Author: E. Evertsz

Posted on

Jemyma Betrian ku Otro Viktoria den MMA

CALIFORNIA — Jemyma Betrian ta logra su di dos viktoria den su di dos pelea profeshonal di Mixed Martial Arts. Tabata ayera nochi den e kartelera Fight Night na Sportsmen’s Lodge ku Jemyma a nòkout Chandra Engel na di 4:30 minut di e prome asalto. E nòkout a bini via un skop den kabes di Engel ku a mand’e lona mes ora.

Ku e viktoria aki Jemyma ta pone su rèkert den MMA profeshonal na 2-0, ku ambos viktoria biniendo via nòkout. Pa Jemyma e plan ta pa logra algun viktoria mas e aña aki ku e meta final pa yega na un kontrakt ku UFC.

Posted on

Mariekson ‘Didi’ Gregorius ku Mensahe Riba Billboard

WILLEMSTAD — E Big Leaguer yu di Kòrsou Mariekson, “Didi” Gregorius ku awe mainta ta biaha pa Fort Lauderdale pa djòin e organisashon di New York Yankees na nan kampamentu di entrenamentu, a hasi un bishitá ayera mainta na su billboard riba Rijskseenheid Blvd.

Pa selebrá e okashon aki Fundashon Desaroyo Deportivo Kòrsou (FDDK) a laga traha un bunita bolo ku “Didi” tabatin e honor di a purba promé. FDDK ta hopi orguyoso di “Didi” i di kada un di nos peloteronan profeshonal. Fundashon Desaroyo Deportivo Kòrsou ta deseá “Didi” i tur nos otro peloteronan profeshonal tur kos bon den temporada di 2015.

Riba e billboard ta figura e siguiente mensahe: ”’Kaminda pa éksito tin hopi opstákulo…’ FDDK tei pa duna un man!”

Posted on

Breve Deporte Awe #1-023

  • E ekipo di Los Angeles Dodgers a mustrá interes den picher Joba Chamberlain. Esaki despues ku e ekipo a tuma nota ku Kenley Jansen lo pèrdè entre ocho pa 12 siman. Banda di Chamberlain e ekipo ta konsiderando otro posibilidatnan tambe. Temporada pasa ku e ekipo di Detroit Tigers, Chamberlain a drenta den 69 partido i tabata tin un efektividat di 3.57 ku dos partido salba.
  • E tersera base Perdro Alvarez a gana e proseso di arbitrahe salarial kontra Pittsburgh Pirates i lo risibí un montante di 5,75 mion dòler e temporada aki. Alvarez temporada pasa tabata tin un promedio di .231 ku 18 honron i 56 kareda empuha.
  • Mark Trumbo tambe a gana e proseso di arbitrahe salarial kontra Arizona Diamondbacks. Trumbo lo risibí un salario di 6,9 mion dòler e siguiente temporada. E ekipo di Diamondback a ofresé 5,3 mion dòler. E pelotero temporada pasa tabata tin un promedio di .235 ku 14 honron i 61 kareda empuha.
  • E ekipo di New York Yankees tabata tin un otro seshon di ehersisio priva ku e prospekto kubano Yoan Moncada djárason ultimo. Yankees ta keda konsiderá komo e ekipo faborito pa optené Moncada. New York ta mira Moncada komo un segunda base of tersera base den futuro pa e ekipo. Los Angeles Dodgers, Boston Red Sox i San Diego Padres tambe a mustra interes den e pelotero kubano.
Posted on

Pichingolo Nissan Selebrando 35 Título

WILLEMSTAD — Ku partisipashon di no ménos ku 24 tim di sòftbòl slowpitch ta start djabièrnè 20 di febrüari na parke di Pichingolo den Buena Vista un torneo di sòftbòl slowpitch.

E torneo aki ta karga e nòmber di “Best of the best Tournament 2015”.

Lo tin 5 diferente kategoria. Maskulino, Maskulino Sosial, Mucha Muhé, Modified i Liga-50.  Den maskulino lo partisipá: MCB, Coca Cola/Licores Maduro, Sulca i SBAB. Den maskulino sosial: UOC,  Petro, Polis, CIS, Ernst & Young, SVB, UOC2 i Pinnacle.

Den mucha muhé: MCB, UAC, UOC i GBST. Den modified: CRT, Brievengat Boys, X-Treme i Thrillers. Den Liga-50: Catpower, Jaws, Los Amigos i Ban Serio.

E weganan pa djabièrnè 20 di febrüari:  7.30 pm: Mucha Muhé: MCB vs GBST, 9or: SVB vs Pinnacle (Sosial Maskulino).

Djasabra 21 di febrüari lo tin 7 wega kuminsando for di 10or di mainta. E último wega ta anochi 7or.

