Category: Futbòl

Posted on

Centro Dominguito Ta Gana!

E kampionato di promé divishon di futbòl a kontinuá i ayera nochi riba tereno di Federashon Futbòl Kòrsou, Centro Dominguito a topa Subt. Den e partido aki Centro Dominguito a logra un viktoria di 2-0. Rolando Martina a anotá tur dos gol pa Centro Dominguito. E promé gol a wòrdu anotá den promé mitar i despues den di dos mitar Martina ta amplia e bentaha di Centro ku un di dos gol. Djarason 8’or di anochi e kampeonato di FFK ta kontinuá kaminda Hubentut Fortuna ta enfrentá Victory Boys.

Posted on

Tenshon entre FIFA i Brazil!

Den siman tras di lomba, sekretario general di FIFA Jerome Valcke a krítika Brazil públikamente riba nan preparashon nan pa Kopa Mundial 2014. Valcke no ta komprondé dikon kos nan no ta kanando i tur preparashon ta kana retrasá.

Brazil su minister di deporte, Aldo Rabelo, a yama e komentario nan di Valcke inapropiá, ofensivo i inakseptabel. E ministerio a siguí bisa ku nan lo entrega un karta na presidente di FIFA Sepp Blatter indikando ku Brazil lo no siguí traha ku Valcke i pa puntra FIFA pa apuntá un representante nobo.

Segun eks kampion mundial i aktual kongresista Romario, nos kara lo ta na bèrgwensa ku e aeropuerto nan na Brazil si trabou nan no kuminsá lihé. Pa ta sinsero. Mi ta purba na keda positivo i spera ku esaki lo no pasa Romario a terminá bisando.

Posted on

Futbol Prome Divishon ta sigi!

Despues ku Stadion Ergilio Hato no ta disponibel te ku final di e luna aki pa motibu di konstrukshon i renobashon di e lus nan, tòg Federashon Futbòl Kòrsou a haña manera pa sigui ku e partido nan di Promé Divishon.

Djasabra Jong Holland a tabla kontra Undeba ku un skor final di 0 – 0, miéntras ku ayera nochi Sithoc a gana ku skor di 5 – 0 kontra Vesta.

Awe nochi Centro Dominguito ta topa Subt riba tereno di Federashon Futbòl Kòrsou.

Posted on

Platini: Real Madrid – Barcelona por hasi e final di Liga di Kampion grandioso!

E presidente di UEFA Michel Platini no ta favoresé ningun ekipo pa yega e final di e kompetensia, pero a atmití ku un partido entre e dos grandi nan di Spaña lo ta hopi atraktivo. Platini a sigui bisando, ku no por deskartá e ekipo nan Ingles i esun nan Italiano ku tambe ta den kompetensia ainda.

Barcelona ya tin un pia den kuart final despues di un viktoria di 3 -1 den e promé buèlta kontra Bayer Leverkussen, miéntras ku Real Madrid a tabla 1 – 1 kontra CSKA Moscow faltando e partido di buèlta djarason aki na Santiago Bernabeu.

E dos ekipo nan aki a topa otro aña pasa den e semi final di Liga di Kampion, kaminda Barca a sali viktorioso ku un saldo di gol di 3 – 1.

Posted on

Lionel Messi un biaha mas e mihó di mundu

Zurich tabata e esenario pa e promé evento mundial grandi di futbòl, kaminda djaluna 9 di yanüari tabata tin e FIFA Ballon d’Or 2011 Gala.

Den e evento aki FIFA lo otorgá e premio Ballon d’Or na e mihó hungadó di aña 2011, tambe lo premia e mihó coach i e mihó gol di 2011.

E strea di Santos, Neymar a gana e premio di mihó gol pa su gol sensashonal ku e la anotá kontra Flamengo. Neymar a gana tantu Lionel Messi i Wayne Rooney pa e mihó gol di aña 2011.

Pep Guardiola di FC Barcelona a gana e premio di coach di aña den futbòl maskulino. Norio Sasaki coach di e selekshon Hapones femenino a bira coach di aña den futbòl femenino.

