Author: E. Evertsz

Posted on

Roger Bernadina huntu ku Jair Jurrjens den Spring Training ku Colorado Rockies

MERKA — E ekipo di Colorado Rockies a anunsiá nan peloteronan ku a risibí invitashon pa partisipá ku e ekipo di Liga Grandi na Spring Training. Entre e grupo di 24 pelotero ku a risibí invitashon tin Jair Jurrjens i Roger Bernadina.

Manera ta konosí Jair a firma un kontrakt di Liga Menor ku e ekipo di Colorado Rockies na novèmber di aña pasa. Ku e invitashon pa Spring Training Jurrjens lo haña e oportunidat di prueba su mes i posiblemente keda ku e ekipo di Rockies den Liga Grandi. Temporada pasa den Liga Menor ku e ekipo di Rockies Jair a logra un rèkert di 2-8 ku un efektividat di 4.54. Miéntras ku na dos okashon e picher a haña e oportunidat pa picha den Liga Grandi. Akinan Jair a logra un rèkert di 0-1 ku un efektividat di 10.61.

Un luna despues di Jair, Roger Bernadina tambe a yega na un akuerdo ku e ekipo di Colorado Rockies ku un kontrakt di Liga Menor. Temporada pasa Roger a pasa temporada ku e ekiponan di Cincinnati Reds i Los Angeles Dodgers.

Ku Dodgers e pelotero a pasa mayoria di su tempu den tripel A huntu ku e ekipo di Albuquerque Isotopes. Akinan Roger a logra un promedio di .246 den 23 partido. Na sèptèmber ora e ekiponan di Liga Grandi a ekspandé nan roster, Roger a subi ku e ekipo di grandi di Los Angeles. Akinan e pelotero a logra un promedio di .286 den 9 partido.

Meskos ku Jair, Roger tambe lo haña e oportunidat di prueba su mes i posiblemente keda ku e ekipo di Rockies den Liga Grandi despues di Spring Training. Pa Colorado Rockies picher i kèchernan mester reportá dia 21 di febrüari próksimo, miéntras ku e otro peloteronan mester tei dia 27 di febrüari.

Posted on

Breve Deporte Awe #1-017

  • Segun gerente general di Texas Rangers Jon Daniels, Jurickson Profar ta progresando satisfaktoriamente den su práktikanan. Aktualmente Jurickson ta bezig ta tira i swin. E pelotero lo siguí hasi un MRI kada tres siman. Segun e gerente general, no ta sigur ainda ku Profar lo ta ku e ekipo di Liga Grandi despues di Spring Training, ya komo ku e pelotero ta riba un regimen di ehersisio diferente for di e ekipo. Segun Daniels, Profar ta segun skedjel. Daniels a bisa ku Profar a sigui progresá den su programa di tira i den gym tambe tin progreso. Te ainda tur kos ta lus bèrdè pa Jurickson, segun Daniels.
  • E ekipo di New York Yankees a anunsiá ku nan tabata tin un reunion ku Alex Rodriguez. Segun e ekipo, e reunion ku a tuma lugá ayera tabata entre Hal Steinbrenner, Randy Levine, Brian Chasman, Jean Afterman, Alex Rodriguez i Jim Sharp. Den e reunion Alex Rodriguez a diskulpa su mes na e organisashon pa su akshonnan durante ultimo añanan. Segun e ekipo, tabata tin un diskushon habri i honesto riba tur asuntu. Ku esaki e ekipo ta hala un strepi tras di e problemanan i segun e ekipo nan siguiente paso ta hunga beisbòl den spring training. E komunikado no ta menshoná nada riba e posibel bononan ku Yankees lo tin ku paga Rodriguez, pues ta di suponé ku esaki tambe a keda solushoná.
  • Kubano prospekto, Yoan Moncada lo tuma oferta di ekiponan interesá den e próksimo dos simannan. Segun e agente di e pelotero, no muchu despues di e dos simannan aki e ta spera ku e pelotero lo tuma un desishon. Segun informashonnan, Los Angeles Dodgers, New York Yankees, Boston Red Sox i San Diego Padres ta tras di e pelotero aktualmente.
  • Detroit Tigers a anunsiá ku Victor Martinez a opera su rudia robes ayera despues di a leshoná esaki hasiendo ehersisio siman pasa. E ekipo ta spera ku den kuater pa seis siman tur e pelotero por kuminsá ku beisbòl atrobe i ta kla pa habri temporada dia 6 di aprel. Temporada pasa Martinez a logra un promedio di .335 ku 32 honron i 103 kareda empuha den 151 partido pa Detroit.
  • Segun informashonnan, e ekipo di Boston Red Sox ta analisando e posibilidat pa hunga un partido di ekshibishon na Cuba promé ku temporada regular kuminsá. Sin embargo, no tin plannan konkreto ainda. Pero tin informashon ku un konosido fanátiko di Red Sox i sekretario di Estado Merikano John Kerry tabata tin bos den e kòmbersashonnan. Baltimore Orioles tambe e ekspresá e deseo aki.
Posted on

