Category: Futbòl

Posted on

UNDEBA a eligí un direktiva nobo

WILLEMSTAD — Konforme UNDEBA su statuto durante di un Reunion General ku a tuma lugá dia 19 di mei 2022 miembronan a eligí un Direktiva Nobo.
E Direktiva Nobo aki ta konsistí di:
Presidente: Rignaal “Jean” Francisca
Vise-Presidente: Sigmond Jamanika
Sekretario: Jowenny Troeman
2e Sekretario: Georgina Francisca
Tesorero:  Asherellah François
2e Tesorero: Urvin Martina
Komisario: Selfrin Sambo
Komisario: Aldrin Troeman
Komisario: Sandie Ortela
Esaki lo ta e tim dinamikó ku lo sigui traha duru pa yuda engrandesé e ekipo di UNDEBA ku ta rumbo pa kumpli su di 50 aniversario.
Pa tur ku kier tuma kontakto ku UNDEBA, nan por hasi esei libremente na undeba20@gmail.com
Posted on

Selekshon Nashonal di Futbòl Maskulino a Kuminsá Preparashonnan pa Próksimo Kompromisonan Durante CONCACAF Nations League

WILLEMSTAD — Nos selekshon nashonal tin algun kompromiso sumamente importante durante e CONCACAF Nations League. Nos promé partido lo tuma lugá 3 di yüni aki na Kòrsou kontra Honduras den Stadion Ergilio Hato pa 8’or di anochi. Despues di e partido aki nos selekshon lo biaha pa Honduras i Canada pa nos 2 otro kompromisonan pa kompletá e buèlta aki.

Despues ku nos kuerpo tékniko enkabesá pa Guus Hiddink i Art Langeler a bira konosí, awor nos ta anunsiá e lista di 23 hungadó ku lo partisipá na nos enkuentro kontra Honduras.

E siguiente hungadónan lo forma parti di nos selekshon;

    1. Eloy Room
    2. Tyrick Bodak
    3. Jean-Marc Antersijn
    4. Rhu-Endly ‘Cuco’ Martina
    5. Roshon van Eijma
    6. Suently Alberto
    7. Dylan Timber
    8. Michaël Maria
    9. Bradley Martis
    10. Vurnon Anita
    11. Kevin Felida
    12. Leandro Bacuna
    13. Roly Bonevacia
    14. Juninho Bacuna
    15. Elson ‘Sontje’ Hooi
    16. Kenji Gorré
    17. Joshua Zimmerman
    18. Brandley Kuwas
    19. Gervane Kastaneer
    20. Rangelo Janga
    21. Anthony v/d Hurk
    22. Jurriën Gaari
    23. Jearl Margaritha

Preparashonnan ta kontinuá pa nos selekshon nashonal su promé kompromiso durante di e CONCACAF Nations League pa 2022, dia 3 di yüni pa 8’or di anochi den Stadion Ergilio Hato kontra Honduras.

Posted on

Smart Home Depot ta Spònser C.S.D. Barber Unifòrm Nobo

WILLEMSTAD — C.S.D. Barber, ku hopi honor i orguyo, ta informá ku e empresa Smart Home Depot a patrosiná unifòrm nobo di e ekipo grandi pa e kampionato aktual di futbòl.

Manera ya ta konosí algun tempu atras Smart Home Depot a patrosiná e ekiponan hubenil di e organisashon C.S.D. Barber ku nan unifòrm i awor a toka turno na e ekipo den divishon di honor.

No opstante ku e situashon finansiero no ta esun mas optimal tòg Smart Home Depot a sa di hasi su esfuerso i a patrosiná e ekipo di Centro Barber ku unifòrm nobo nobo. Smart Home Depot ta tur tur ku e pueblo di banda abou i prueba di esaki ta nan sosten na e organisashon di C.S.D. Barber.

