Author: E. Evertsz

Posted on

Fuente: Andruw Jones a hiba kòmbersashon ku Baltimore Orioles

MERKA — Den wikènt tras di lomba e agente di Andruw Jones kual ta Scott Boras a bisa ku tin por lo ménos dos ekipo ku ta interesá den e servisionan di e pelotero Kurasoleño.

Segun un fuente, un di e ekiponan ku a hiba kòmbersashon ku Andruw Jones i su agente Scott Boras ta e ekipo di Baltimore Orioles. Boras a duna di konosé ku e ekiponan ku ta interesá den Andruw ke e pelotero komo batido designa i/of komo un batido drechi for di riba banki ku por hunga diferente posishon. Banda di tur posishon den outfield, Andruw tin eksperensia hungando primera base. Na 2009 ku Texas Rangers e pelotero a hunga ocho partido na primera base, miéntras ku na Hapon Andruw a hunga 48 partido den dos temporada na primera base. Mas aleu Boras a bisa, ku Andruw tin poder ainda i si bo por konektá 25 honron na Hapon ta paso bo ta hasiendo algu.

E ekipo di Baltimore Orioles no ta deskonosí pa peloteronan di Kòrsou. Aktualmente den Liga Grandi e ekipo tin Jonathan Schoop, miéntras ku su ruman Sharlon Schoop ta den Liga Menor di e ekipo. Banda di esakinan e ekipo tin un kantidat mas di peloteronan Kurasoleño den Liga Menor, entrenan: Roderick Bernadina, Jonatan Isenia, Ademar Rifaela, Rochendrick Alexander i Wendell Floranus.

Awor ta di warda wak kiko ta bai pasa i si Andruw Jones ta bira e siguiente pelotero di Kòrsou den e organisashon di Baltimore Orioles.

Posted on

Breve Deporte Awe #1-012

  • Segun Jurickson Profar e ekipo di Texas Rangers lo no permiti’e hunga tur partido di Spring Training manera e pelotero a bisa algun dia pasa. Jurickson mes no tin problema ku esaki. E pelotero a bisa ku e ta dispuesto pa hasi loke e ekipo ke, e ta kla pa tur kos. E gerente general di Texas, Jon Daniels a bisa ku nan ta bai trankil ku Jurickson. Segun Daniels, Jurickson lo bai kuminsá haña turno na bate promé ku e kuminsá hunga shortstop den partidonan. E gerente general no kier a pone un fecha pero ta spera ku Jurickson lo ta kompletamente bon pa hunga na final di spring training. Mas aleu Daniels a bisa, ku nan ta hopi kouteloso ku Jurickson. E pelotero ta saludabel awor aki i e ekipo ke mantené asina. Komo muestra di e ekipo su koutela nan lo laga Jurickson hasi un MRI kada tres siman pa wak kon ta bayendo ku e skouder.
  • E ekipo di New York Mets a yega na un akuerdo di un aña ku pa 4,2 mion dòler ku Lucas Duda. Di e forma aki e dos partidonan ta evitá e proseso di arbitrahe salarial. Duda e logra un promedio di .253 ku 30 honron i 92 kareda empuha temporada pasa.
  • San Francisco Giants a yega na un akuerdo ku di un aña ku Brandon Belt pa 3,6 mion dòler. Asina ‘ki Giants ta evitá e proseso di arbitrahe salarial ku e pelotero. Belt temporada pasa a logra un promedio di .243 ku 12 honron i 27 kareda empuha den 61 partido.
Posted on

Andruw Jones lo por ta di regreso den Liga Grandi

MERKA — Segun informashonnan, Andruw Jones por ta di regreso na Merka den beisbòl Liga Grandi. E agente di e pelotero Scott Boras a duna di konosé ku tin algun ekipo interesá den e pelotero pa e sirbi komo batido designa.

Andruw a pasa e ultimo dos temporadanan na Hapon hungadó ku e ekipo di Rakuten Golden Eagles. Na final di e temporada e pelotero a ekspresá su deseo di yega su di 500 honron akumulá den Liga Grandi i den beisbòl profeshonal Hapones na Hapon, pero e ekipo di Golden Eagles no a kontratá Andruw pa un di tres temporada. Tabata tin kòmbersashonnan entre e pelotero i e ekipo di Chiba Lotte Marines, sin embargo esaki no a konkretisá. Durante di su dos temporadanan na Hapon Andruw a logra un promedio di .232 ku 50 honron.

Ultimo biaha ku Andruw Jones a hunga den Liga Grandi tabata na aña 2012 ku e ekipo di New York Yankees. Akinan den 97 partido ku e ekipo Andruw a logra un promedio di .197 ku 14 honron i 34 kareda empuha.

Nos tin informashon di un funete, ku un di e ekiponan ku a mustra interes den Andruw Jones ta un organisashon ku diferente pelotero Kurasoleño a forma parti di dje i aktualmente tin par di pelotero di Kòrsou aktivo den e organisashon aki. Sin embargo, nos ta wanta un ratu ku e nòmber di e organisashon aki. Tin un otro organisashon ku tambe nos ta na altura di dje pero negosiashon a manera fria un tiki ei banda.