Djadumingu tambe tin 7 wega kuminsando for di 10or di mainta i finalisando ku e último wega 7or di anochi. Tur amante di sòftbòl slowpitch i di bon ambiente ta kordialmente invitá.

Lo tin un bar i kushina bon surti. Pichingolo ta preparando pa su tremendo BBQ di dia 7 di mart. Lo por haña karchi na parke.

Posted on

Jemyma Betrian Bek Den Rin Awe

CALIFORNIA — Jemyma Betrian ta bek den ring awe nochi den e kartelera Fight Night at Sportsmen’s Lodge na Studio City, California. Jemyma lo enfrentá Chandra Engel den loke lo bira su di dos pelea profeshonal di Mixed Martial Arts. Jemyma tin un rèkert di 1-0 den MMA miéntras su kontrinkante Chandra Engel ta di 0-2.

E úniko viktoria te ainda di Jemyma den MMA a bin kontra Hadley Griffith den e kartelera di Lights Out Promotions, Chaos at the Casino 5. Den e pelea aki Jemyma a nòkout Hadley den di 47 sekònde di e promé asalto.

Na desèmber ultimo, Jemyma tabata tin un otro pelea programa kontra Catalina Madril den e kartelera di Gladiator Challenge, pero akinan su kontrinkante no a presentá. Esaki ta hasi ku Jemyma ta bolbe bringa despues di seis luna. Pa Jemyma esaki ta un eternidat teniendo na kuenta ku den e promé seis luna nan di 2014 e la bringa den sinku kartelera di Muay Thai.

Despues di e pelea aki Jemyma ta spera di bringa algun biaha mas e aña aki ku e meta final di yega na un kontrakt ku UFC.

Posted on

Jurickson Profar lo Opera Skouder

TEXAS — Despues di tabata rekuperando satisfaktoriamente di su leshon na skouder tur kos a kambia ayera ora Texas Rangers a anunsiá ku Jurickson Profar lo tin ku opera su skouder.

Segun e ekipo di Texas Rangers, Jurickson tabata tira na un distansia di 105 pia sin ningun problema. Keda tres siman e tabata hasi un MRI na su skouder pa monitor e situashon di e skouder. Sin embargo, e MRI ku e keda hasi djamars a mustra ku e skouder di Jurickson ta leshoná atrobe. Esaki no tabata bisto den e MRI anterior tres siman pasa. A base di esaki e ekipo huntu ku e pelotero a opta pa opera e skouder djaluna próksimo na Arlington. Dòkter Keith Meister lo ta enkargá ku e operashon.

Jurickson for di komienso di temporada 2014 a kuminsá lucha ku leshon na su skouder. Esaki a pone e pelotero pèrdè temporada pasa den su totalidat. Ya tin spekulashonnan ku e pelotero lo por pèrdè e temporada 2015 tambe. Sin embargo, e ekipo di Rangers no a pone un fecha ainda pa e regreso di Jurickson i ta bisa ku esaki lo keda determiná na momentu ku keda establesé kon grandi e operashon lo ta.

Jurickson ta bira e di dos pelotero di Kòrsou ku lo habri temporada 2015 riba lista di hungadó leshoná. Algun dia pasa tabata e ekipo di Los Angeles Dodgers ku a anunsiá ku Kenley Jansen lo pèrdè e komienso di temporada regular pa motibu di un operashon ku a keda hasi na su pia robes. E ekipo di Dodgers ta kere ku Jansen lo pèrdè entre 8 pa 12 siman.

Posted on

Street Masters 2015 organisa pa FDDK

WILLEMSTAD — Fundashon Desaroyo Deportivo Kòrsou (FDDK) ta organisá djabièrnè 20 di febrüari próksimo un kompetensia di ‘STREET MASTERS 2015.’

Esaki lo tuma lugá na kompleho deportivo Don Bosco for di 09:00 te ku 11:30. E kompetensia aki ta wòrdu hunga bou di e kategorianan 9-13 i 13-16 aña.

Tur hóben ku kier bin kompetí den ‘3 on 3’ den basketbòl i futbòl por bin i inskribí nan ekipo di máksimo di 3 persona pa kompetí. Pa mas informashon i reservashon por yama Stallone Isenia riba number 5145178 òf 8881840 pa inskribí nan ekipo.

Pa ekiponan ganadornan lo bai tin premionan deportivo. Bin sera bo fakansi di skol den un ambiente deportivo.

Posted on

FFK ku kurso hubenil pa rèfri

WILLEMSTAD — Djasabra 7 di mart 2015, Federashon di Futbòl Kòrsou pa medio di su Departamentu di Rèfri, ta organisá su promé kurso pa e aña aki.

