Bòkseo Archives | Page 10 of 11

November 28, 2011

VIDEO: Prome pelea Cotto kontra Margarito!

Nos a drenta e siman kaminda e revancha entre Miguel Cotto i Antonio Margarito ta bai tuma lugá. Esaki sigur lo bira un bon pelea. Un pelea kaminda Cotto ke mustra ku e la pèrdè den e promé pelea na 2008 kontra Margarito djis paso Margarito a usa wante yena ku geps.

Cotto a tuma e echo aki hopi na pechu bisando ku den e pelea ei Margarito a pone Cotto su salú na peliger. Di otro banda Margarito ke mustra ku e la gana Cotto simplemente paso e ta un mihó bòksdó i e echo ku e la gana no tin nada di haber ku akto nan froudulento.

Siguientemente bo por wak e promé pelea di Cotto kontra Margarito den su totalidat.

November 28, 2011

Canelo ta pasa fásil riba Cintron!

E rivalidat entre Mexico i Puerto Rico ta sigui den bòkseo i wikènt ku a pasa Saul “Canelo” Alvarez a ekstendé e racha di viktoria di bòksdó nan Mehikano riba bòksdó nan Puerto Rico. Puerto Rico tin un chèns mas pa kibra e racha di viktoria Mehikano di e aña aki na momentu ku Miguel Cotto topa djasabra tres di desèmber kontra Antonio Margarito.

Den e pelea di djasabra último Saul “Canelo” Alvarez a pasa fásil riba Kermit Cintron ku un nòkout den di sinku rònt. For di komienso di e pelea aki Canelo a dominá i no a duna Cintron niun chèns. Esaki ta reflehá tambe den e statistiknan nan di CompuBox kaminda por nota ku Canelo a logra konektá 44% di su moketa nan di poder den e pelea. Di otro banda Cintron a logra konektá solamente 12% di su moketa nan.

Ku e viktoria aki Canelo na edat di solamente 21 aña ta retené su faha di WBC Junior Welterweight. Canelo ta kresiendo komo un di e tòp prospekto nan den bòkseo i despues di e pelea Canelo a pidi pa un pelea kontra Floyd Mayweather.

Mesora despues di e pelea e promotor di Canelo kual ta Oscar de la Hoya i Golden Boy Promotions a puntra riba su kuenta di Twitter si e mester laga Canelo los pa buska un pelea grandi.

Canelo ta gran bòksdó i sigur lo bo bai tende su nòmber zona huntu ku otro bòksdó nan grandi den e aña nan ku ta bini. Pero ku solamente 21 aña di edat i sin niun pelea grandi ainda Canelo no ta kla pa Mayweather. Canelo tin ku proba su mes kontra bòksdó nan di mas peso promé ku e yega kontra Mayweather. Kisas un Canelo kontra e ganadó di Cotto-Margarito òf te asta Canelo kontra su kompatriota Julio Cesar Chavez Jr. ta na su lugá promé ku Mayweather.

November 26, 2011

Pedido pa Floyd Mayweather ta sigui subi!

Manera Deporte Awe! a relatá anteriormente Floyd Mayweather Jr. ku te ainda ta invikto i ku a gana di forma kontorversial di Victor Ortiz ya kaba a separá MGM Grand hotèl i kasino pa sinku di mei 2012. Apesar di esaki ainda Mayweather no tin kontrinkante pa e fecha aki.

Maske mayoria di e fanátiko nan di bòkseo ke mira Mayweather enfrentá Manny Pacquiao tin hopi bòksdó ku tin algu otro den mente. Amir Khan ta un di e bòksdó nan ku a bisa ku ta dispuesto na subi di peso pa asina enfrentá Mayweather. Tambe tin papia di e posibel pelea di Saul “Canelo” Alvarez kontra Mayweather of tambe di Erik Morales kontra Mayweather.

Banda di e bòksdó nan aki, Robert Guerrero tambe a bin aserka komo posibel kontrinkante di Mayweather. Aktualmente Guerrero ta rehabilitando un skouder ku e la leshoná i ta pendiente pa drenta rin mas pronto ku ta posibel.

Den un entrevista ku boxingscene.com Guerrero a bisa ku e ta meresé e pelea paso e ta den su mihó forma i e tin e abilidat pa bringa di pa den. Pero mas importante ku un kontrinkante defensivo manera Mayweather bo mester tin bon kondishon i e abilidat di tira hopi moketa. Segun Guerrero e biaha ku e la tira mas tantu moketa tabata den su pelea pa titulo mundial kontra Malcolm Klassen kaminda e la tira kasi 1300 moketa.

November 22, 2011

Cotto-Margarito ta kla pa New York!

Dia tres di desèmber próksimo mester tuma lugá e revancha entre Miguel Cotto i Antonio Margarito na Madison Square Garden New York. For di dia 19 di sèptèmber e promoshon pa e pelea aki a kuminsá i a hiba kuné ku tur karchi pa e pelea aki ta serka di kaba. Tur fanátiko di bòkseo a keda straña e siman aki ora e Komishon Atlétiko di Estado New York a anunsiá ku nan lo no lisensia Margarito pa bringa na New York.