Posted on

Breve Deporte Awe #1-011

  • Segun informashonnan, Jonathan Schoop ta enfoká pa pèrdè peso durante di ‘offseason’ di moda ku e por bira un tiki mas lihé. Segun e manager di Baltimore Orioles, Buck Showalter Jonathan ta pisa 225 liber aktualmente kompará ku 231 liber aña pasa. E pelotero mes a bisa ku e ke yega banda di 220 liber. “Mi ke pèrdè un tiki peso pa mi por move mihó, subi mi alkanse riba tereno i añadí un tiki velosidat koriendo base,” Jonathan a bisa.
  • Segun informashonnan, Jurickson Profar ta spera ku e por hunga tur partido di Spring Training pa e ekipo di Texas Rangers. Jurickson a risibí bon notisia siman pasa ora ku un MRI ku e keda hasi riba su skouder leshoná a sali positivo. E siman aki Jurickson lo kuminsá tira na un distansia di 75 pia i ta spera di avansá pa 90 pia otro siman si tur kos siguí bon. Segun Jurickson, e ta sinti su mes fuerte, sin doló i kla pa kuminsá hunga.

 

Posted on

Liemarvin Bonevacia ku tempu rèkert ta klasifiká pa Kampionato Oropeo Indoor

MERKA — Liemarvin Bonevacia a logra otro rèkert Hulandes den wikènt tras di lomba na e Boston University John Thomas Terrier Invitational. Akinan riba 400 meter indoor, Liemarvin a logra un tempu di 46.46 sekònde. Ku esaki Liemarvin tin awor tantu e rèkert Hulandes di 400 meter indoor i esun outdoor riba su nòmber.

E tempu di 46.46 sekònde tabata sufisiente tambe pa Liemarvin klasifiká pa e kompetensia oropeo di atletismo indoor na Praag den luna di mart próksimo. Siman pasa Brian Mariano tambe a logra su klasifikashon pa e kompetensia aki riba 60 meter.

Posted on

Breve Deporte Awe #1-010

  • Jurickson Profar a risibí bon notisia ora ku un MRI ku e keda hasi riba su skouder leshoná djamars ultimo a sali positivo. E MRI a mustra un rekuperashon signifikativo den e skouder ku Jurickson a leshoná. E siman aki Profar lo sigui tira bala for di un distansia di 60 pia. Otro siman ta ekstendé e distansia ku Jurickson lo tira na 75 pia. E pelotero ta plania pa tira riba djaluna, djárason i djabièrnè di otro siman. Tambe e ekipo ta permití Jurickson kuminsá swing bate sin hasi kontakto ku bala otro siman.
  • E Asosiashon di Peloteronan di Liga Grandi a anunsiá ku Omar Minaya a bandoná su puesto ku e ekipo di San Diego Padres i lo ta awor konsehero pa e direktor di e asosiashon Tony Clark. Den su trabou ku e asosiashon Minaya lo bai focus riba relashoná internashonal i desaroyo di beisbòl den Merka.
  • Tambe e Asosiashon di Peloteronan di Liga Grandi a bisa ku nan lo sostené Alex Rodriguez den kaso ku New York Yankees trata na keda sin paga e pelotero un bono di 6 mion dòler si Rodriguez yega 660 honron. Segun e asosiashon un pelotero no por bolbe risibí kastigu riba algu ku ya e la keda kastigá pe.
  • E ekipo di Boston Red Sox a anunsiá ku nan a logra yega na un akuerdo ku e pelotero Daniel Nava i asina aki evitá e proseso di arbitrahe salarial. Nava lo risibí un montante di 1,85 mion dòler próksimo temporada. Inisialmente e pelotero a pidi un montante di 2,25 mion dòler miéntras ku e ekipo a ofresé 1,3 mion dòler. Temporada pasa Nava di 31 aña di edat tabata tin un promedio di .270 ku 4 honron i 37 kareda empuha.
  • Atlanta Braves a firma e picher Eric Stults na un kontrakt di Liga Menor ku invitashon pa Spring Training. Stults di 35 aña a pasa e mayor parti di ultimo tres añanan ku e ekipo di San Diego Padres. Temporada pasa e picher tabata tin un rèkert di 8-17 ku un efektividat di 4.30 den 32 salida.
  • Philadelphia Phillies a firma picher Chad Billingsley na un kontrakt di un aña pa 1,5 mion dòler. E kontrakt ta kontené tambe bononan pa prestashon. Den kaso ku e picher logra optené tur e bononan aki lo e risibí un otro 6,5 mion dòler. Billingsley ku a pasa henter su karera te awor ku Dodgers no a picha for di 2013 pa motibu di operashon Tommy John.
Posted on

