Author: E. Evertsz

Posted on

Jong Oranje ta gana di Israel

PETAH TIKVA, Israel – Jetro Willems a hasi su debut ku e selekshon U-21 ku ta preparando pa e Kopa Europeo ku ta tuma lugá den yüni na Israel. E selekshon Oraño a logra un viktoria di 2-1 kontra Israel.

Willems a hunga 72 minüt den e partido aki i a wòrdu supstituí pa Patrick van Aanholt. Huntu ku Willems, Leroy Fer tambe a hunga den e partido aki i tambe a hunga 72 minüt den e partido. Fer a wòrdu remplasá pa Lerin Duarte.

Jürgen Locadia tambe ta forma parti di e selekshon pero no a biaha ku e ekipo pa Israel. Locadia a kanselá pa motibu di kebrante di salu. Ku tur probabilidat Locadia lo ta bek ku e selekshon pa e siguiente partido.

Riba 25 di mart e selekshon Hulandes U-21 ta hunga un otro partido na momentu ku nan risibí Noruega komo bishitante den stadion Mandemakers na Waalwijk, Hulanda.

Posted on

Tres siman di mega pelea den bòkseo

LOS ANGELES, California – Preparashon nan ta kanando i fanátiko nan di bòkseo ta entusiasmá pa tres siman siguí di evento nan mega den bòkseo. Tur kos ta kuminsá riba 20 di aprel ku e pelea entre Canelo Alvarez i Asutin Trout. Su siguiente siman riba 27 di aprel ta siguí ku Danny Garcia kontra Zab Judah. Por último dia 4 di mei, Floyd Mayweather lo enfrenta Robert Guerrero.

Alrededor di 50.000 karchi a wordu bende kaba pa e tres evento nan aki. E promé pelea entre Alvarez i Trout lo ta den Alamodome na San Antonio, Texas i ta wòrdu televisá pa kanal Showtime. Showtime lo transmití e pelea di Garcia i Judah tambe for di Barclay Center na Brooklyn, New York. Mayweather i Guerrero su pelea lo ta riba Showtime PPV bibu for di MGM Grand na Las Vegas, Nevada.

Riba e kartelera di Garcia i Judah tambe lo tin e pelea entre Peter “Kid Chocolate” Quillin i Fernando Guerrero. Miéntras ku riba e kartelera di Mayweather i Guerrero tin e pelea entre Daniel Ponce de Leon kontra Abner Mares.

Posted on

Partido nan di futbòl Promé Divishon pa wikènt siguiente

WILLEMSTAD – Wikènt binidero lo tin sinku partido di futbòl Promé Divishon riba programa pa Federashon Futbòl Kòrsou. Riba djabièrnè 22 di mart lo tin un partido, esaki lo ta Hubentut Fortuna kontra UNDEBA. Hubentud Fortuna tin un punto riba tabla di posishon miéntras ku UNDEBA ta bai buska nan promé punto nan.

Djasabra 23 di mart lo bai tin dos partido, e promé partido ta entre SUBT i SITHOC. Tur dos ekipo tin tres punto aktualmente riba tabla di posishon. Despues lo tin Jong Colombia kontra Jong Holland. Akinan ámbos ekipo tin un punto riba tabla di posishon.

Djadumingu 24 di mart tambe lo bai tin dos partido, e promé ta Centro Barber kontra Centro Dominguitu. Centro Barber ta konta ku tres punto aktualmente riba e tabla di posishon miéntras ku Dominguitu tin unu. Riba mesun dia lo tin Victory Boys kontra Vesta, tur dos ekipo ta buskando nan promé punto nan den e kampionato.

Posted on

Andrelton Simmons ta sigui kayente despues di Klásiko

LAKE BUENA VISTA, Florida – Andrelton Simmons ku un averahe di .333 for di kua tres doblete i dos honron tabata un di e mihó batido nan di e selekshon di Reino den e Klásiko Mundial di Beisbòl.

