WILLEMSTAD (DA) — Federashon Biyar Kòrsou, ku satisfakshon por anunsiá ku su último evento pa 2025 tabata unu sumamente eksitoso.
Prueba di esei ta e partisipashon rèkert di 30 biardista den e ‘Tour bola 8’. Kuater dia di bataya fuerte riba mesa ku a bin kulminá djabièrnè anochi ku e último kuater hungadónan batayando den e semi final.
Den e promé partido di semi final e number 1 di Kòrsou Barat Ibrahim a enfrentá Gemajel “Jimmy” Rol i klaramente el a demostrá di kon e ta e aktual number 1. Barat a pasa ku fasilidat pa e final despues di dominá Jimmy ku skor di 6 pa 1.
Den e otro enkuentro pa saka finalista, Shamir Tremus, un di nos mihó biardista nan di último añanan, a gana fasil tambe di Gregory Zimmerman ku skor di 6 pa 1. Konsekuentemente, sin duda, e dos mihónan di Kòrsou a topa otro den e gran final.
Eksperensia a manifestá su mes durante e partido final. Shamir no a duna Barat ningun chèns i ta seya su viktoria ku skor dominante di 6 pa 1. Ku e viktoria aki tambe Shamir Tremus ta sera 2025 ku dos triunfo konsekutivo. Siman pasá el a skibi e torneo bola 10 riba su nòmber i awor bola 8.
Shamir Tremus ta titulá kampion di Tour Bola 8, miéntras ku Barat Ibrahim a keda na di dos lugá i e biardista nan Gregory Zimmerman i Gemajel Rol a kompartí e di tres lugá.
Febiko un biaha mas ta gradisí tur ku for di 10 di sèptèmber a duna nan sosten na e direktiva nobo i den mes rosea ta ekstendé un invitashon pa kumpli ku e kontribushon pa asina bo tin derecho pa partisipá na nos eventonan den 2026. Keda pendiente pasobra tin kos grandi na kaminda.
Presidente Michael Arvelo ta deseá tur miembro felis dianan di fiesta.