WILLEMSTAD — Porfin e gran dia a yega pa Kòrsou eksperensiá e promé edishon di un evento úniko.
Awe djaluna 8’or anochi ta marka inisio di e tremendo torneo Sharky’s Curaçao Classic 2026, ku ta tuma lugá bou di ouspisio di Federashon Biyar Kòrsou. Poolarena na gosieweg ta esenario di e tremendo evento.
Ta trata aki di un evento ku ta konta ku premionan atraktivo. E evento ta konsistí di dos parti, den e promé parti lo hunga e disiplinanan di bola 10, Bankpool, bola 8 i Rotation, konosí na Kòrsou komo 61. Den e di dos i último parti e 8 mihó hungadónan di e promé parti lo bai bataya den e disiplina di ‘One pocket’.
Pues un evento úniko, kaminda pa promé biaha lo kompetí den 3 disiplina no muchu popular serka nos na Kòrsou. Djaweps awor ta start ku e kompetensia di Bankpool. 25 Biardista a inskribí i a kumpli tambe ku reglanan di partisipashon.
Federashon Biyar Kòrsou ta yama danki na spònser di e evento Sr. Clarck “Sharky” Bloom. Un invitashon ta bai na tur amante di biar pa bin presensia un kompetensia diferente for di tur otro ku pa promé biaha ta tuma lugá na Kòrsou. Tur hende ta bon bini na Poolarena na Gosieweg.