TEXAS — Despues di tabata rekuperando satisfaktoriamente di su leshon na skouder tur kos a kambia ayera ora Texas Rangers a anunsiá ku Jurickson Profar lo tin ku opera su skouder.
Segun e ekipo di Texas Rangers, Jurickson tabata tira na un distansia di 105 pia sin ningun problema. Keda tres siman e tabata hasi un MRI na su skouder pa monitor e situashon di e skouder. Sin embargo, e MRI ku e keda hasi djamars a mustra ku e skouder di Jurickson ta leshoná atrobe. Esaki no tabata bisto den e MRI anterior tres siman pasa. A base di esaki e ekipo huntu ku e pelotero a opta pa opera e skouder djaluna próksimo na Arlington. Dòkter Keith Meister lo ta enkargá ku e operashon.
Jurickson for di komienso di temporada 2014 a kuminsá lucha ku leshon na su skouder. Esaki a pone e pelotero pèrdè temporada pasa den su totalidat. Ya tin spekulashonnan ku e pelotero lo por pèrdè e temporada 2015 tambe. Sin embargo, e ekipo di Rangers no a pone un fecha ainda pa e regreso di Jurickson i ta bisa ku esaki lo keda determiná na momentu ku keda establesé kon grandi e operashon lo ta.
Jurickson ta bira e di dos pelotero di Kòrsou ku lo habri temporada 2015 riba lista di hungadó leshoná. Algun dia pasa tabata e ekipo di Los Angeles Dodgers ku a anunsiá ku Kenley Jansen lo pèrdè e komienso di temporada regular pa motibu di un operashon ku a keda hasi na su pia robes. E ekipo di Dodgers ta kere ku Jansen lo pèrdè entre 8 pa 12 siman.