nan kual ta: Roger Bernadina, Xander Bogaerts, Shairon Martis, Jonathan Schoop i Andrelton Simmons lo añadí nan mes na e ekipo djaluna 25 di febrüari.

E selekshon kompletu ta konsistí di:

Picher

Jonathan Balentina (Baltimore Orioles)
David Bergman (Corendon Kinheim)
Leon Boyd (Burnaby Bulldogs)
Rob Cordemans (L&D Amsterdam)
Berry van Driel (DOOR Neptunus)
Kevin Heijstek (L&D Amsterdam)
Jonatan Isenia (Baltimore Orioles)
Diegomar Markwell (DOOR Neptunus)
Shairon Martis (Minnesota Twins)
Loek van Mil (Cincinnati Reds)
Mark Pawelek (sin ekipo)
Tom Stuifbergen (Minnesota Twins)
Orlando Yntema (DOOR Neptunus)

Kècher

Quintin de Cuba (Corendon Kinheim)
Bas Nooij (L&D Amsterdam)
Dashenko Ricardo (agente liber)

Infleider

Xander Bogaerts (Boston Red Sox)
Yurendell de Caster (Winnipeg Goldeyes)
Michael Duursma (Hoofddorp Pioniers)
Jonathan Schoop (Baltimore Orioles)
Andrelton Simmons (Atlanta Braves)
Curt Smith (agente liber)
Hainley Statia (Milwaukee Brewers)

Outfielder

Wladimir Balentien (Yakult Swallow, Hapon)
Roger Bernadina (Washington Nationals)
Andruw Jones (Tohoku Rakuten Golden Eagles, Hapon)
Randolph Oduber (Baltimore Orioles)
Kalian Sams (Seattle Mariners)

February 21, 2013

Kòrsou U20 tin ku bai buska e viktoria awe nochi

WILLEMSTAD – Despues di a pèrdè e promé partido kontra Mexico den e klasifikatorio pa Mundial FIFA U20, awe e selekshon di Kòrsou ta bai purba kambia kos i logra un viktoria. Miéntras ku un empate ainda e ekipo di Kòrsou tin bida, esaki kisas no ta e mihó opshon. Ku un empate Kòrsou su destino lo ta den man di Mexico i El Salvador.

Ku un viktoria awe nochi e ekipo di Kòrsou ta hasi kos sumamente interesante den su grupo. Esaki lo pone preshon riba Mexico ku no ke pèrdè e partido kontra El Salvador i forsa un tripel empate na promé lugá. Den U20 Kòrsou a topa na sinku okashon ku El Salvador, di kua Kòrsou a gana un biaha, empatá dos i pèrdè dos.

E tarea pa e selekshon di Kòrsou pa awe nochi ta fásil, buska un viktoria i trata nan hinka mas gol posibel. Kòrsou ta hunga awe nochi 10or ora lokal di Kòrsou.