Floyd Mayweather i Manny Pacquiao: Pesahe ofisial i Dokumentario

MERKA — Awe, un dia promé ku e mega-pelea entre Floyd Mayweather i Manny Pacquiao tin e pesahe ofisial pa e pelea. Esaki lo tuma lugá na e mes un lokalidat kaminda e pelea ta tuma lugá, esta MGM Grand Arena I ta plania pa 6’or di atardi ora lokal di Kòrsou i bo por mira esaki aki.

Huntu ku e pesahe ofisial tambe lo bo por mira algun dokumentario riba ambos bòksdó ku e kanalnan di televishon Showtime i HBO a produsí. E dokumentario di Showtime ta basa riba Floyd Mayweather i ta parti den kuater episodio. Te ainda tres episodio so a keda publiká, manera e di kuater keda publiká e lo keda añadí na e paginá aki. HBO di otro banda a traha un dokumentario basa riba Manny Pacquiao.

Pesahe ofisial pa e pelea

Inside Mayweather vs. Pacquiao (Showtime) promé episodio

Inside Mayweather vs. Pacquiao (Showtime) di dos episodio

Inside Mayweather vs. Pacquiao (Showtime) di tres episodio

Mayweather/Pacquiao: At Last (HBO)

Floyd Mayweather kontra Manny Pacquiao su karchinan ta sali na benta awe

MERKA — Algu mas ku un siman promé ku e mega pelea entre Floyd Mayweather i Manny Pacquiao na MGM Grand Garden Arena Las Vegas, por fin karchinan lo sali na benta awe. Tabata tin algun problema entre Mayweather Promotions i Top Rank riba distribushon di karchinan loke a trese un tardansa den benta di e karchinan i asta a pone e pelea na peliger.

Pa kartelera aki dia 2 di mei próksimo ta bai tin tres tipo di karchi disponibel. Ta bai tin 500 karchi pa públiko en general wak e pelea bibu den e arena. E karchinan aki tin preis fiho. Tambe ta bai tin karchi pa wak e pelea riba sirkuito sera den e diferente propiedatnan di MGM Resorts International. Por ultimo tin un kantidat di 16 mil karchi ku ta bou di kontrol di e promotornan i MGM Grand ku lo keda bende na ‘brokernan’ ku na nan turno lo rebendé esakinan.

E 500 karchinan pa wak e pelea bibu den e arena ta kosta $1500, $2500, $3500, $5000 i $7500 sin inkluí kargonan pa servisio. Tin karchi di $10.000 pero esakinan no ta disponibel pa públiko general. Pa kada kategoria di preis tin solamente 100 karchi disponibel, pues 100 na $1500, 100 na $2500 etc. Pa yega na remarke pa e karhcinan di $10.000 ku ta ‘ringside’ bo mester tin un liña di krédito di por lo mínimo $250.000 ku MGM Grand casino. E karchinan di entre $1500 pa $7500 ta sali na benta awe 3’or di atardi i kada persona por kumpra un máksimo di kuater karchi.

Karchinan pa wak e pelea riba sirkuito sera na e propiedatnan di MGM Resorts na Las Vegas ta kosta $150, sin inkluí kargonan pa maneho. Esakinan lo sali na benta awe 6’or di atardi i kada persona por kumpra un máksimo di ocho karchi. Tin entre 35 pa 50 mil asiento pa wak e pelea riba sirkuito sera disponibel.

E otro 16 mil karchinan ku lo ta den man di ‘brokernan’ no tin un preis fiho i e preis ta dependé di kada ‘broker’. Te ku ayera riba e website seatgeek.com e karchi mas barata tabata keda bende pa $5321 miéntras ku esun di mas karu tabata $59.400.

E pelea di Mayweather kontra Pacquiao lo tuma lugá djasabra 2 di mei próksimo ku transmishon di Pay-Per-View kuminsando 9’or di anochi.

Manny Pacquiao entrenamentu pa prensa

MERKA — Den preparashon pa e mega pelea di 2 di mei próksimo na MGM Grand na Las Vegas, 11 biaha kampion di mundu Floyd Mayweather i ocho biaha kampion di mundu Manny Pacquiao lo tin un entrenamentu separá pa prensa.

Pa Mayweather e entrenamentu aki a tuma lugá ayera na Mayweather Boxing Club na Las Vegas. Esun di Pacquiao lo tuma lugá awe 15 di April 6’or di atardi ora lokal di Kòrsou na Wild Card Boxing Club na Los Angeles. Kontrali na Mayweather ku a kuminsá entrená ku mas di dos ora di tardansa, Pacquiao a deklará ku e si lo kuminsá na ora awe.

Wak e entrenamentu di Manny Pacquiao aki riba Deporte Awe.

Manny Pacquiao entrenamentu pa prensa

Floyd Mayweather entrenamentu pa prensa

MERKA — Den preparashon pa e mega pelea di 2 di mei próksimo na MGM Grand na Las Vegas, 11 biaha kampion di mundu Floyd Mayweather i ocho biaha kampion di mundu Manny Pacquiao lo tin un entrenamentu separá pa prensa.