Den e partido kontra Pittsburgh Pirates, Simmons a konektá un doblete i dos honron. Simmons a habri e wega ku un doblete den bòm di promé ining. Den di kuater ining Simmons a konektá su promé honron ku niun hende na base. Despues den di sinku Simmons ta konektá su di dos honron di e partido, e biaha aki ta unu di tres kareda.

Posted on

Roger Bernadina bek ku Washington Nationals

VIERA, Florida – Roger Bernadina a regresá Viera, Florida kaminda e ekipo di Washington Nationals su kampamentu di Spring Training ta. Segun Bernadina, “e Klásiko Mundial di Beisbòl tabata un bon eksperensiá. Úniko kos ta ku e tabata un tiki leu. Nos tabata kontentu di a formá parti di dje. E tabata great.”

E mènedjer di e ekipo, Davey Johnson a bisa ku e la risibí bon komentario di su coach di tersera base, Trent Jewett. Jewett tabata tin kontakto durante e Klásiko Mundial di Beisbòl ku Hensley Meulens pa sa kon ta bayendo ku Bernadina.

Johnson a kontinuá bisando ku Bernadina lo biaha ku e ekipo pa Lake Buena Vista pero e no sa ainda si e lo hunga. “Bernadina a kustumbrá di hunga sporádikamente i e ta dil kuné hopi bon, mihó ku mayoria hungadó,” Johnson a bisa.

Posted on

Jonathan Schoop bek na Spring Training

SARASOTA, Florida – Jonathan Schoop a regresá bek ku e ekipo di Baltimore Orioles despues di su partisipashon na e Klásiko Mundial di Beisbòl. Schoop ta kontentu ku e prestashon di e selekshon di Reino den e kampionato. “Mi ta kontentu, nos a hasi un bon trabou i nos a mustra mundu ku nos por kompetí na un nivel haltu,” Schoop a bisa.

Schoop tabata kla pa hunga awe den e partido entre Orioles i Toronto Blue Jays pero e mènedjer di e ekipo a preferá dun’é por lo ménos un dia liber promé ku laga hunga atrobe. Schoop a bisa, “mi ta kla pa hunga, ma drumi den avion i si mi tin ku hunga awe, mi ta kla pa hunga.”

Segun e mènedjer e tin gana di wak Schoop un hunga un par di biaha mas promé ku mand’é pa e ekipo di Tripel A. “Mi tin gana di mir’é un par di biaha mas. Nos a haña masha poko oportunidat pa mir’é,” e mènedjer a bisa.

Posted on

Repúblika Dominikana kampion Klásiko Mundial di Beisbòl

SAN FRANCISCO, California – Despues ku e selekshon Dominikano gana e selekshon di Reino nan a pasa pa hunga e final di e Klásiko Mundial di Beisbòl kontra Puerto Rico. For di tempran den e partido e Dominikano nan a bai ariba i nan picheo a sa di mantené e bentaha. Ku un skor di 3-0 Repúblika Dominikana ta bira kampion invikto di e Klásiko Mundial di Beisbòl.

E viktoria aki no ta hasi Repúblika Dominikana solamente e kampion di e torneo, pero ku esaki nan ta bira tambe Kampion di Mundu rekonosé pa e Federashon Internashonal di Beisbòl (IBAF). Esaki ta e promé biaha despues di 1948 na Nicaragua ku Repúblika Dominikana ta logra e titulo di Kampion di Mundu.

Ku e viktoria di e Dominikano nan e reinado di e selekshon di Reino komo aktual Kampion di Mundu tambe ta kaba. Na 2011 e selekshon di Reino a logra titulá Kampion di Mundu na Panamá ora ku nan a vense Cuba den e partido final.

Posted on

Selekshon di Reino ta kai chikí kontra Repúblika Dominikana

SAN FRANCISCO, California – Selekshon di Reino a yama ayó na e Klásiko Mundial di Beisbòl despues di vensí kontra Repúblika Dominikana. Un biaha mas e selekshon di Reino a habri e markadó pero no por a wanta e bentaha aki.