E motibu dikon nan no ke lisensia Margarito ta pa un leshon ku Margarito a haña na su wowo drechi, aña pasa den e pelea kontra Manny Pacquiao. Den un reunion e Komishon Atlétiko di Estado New York a yega na un akuerdo ku nan lo lisensia Margarito si e bin New York pa un eksamen mediko ku un dokter di nan eskoho.

Esaki a sosodé i djaluna ku a pasa ei Margarito a biaha for di kaminda e ta train na Mexico City pa New York. Mesora e ora ei e Komishon Atlétiko di Estado New York a pone un reunion riba agènda pa awe djamars kaminda nan lo presentá e konklushon di e eksamen médiko. Den e deliberashon di e Komishon Atlétiko di Estado New York nan a konkluí ku Margarito a pasa e eksamen médiko i konsekuentemente ta keda lisensia pa bringa na New York.

E promotor di e pelea Bob Arum tabata wanta su kurason pa e desishon di e Komishon Atlétiko di Estado New York. E motibu di esaki ta paso aunke Arum tabata tin otro sitio nan disponibel pa e pelea tuma lugá, awe Cotto a duna di konosé ku e no ta bringa niun otro kaminda ku no ta na New York.

“Mi a firma pa e pelea aki tuma lugá na New York. Mi no a firma pa bringa niun otro kaminda. Mi ke bringa na New York. Mi no ta bai presentá mi mes na niun otro komishon di estado ku no ta di New York.”

“No ta kuestion di duna bentaha na niun hende. Ta kuestion di hasi loke ta korekto i esei ta bringa na New York”, Cotto a sigui bisa.

November 20, 2011

Fanatiko nan ke mira Mayweather kontra Pacquiao!

Manera Deporte Awe! a relatá anteriormente, ainda aña no a kaba i ya hopi fanátiko di bòkseo tin nan bista ta riba 2012. Floyd Mayweather Jr. ku te ainda ta invikto i ku a gana di forma kontorversial di Victor Ortiz ya kaba a separá MGM Grand hotèl i kasino pa sinku di mei 2012. Apesar di esaki ainda Mayweather no tin kontrinkante pa e fecha aki. E fanátiko nan di bòkseo ke mira Floyd Mayweather kontra Manny Pacquiao.

Den un enkuesta hasi pa RingTv.com e gran mayoria di enkuestado nan a bisa ku nan ke mira Mayweather bringa kontra Pacquiao. Den e enkuesta e fanátiko nan a ser puntra ken Manny Pacquiao mester enfrentá próksimamente i di e 14.218 kontestashon nan 10.640 fanátiko a bisa Mayweather. Un kantidat chikí di 2.116 fanátiko a bisa Juan Manuel Marquez.

Lo ke ta straño ta ku den e opshon nan no ta aparesé Amir Khan. Amir Kahn a duna di konosé ku e ta plania pa subi peso i bai Welterweight i asina buska e posibilidat pa bringa kontra Mayweather. Si Khan ta dispuesto pa bringa Mayweather anto e ora ei e mester ta dispuesto pa bringa Pacquiao i ta interesante pa sa kiko e fanátiko nan ta pensa di e pelea aki.

November 19, 2011

Posibel mudansa Cotto-Margarito!

No ta na sierto parti di mundu, ni tampoko no ta sierto organisashon nan so ta warda kos pa último ora. Tin biaha ta esun nan ku ménos bo a spera ta warda kos pa último ora. Estádos Unídos ta konosí pa su bon maneho di evento nan grandi i un parti grandi di e bon maneho aki ta basa riba puntualidat. Pero ta parse ku e Komishon Atlétiko di Estado New York (NYSAC) ta karesé di e abilidat aki.

E motibu dikon nan no ke lisensia Margarito ta pa un leshon ku Margarito a haña na su wowo drechi, aña pasa den e pelea kontra Manny Pacquiao. Sin ku e Komishon Atlétiko di Estado New York lisensia Margarito e pelea di dia tres di desèmber no por tuma lugá na New York.

Loke ta straño ta ku e Komishon Atlétiko di Estado New York nunka no tabata tin problema pa e pelea aki tuma lugá na New York. Den e gira promoshonal pa e pelea Melvina Lathan e presidente di e Komishon Atlétiko di Estado New York a bisa ku e ta masha kontentu ku e pelea ta tuma lugá na New York i ku e lo ta e tremendo show.

Tumando nota di esaki mesora ta bin e pregunta di kon ta awor numa, ku ta mas òf ménos dos siman promé ku e pelea e Komishon Atlétiko di Estado New York ta trese esaki dilanti?

Miéntras tantu e Komishon Atlétiko di Estado New York a reuní i a akordá ku si Margarito ke wòrdu lisensia na New York, un dòkter selekshoná pa e Komishon Atlétiko di Estado New York mester eksaminá Margarito i si e resultado ta positivo e pelea ta sigui na New York. Apesar di esaki Bob Aruma promotor di e pelea a bisa ku e tin kuater otro sitio di back up den kaso ku e pelea no sigui na New York.