Breve Deporte Awe #1-016

  • Segun informashonnan, tabata tin kòmbersashonnan entre Andruw Jones i un di sinku ekipo. E biaha aki kòmbersashonnan a wòrdu hibá ku e ekipo di Atlanta Braves. Sin embargo, ta parse ku e ekipo no tin lugá aktualmente pa e pelotero. E ekipo ta en búskeda di un batido iskierdo ku poder i ku por yuda den outfield.
  • Despues di a firma picher James Shields, e ekipo di San Diego padres agresivamente ta bai en búskeda di e pelotero prospekto kubano Yoan Moncada. Segun informashonnan e ekipo tabata tin un seshon di entrenamentu priva ku e pelotero ayera. Hopi ta kere ku Moncada por ta mihó ku su kompatriotanan, esta; Yasiel Puig, Jose Abreu, Yoenis Cespedes of Jorge Soler. San Diego Padres ta trahando un ekipo sumamente kompetitivo den e divishon west di Liga Nashonal. Durante di off-season e ekipo a atkerí banda di picher James Shields; Matt Kemp, Derek Norris, Justin Upton, Wil Myers, Brandon Morrow, Will Middlebrooks, Shawn Kelley, Brandon Maurer i Josh Johnson.
  • E ekipo di St. Louis Cardinals a anunsiá ku nan a yega na un akuerdo ku di dos aña ku e outfielder Jon Jay. Di e forma aki e dos bandanan ta evitá e proseso di arbitrahe salarial. Pa e dos añanan Jon Jay lo risibí un montante di 10,975 mion dòler. Jay temporada pasa tabata tin un promedio di .303 ku 3 honron i 46 kareda empuha.
  • Ku inisio di Spring Training aserkando, ya diferente ekipo a kuminsá muda nan materialnan pa e diferente kampamentunan di Spring Training na Arizona i Florida. Algun di e ekiponan ku ya a kuminsá ku mudansa ta: Baltimore Orioles, Miami Marlins, Texas Rangers i Washington Nationals. Entre 18 pa 22 di febrüari próksimo ta e fecha ku picher i kèchernan mester reportá na nan respektivo ekiponan. Di 23 pa 27 di febrüari e sobra peloteronan mester reportá. E promé partido di Spring Training ta kuminsá djaluna promé di mart.
Posted on

Breve Deporte Awe #1-015

  • Segun Gerente general di New York Yankees, Brian Cashman, e no ta garantisá ku e ekipo ta gana nan divishon e temporada aki pero ta rekonosé ku nan tin potensial si. Segun Chasman, nan tin hopi talento. Pero meskos ku otro ekiponan tin algun interogatorio. “Si e peloteronan ku tabata leshoná regresá den bon forma, si e rotashon keda saludabel, si e ekipo den su totalidat keda saludabel, nos tin un bon ekipo,” Cashman a bisa.
  • Diferente Gerente general den Liga Grandi ta papiando di e prospekto kubano di 19 aña Yoan Moncada. Segun algun e por ta e siguiente Robinson Cano of Chase Utley pero nan ta kere mas Cano. Otro nan ta bisa ku Moncada por ta mihó ku Yasiel Puig, Jose Abreu, Yoenis Cespedes of Jorge Soler. Sin embargo, tin gerente general ta kere ku Moncada mester di par di temporada den Liga Menor promé ku nan mand’e Liga Grandi.
  • E ekipo di Miami Marlins a mustra interes den picher agente liber Francisco Rodriguez. Marlins ta buskando pa drecha nan bullpen i e gerente general di e ekipo a bisa ku e ta konsiderando e veterano. Rodriguez temporada pasa ku e ekipo di Milwaukee Brewers a salba 44 partido ku un efektividat di 3.04.
  • Segun informashonnan, e ekipo di San Diego Padres a yega na un akuerdo ku picher James Shields. Shields a bai di akuerdo ku un dil di 4 aña pa un montante di entre 72 pa 78 mion dòler. Temporada pasa Shields a habri 34 partido pa Kansas City Royals kaminda e la logra un rèkert di 14-8 ku un efektividat di 3.21.

