Gobièrnu di Kòrsou a firma MOU pa renovashon di Stadion di Little League

WILLEMSTAD — Gobièrnu di Kòrsou, representá pa nos Promé Minister, sr. Ivar Asjes, i Minister Earl Balborda a firma un Memorandum of Understanding (MOU) huntu ku ARBJ-Foundation pa renobá Stadion di Beisbòl Little League na Muizenberg.

ARBJ-Foundation ta e fundashon enkabesá pa un di Kòrsou su peloteronan tòp ku a marka historia, sr. Andruw Jones. Renovashon di e Stadion di Little League ta enserá ku e stadion ta bai haña un ‘face lift’ kompletu. Asina e trabounan di konstrukshon ta konsentrá riba renobá e dos ‘dugout’nan, e barnan, ekspanshon di e vèlt di beisbòl aktual i mas espasio pa stashoná outo. Tambe e invershon tin komo meta pa pone disponibel un mínimo di 2.000 asiento nobo pa e públiko ku ta bishitá e stadion.

Gobièrnu mesora a duna su kooperashon kompletu pa e proyekto kana den bon direkshon i ku rapides. Renovashon di e Stadion di Little League ta toka diferente di e metanan stratégiko den e Programa di Gobernashon titulá ‘Speransa i Konfiansa’. Un aspekto klave ta formashon di nashon ya ku deporte ta un punto kardinal ku ta trese nos nashon huntu. Kòrsou komo isla chikí su nòmber ta resoná den deporte internashonal. Esaki tambe por habri bista di potensial invershonistanan pa invertí na Kòrsou i asina kontribuí na mas entrada pa Gobièrnu por sigui fasilitá i mehorá e fasilidatnan pa e talentonan lokal den deporte por sigui desaroyá. Gobièrnu di Kòrsou ta sigui traha riba mas kooperashon entre instansianan pa logra e metanan stipulá pa adelanto di nos nashon. Gobièrnu di Kòrsou ta gradisí sr. Ivan de Windt di Stichting Sport Terreinen kende a duna su aporte pa e firmamentu di e MOU bira realidat.