Dia tres di desèmber próksimo mester tuma lugá e revancha entre Miguel Cotto i Antonio Margarito na Madison Square Garden New York. For di dia 19 di sèptèmber e promoshon pa e pelea aki a kuminsá i a hiba kuné ku tur karchi pa e pelea aki ta serka di kaba. Tur fanátiko di bòkseo a keda straña e siman aki ora e Komishon Atlétiko di Estado New York a anunsiá ku nan lo no lisensia Margarito pa bringa na New York.
E motibu dikon nan no ke lisensia Margarito ta pa un leshon ku Margarito a haña na su wowo drechi, aña pasa den e pelea kontra Manny Pacquiao. Den un reunion e Komishon Atlétiko di Estado New York a yega na un akuerdo ku nan lo lisensia Margarito si e bin New York pa un eksamen mediko ku un dokter di nan eskoho.
Esaki a sosodé i djaluna ku a pasa ei Margarito a biaha for di kaminda e ta train na Mexico City pa New York. Mesora e ora ei e Komishon Atlétiko di Estado New York a pone un reunion riba agènda pa awe djamars kaminda nan lo presentá e konklushon di e eksamen médiko. Den e deliberashon di e Komishon Atlétiko di Estado New York nan a konkluí ku Margarito a pasa e eksamen médiko i konsekuentemente ta keda lisensia pa bringa na New York.
E promotor di e pelea Bob Arum tabata wanta su kurason pa e desishon di e Komishon Atlétiko di Estado New York. E motibu di esaki ta paso aunke Arum tabata tin otro sitio nan disponibel pa e pelea tuma lugá, awe Cotto a duna di konosé ku e no ta bringa niun otro kaminda ku no ta na New York.
“Mi a firma pa e pelea aki tuma lugá na New York. Mi no a firma pa bringa niun otro kaminda. Mi ke bringa na New York. Mi no ta bai presentá mi mes na niun otro komishon di estado ku no ta di New York.”
“No ta kuestion di duna bentaha na niun hende. Ta kuestion di hasi loke ta korekto i esei ta bringa na New York”, Cotto a sigui bisa.