Den promé entrada e selekshon Oraño ta bai ariba 1-0 sin konektá hit. Andrelton Simmons i Jurickson Profar ta probechá di e deskòntròl di Edinson Volquez i yega base riba base por bola. Un roletaso di Roger Bernadina ta avansá e koredó nan pa segunda i tersera base. Wladimir Balentien ta empuhá Simmons for di tersera ku un roletaso pa shortstop Jose Reyes.

Diegomar Markwell a wanta e bentaha di 1-0 te den bòm di sinku ining. Akinan Markwell ta permití dos doblete i e Dominikano nan ta tabla e wega na unu. Den mesun ining Repúblika Dominikano ta añadí tres kareda mas ku ta sufisiente pa sigurá e viktoria.

Ku e viktoria aki e selekshon di Reino ta tèrminá nan partisipashon na e Klásiko Mundial di Beisbòl, miéntras ku Repúblika Dominikana ta hunga e final kontra Puerto Rico. Un parti di e selekshon Oraño ta yega Hulanda mañan mainta, miéntras ku e hungadó nan profeshonal ku ta hunga na Merka lo reportá na nan respektivo ekipo nan i un parti chikí lo bai Kòrsou.

Hensley Meulens, mènedjer di e selekshon ta sumamente satisfecho ku e aktuashon di e ekipo. “Mi ta orguyoso di loke e selekshon aki a brinda durante di e torneo aki. Nos a hunga bon pero e Dominikano nan tabata un tiki mas mihó,” Meulens a bisa. Segun Meulens tur biaha ku tabata tin e torneo e selekshon di Reino a progresá. Ku un smail Meulens a bisa, “esei ta nifiká ku aki kuater aña nos ta yega final.”

Posted on

Centro Barber ta gana di VESTA

WILLEMSTAD – Centro Barber i VESTA tabata e último dos ekipo nan ku a mira akshon den futbòl promé divishon den wikènt ku ta tras di lomba. E ekipo di bánda’bou a habri e markadó pa medio di Jurensley Martina, ku na di sinku minüt di e partidó a duna Barber e bentaha di 1-0. Djis promé ku final di e promé mitar Norman Hoyer ta anota otro gol pa Barber i hasi e partido 2-0. Dos gol no tabata sufisiente pa Barber i mesora despues di promé mitar Curtly Hooi ta hinka e di tres pa Barber. E ekipo di VESTA a pone preshon riba Barber pero no a logra di anotá.

Posted on

Jürgen Locadia ta kanselá su partisipashon ku U-21

ZEIST, Hulanda – Jürgen Locadia a haña ta kanselá su partisipashon ku e selekshon U-21 di Hulanda. E selekshon tin ku hunga di 21 i 25 di mart dos partido kontra Israel i Noruega. Locadia a kanselá pa motibu di kebrante di salu.

E selekshon ta biaha djamars pa Israel i e direktor tékniko no a yama niun otro hungadó pa remplasá Locadia. Jetro Willems i Leroy Fer si lo hasi e biahe ku “Jong Oranje” pa Israel.

E selekshon U-21 ta konta ku e siguiente hungadó nan:

Patrick van Aanholt (Vitesse)
Marco Bizot (FC Groningen)
Jean-Paul Boëtius (Feyenoord)
Jeffrey Bruma (Hamburger SV)
Lerin Duarte (Heracles Almelo)
Leroy Fer (FC Twente)
Marco van Ginkel (Vitesse)
Jeffrey Gouweleeuw (sc Heerenveen)
Mike van der Hoorn (FC Utrecht)
Luuk de Jong (Borussia Mönchengladbach)
Kelvin Leerdam (Feyenoord)
Adam Maher (AZ)
Bram Nuytinck (Anderlecht)
Rajiv van la Parra (sc Heerenveen)
Georginio Wijnaldum (PSV)
Yanic Wildschut (VVV-Venlo)
Jetro Willems (PSV)
Jeroen Zoet (RKC Waalwijk)

Facebook Twitter Instagram Youtube
© 2025 Deporte Awe. Tur derechi reservá. Diseñá pa E² Media