Breve Deporte Awe #1-009

  • E ekipo di Washington Nationals a yega na un akuerdo di un aña ku picher Casey Janssen pa 3,5 mion dòler. Casey Janssen a sirbi e ultimo tres temporadanan komo closer pa e ekipo di Toronto Blue Jays. Den e tres temporadanan aki e picher a salba 81 partido ku un efektividat di 2.94. Tur kos ta mustra ku den e ekipo di Nationals e picher lo sirbi komo set-up man pa e closer Drew Storen.
  • Èks- picher, Joe Blanton ta preparando pa un regreso den beisbòl Liga Grandi. E picher lo tin un oudishon pa ekiponan interesá dia 4 di febrüari próksimo. 2013 tabata e ultimo temporada di Blanton den Liga Grandi ora ku e la picha ku Los Angeles Angels. Akinan den 28 partido e picher a logra un rèkert di 2-14 ku un efektividat di 6.04.
  • E ekipo di Chicago White Sox a yega na un akuerdo di un aña pa 2 mion dòler ku infielder Gordon Beckham. Temporada pasa Beckham a kombiná tempu entre e ekiponan di Chicago White Sox i Los Angeles Angels. Akinan e pelotero a logra un promedio di .226 ku 9 honron i 44 kareda empuha.
  • E ekipo di Atlanta Braves a anunsiá ku nan a firma e outfielder kubano, Dian Toscano na un akuerdo di kuater aña pa 6 mion dòler. E kubano di 25 aña di edat tabata tin un promedio di .356 durante e temporada 2012-13 ku e ekipo di Villa Clara na Cuba.
  • Los Angeles Angels a evitá e proseso di arbitrahe salarial ora ku nan e yega na un akuerdo di un aña ku tersera base, David Freese. Temporada pasa ku Angels e pelotero a logra un promedio di .260 ku 10 honron i 55 kareda empuha.
  • E ekipo di Caribes de Anzoátegui a logra nan di dos título den beisbòl profeshonal venezolano despues di a derota Navegantes del Magallanes ku skor di 8-3 den e di sinku partido di e final. Durante di e temporada 2010-11 e ekipo di Caribes a logra nan promé título ora ku nan a derota Tigres de Aragua.
Posted on

Jean-Julien Rojer i partner ta kai chikí den semi-final

Oustralia — Jean-Julien Rojer i partner Horia Tecau no a logra avansá pa e final di dòbel den e Australian Open. Rojer i su partner Tecau a pèrdè ayera den e semi-final kontra e Italianonan Simone Bolelli i Fabio Fognini ku skor di: 4-6, 6-3 i 3-6.

Esaki ta di dos biaha ku Rojer ta kai den e semi-final di e Australian Open. Na 2011 tambe e tenista a pèrdè den e semi-final. Apesar di no a logra e final e duo Rojer/Tecau ta bai kas ku un premio di 142.500 dòler.

Posted on

Breve Deporte Awe #1-008

  • E ekipo di Baltimore Orioles a anunsiá ku na a risibí outfielder Travis Snider den un kambio ku Pittsburg Pirates. A kambio e ekipo di Pittsburgh a risibí picher Stephen Tarpley i un pelotero ku lo no wòrdu anunsiá despues. Snider temporada pasa tabata tin un promedio di .264 ku 13 honron i 38 kareda empuha den 140 partido.
  • Shortstop di San Francisco Giants, Brandon Crawford a yega na un akuerdo di un aña ku e ekipo pa 3,175 mion dòler. Ku esaki e pelotero ta evitá e proseso di arbitrahe salarial. Den e proseso di arbitrahe Crawford a pidi 3,95 mion dòler miéntras e ekipo a ofresé 2,4 mion dòler. E salario di 3,175 mion dòler ku Crawford lo haña ta net e punto mei mei di e dos salarionan menshoná. Temporada pasa e pelotero tabata tin un promedio di .246 ku 10 honron i 69 kareda empuha den 153 partido.
  • Kansas City Royals a yega na un akuerdo ku outfielder Jarrod Dyson pa 1,225 mion dòler pa e próksimo temporada. Ku esaki Dyson tambe ta evitá e proseso di arbitrahe salarial. Dyson temporada pasa tabata tin un promedio di .269 ku 36 base roba den 120 partido.
  • Segun agente di picher Johan Santana, e pelotero lo no picha na Venezuela mas den e Liga Invernal. New York Yankees tabata un di e ekiponan ku tabata tin bista riba e picher aki. Temporada pasa e pelotero di 35 aña e purba di hasi un comeback den Liga Grandi ku Baltimore Orioles pero no a logra esaki despues di a leshoná i mester a pèrdè e restu di e temporada.
Posted on

Jean-Jullien Rojer i Horia Tecau den semi-final awe

Oustralia — Jean-Julien Rojer i su partner Horia Tecau a avansá pa e semifinal di e promé Grand Slam di aña kual ta Australian Open. E duo Rojer/Tecau a derota Dominic Inglot i Florin Mergea: 6-4 i 7-6. Den e semi-final, Jean-Julien i Tecau lo enfrentá e Italianonan, Simone Bolelli i Fabio Fognini. E partido aki lo ta awe 8’or di anochi, ora lokal di Kòrsou.