Author: E. Evertsz

PHOENIX, Arizona – E selekshon di Reino Hulandes a konfirmá ku Kenley Janses lo wòrdu añadí na e roster di e selekshon i lo ta disponibel pa hunga den e buèlta di Kampion nan na parke AT&T na San Francisco. Jansen lo remplasá Jonatan Isenia ku a sufri un leshon na su kokoti drechi. Si kos nan bai segun plan Jansen lo keda ku Los Angeles Dogders den wikènt, bula djadumingu pa San Francisco i regresá bek ku Dodgers djarason.

Don Mattingly, mènedjer di Dodgers a gusta e idea aki: “e no ta pèrdè nada i nos ta pensa ku esaki lo ta bon pe. E ta drenta den kompetensia i lo ta un bon senario pa hink’é den un mentalidat kompetitivo i di preshon haltu i loke nos ta gusta mas ta, ku ta solamente un par di dia.”

PHOENIX, Arizona – Despues di  añadí Jurickson Profar na e roster di e selekshon di Reino probablemente tin un chèns pa añadí un otro hungadó. E regla nan di Klásiko Mundial di Beisbòl ta bisa ku na momentu ku un picher leshoná bo por remplasá esaki ku un otro picher. Segun informashon nan e picher Jonatan Isenia ta leshoná i no por regresá den e kampionato, konsekuentemente esaki ta habri lugá pa un picher.

Den deklarashon nan duna pa picher Kenley Jansen e la bisa ku, ta 95 porshento probabel ku e lo forma parti di e selekshon di Reino pa semifinal djaluna. Si kos nan bai segun plan Jansen lo keda ku Los Angeles Dogders den wikènt, bula djadumingu pa San Francisko i regresá bek ku Dodgers djarason.

Don Mattingly, mènedjer di Dodgers a gusta e idea aki: “e no ta pèrdè nada i nos ta pensa ku esaki lo ta bon pe. E ta drenta den kompetensia i lo ta un bon senario pa hink’é den un mentalidat kompetitivo i di preshon haltu i loke nos ta gusta mas ta, ku ta solamente un par di dia.”

E selekshon di Reino tin te ku djasabra pa trese kambio na e roster. Awe nochi e selekshon Oraño 10’or ora lokal di Kòrsou e ekipo Oraño lo hunga un partido di práktika kontra San Diego Padres.

PHOENIX, Arizona – For di despues di e partido ku e selekshon Oraño a hunga kontra Hapon e mènedjer di e selekshon Hensley Meulens a duna di konosé ku tin posibilidat ku por trese kambio den e roster di e selekshon.

Na e momentu Meulens ei no tabata sigur ainda si e lo trese kambio den selekshon i a menshoná par di faktor ku mester konsiderá promé. E promé faktor tabata, tin ku wak si e hungadó nan ku ta leshoná sigur no por forma parti mas di e torneo. Di dos tabata, tin ku wak si e hungadó nan ku ta bai usa komo remplaso ta haña pèrmití di nan respektivo ekipo nan.

Despues ku e selekshon Oraño a klasifiká pa semifinal Jurickson Profar ta un di e promé hungadó nan ku a hasi su mes dispuesto pa wòrdu añadí na e tim. Profar su disponibilidat a bira un kompromiso ya komo ku ta konfirmá pa Deporte Awe ku Profar lo ta den semifinal ku e ekipo Oraño.

Tur medaya tin dos banda i lástimamente Yurendell de Caster ta wòrdu kita for di e roster pa motibu di e leshon ku e la sufri na pia den partido kontra Hapon.

Awe e selekshon Oraño tabata tin un práktika plania pero esaki a keda kanselá pa Hensley Meulens despues di e biahe di 12 ora for di Hapon pa Arizona. Mañan kos ta siguí normal pa e selekshon di Reino kaminda 7’or di anochi nan lo hunga kontra San Diego Padres i djabièrnè mesun ora kontra Seatle Mariners.

TOKIO, Hapon – E selekshon di  Reino Hulandes ku ta partisipando den e Klasiko Mundial di Beisbol a hunga nan último partido di e di dos buèlta promé nan biaha pa San Fransisco pa hunga semifinal. Un biaha mas e selekshon Oraño mester a enfrentá Hapon pero e biaha aki pa determiná kontra ken kada ekipo ta bai hunga den semifinal ya komo ku tur dos a pasa pa siguiente buèlta.

Andrelton Simmons ta kuminsá kaminda e la keda den e partido kontra Cuba i hiba e selekshon di Reino ariba 1-0 ku un honron den kabes di promé ining. E selekshon Oraño no por a wanta e bentaha aki i a pèrmití ocho kareda den bòm di dos ining.

Den kabes di shete Hulanda ta hasi e partido 8-3. E promé kareda den e ining a drenta riba un single empuhador di Xander Bogaerts i despues e di dos ta drenta riba un flai di sakrifisio di Randolph Oduber. E selekshon di Reino ta siguí pone preshon riba Hapon i ta anotá tres kareda mas den kabes di ocho ining pero esaki no tabata sufisiente i ta pèrdè ku skor di 10-6 di Hapon.