 

Posted on

Kòrsou ta kuminsá eliminatorio Rusia 2018 dia 27 di mart próksimo

WILLEMSTAD — Djasabra último a ser konfirmá ku e weganan, ku Kòrsou tin di hunga pa eliminatorio kampionato mundial di FIFA ku ta tuma lugá na Rusia na aña 2018 ta kuminsá dia 27 di mart próksimo na Kòrsou.

Manera ya a wòrdu trese dilanti den yanüari último, e sorteo a tuma lugá na Miami. Kòrsou ta sali den promé buèlta kontra Montserrat i si Kòrsou gana den e di 2 buèlta Kòrsou tin di hunga kontra Cuba na luna di yüni próksimo den e periodo di 9 pa 16 di yüni. E promé wega lo tuma lugá na Kòrsou i e di 2 partido lo tuma lugá na Cuba.

E promé wega kontra Montserrat ta tuma lugá djabièrnè 27 di mart den stadion Ergilio Hato pa 8or di anochi. E di 2 partido lo tuma lugá djamars 31 di mart na Montserrat.

E base di Kòrsou su selekshon lo ta e hungadónan ku aña pasa a hunga na Puerto Rico, despues na Guadeloupe i finalmente den novèmber aña pasa na Jamaica. Kòrsou su selekshon ta konsistí di mayoria hungadónan ku ta hunga den eksterior, kombiná ku hungadónan ku ta partisipá den kampionato lokal. E hungadónan di den eksterior ta partisipando aktualmente den nan respektivo klupnan su kampionato.

Kòmbersashonnan ta ser hiba ku diferente hungadónan mas pa sigui reforsá nos selekshon nashonal. Manera tur otro paisnan na mundu e hungadónan por partisipá pa representá nan respektivo pais solamente durante kalendario di FIFA i e biaha aki e ta di 23 di mart pa 31 mart próksimo.

Kòrsou su preparashon manera ya trese dilanti a kuminsá for di aña pasa den Caribbean Championship tantu na Puerto Rico, Guadeloupe i Montego Bay, Jamaica.

Negosashonnan ta tumando lugá pa nos selekshon tin un gran entrenadó Hulandes. E negosashonnan ta den un fase sumamente avansá i si tur kos ser regla pronto nos por firma i anunsiá ken e persona aki ta.

Na e momentu aki nos selekshon ta den man di sr. Etienne Siliee, ku lo pasa e tareanan over asina nos kaba di yega na un akuerdo final ku nos entrenadó nobo. Pronto por spera mas notisia i ta e intenshon pa djaweps dia 5 di mart próksimo duna mas informashon den un rueda di prensa tokante e magno evento aki.

Posted on

Breve Deporte Awe #1-015

  • E ekipo di Miami Marlins a gana e kaso di arbitrahe salarial kontra e picher Mat Latos. Latos a pidi un salario di 10,4 mion dòler pa e próksimo temporada. E panel di arbitronan no a bai di akuerdo ku esaki i a vota na fabor di Miami Marlins pa un kontrakt di 9,4 mion dòler. Latos tabata tin un rèkert di 5-5 den 16 salida ku un efektividat di 3.25 temporada pasa ku Cincinnati Reds. Marlins a haña e pelotero desèmber ultimo den un kambio ku Cincinnati Reds.
  • Detroit Tigers a anunsiá ku e pelotero Victor Martinez a sufri un leshon na su rudia hasiendo ehersisio, konsekuentemente e pelotero lo tin ku opera otro siman djamars. E ekipo no a bisa ainda kuantu tempu lo tuma pa e pelotero rekuperá, pero nan lo bisa esaki despues di e operashon hasi pa Dr. James Andres otro siman. Temporada pasa Martinez a logra un promedio di .335 ku 32 honron i 103 kareda empuha den 151 partido pa Detroit.
  • E ekipo di Boston Red Sox a yega na un akuerdo di ekstenshon ku picher Wade Miley. E dil ta pa e próksimo tres añanan na un montante di 19,25 mion dòler. Boston a risibí e picher na desèmber ultimo den un kambio ku Arizona Diamondbacks. Ku Diamondbacks temporada pasa Miley tabata tin un rèkert di 8-12 ku un efektividat di 4.34 den 33 salida.
  • Tin informashonnan ta sirkulando ku si tur kos kana bon den e próksimo siman Andruw Jones lo por keda kla ku un ekipo di beisbòl na Merka. Manera ta konosí Andruw a ekspresá su deseo pa regresá bek den beisbòl Liga Grandi despues di dos aña na Hapon. Tin vários ekipo ku a mustra interes kaba den e pelotero, entre nan: Houston Astros, Baltimore Orioles, Cleveland Indians i Miami Marlins.
Posted on

