WILLEMSTAD – Fundashon Tio Daou Ball Park i deporte di beisbòl en general di Kòrsou ta sumamente gradesí pa e aporte balioso ku Refineria Isla, den kuadro di su filosofiá Isla: Ku kurason pa komunidat, a duna pa despues di hopi aña di esfuerso i perseveransia awe Kòrsou porfin tin su parke di yerba pa deporte di beisbòl. Asina Presidente di Fundashon Tio Daou Ball Park, Philip ‘Lipo’ Elhage a duna di konosé djamars atardi na okashon di e entrega ofisial. “Nos sa ku Refineria Isla a bin ta invertí sumanan kuantioso den nos deporte riba nos isla. I awe mi ta gradisí di kurason gerensia di Refineria Isla, Sr. Manuel Medina i Kenneth Gijsbertha en partikular, pa e konfiansa den nos direktiva. Ta ku satisfakshon enorme mi por bisa awe ku un invershon di kasi 1.5 mion florin awor Kòrsou tin su parke di yerba pa beisbòl”.
Durante un aktividat djamars atardi na Parke di beisbòl Tio Daou na Sta. Rosa presentenan por a tuma nota di e presiosidat di e superfisie kubrí ku yerba. Direktor gerente di Refineria Isla, Manuel Medina, di forma simbóliko a traves di ‘un mosaiko di yerba artifisial’ a hasi entrega ofisial di superfisie di yerba na Fundashon Tio Daou Ball Park. Segun Sr. Medina, Refineria Isla ta komprometé ku komunidat di Kòrsou. Ademas e direktor gerente a bisa: “Dunando kontenido real na su filosofia: “Isla: ku kurason pa komunidat” i su programa di Invershon Sosial, Refineria Isla a bin ta duna su granito na desaroyo i adelanto di Kòrsou”. Segun e direktor, deporte ta un medio sano pa enkuentro sosial i amistoso di hende pa hende i ta alabes bon pa mantené un mente sano den un kurpa sano. Sr. Medina a pidi pa komunidat di Kòrsou kuida e loke tin i a hasi un apelashon na Fundashon Tio Daou Ball Park i dirigentenan di deporte di beisbòl en general pa kòrda tambe riba e parti di mantenshon pa por sigui disfrutá di fasilidatnan den bon kondishon pa tempu largu.
Segun Lipo Elhage, awor no solamente beisbòl dòbel A ta probechá, pero Tio Daou Ball Park, awor kubrí ku yerba, ta keda usá intensivamente pa skolnan parti mainta, beisbòl Little League parti mèrdia pa atardi i despues di 5or pa beisbòl di adultonan. Awor nos por invitá beisboleronan di Grandes Liga tambe bin hunga weganan di demostrashon na Kòrsou.
Minister Rubia Bitorina di enseñansa, siensia, kultura i deporte, a gradisí refineria Isla pa su responsabilidat sosial korporativo, pa regalá Kòrsou i beisbòl en partikular un superfisie kubri ku yerba artifisial. Esaki mester kontribuí pa yuda alsa nivel di e deporte riba nos isla.
Eddie Daou, yu di Tio Daou, a gradisí na nòmber di famia pa e bunita gesto i honor duna na su tata. Segun Eddie Daou, su tata di felis memoria, mester ta hopi kontentu ku e parke ku ta karga su nòmber ta un parke ku awor por kompetí ku kualke parke den nos region.
Na final, Eddy Daou ku a bini speshalmente for di Aruba pa e akto aki, a trese dilanti ku awor e ta spera e invitashon di Lipo Elhage pa e bin hunga beisbòl riba e superfisie kubri ku yerba artifisial.