November 17, 2011

Mayweather kontra Pacquiao den 2012?

Ainda 2011 no a kaba i te ainda a keda algun bon pelea di bòkseo pa e aña aki. Fin di siman tin Julio Cesar Chavez Jr. kontra Peter Manfredo Jr pa e titulo di WBC. Sigiuentemente tin Saul Alvarez kontra Kermit Cintron, Miguel Cotto kontra Antonio Margarito, Amir Khan kontra Lamont Peterson i tambe Wladimir Klitschko kontra Jean Mark Mormeck.

Apesar di tur e pelea nan aki hopi fanátiko ya nan bista ta riba 2012. Floyd Mayweather Jr. ku te ainda ta invikto i ku a gana di forma kontorversial di Victor Ortiz ya kaba a separá MGM Grand hotèl i kasino pa sinku di mei 2012. Apesar di esaki ainda Mayweather no tin kontrinkante pa e fecha aki. E fanátiko nan di bòkseo ke mira Mayweather kontra Pacquiao.

Segun Freddy Roach entrenadó di Manny Pacquiao, e no ta disidí riba ken Pacquiao ta bringa kontra dje i tur kos ta den man di e promotor Bob Arum. Roach ta sigui bisa ku e no a papia ku Pacquiao riba su siguiente pelea kiermen ku e no por bisa kiko Pacquiao mes ke.

Den un entrevista ku Yahoo! Sports, Bob Arum promotor di Manny Pacquiao a bisa ku e no ta dispuesto pa papia riba un posibel pelea di Mayweather kontra Pacquiao awor aki. Arum a bisa ku awor aki e su skedjel ta yen ku promoshon di Chavez Jr. kontra Manfredo Jr. i Cotto kontra Margarito.

Despues di e pelea di Pacquiao, djasabra último ei Arum a bisa ku e ta preparando pa un di kuater pelea entre Pacquiao i Marquez. Segun e CEO di Golden Boy, Richard Schaefer a bisa Yahoo! Sport, ta parse manera ku Arum no ta interesá den e pelea di Mayweather kontra Pacquiao.

Kiko lo pasa si e pelea di Mayweather kontra Ortiz no konkretisa? Amir Kahn a duna di konosé ku e ta plania pa subi peso i bai Welterweight i asina buska e posibilidat pa bringa kontra Mayweather. Pero segun Floyd Mayweather Sr., Khan no ta kla pa bringa Mayweather ainda.

Apesar di un viktoria kontra Lamont Peterson, Amir Khan tin ku bai duna e prestashon di su bida den ring dia 10 di desèmber. Den e pelea aki Khan no tin ku solamente sali viktorioso pero mustra tambe ku e ta kla pa un posibel pelea kontra Mayweather Jr.

November 10, 2011November 10, 2011

Video: Prome dos peleanan di Pacquiao kontra Marquez!

Despues di e pelea di Maywetaher kontra Ortiz ku a kaba di forma kontroversial den di kuater rònt djasabra último, tur hende a keda ku gana di manera un bon pelea di bòkseo. Pa e aña aki a keda práktikamente dos pelea grandi mas. Un di nan ta e pelea di Miguel Cotto kontra Antonio Margarito dia tres di desèmber i e otro ta e pelea di Manny Pacquiao kontra Juan Manuel Marquez dia 12 di novèmber.

Esaki lo bira e di tres biaha ku Pacquiao ta bringa kontra Marquez. Tin hopi atenshon riba e pelea aki teniendo na kuenta ku esaki por ta Pacquiao su último pelea promé ku e enfrentá Floyd Mayweather. Den pasado nunka e pelea di Pacquiao i Mayweather no a kristalisá pa e motibu ku Pacquiao no kier a someté su mes na tèst di droga. Mayweather a bisa ku e no ta bringa kontra Pacquiao si e no hasi e tèst di droga.

Siguientemente bo por mira e promé pelea di Pacquiao kontra Marquez na aña 2004 ku a bira un di e pelea nan mas memorabel i kontroversial di último tempu. E video nan ta kortesia di: ESPNDeportes

Kuater aña despues na 2008 Pacquiao a bolbe topa Marquez despues ku nan promé pelea a terminá den un empate.

September 26, 2011September 26, 2011

Video: Joe Cortez ta papia riba pelea di Mayweather kontra Ortiz!

Anteriormente riba Deporte Awe! bo por a wak i tende tantu di Mayweather komo di Ortiz kiko a pasa den e pelea entre nan dos. Pero a keda un persona mas ku for di siman pasa despues di e pelea niun hende no a tende di dje i esei ta Joe Cortez, ku tabata e rèfri den e pelea di Mayweather kontra Ortiz. Pa kortesia di WLFI 18 Deporte Awe! a haña e siguiente entrevista ku Joe Cortez. Den e entrevista Joe Cortez ta konta no solamente kiko a pasa durante di e pelea sino e ta splika tambe dikon e pelea ta legal, tambe e ta papia riba su karera komo rèfri i kiko bòkseo mester hasi pa ta manera UFC.

September 21, 2011September 22, 2011