Breve Deporte Awe #1-014

  • Segun informashonnan, e merkado pa picher agente liber James Shields a kuminsá kue forma. E picher a risibí diferente oferta i ta spera ku pa fin di siman e picher por tuma un desishon. Algun di e ekiponan ku a mustrá interes den James Shields ta; Chicago Cubs, Miami Marlins i San Diego Padres. Hopi a sugerí ku New York Yankees of Boston Red Sox por buska James Shields pero te ku ayera niun di dos ekipo no a hasi un oferta na e pelotero. Shields temporada pasa a habri 34 partido pa Kansas City Royals kaminda e la logra un rèkert di 14-8 ku un efektividat di 3.21.
  • Tin informashon ku dos pelotero kubano ku ta partisipando na Seri di Karibe na Puerto Rico a bandoná e ekipo. Ta trata di e peloteronan Vladimir Gutierrez i Dainer Moreira. Segun informashonnan, Vladimir Gutierrez ta un di e mihó pichernan prospekto di Cuba. Guitierrez di 19 aña ya ta disponé di probablemente e mihó kurva na Cuba, segun ekspertonan. Miéntras ku Moreira ta un hungadó di kuadro ku hopi ta kere ta mas un pelotero di Liga Menor. Esaki apesar ku e pelotero tabata tin un promedio di .332 den 277 turno na bate temporada pasa na Cuba.
  • E ekipo di Texas Rangers a anunsiá ku nan a firma outfielder Ryan Ludwick na un kontrakt di Liga Menor ku invitashon pa Spring Training. Si e pelotero logra subi e roster di Liga Grandi na final di Spring Training e pelotero lo gana 1,75 mion dòler. Ryan Ludwick, Reed Johnson i Andruw Jones tabata e posibel peloteronan ku e keda sugerí na Cleveland Indians den nan búskeda di un batido man drechi. Ludwick temporada pasa ku e ekipo di Cincinnati Reds tabata tin un promedio di .244 ku 9 honron i 45 kareda empuha.
  • Kedando riba Andruw Jones, segun informashonnan tin un ekipo mas ku a puntra pa servisionan di Andruw Jones. Despues ku tres ekipo di Liga Merikano a puntra pa e pelotero, esaki ta e promé ekipo di Liga Nashonal ku nos a tende di dje. Ta trata di e ekipo di Miami Marlins ku tin mester di profundidat den nan outfield den kaso ku nan peloteronan prinsipal leshoná. E ekiponan di Liga Merikano ku a mustra interes tabata: Houston Astros, Baltimore Orioles i Cleveland Indians.
  • Baltimore Orioles a yega na un akuerdo ku picher Zach Britton i asina evitá e proseso di arbitrahe salarial. E pelotero a bai di akuerdo ku un dil di 3,2 mion dòler pa un aña. Adishonalmente e pelotero por risibí un kantidat di 300 mil dòler na insentivo pa weganan salba, kuminsando ku e di 45 partido salba. Temporada pasa e pelotero a salba 37 partido ku un efektividat di 1.65.
Posted on

Gobièrnu di Kòrsou a firma MOU pa renovashon di Stadion di Little League

WILLEMSTAD — Gobièrnu di Kòrsou, representá pa nos Promé Minister, sr. Ivar Asjes, i Minister Earl Balborda a firma un Memorandum of Understanding (MOU) huntu ku ARBJ-Foundation pa renobá Stadion di Beisbòl Little League na Muizenberg.

ARBJ-Foundation ta e fundashon enkabesá pa un di Kòrsou su peloteronan tòp ku a marka historia, sr. Andruw Jones. Renovashon di e Stadion di Little League ta enserá ku e stadion ta bai haña un ‘face lift’ kompletu. Asina e trabounan di konstrukshon ta konsentrá riba renobá e dos ‘dugout’nan, e barnan, ekspanshon di e vèlt di beisbòl aktual i mas espasio pa stashoná outo. Tambe e invershon tin komo meta pa pone disponibel un mínimo di 2.000 asiento nobo pa e públiko ku ta bishitá e stadion.