C.S.D. Barber ta gradisí  gerensia i personal di Smart Home Depot, representantenan di e marka iNGCO Curacao, pa e tremendo gesto aki. E ekipo di Centro Barber sigur lo hasi su máksimo esfuerso pa sigui saka kara i ta invitá tur fanátiko pa bin sostené e ekipo durante kampionato.

Posted on

Nos Selekshon Nashonal Femenino U-17 Lo Partisipá Na Segundo Buèlta Di E Concacaf Women’s U-17 Championship Ku Lo Tuma Lugá 30 Aprel Na Repúblika Dominikana

WILLEMSTAD — Aña pasá nos selekshon nashonal femenino kategoria U-17 a terminá komo number 1 den su pul i a klasifiká pa e segundo buèlta di e CONCACAF Women’s U-17 Championship. P’esei nos selekshon ta rumbo pa Repúblika Dominikana pa enfrentá sea Merka òf Costa Rica (dependiendo di nan resultado awe) durante nos kompromiso di e segundo buèlta di a kampionato aki. Nos partido lo tuma lugá 30 di aprel pa 4’or di atardi den Stadion Cristóbal Panamerican aya na Repúblika Dominikana.

Nos selekshon di dama kategoria U-17 ya tin algun siman ta preparando i ta praktiká pa saka kara di Kòrsou un biaha mas. Un grupo di 19 hungadó ta forma parti di nos selekshon nashonal femenino kategoria U-17. E hungadónan aki ta hungadónan aktivo den Kampionato Femenino pero tambe tin 2 hungadó residensiá na Hulanda i Boneiru ku a bin pa reforsá nos selekshon.

E selekshon a wòrdu dirigí pa Sr. Reynold Mercera ku ta wòrdu asistí pa

Sr. Heinrich Roojer komo asistente tékniko i Sr. Pablo Mark Alomá komo entrenadó di portero. Sra. Dianne Winklaar huntu ku Sra. Denice Linger Berggraaf ta e masahistanan miéntras dòkter Eartha Helstone tambe ta kompañá e selekshon.

E hefe di delegashon ta Sra. Fabi Constansia, miembro di direktiva di FFK.

E siguiente hungadónan ta forma parti di nos selekshon;

    1. Rushaviana Petronilia (Jong Holland)
    2. Deyanisha Dorcas (Hubentut Fortuna)
    3. Charnainelys Andrea (Vesta)
    4. Julainy Fanijten Thielman (Wishi Marchena)
    5. Gervionna Martina (Jong Colombia)
    6. Ludmarie Flaneur (Xerxes DZB, Hulanda)
    7. Lygaira Pieters (Atletico Tera Cora, Boneiru)
    8. Raëngely Keller (Excellence School)
    9. Queen-Jelly Alexandre (Vesta)
    10. Gionella Calvenhoven (Vesta)
    11. Soerianieh Nucatia (Excellence School)
    12. Kaaisha Constansia (Excellence School)
    13. Kishana Mathilda (Jong Holland)
    14. Aukje Moerdijk (Inter Willemstad)
    15. Queennaily Geertruida (Jong Holland)
    16. Caelyn Hodge (Excellence School)
    17. Kyra Martie (Excellence School)
    18. Lisa Pasman (Excellence School)
    19. Shoniqca Olaria (Excellence School)

Preparashonnan ta kanando den ful swing pa nos damanan ku lo biaha próksimamente pa Repúblika Dominikana pa nos kompromiso durante e segundo buèlta di e CONCACAF Women’s U-17 Championship.