Por último FIFA a otorgá e Ballon d’Or pa e mihó hungadó nan di 2011. Den e sekso femenino e premio a bai pa e hungadó Hapones, Homare Sawa. Den futbòl maskulino e premio di mihó hungadó pa aña 2011 a bai pa Lionel Messi. Esaki ta e di tres aña konsekutivo ku Messi ta wòrdu nombra komo e mihó di mundu. Ku esaki Messi dupliká e rèkòrt di Michel Platini ku tambe a logra gana e premio di Ballon d’Or Franses na tres okashon konsekutivo.

Posted on

Kòrsou ku fiesta di gol!

Awe Kòrsou e hunga su último partido pa loke ta trata e klasifikatorio pa mundial Brazil 2014. E partido aki a wòrdu hunga entre e selekshon di Kòrsou i e selekshon di Isla Virgenes na Stadion Ergilio Hato na Kòrsou. Un biaha mas e selekshon Kurasoleño a hasi loke tabata su kustumber durante di e klasifikatorio aki i bai ariba promé den e markadó. Den tur e seis partido nan ku e ekipo di Kòrsou a hunga, ta den e partido kontra Antigua na Kòrsou, so e selekshon Kurasoleño no a logra bai ariba promé i ta e úniko biaha ku Kòrsou no ta hinka gol. Den e partido di awe Kòrsou a hinka seis gol i a permití un gol. E gol nan di Kòrsou a wòrdu anotá pa Shanon Carmelia (33’, 78’), Richmar Silberie (39’, 85’), Everon Espacia (73’) i Angelo Cijntje (89’). Keda pendiente pa den e próksimo dia nan un análisis kompletu di e selekshon Kurasoleño di e klasifikatorio pa mundial 2014.

Posted on

Kòrsou ta gana su promé wega!

E selekshon di futbòl di Kòrsou a gana su promé wega den e klasifikatorio pa mundial di futbòl Brazil 2014. Despues di a pèrdè e promé tres partido nan i empatá den e di kuater partido kontra Haiti, Kòrsou ta drenta kolumna di viktoria. E viktoria aki a bin den e partido di Kòrsou kontra Islas Virgenes i tur e gol nan a bin den promé mitar di e partido. Na di ocho i di 13 minüt Richmar Silberie ta manda Kòrsou ariba dos pa nada. Djis un ratu despues na di 26 minüt Sendley Bito ta anotá un gol pa hasi e skor tres pa nada. Ku e viktoria aki Kòrsou ta haña kuater punto faltando un partido mas. Kòrsou ya a wòrdu eliminá for di klasifikashon pa mundial 2014 pero ku e viktoria nan ta garantisá ku nan ta finalisá e klasifikatorio na di tres lugá.

Posted on

Skedjel di partido pa Kopa Mundial di FIFA 2014 a wòrdu anunsiá!

E skedjel di partido pa e di 20 Kopa Mundial di FIFA a wòrdu anunsiá awe 20 di òktober na Zurich, Suisa. 12 suidat na Brazil lo ta anfitrion di e 64 partido nan ku lo tuma lugá den e kopa. Sao Paulo lo ta testigu di e partido di apertura riba 12 di yüni 2014, miéntras ku Rio de Janeiro lo ta e lugá di enkuentro pa e final di torneo mas prestigioso di futbòl mundial.

E anfitrion Brazil lo wòrdu di lòt komo A1 i konsekuentemente nan lo hunga e wega di apertura na Sao Paulo dia 12 di yüni, 16.00 ora lokal di Kòrsou. Nan siguiente partido lo ta djamars 17 di yüni na Fortaleza, 18.00’or di atardi. Por último Brazil ta sera e ròndu di grupo djaluna 23 di yüni, 12.00’or di mèrdia na Brasilia.

Adishonal e orario di komienso di e diferente partido nan lo ta lo siguiente (orario lokal di Kòrsou):

Partido di Apertura: 16.00
Partido nan di Grupo: 12.00, 15.00, 18.00, 21.00
Ròndu di 16 / Kuart-final: 12.00, 16.00
Semi-final: 16.00
Partido pa di tres lugá: 16.00
Final: 15.00

Pa e skedjel kompletu klik aki.

Posted on

Kòrsou ta difikultá kos pa Haiti!

