Kòrsou ta kuminsá eliminatorio Rusia 2018 dia 27 di mart próksimo

WILLEMSTAD — Djasabra último a ser konfirmá ku e weganan, ku Kòrsou tin di hunga pa eliminatorio kampionato mundial di FIFA ku ta tuma lugá na Rusia na aña 2018 ta kuminsá dia 27 di mart próksimo na Kòrsou.

Manera ya a wòrdu trese dilanti den yanüari último, e sorteo a tuma lugá na Miami. Kòrsou ta sali den promé buèlta kontra Montserrat i si Kòrsou gana den e di 2 buèlta Kòrsou tin di hunga kontra Cuba na luna di yüni próksimo den e periodo di 9 pa 16 di yüni. E promé wega lo tuma lugá na Kòrsou i e di 2 partido lo tuma lugá na Cuba.

E promé wega kontra Montserrat ta tuma lugá djabièrnè 27 di mart den stadion Ergilio Hato pa 8or di anochi. E di 2 partido lo tuma lugá djamars 31 di mart na Montserrat.

E base di Kòrsou su selekshon lo ta e hungadónan ku aña pasa a hunga na Puerto Rico, despues na Guadeloupe i finalmente den novèmber aña pasa na Jamaica. Kòrsou su selekshon ta konsistí di mayoria hungadónan ku ta hunga den eksterior, kombiná ku hungadónan ku ta partisipá den kampionato lokal. E hungadónan di den eksterior ta partisipando aktualmente den nan respektivo klupnan su kampionato.

Kòmbersashonnan ta ser hiba ku diferente hungadónan mas pa sigui reforsá nos selekshon nashonal. Manera tur otro paisnan na mundu e hungadónan por partisipá pa representá nan respektivo pais solamente durante kalendario di FIFA i e biaha aki e ta di 23 di mart pa 31 mart próksimo.

Kòrsou su preparashon manera ya trese dilanti a kuminsá for di aña pasa den Caribbean Championship tantu na Puerto Rico, Guadeloupe i Montego Bay, Jamaica.

Negosashonnan ta tumando lugá pa nos selekshon tin un gran entrenadó Hulandes. E negosashonnan ta den un fase sumamente avansá i si tur kos ser regla pronto nos por firma i anunsiá ken e persona aki ta.

Na e momentu aki nos selekshon ta den man di sr. Etienne Siliee, ku lo pasa e tareanan over asina nos kaba di yega na un akuerdo final ku nos entrenadó nobo. Pronto por spera mas notisia i ta e intenshon pa djaweps dia 5 di mart próksimo duna mas informashon den un rueda di prensa tokante e magno evento aki.