Posted on

3 Entrenadó Femenino Di Kòrsou a Biaha pa Boneiru pa Partisipá na e UEFA Assist Dutch Caribbean 2022

WILLEMSTAD — Tur aña KNVB ku UEFA ta brinda oportunidat na entrenadónan femenino di Sürnam, Aruba, Boneiru, Kòrsou i Sint Maarten pa siguí kursonan pa siguí desaroyá nan abilidatnan futbolístiko. E biaha aki FFB ta tin e oportunidat pa organisá UEFA Assist Dutch Caribbean 2022 ku a tuma lugá di 16 pa 23 di aprel. Rignalda Hooi, Merrydiën Martina i Suryli Ipcedencia a biaha pa Boneiru pa partisipá na e kurso aki ku e meta pa ampliá nan konosementu di futbòl i pone den praktiká tur loke nan a siña pa engrandesé futbòl femenino aki na Kòrsou.

E kurso aki a tuma lugá di mainta pa atardi na un skol na Rincon i e tabata repartí den 2 parti. Parti mainta tur kursista tabata haña e parti teorétiko ku presentashonnan di Powerpoint. Parti atardi ta tin e parti práktiko ku un grupo di 49 hungadó femenino di Boneiru entre 9 pa 13 aña ku tambe a partisipá na e kurso p’asina pone den praktiká loke a duna durante e kurso. Tambe nan mester a hasi diferente tareanan den grupo i por último organisá un torneo, harma vèlt, analisá trainingnan i duna puntuashon na e hungadónan abase di nan prestashon.

Un total di 20 kursista a partisipá na e kurso aki ku a resultá un éksito.

Tur e kursistanan tabata di opinion ku e kurso tabata hopi interesante i bon hinká den otro pasó despues di e parti teorétiko, nan tabata pone den práktika tur loke nan a siña, riba e mesun dia pa despues evaluá e kosnan ku a bai ménos bon. Tambe tabata algu hopi grandi pa por a konosé e legendario Johan Neeskens personal i a tuma lès serka 2 di e mihó entrenadónan na Hulanda ku ta Henriette de Reus i Corina Dekker.

Pues nan ta tin un eksperensia úniko i hopi informativo.

Awor futbòl femenino ta konta ku 3 entrenadó bon prepará pa siguí desaroyá nos damanan i yuda engrandesé futbòl femenino aki na Kòrsou.

FFK ta felisitá tur e entrenadónan aki ku nan diploma di UEFA Assist Dutch Caribbean 2022!

Posted on

Guus Hiddink Direktor Tekniko di Selekshon Nashonal Maskulino

WILLEMSTAD — Manera ya ta konosí den e lunanan benidero nos selekshon nashonal lo tin algun partido sumamente importante na kaminda. Despues ku nos selekshon ta tin algun luna inaktivo, direktiva di Federashon Futbòl Kòrsou huntu ku e departamento tékniko a bin ta traha duru p’asina yega na un kuerpo tékniko pa dirigí nos selekshon nashonal durante nos próksimo kompromisonan.

Durante vários dia di entrevista ku diferente kandidato ku hopi potensial pa bira e próksimo direktor tékniko di nos selekshon nashonal, FFK a yega na e siguiente konstelashon ku lo dirigí nos selekshon durante nos próksimo kompromisonan.

Kuerpo tékniko
Sr. Guus Hiddink Direktor tékniko
Sr. Art Langeler ‘Bonds coach’
Sr. Gillian Justiana ‘Assistant coach’
Sr. Gersinio Constansia ‘Assistant coach’
Sr. Quentin Jakoba ‘Assistant coach’
Posted on

Jong Holland ku Promé Partido Awe den Caribbean Club Shield 2022

WILLEMSTAD — Djamars último Jong Holland a sali pa Puerto Rico pa representá Kòrsou na e CONCACAF Caribbean Club Shield 2022. E torneo aki ta pa tur e ekiponan den Karibe ku a sali kampion di nan kampionato lokal, kompetí ku otro riba nivel internashonal.

E torneo ta konta ku partisipashon di un total di 11 pais ku a keda repartí den 3 grupo di 3 òf 4 pais. Jong Holland a kai den grupo B, huntu ku Real Rincon di Boneiru, SWA Sharks Fc di Turks & Caicos i AS Gosier di Guadeloupe.

