E. Evertsz, redaktor pa Deporte Awe

March 17, 2013March 18, 2013

Kenley Jansen ta bira tata

SAN FRANCISCO, California – Aktualmente e selekshon di Reino ku ta partisipando den e Klásiko Mundial di Beisbòl ta na San Francisco wardando pa nan por hunga nan partido di semi final mañan anochi kontra Repúblika Dominikana.

Kenley Jansen a wòrdu añadí na e roster di e selekshon di Reino e wikènt aki despues ku Jonatan Iseniaa sufri un leshon na su kokoti drechi i no ta disponibel pa kontinuashon di e torneo. Banda di wòrdu añadí na e roster di selekshon di Reino e wikènt aki Jansen a risibí e notisia tambe ku e la bira tata di un yu muhé, yama Natalia.

March 17, 2013

Resultado nan Futbòl Sekshon Paga djasabra 16 di mart

WILLEMSTAD – Riba djasabra 16 di mart tabata tin dos partido riba programa den promé divishon pa Federashon Futbòl Kòrsou. E promé enkuentro tabata entre SITHOC i Victory Boys i despues a siguí e partido entre Jong Holland i Hubentud Fortuna.

Den e promé partido SITHOC a sali for di e porta grandi ku skor mínimo di 1-0 riba Victory Boys. E promé mitar di e partido a tèrminá ku un skor di 0-0. Den di dos mitar, na di 57 minüt SITHOC ta subi e markadó ku un gol di Jursley “Pipo” Kroonstadt. Esaki tabata sufisiente pa garantisá e viktoria pa SITHOC.

E partido entre Jong Holland i Hubentud Fortuna a kaba ku un empate na un kareda. Jong Holland a sa di pika dilanti promé den e partido na momentu ku den promé mitar Shuremy Felomina ta anotá. E ekipo di Jong Holland no ta mantené nan bentaha i faltando 15 minüt pa e partido Oscar Molina ta hinka e gol di empate pa Hubentud Fortuna.

March 16, 2013March 17, 2013

SUBT ta gana di UNDEBA

WILLEMSTAD – E kampionato di futbòl Sekshon Paga a kontinuá ku kuater partido e wikènt aki. E promé partido ku a tuma lugá tabata entre SUBT i UNDEBA den Stadion Ergilio Hato. Den promé mitar pa ta mas eksakto na di 32 minüt Jizhar Santiroma ta habri e markadó pa SUBT. Promé ku siere di e promé mitar UNDEBA ta empatá e partido Lendell Johannes ku un pinalti. E partido ta keda 1-1 den di dos mitar i kasi na final di e tempu reglamentario Jamian “Jimmy” de Kaster ta anotá e gol di viktoria di 2-1 pa SUBT.

Awe futbòl ta kontinuá ku Sithoc kontra Victory Boys pa 19.00 di anochi i mas lat pa 21.00, Jong Holland ta hunga kontra Hubentut Fortuna. Djadumingu 17 di mart 17.00, Vesta ta enfrentá Centro Barber .

March 16, 2013

Selekshon di Reino ta terminá nan wega nan di fogeo ku éksito

PEORIA, Arizona – E selekshon di Reino ku lo representá Reino den e semi final di Klásiko Mundial di Beisbòl a terminá nan wega nan di fogeo ku éksito. Despues ku e selekshon a regresá Estádos Unídos for di Taiwan nan tabata tin dos enkuentro di fogeo plania. Den nan di dos partido di fogeo nan enfrentá Seattle Mariners i sali viktorioso for di e enkuentro aki ku skor di 8-1.

E partido kontra Mariners a kuminsá ku un minüt di silensio na memoria di Gregory Halman, ku na novèmber di 2011 a fayesé na un edat di 24 aña. Halman tabata forma parti di e organisashon di Seattle Mariners i tambe e selekshon di Reino.