Gobièrnu mesora a duna su kooperashon kompletu pa e proyekto kana den bon direkshon i ku rapides. Renovashon di e Stadion di Little League ta toka diferente di e metanan stratégiko den e Programa di Gobernashon titulá ‘Speransa i Konfiansa’. Un aspekto klave ta formashon di nashon ya ku deporte ta un punto kardinal ku ta trese nos nashon huntu. Kòrsou komo isla chikí su nòmber ta resoná den deporte internashonal. Esaki tambe por habri bista di potensial invershonistanan pa invertí na Kòrsou i asina kontribuí na mas entrada pa Gobièrnu por sigui fasilitá i mehorá e fasilidatnan pa e talentonan lokal den deporte por sigui desaroyá. Gobièrnu di Kòrsou ta sigui traha riba mas kooperashon entre instansianan pa logra e metanan stipulá pa adelanto di nos nashon. Gobièrnu di Kòrsou ta gradisí sr. Ivan de Windt di Stichting Sport Terreinen kende a duna su aporte pa e firmamentu di e MOU bira realidat.

Posted on

Kampionato Hubenil su resultadonan i skema pa wikènt binidero

Resultadonan u-11 te ku u-15

Fecha Tim di kas Bishitante Velt U-11 U-13 U-15
31-01-2015 Willemstad A v/s Excellence A WILLEMSTAD (1) 2-2 4-5 2-3
31-01-2015 SUBT A v/s Hubentud Fortuna SUBT 10-0 5-0 2-0
31-01-2015 Mahuma v/s Victory Boys MAHUMA 0-0 0-0
31-01-2015 Tera Cora v/s Victory Boys MAHUMA 2-0
31-01-2015 Quick ’60 v/s Gemstones United QUICK ’60 Cancelled Cancelled
31-01-2015 New Song v/s Scherpenheuvel FFK 1-0 6-0 0-11
31-01-2015 UNDEBA v/s Sithoc-Marchena TERA CORA 3-1 2-4
31-01-2015 VESTA v/s Atletico Salinja A VESTA 1-1 2-8 2-8
 

Kategoria u-17 & u-20:

Fecha Tim di kas Bishitante Velt U-17 U-20
31-01-2015 Victory Boys v/s C-Stars United FFK 0-3
31-01-2015 Mahuma v/s Scherpenheuvel SUBT D 0-3
31-01-2015 Willemstad A v/s Centro Barber FFK 6-0
31-01-2015 Atletiko Saliña v/s Willemstad B SDK 7-1
 
02-02-2015 Hubentut Fortuna v/s VESTA SDK 1-1
03-02-2015 Scherpenheuvel v/s Jong Holland SDK 3-4
 

Kampionato timnan B:

Fecha Tim di kas Bishitante Velt U-11 U-13 U-15
31-01-2015 Willemstad C v/s Atletico Salinja B WILLEMSTAD (2) 1-2  
31-01-2015 Excellence B v/s F.C. Stallions WILLEMSTAD (2) D 0-3  
31-01-2015 Willemstad B v/s Excellence B WILLEMSTAD (1) 9-1
31-01-2015 SUBT B v/s Willemstad B SUBT 0-2
31-01-2015 Atletico Salinja B v/s Excellence B VESTA 2-2
 

Weganan pa wikènt binidero:

Kategoria u-11 te ku u-15:

Fecha Tim di kas Bishitante Velt U-11 U-13 U-15
7-2-2015 Scherpenheuvel Atletico Salinja A SCHERPENHEUVEL 10:00 AM 11:30 AM 1:00 PM
7-2-2015 SUBT A Excellence A SUBT 10:00 AM 11:30 AM 1:00 PM
7-2-2015 UNDEBA Gemstones United TERA KORA 10:00 AM 11:30 AM
7-2-2015 New Song Quick ’60 FFK 10:00 AM 11:30 AM
7-2-2015 New Song Tera Kora FFK 1:00 PM
7-2-2015 Genesis Boys Victory Boys VESTA 10:00 AM 11:30 AM
7-2-2015 Jong Holland Victory Boys VESTA 1:00 PM
7-2-2015 Mahuma Willemstad A MAHUMA 10:00 AM 11:30 AM
7-2-2015 Hubentud Fortuna VESTA SERU FORTUNA 10:00 AM 11:30 AM 11:00 AM

