WILLEMSTAD (DA) — Ministerio di Enseñansa, Siensia, Kultura i Deporte (ESKD) a indiká ku tin fondonan reservá pa kubri e gastunan di un pista nobo di atletismo na Stadion Ergilio Hato, i ku preparashonnan pa e proyekto ya a kuminsá.
Minister enkargá ku Deporte, sr. Sithree van Heydoorn, a tuma nota di e preokupashon di komunidat i krítikanan riba kondishon di e pista na Stadion Ergilio Hato, i e ta konsiente di e defisiensianan.
Na kabamentu di desèmber tabata tin un kombersashon preliminar ku Curaçaose Atletiek Bond (CAB), Fundashon Desaroyo Deportivo Kòrsou (FDDK) i Sektor di Kultura i Deporte di Gobièrnu pa interkambiá riba aspektonan tékniko i e desishonnan importante ku mester tuma pa yega na un pista nobo.
ESKD lo anunsiá pronto e fecha riba kua e trabounan pa kambia e pista lo inisiá.