Wladimir Balentien a rekuperá kompletamente di su leshon i a sirbí den e partido di ayera komo batido designa. Mesora Balentien a tuma a trabou over i a konektá tres hit den sinku turno, di kua un honron di tres kareda i un sinlgle empuhador di dos kareda.

Despues di e partido ayera nochi mesora e selekshon Oraño a subi avion i biaha pa San Francisco. Awe 17.15 ora lokal di Kòrsou e selekshon lo train den stadion AT&T na San Francisco. Mañan 12.45 ora lokal di Kòrsou nan lo tin un último training promé ku e semi final djaluna anochi 21.00 ora lokal di Kòrsou. Ainda no ta konosí kontra ken e selekshon di Reino lo hunga pero lo ta sea Repúblika Dominikana òf Puerto Rico.

March 16, 2013

Churandy Martina i Justin Gatlin ta hasi Harlem Shake

WILLEMSTAD – Tur hende ta trahando nan propio video di Harlem Shake e dia nan aki i atleta nan profeshonal no por keda afó. Den pasado nos a mira atleta nan di atletismo manera Usain Bolt i Wallace Spearmon den un video di Harlem Shake. E biaha aki Churandy Martina i Justin Gatlin a partisipá den un video di Harlem Shake. Den e video por nota presensia di un kantidat grandi di kolega atleta di Martina i Gatlin manera Kellie Wells, Charonda Williams i Damu Cherry.

March 16, 2013

Dashenko Ricardo ta firma ku Los Angeles Dodgers

PEORIA, Arizona – Meskos ku su kolega di ekipo Curt Smith, Dashenko Ricardo e kuminsá den e Klásiko Mundial di Beisbòl komo agente liber. Ricardo a hunga kuater temporada pa e organisashon di Baltimore Orioles i e último dos temporada nan pa e organisashon di San Francisco Giants. Na final di temporada pasa Ricardo so kontrakt no a wòrdu ekstendé pa San Francsico.

E bon prestashon di Ricardo tras di plato huntu ku e selekshon Oraño a duna fruta. Los Angeles Dodgers a gusta e trabou di Ricardo i a ofresé un kontrakt di un aña ku e organisashon. Ricardo a bai di akuerdo ku e kontrakt i asina buta su mes na servisio di Los Angeles Dodgers.

March 15, 2013March 21, 2013

Ekipo nan ku lo enfrentá otro den kuart final di Champions League

NYON, Suisa – E ocho ekipo ku lo partisipá den e kuart final di UEFA Champions League tabata konosi kaba. Lo ke tabata deskonosí tabata kontra ken kada ekipo lo hunga den kuart final. Awe mainta e ocho ekipo nan ku a pasa pa kuart final a partisipá den un sorteo pa sa kontra ken nan lo hunga den kuart final. E sorteo a duna e siguiente resultado: Málaga CF (Spaña) lo hunga kontra Borussia Dortmund (Alemania). Real Madrid CF (Spaña) kontra Galatasaray AS (Turkia). Paris Saint-Germain FC (Fransia) lo bai kontra FC Barcelona (Spaña). FC Bayern München (Alemania) ta enfrentá Juventus ( Italia).

E partido nan di ida lo ta riba 2 di aprel i 3 aprel, miéntras ku e partido nan di buèlta lo ta riba 9 di aprel i 10 di aprel. Riba 12 di aprel UEFA lo tene su siguiente sorteo pa determiná kua ekipo ta hunga kontra otro den semi final.

March 15, 2013March 15, 2013

Selekshon di Reino ta gana di San Diego Padres

PEORIA, Arizona – Banda di ku e selekshon di Reino a añadí Jurickson Profar i Kenley Jansen na su roster tambe nan tin algu wega di preparashon promé ku nan hunga den e semifinal di e Klásiko Mundial di Beisbòl. Nan promé partido di preparashon tabata kontra San Deigo Padres kaminda e selekshon Oraño a sali for di e porta grandi ku skor di 9-3.