Mesora despues di e partido e selekshon di Reino a subi avion i kuminsá nan biahe di 12 ora pa Phoenix, Arizona. Aki nan e selekshon lo hunga dos wega di training promé ku e partido di semifinal. Nan promé partido ta djaweps 14 di mart, 7’or di anochi kontra San Diego Padres. E di dos partido ta un dia despues esta djabièrnè mesun ora kontra Seattle Mariners.

Segun Hensley Meulens tin posibilidat pa trese algu kambio den e selekshon pero esaki no ta definitivo ainda, e selekshon tin te djasabra pa disidí. Meulens a bisa promé tin ku wak si e hungadó nan ku ta leshoná sigur no por forma parti mas di e torneo. Banda di esaki tin ku wak tambe ku e hungadó nan ku ta bai usa komo remplaso ta haña pèrmití di nan respektivo ekipo nan. E hungadó nan prinsipal den mente di Meulens ta Jurickson Profar, Mariekson Gregorius, Kenley Jansen i Jair Jurrjens.

TOKYO, Hapon – Despues di a gana di Cuba algu dia pasa, selekshon di Reino tabata tin ku saka un viktoria for di e ekipo Kubano pa pasa pa semifinal. Un biaha mas e selekshon di Reino a bin ta kumpli ku nan denominadó komun di e torneo, esta habri e markadó.

E selekshon Oraño a bai ariba den bòm di tres ining ku un flai di sakrifisio konektá pa Andruw Jones despues ku e selekshon a yena base. Riba e sakrifisio aki Randolph Oduber a nota e promé kareda. Mesora su tras Curt Smith a konektá un single empuhador di un kareda i asina hiba e selekshon Oraño 2-0 ariba.

Despues ku Cuba a tabla e partido den kabes di kuater ining, e selekshon di Reino a drenta ofensivo bek. Aki nan Andrelton Simmons ta konektá un flai di sakrifisio i asina empuhá Kalian Sams pa hiba Ulanda ariba 3-2. Ku Jonathan Schoop na bate, Oduber ta roba tersera i ta siguí pa krusa plato riba un tiru malu di e kècher.

Den kabes di sinku Cuba ta empatá e partido na kuater i nan ta bai ariba den di ocho ku un bentaha di dos kareda. E selekshon di Reino mesora ta bora e bentaha aki riba un honron di dos kareda konektá pa Andrelton Simmons.

E selekshon Oraño ta laga Cuba den tereno den bòm di nuebe ining despues ku nan ta yena base i Kalian Sams ta konektá un flai di sakrifisio, empuhando Andruw Jones for di tersera. Ku esaki selekshon di Reino a logra e pase pa semifinal ku skor di 7-6.

E selekshon di Reino lo hunga na próksimo partido djamars 12 di mart, 6’or di mainta kontra Hapon. E partido aki ta solamente pa determiná posishon kua ekipo ta topa ken den semifinal ku ta kuminsá djadumingu 17 di mart.

TOKIO, Hapon – Pa promé biaha den e Klásiko Mundial di Beisbòl e selekshon Oraño no ta habri e markadó, tresiendo kuné e di dos derota pa e ekipo. Hapon a sa di nota den tur ining i konsekuentemente finalisando e partido den di shete ining ku un skor di 16-4 pa motibu di lei di miserikòrdia.

Den di seis ining e bate nan Oraño a bin na bida pero esaki no tabata sufisiente. Despues di yena base Wladimir Balentien a konektá un doblete ku a empuhá Kalian Sams, Andrelton Simmons i Randolph Oduber. Balentien no a keda na segunda base largu ya ku e siguiente batido Andruw Jones a konektá un single pa empuhá Balentien i hasi e partido 12-4 pa Hapon.

Ku e derota aki e selekshon di Reino tin ku hunga un partido desisivo kontra Cuba, djaluna 11 di mart 6’or di mainta ora lokal di Kòrsou.

TOKYO,Hapon – Den tur partido ku e selekshon di Reino a hunga den e Klásiko Mundial di beisbòl nan a sabi di habri e merkado promé. Tur biaha ménos den e wega kontra China Taipei nan a sa di sali viktorioso. Nada no a kambia den e partido kontra Cuba, un biaha mas e selekshon Oraño ta habri e markadó i mantene esaki pa sigurá e viktoria.

E selekshon di Reino ta bai ariba den kabes di dos ining despues ku Curt Smith ta konektá un honron di un kareda. Andrelton Simmons ta hasi e partido 2-0 despues di konektá un single ku ta empuhá Kalian Sams ku a enbasá despues di un doblete.

Un defensa sólido a yuda e selekshon Oraño mantene nan bentaha apesar ku Diegomar Markwell no tabata mesun skerpi ku su promé wega kontra Sur Korea. Markwell a picha seis entrada permitiendo nuebe hit, un kareda i bolea unu. E defensa a logra konbertí sinku dòbel play den e promé seis entrada nan i asina yuda konserva e bentaha.

Den kabes di seis ining Reino Hulandes ta drenta ofensivo un biaha mas i ta añadié tres kareda riba un honron di tres kareda di Jonathan Schoop. Schoop ta empuhá un kareda mas den di ocho i asina sigurá e viktoria di 6-2 pa e ekipo Hulandes riba e selekshon di Cuba.

E selekshon di Reino ta hunga nan siguiente partido djadumingu 7’or di mainta ora lokal di Kòrsou kontra Hapon. Ku un viktoria e selekshon di Reino ta pasa pa semifinal na San Francisco, California.