Kategoria u-17 & u-20:

Fecha Tim di kas Bishitante Velt U-17 U-20
Djabierne 6-2-2015 Quick ’60 Sithoc-Marchena FFK 19:00
Djabierne 6-2-2015 UNDEBA Hubentud Fortuna SDK 19:00
Djabierne 6-2-2015 Vesta Willemstad A VESTA 19:00 21:00
Djabierne 6-2-2015 Scherpenheuvel Willemstad B SUBT 20:30
Djabierne 6-2-2015 Hubentud Fortuna Centro Dominguito SDK 21:00
Djabierne 6-2-2015 Mahuma Indekor FFK 21:00
 
Djasabra 7-2-2015 Victory Boys Excellence FFK 17:00
Djasabra 7-2-2015 Scherpenheuvel Sithoc-Marchena FFK 19:00
Djasabra 7-2-2015 Mahuma C-Stars United SDK 20:00
Djasabra 7-2-2015 New Song Centro Barber VESTA 20:00
Djasabra 7-2-2015 SUBT Jong Holland SUBT 19:00 21:00
Djasabra 7-2-2015 Centro Barber Victory Boys FFK 21:00

Kampionato timnan B:

Fecha Tim di kas Bishitante Velt U-11B U-13B U-15B
6-2-2015 Atletico Salinja B SUBT B WILLEMSTAD (1) 6:00 PM
6-2-2015 Atletico Salinja B SUBT B WILLEMSTAD (1) 7:30 PM
7-2-2015 Excellence B Excellence D WILLEMSTAD (2) 10:00 AM
7-2-2015 Excellence C Willemstad C WILLEMSTAD (2) 11:30 AM
7-2-2015 SUBT B F.C. Stallions WILLEMSTAD (2) 1:00 PM
7-2-2015 Excellence C Excellence B WILLEMSTAD (1) 11:30 AM
7-2-2015 Excellence B Willemstad B WILLEMSTAD (1) 1:00 PM
 

 

FFK ta invitá hinter e pueblo di Kòrsou pa bin disfrutá i apoyá nos muchanan den e delaster wikènt di e weganan di Kampionato Hubenil, promé ku bai ku algun dia di vakashon en konekshon ku e temporada di karnaval. E weganan aki ta tuma lugá for di mainta te atardi riba djabièrnè i djasabra na diferente vèlt rònt Kòrsou. Bin ku hinter bo famia pa bin disfrutá di e tremendo partidonan aki i alabes bin apoyá nos futuro nan di mañan, tur wega ta grátis!

Posted on

Breve Deporte Awe #1-013

  • Cleveland Indians ta otro ekipo ku segun informashonnan a mustra interes den servisionan di Andruw Jones. E ekipo di Cleveland ta en búskeda di entre otro un batido man drechi. Banda di Cleveland den pasado Andruw i su agente tabata tin kòmbersashonnan ku Baltimore Orioles i tambe Houston Astros. Sin embargo banda di Houston Astros kos a manera fria un tiki.
  • E ekipo di Kansas City Royals a yega na un akuerdo di un aña pa 2,64 mion dòler ku Mike Moustakas. Ku esaki e ekipo ta evitá e proseso di arbitrahe salarial. Moustakas temporada pasa tabata tin un promedio di .212 ku 15 honron i 54 kareda empuha.
  • Segun informashonnan, MLB a duna lus bèrdè pa e pelotero Kubano Yoan Moncada por firma ku un ekipo di Liga Grandi. Algun siman pasa e pelotero aki di 19 aña di edat tabata tin un seshon di entrenamentu priva pa e ekipo di New York Yankees. Scoutnan ta kompará Moncada ku otro peloteronan Kubano manera Jorge Soler i Yasiel Puig. Mas aleu nan ta bisa ku ofensivamente e pelotero ta hopi bon i nan ta kere ku e lo ta un futuro segunda of tersera base. San Francisco Giants i Boston Red Sox tambe a mustra interes den e pelotero aki.
  • Picher agente liber Kyle Kendrick a yega na un akuerdo ku e ekipo di Colorado Rockies. E akuerdo ta pa un aña na 5,5 mion dòler. Kendrick te awor a pasa tur su añanan den Liga Grandi ku e ekipo di Philadelphia Phillies. Temporada pasa Kendrick tabata tin un rèkert di 10-13 den 32 salida ku un efektividat di 4.61.