Tres ora promé ku e partido Jurickson Profar a yega den kamerin di e selekshon di Reino kaminda e la wòrdu saludá pa e ekipo i a bisti su unifòrm ku number 10 ariba. Profar a debutá ku e selekshon hungando segunda base pero no a logra konektá hit den su kuater turno nan na bate. Ku e atkishon di Profar na segunda, Jonathan Schoop mester a move i kubri tersera base.

E otro atkishon nan e roster di e selekshon Oraño kual ta Kenley Jansen no a uni ku e selekshon ainda. Si kos nan bai segun plan Jansen lo keda ku Los Angeles Dogders den wikènt, bula djadumingu pa San Francisco kaminda lo e uni ku e selekshon di Reino.

E selekshon di Reino ta hunga awe nochi nan último partido di preparashon promé ku e semifinal na San Francisco, djaluna 18 di mart 9’or di anochi ora lokal di Kòrsou. E partido di preparashon pa e selekshon di Reino lo ta awe nochi 10’or ora lokal di Kòrsou kontra Seatle Mariners.

March 15, 2013

Jetro Willems ta uni su mes ku Leroy Fer i Jürgen Locadia den selekshon U-21 Hulandes

ZEIST, Hulanda – Jetro Willems a wòrdu añadí na e selekshon Hulandes U-21 mihó konosí komo “Jong Oranje” ta bai kuminsá nan preparashon nan pa e Kopa Europeo U-21 ku ta tuma lugá den yüni na Israel. Te ku par di siman pasa Willems tabata den e preselekshon Hulandes ku ta bai kuminsá nan partido nan di klasifikashon pa Kopa Mundial.

E direktor tékniko di e selekshon U-21 Cor Pot a manda yama 19 hungadó, di kua Jetro Willems ta e úniko kara nobo. Willems nunka no a hunga pa “Jong Oranje” pero si e tin nuebe partido ku e la hunga ku e selekshon grandi di Hulanda.

Huntu ku Willems, Leroy Fer i Jürgen Locadia tambe ta forma parti di e selekshon U-21. Na promé instante e direktor tékniko a yama Leandro Bacuna tambe den e preselekshon pero esaki no a wòrdu yama pa e selekshon definitivo.

Hulanda lo hunga dos wega di preparashon. E promé partido di e selekshon Hulandes U-21 ta riba 21 di mart na momentu ku nan topa kontra Israel den stadion HaMoshava na Petaj Tikva. Despues riba 25 di mart e selekshon Hulandes ta risibí Noruega komo bishitante den stadion Mandemakers na Waalwijk, Hulanda.

E selekshon U-21 ta konta ku e siguiente hungadó nan:

Patrick van Aanholt (Vitesse)
Marco Bizot (FC Groningen)
Jean-Paul Boëtius (Feyenoord)
Jeffrey Bruma (Hamburger SV)
Lerin Duarte (Heracles Almelo)
Leroy Fer (FC Twente)
Marco van Ginkel (Vitesse)
Jeffrey Gouweleeuw (sc Heerenveen)
Mike van der Hoorn (FC Utrecht)
Luuk de Jong (Borussia Mönchengladbach)
Kelvin Leerdam (Feyenoord)
Jürgen Locadia (PSV)
Adam Maher (AZ)
Bram Nuytinck (Anderlecht)
Rajiv van la Parra (sc Heerenveen)
Georginio Wijnaldum (PSV)
Yanic Wildschut (VVV-Venlo)
Jetro Willems (PSV)
Jeroen Zoet (RKC Waalwijk)

March 15, 2013March 15, 2013

Curt Smith a firma ku Minnesota Twins

PHOENIX, Arizona – Curt Smith a yega Klásiko Mundial di Beisbòl komo agente liber despues di a wòrdu laga den libertat pa e ekipo di liga menor Jacksonville Suns. E bon trabou ku Smith a bin ta hasi den e selekshon di Reino a wòrdu honra ku un kontrakt ku e ekipo di Minnesota Twins. Smith a anunsiá esaki ayera na su kolega nan di e ekipo Oraño.