Aunke Kòrsou a keda matemátikamente eliminá for di e kontienda pa yega mundial Brazil 2014 despues di e partido ku Kòrsou a pèrdè kontra Antigua dia 7 di òktober tòg a keda tres partido pa e ekipo di Kòrsou hunga. Un di a partido nan ei tabata awe kontra Haiti kaminda Kòrsou a empatá na 2 gol. Den e partido aki Kòrsou a bai ariba 2 pa nada ku gol nan di Richmar Silberie na di shete minüt di promé tempu i shete minüt despues ku gol di Sendley Bito. Kòrsou no por a wanta e bentaha aki i na di 25 minüt Haiti ta haña un pinalti i hasi e partido 2 pa 1. Den di 60 minüt Kòrsou no ta logra mantené e bentaha i ta permití e gol di empate.

Despues di kuater partido den e klasifikatorio pa mundial Brazil 2014 tin un kos ku Deporte Awe! por señalá komo e denominadó komun pa loke ta trata e selekshon Kurasoleño i esei ta e echo ku Kòrsou no por logra mantené nan bentaha. Ku eksepshon di un partido, tabata tin tres partido ku Kòrsou a bai ariba promé pero no ta logra wanta e bentaha. Na dos okashon Kòrsou ta pèrdè despues di ta ariba i na un okashon empatá.

Kon kos lo tabata si nos por a wanta e bentaha nan aki? Si Kòrsou por a logra esaki, awe e selekshon Kurasoleño lo tabata tin tres wega gana i un wega pèrdí ku ta bon pa 9 punto, faltando dos partido kontra Isla Virgenes. Den e senario aki Kòrsou lo tabata empatá ku Antigua na 9 punto komo lider di Grupo F. E resultado aki lo a faboresé Kòrsou enormemente teniendo na kuenta ku Antigua lo hunga su último dos nan kontra Haiti. Lástimamente esaki lo keda simplemente un nostalgia pa hopi di nos.

Apesar di esaki tòg e empate di awe kontra Haiti di awe ta duna tòg un tiki satisfakshon. Ku e empate di awe Kòrsou ta hinka Haiti den un buraku. Ku e empate aki Haiti tin kuater wega hunga ku 10 punto i faltando dos wega kontra Antigua. Antigua a gana su partido kontra Isla Virgenes i konsekuentemente ta komandá Grupo F ku 12 punto, faltando dos wega.

Posted on

Kòrsou ta pèrdè kontra Antigua i matematikamente ta elimina for di mundial 2014!

Kòrsou ta bolbe pèrdè ku skor di 1 pa nada kontra Antigua den un wega ku Kòrsou mester a gana. Den e promé partido kontra Antigua Kòrsou a pèrdè ku skor di 5 pa 2. Ku e wega pèrdí aki Kòrsou tin un rekòrt di sero wega gana i tres wega pèrdí. Faltando tres partido mas esaki ta nifiká ku Kòrsou no ta pasa pa e siguiente ròndu di klasifikashon pa mundial Brazil 2014. Pa logra pasa pa e siguiente buèlta di e klasifikatorio pa mundial bo mester gana bo grupo.

Dikon Kòrsou ta keda eliminá? Tantu Haiti komo Antigua a gana tur tres di nan promé partido nan i konsekuentemente nan tin 9 punto kada un. Ainda Kòrsou falta hunga tres partido pero ku e wega pèrdí kontra Antigua, Kòrsou mester gana tur su siguiente tres partido nan i spera ku Antigua ta pèrdè tur su tres siguiente partido nan pa asina forsa un empate na 9 punto ku Antigua. Pero pa Antigua pèrdè tur tres di su siguiente partido nan ta nifiká ku Haiti ta gana por lo mínimo dos partido, teniendo na kuenta ku Antigua ta hunga kontra Haiti nan último dos partido nan di klasifikatorio pa mundial 2014. Ku Haiti ganando por lo mínimo  e último dos partido nan ta sufisiente pa nan yega 12 punto i asina gana e grupo. Meskos ta konta den e kaso ku Haiti pèrdè su último tres partido nan, e ora ei Antigua ta gana por lo mínimo dos i asina gana e grupo.

Facebook Twitter Instagram Youtube
© 2025 Deporte Awe. Tur derechi reservá. Diseñá pa E² Media