Esaki lo ta e kurso hubenil, ku lo inisiá riba e promé Djasabra den Mart i lo ta riba tur kuater Djasabra mainta den Mart.  E kurso lo ta na edifisio Mordy Maduro di FFK na Brievengat y manera ariba menshoná lo bai ta e fechanan 7, 14, 21 y 28 di Mart 2014, di 10:00 pa 12:00 mainta.

E kurso aki ta netamente pa hóben, ku e meta pa logra hañá mas rèfri hóben pa dirigí weganan hubenil, entre otro weganan di Lito.

Ora kompletá e kurso aki lo risibí un sertifikado di partisipashon.
Klupnan ta wòrdu enkurashá pa motivá nan miembronan pa inskribí, dor di hasi esaki, ta yuda nan mes klup.

Por inskribí te ku 6 Mart na departamentu di rèfri via email na referee@ffk.cw of via telefon na numbernan 7365057, 5112915, 5128617, 5202587

Pa mas informashon por tuma kontakto ku Departamento di Refri.

Posted on

Breve Deporte Awe #1-022

  • E ekipo di Kansas City Royals a yega na un akuerdo pa evitá arbitrahe salarial ku e primera base Eric Hosmer. Ta trata di un akuerdo di 13,9 mion dòler pa dos aña. Hosmer di 25 aña temporada pasa ku e ekipo di Kansas tabata tin un promedio di .270 ku 9 honron i 58 kareda empuha.
  • Manera kos ta mustra Miami Marlins lo no añadí picher Francisco Rodriguez na nan bullpen. Te ku par di dia pasa e ekipo di Marlins a mustra interes den e picher i te ainda tin interes den e picher pero no na e preis ku Rodriguez ta pidi. Segun informashonnan, Marlins ta di akuerdo pa paga e picher 10 mion dòler pa dos aña. Pero aparentemente e picher ta pidiendo 10 mion dòler pa un aña. Temporada pas ku e ekipo di Milwaukee Brewers Rodriguez a salba 44 partido ku un efektividat di 3.04
  • E ekipo di New York Yankees ta konsiderando un rotashon di seis picher habridó. Segun e coach di picheo di Yankees, Larry Rothschild, e ta studiando e posibilidat pa añadi un picher habridó mas na e rotashon di sinku habridó, ku ta antisipá di keda forma pa CC Sabathia, Masahiro Tanaka, Michael Pineda, Chris Capuano i Nathan Eovaldi. Segun e coach di picheo añadiendo un picher mas ta duna e pichernan dianan adishonal di sosiegu i ta sirbi komo un pólisa di seguro kontra posibel leshonnan.
  • Miguel Cabrera a risibí lus bèrdè di dòkternan pa kuminsá praktiká beisbòl atrobe. Segun e ekipo di Detroit Tigers ku esaki e pelotero lo ta den kondishon optimal pa habri e temporada ku e ekipo. Temporada pasa Cabrera tabata tin un promedio di .313 ku 25 honron i 109 kareda empuha.
Posted on

Breve Deporte Awe #1-021

  • Awe ta e prome dia ku picher i kecher lo kuminsa reporta na Spring Training. Ofisialmente awe ta dia pa picher i kechernan di San Francisco Giants, Cleveland Indians, Philadelphia Phillies, Pittsburgh Pirates i Cincinnati Reds reporta. Djaweps ta dia pa picher i kechernan di Angels, Athletics, Cardinals, Cubs, Diamondbacks, Dodgers, Mets, Nationals, Orioles, Padres, Rockies, Royals i Tigers. Djabierne ta Astros, Braves, Brewers, Mariners, Marlins, Rangers, Red Sox, White Sox i Yankees. Despues ta Rays riba djasabra, Twins djadumingu i Blue Jays djaluna.
  • Alex Rodriguez a diskulpa su mes ayera pa usa di supstansia pa mehora prestashon mediante un karta skirbi na man. Den e karta Rodriguez ta tuma responsabilidat kompletu pa su aktonan. A-Rod a pidi dispensa na Major League Baseball, e ekipo di New York Yankees, famia Steinbrenner, asosiashon di peloteronan i e fanatikonan.
  • E ekipo di Miami Marlins a firma Reed Johnson na un kontrakt di Liga Menor ku invitashon pa Spring Training. Johnson lo gana un 1,25 mion doler si e keda riba e roster di Liga Grandi. Den kaso ku e pelotero no keda añadi na e roster e por kibra e kontrakt dia 29 di mart. Jonhson temporada pasa ku e ekipo di Marlins tabata tin un promedio di .235 ku 2 honron i 25 kareda empuha.
  • Baltimore Orioles a yega na un akuerdo di Liga Menor ku invitashon pa Spring Training ku Jayson Nix pa 750 mil doler. Temporada pasa Nix tabata ku Philadelphia Phillies, Pittsburgh Pirates i Kansas City Royals akinan e la logra un promedio di .120 den 41 partido.