WILLEMSTAD — Federashon Atletismo Kòrsou a habri ofisialmente e temporada di atletismo 2026 durante e kompensia di apertura di temporada den stadion Ergilio Hato, markando un komienso festivo, inklusivo i di haltu nivel kompetitivo pa e aña nobo di atletismo.
Den presensia di atletanan, entrenadónan, miembronan di honor i representantenan di sponsor, e vicepresidente di FDOK, Sr. Paulus Berkenveld, a duna e señal ofisial di start, deklarando asina e temporada di atletismo 2026 habrí.
Un momentu spesial durante e seremonia di habrimentu tabata e partisipashon di atletenan den ròl stul, ku a hasi un ronda di 400 meter riba e pista. Nan presensia a subrayá e kompromiso di e federashon ku atletismo inklusivo basá riba igualdat di partisipashon pa tur hende.
Prestashonnan Ekselente i Rekòr Nobo
E kompetishonnan durante den kuadro di apertura di temporada tabata impreshonante i a duna atletenan e oportunidat pa mustra e progreso ku nan a hasi despues di 6 luna di preparashon intensivo. Den tur kategoria di edat nan determinashon, ambishon i preparashon pa e temporada nobo tabata visibel.
Un di e momentunan mas sobresaliente a bin di Bradley Bonevacia di The New Revolution. Den su di dos intento, Bradley a lansa e speer 50,67 meter, ku a garantisá su kualifikashon pa e Carifta Games 2026. E lansamentu aki tambe a resultá den un rèkort nashonal nobo den e kategoria mucha hòmber bou di 17 ku e speer di 700 gram.
“Mi ta hopi agradesí na Dios, mi mayornan i mi entrenadónan,” Bradley Bonevacia a bisa medionan di prensa durante e seremonia di medaya.
Enfoke riba Kualifikashon Internashonal
Pa e atletenan hóbennan di Kòrsou, e kompetisia di apertura di temporada ta habri tambe nan posibilidat pa kualifikashon pa eventonan internashonal manera e Carifta Games i e South American Youth Games, ambos den luna di april. E kompetensia aki a sirbi komo un punto importante den nan trayekto di kualifikashon.
Presensia di e Gobernadó di Kòrsou
Un otro momento kulminante di e evento tabata e presensia di e Gobernadó di Kòrsou, Su Ekselensia Sr. Mauritsz J. de Kort. E Gobernadó a expresá su apresio pa e prestashon di nos atletanan i mustrá satisfakshon pa fraternidat i unidat bou e atletenan, apesar ku nan ta pertenesé na diferente klùp.
Pa hopi atleta, tabata un gran honor pa risibí nan premio for di man di e Gobernadó, loke a hasi e evento aún mas memorabel.
Ku mira pa dilanti
Federashon di Atletismo Kòrsou ta wak bèk ku gran satisfakshon riba apertura di temporada eksitoso i ta yama danki na tur esnan ku a hasi e kompetensia aki posibel kual ta MCB, Churandy Martina Foundation, Powerade i FDOK naturalmente un danki speshal na tur nos boluntarionan.
E federashon ta sigui ku e mira pa dilanti na un temporada di atletismo 2026 hopi prometedor, karakterisá pa desaroyo, inklusidat, prestashonnan fuerte i representashon internashonal.