LIMA – XX Juegos Bolivarianos Ayacucho-Lima 2025 a kontinuá djaluna 01 di desèmber i mester remarká ku dos biardista tabata den akshon ayera tambe pa Kòrsou.
Ta trata di e hóben Zenah Freitas ku a kompetí den e disiplina nobo ‘Heyball’ femenino i e legendario David Prins ku a kompetí den e disiplina ‘Heyball’ i den Snooker (Karambola). E resultado tabata di e siguiente forma:
‘Heyball’ femenino:
Pa loke ta e deporte di Biar, ayera e biardista Zenah Freitas a partisipá den e modalidat di ‘heyball’ femenino i den e kuart final ta kai Zena ta kai vensí kontra e biardista di Peru Katherine Corzo ku skor di 0-5.
Ku e resultado aki Zenah Freitas ta pasa pa kompetí den e buèlta di pèrdèdó i aki Zenah ta duna bataya, pero finalmente e ta sufri su di dos derota, na momentu ku e ta kai vensí ku skor di 1-5 kontra e biardista venezolano Albany Ramones. Di e forma aki tambe Zenah su partisipashon na Juegos Bolivarianos 2025 ta konkluí.
‘Heyball’ maskulino:
Den e kategoria maskulino tabata e biardista David Prins ku a debutá ayera den Juegos Bolivarianos 2025, kompitiendo den e modalidat ‘heyball’ maskulino. E veterano biardista ta trompeká den kuart final, ora e ta kai vensí ku skor di 2-6 kontra e Boliviano Leonardo Villarroel.
Den e buèlta di pèrdèdó David Prins a enfrentá e venezolano Enderson Carreño i aki tambe e legendario David Prins ta trompeká i ta kai vensí ku skor di 2-6. Ku esaki e ta keda eliminá.
Snooker Maskulino (Karambola):
Seguidamente David Prins a kompetí tambe den e disiplina di ‘karambola’ maskulino i aki Prins ta avansá pa semi final riba un bypass, pero ta kai vensí 0-2 kontra e venezolano Javier Ochoa.
Seguidamente den e buèlta di pèrdèdó David Prins ta pèrdè 0-2 di e guatemalteko Erson Girón.
Ku e resultado aki Prins ta keda eliminá den e kompetensia di ‘karambola’. Ta bon pa asentuá ku pa ámbos biardista tabata un tremendo eksperensia di por a kompetí na nivel internashonal.