Pa Mayweather e entrenamentu aki lo tuma lugá awe 14 di aprel 7’or di anochi ora lokal di Kòrsou na Mayweather Boxing Club na Las Vegas. Esun di Pacquiao lo tuma lugá mañan 15 di aprel 6’or di atardi ora lokal di Kòrsou na Wild Card Boxing Club na Los Angeles.

Ambos e entrenamentunan aki bo por mira nan aki riba Deporte Awe.

Floyd Mayweather entrenamentu pa prensa

Konferensia di prensa: Floyd “Money” Mayweather i Manny “Pac-Man” Pacquiao

MERKA — Floyd “Money” Mayweather i Manny “Pac-Man” Pacquiao lo tin un konferensia di prensa awe na ‘Nokia Theatre Los Angeles’ den antisipashon pa nan pelea di djasabra 2 di mei. Segun e promotornan esaki ta e úniko konferensia di prensa ku ambos bòksdó huntu promé ku e pelea. E konferensia ta programa pa kuminsá mitar di sinku awe tardi i bo por mira esaki bibu akinan.

Jemyma Betrian ku Otro Viktoria den MMA

CALIFORNIA — Jemyma Betrian ta logra su di dos viktoria den su di dos pelea profeshonal di Mixed Martial Arts. Tabata ayera nochi den e kartelera Fight Night na Sportsmen’s Lodge ku Jemyma a nòkout Chandra Engel na di 4:30 minut di e prome asalto. E nòkout a bini via un skop den kabes di Engel ku a mand’e lona mes ora.

Ku e viktoria aki Jemyma ta pone su rèkert den MMA profeshonal na 2-0, ku ambos viktoria biniendo via nòkout. Pa Jemyma e plan ta pa logra algun viktoria mas e aña aki ku e meta final pa yega na un kontrakt ku UFC.

Jemyma Betrian Bek Den Rin Awe

CALIFORNIA — Jemyma Betrian ta bek den ring awe nochi den e kartelera Fight Night at Sportsmen’s Lodge na Studio City, California. Jemyma lo enfrentá Chandra Engel den loke lo bira su di dos pelea profeshonal di Mixed Martial Arts. Jemyma tin un rèkert di 1-0 den MMA miéntras su kontrinkante Chandra Engel ta di 0-2.

E úniko viktoria te ainda di Jemyma den MMA a bin kontra Hadley Griffith den e kartelera di Lights Out Promotions, Chaos at the Casino 5. Den e pelea aki Jemyma a nòkout Hadley den di 47 sekònde di e promé asalto.

Na desèmber ultimo, Jemyma tabata tin un otro pelea programa kontra Catalina Madril den e kartelera di Gladiator Challenge, pero akinan su kontrinkante no a presentá. Esaki ta hasi ku Jemyma ta bolbe bringa despues di seis luna. Pa Jemyma esaki ta un eternidat teniendo na kuenta ku den e promé seis luna nan di 2014 e la bringa den sinku kartelera di Muay Thai.

Despues di e pelea aki Jemyma ta spera di bringa algun biaha mas e aña aki ku e meta final di yega na un kontrakt ku UFC.

Jemyma Betrian viktorioso den su debut den MMA

LOS ANGELES – Jemyma Betrian a kuminsá su karera den Mixed Martial Arts (MMA) na un manera espektakular. Jemyma ayera tabata tin su promé pelea di MMA ora ku e la enfrentá Hadley Griffith den e kartelera di Lights Out Promotions, Chaos at the Casino 5.

Apesar ku ainda por a nota e estilo di Muay Thai Kickboxing den Jemyma e la sa di dominá e pelea i nòkout su rival den 47 sekònde di e promé asalto. “Ora ku e la kai, ma stop di bringa paso den kickboxing ta bin e konteo, pero mes ora mi skina a kuminsá grita pa mi sigui bringa,” Jemyma a bisa.

Jemyma ku ta e aktual kampion WBC Muay Thai i tin un rèkert di 35-2-1 ta bai sigui ku su karera den MMA. “Mi ta bai sigui focus riba MMA, mi tin hopi di siña ainda,” Jemyma a terminá bisando.

Den un deklarashon e kontrinkante di Jemyma, Hadley Griffith a manda un atvertensia pa tur bringadó di 115 liber pa nan tene kuenta ku Jemyma Betrian. Segun Griffith, Jemyma ta bai hasi algu grandi den e divishon. Mas aleu, Griffith a gradisí Jemyma pa un bon pelea i a duna di konosé ku pronto Jemyma lo tin un título di MMA riba su nòmber.

Video di e pelea hasi dor di un fanatiko

 

Jemyma Betrian ta defendé su título ku éksito

CALIFORNIA – Jemyma Betrian un biaha mas ta sali viktorioso. E biaha aki na momentu ku e la defendé su título mundial di ‘WBC Women’s Bantamweight’ kontra Christi Brereton di Inglatera den e World Championship Muay Thai International Showdown na Pechanga Resort, California.

E pelea tabata programa pa sinku asalto, pero Jemyma tabata tin mester di solamente dos asalto. Den e di dos asalto Jemyma ta logra e viktoria ku un nòkout tékniko (TKO).