WILLEMSTAD – Ku gran doló den nos kurason nos a risibí e notisia di fayesimentu di sr. Ruthsel Martina, ku durante hopi aña a sirbi komo Sekretario General di e direktiva anterior.
Ruthsel no tabata solamente un miembrio di direktiva di FDOK; e tabata un pilá den nos moveshon di deporte, un hende ku a duna tur loke e por pa motivá, fortalesé i avansá deporte riba nos isla.
E tabata un pèrsona ku pashon pa progreso, ku un manera trankil pero poderoso di liderá. Ku su konsistensia, su bista kla i su kompromiso sin limite, e a logra un impakto ku nos lo sigui sinti durante hopi aña mas. Hopi proyektonan, hopi atletenan i hopi hende den nos komunidat a krese i risibí oportunidat danki na su trabou firme i amor pa deporte.
Ruthsel tabata un hende di palabra, di integridat i di karakter. Su presensia tabata un lus; su aporte, un regalo i su legado, un herensia ku nos mester sigui honra.
Den e momentu difisil aki, nos ta manda forsa, konsuelo i bendishon pa su famia, amigunan i tur hende ku tabata kere den dje. Ruthsel, danki pa bo pasenshi, bo dedikashon i kontribushon pa deporte i komunidat. Bo trabou lo keda papia pa bo.