WILLEMSTAD — Durante fin di siman tras di lomba Kòrsou a konosé un tremendo inisio di temporada di biar, ku e di 11 edishon di Schotborgh Cup dediká na señora Meredith Trinidat.
E evento a inisiá djabièrnè 09 di yanüari ku e ekipo di Kòrsou serando e promé dia di kompetensia ku un bentaha, ku skor di 5 pa 2, riba e ekipo di Boneiru.
Djasabra 10 di yanüari a marka kontinuashon di e evento ku a tuma lugá den Poolarena situá na Gosieweg. E ekipo di Boneiru no ta baha kabes i ta buta preshon i ta yega hopi serka pa finalmente e di dos dia sera ku Kòrsou manteniendo un bentaha chikí ku skor di 8-6 riba Boneiru. Esaki, manera por a antisipá, a pone ku e di tres i último dia di e evento a bira unu sumamente interesante.
Riba djadumingu kosnan a bira sumamente emoshonante ku e ekipo di Boneiru demostrando ku semper nan ta peligroso i ta logra kòrta bentaha di forma peligroso ora e skor ta bira 10 pa 9. Aki dos veterano ta topa otro pa e desishon final, ku e legendario David Prins di Kòrsou enfrentando Garino Molina di Boneiru, un di e mihó hungadónan di Boneiru.
Prins kende konosé su atversario hopi bon, no a dun’é ningun chèns i ta logra dominá e enkuentro i finalmente ta sali viktorioso ganando e wega desisivo aki ku skor di 5 pa 2. Di e forma aki, den un final sumamente emoshonante, Kòrsou ta bira kampion di e edishon 11 di Schotborg Cup ku e skor final 11 pa 9. Kòrsou awor ta tuma bentaha den e seri ku 6 viktoria miéntras Boneiru tin 5 viktoria.
Federashon Biyar Kòrsou, ta gradisí Gemajel “Jimmy” Rol pa su tremendo trabou hasí pa asina mundu kompleto por a sigui e evento, Stanley Dunker ku tabata enkargá ku sala di entrenamentu i nos dos rèfrinan Curt Francisca i Evandro Hooi ku a desplegá tremendo trabou dirigiendo mayoria di e enkuentronan. Meskos un danki na e direktor deportivo i árbitro prinsipal Michael Arvelo.
Mester remarká ku e di 12 edishon Schotborgh Cup ta tuma lugá den luna di desèmber benidero na nos hermana isla Boneiru. Esaki ta planiá pa tuma lugá den e promé wikènt di desèmber.
Federashon Biyar Kòrsou no ta para ketu i ta planiando mas evento grandi pa su miembronan. FEBIKO ta pidi su miembronan pa keda pendiente pa ‘Sharkys Curaçao Classic’ ku ta na kaminda próksimamente.