Awe Jong Holland lo tin su promé enkuentro kontra SWA Sharks Fc pa 8’or di anochi, despues nan lo enfrentá Real Rincon dia 17 di aprel pa 8’or di anochi i por último nan lo topa AS Gosier 3’or di atardi dia 19 di aprel benidero.

Despues di e partidonan aki, e ekiponan ku a klasifiká komo number un di nan grupo i e ekipo ku kaba komo e mihó na segundo puesto ta klasifiká pa e semifinal ku ta tuma lugá dia 22 si aprel próksimo. E ganadónan di e partidonan di semifinal lo pasa pa e gran final lo tuma lugá 24 di aprel 2022.

Posted on

“Ami, Mi Mes i Mi Logronan” ku Futbòl den Brievengat!

BRIEVENGAT — Sin duda ta un tremendo notisia pa abitantenan, pero prinsipalmente un alegria pa muchanan di e bario Brievengat e notisia di ku futbòl ta bèk den e bario.

Hopi di esnan di ántes ta kòrda kon tabata hunga futbòl na Brievengat riba vèlt grandi, pero tambe den plenchi i hanchinan dje bario.

Enkabesá pa Sr. Ramiro Balentina, futbòl ta bèk den e bario danki na e tremendo sosten di:” Ami, Mi Mes i Mi Logronan” ku ta un proyekto pa yuda eduká hóbennan mediante deporte ku sosten di Hulanda.

Ramiro Balentina ku tabata un estrea den baseball na Hulanda ta “kara” dje proyekto aki, i mester bisa ku awor nan ta ku futbòl den e bario di Brievengat. Dia 31 di mart 3 tremendo amigu di ántes a topa ku otro atrobe den e bario.

Na aña 1986 nan tabata den selekshon di baseball Little League ku a representá Kòrsou na e siudat di Maracaibo: Atherly La Bast (presidente di Asosiashon Bario Brievengat), Ramiro Balentina i Giovertino Isebia.

Huntu nan lo karga e proyekto aki den e bario di Brievengat i trata di hinka deporte bèk den e hubentut di e bario di Brievengat kaminda ku ántes tabatin hopi deportista. Hopi éksito naturalmente ku e proyekto aki ku su meta prinsipal ta pa yuda den edukashon i formashon di hopi mucha.

Posted on

Korsou ta Logra un Empate di 1 Gol ku Haiti

PORT AU PRINCE — Nos selekshon nashonal a empatá ku Haiti na 1 gol durante nos segundo enkuentro di e di 2 buèlta di Nations League. Elson ‘Sontje’ Hooi a anotá e úniko gol di nos selekshon ku a keda dediká na nos kiper, Jarzinho Pieter ku a fayesé di forma repentino djaluna último na Haiti.

Awe 11:30am nos hungadónan a regresá Kòrsou i a pasa duna kondolensia na familiarnan di nos kiper stimá. Esaki tabata un momentu hopi doloroso i duru tantu pa nos selekshon komo pa e señora mama i tambe demas famia di e defuntu ku a keda atras. Despues nos selekshon a bai kome huntu i pa mas anochi, esnan residensiá den eksterior a regresá nan destinashon.

FFK di su banda a hasi tur loke ta na su alkanse pa e kurpa tambe bin Kòrsou huntu ku nos selekshon pero lamentabelmente esaki no por tabata posibel. Aktualmente e kònsùl di Hulanda na Haiti, ku a duna nos tur klase di koperashon, ta reglando huntu ku FFK, tur e tramitenan pa e kurpa por yega pero esaki tin un durashon di minimal 8 dia nòrmalmente. Ora esaki keda reglá, e kurpa por bini Kòrsou pa asina nos por despedí di Zinho na un manera digno.

Un biaha mas nos ta ekstendé nos mas sentido pesame na tur famia, amigu i konosí di Zinho i na pueblo di Kòrsou kompletu pa nos gran pèrdidá!