WILLEMSTAD – For di dia 5 mei 2013, ora ku alrededor di 16.55’or parlamentario H.M. Wiels a keda asesiná na altura di e pir na Mari Pampun, Kuerpo Polisial Kòrsou (KPC) bou di ouspisio di Ministerio Públiko i sostené pa Recherche Samenwerkingsteam (RST) inmediatamente a kuminsá un investigashon profundo.
A disidí inmediatamente pa lanta un TGO (Team Grootschalige Opsporing). E tim aki ta konsistí di reshèrshi nan di KPC i RST. E TGO ta haña guia di un ‘stuurgroep’ ku ta konsistí di Fiskal Mayó di Ministerio Públiko, Hefe di Kuerpo Polisial Kòrsou i Hefe di Recherche Samenwerkingsteam.
For di dia di e suseso a realisá un kantidat grandi di aktividat investigativo profundo tantu tékniko/forénsiko komo táktiko. Na diferente okashon kolega nan di e otro pais nan den Reino Hulandes sea riba petishon pa un eksperto spesífiko òf di otro forma a kontribuí ku e investigashon. E Nederlands Forensisch Instituut (NFI) a hunga un ròl importante den akumulashon i investigashon di e material forénsiko. Polis i hustisia te ainda a disidí di tene e suministro di informashon na prensa limitá. Esaki tabata un eskoho konsiente, ya ku suministro di mas informashon lo por a afektá e investigashon. Por sierto, e insinuashon ku a keda lantá pa sierto medio di komunikashon lokal ku a duna mas informashon na prensa hulandes ku na prensa lokal, ta kompletamente inkorekto.
Miéntras tantu a bira posibel pa duna mas informashon for di e TGO tokante di e resultado nan di e investigashon. For di e investigashon a resultá entre otro lo siguiente:
- E outor di e asesinato di señor Wiels den ehekushon di e krímen aki a hasi uso di un Kia Picanto koló mòka, ku a hür na Oost-West Car Rental na Rooi Santu. A konfiská e outo i a investigá hueya nan den i na esaki.(komunikado no.287/2013).
- E hürdó di e Kia Picanto ora e asesinato a keda kometé tabata e Yu di Kòrsou di 30 aña, Raul Jacinto Martinez (komunikado no. 294 / 2013).
A bin haña un otro outo ku e Martinez aki tabata usa,- un Kia Rio blanku F / 2-75-, dia 18 mei, sin okupante na saliña nan (zoutpan) den e bario di Samí Liber. Den e outo tabatin un kantidat grandi di sanger. Martinez ta pèrdí for di medio mei 2013.
- Denter di e investigashon di e asesinato di señor Wiels, promé ku su desaparishon, ya Martinez a keda indiká komo un di e sospechoso nan ku de fakto a kometé e asesinato.
- E identidat di e persona ku ta sospechá di tabata huntu ku Martinez den e Kia Picanto riba 5 di mei 2013 na momento ku a kometé e asesinato, ta konosí serka e tim investigadó. Na bienestar di e investigashon na e momentu aki no ta duna mas informashon tokante di e persona aki.
- Riba 4 di yüni 2013 a haña un kurpa sin bida na kosta di Kòrsou, riba sabana (vlakte) di San Pedro (komunikado 317/2013). Aunke investigashon di DNA ainda mester indiká esaki definitivamente, ku tur probabilidat ta trata aki di kurpa di Martinez, ku a pèrdè su bida dor di un akto kriminal.
- Komo sospechoso di e asesinato pre meditá c.q. homisidio di Martinez ta konsiderá entre otro e Yu di Kòrsou di 26 aña L.L. F. Riba petishon di Ministerio Públiko di Kòrsou a lokalisá e sospechoso aki i riba 15 di yüni 2013 a deten’é na Zoetermeer, Hulanda. Riba 17 di yüni 2013 bou di guia di Koninklijke Marechaussee a transferié pa Kòrsou. Hues Komisario na Kòrsou a duna órden pa detenshon preliminar di F., a base di sospecho di asesinato pre meditá c.q. homisidio di Martinez. Den kurso di otro siman ta bira konosí si su detenshon preliminar lo keda prolongá.
- Naturalmente ta investigá tambe kua relashon tin entre e morto di señor Wiels i e morto di Martinez, kual a menshoná anteriormente. No ta ekskluí ku e relashon aki tin di haber ku en kubrimentu di asesinato di señor Wiels, pero ta tene kuenta debidamente ku otro senario nan tambe den e investigashon.
- Den e kas nan di Martinez i F. na Kòrsou a hasi entrada hudisial. Durante di e búskeda aki a salvaguardá entre otro hueyanan tékniko. Tambe a hasi investigashon den i na e vehíkulo ku kua probablemente a transportá e kurpa di Martinez. E investigashon forénsiko di e hueyanan aki ta andando.
Manera menshoná anteriormente, e tim di investigashon tin un bista basta kla ken ta e sospechoso nan di e asesinato di señor Wiels i kiko a sosodé riba 5 di mei 2013. Probablemente ta trata di un asesinato riba enkargo (huurmoord) kaminda persona nan a keda pagá pa un òf mas tersera pa kometé òf laga kometé e asesinato. Naturalmente e investigashon ta dirigí tambe riba es(nan) ku a duna e enkargo pa e asesinato i kende a paga e aktual outor nan. Riba e tereno aki tambe e tim di investigashon ta hasiendo avanse nan i tin indikashon den kua direkshon mester buska e hende nan aki.
Polis kontinuamente a keda pidi públiko pa suministrá informashon, i hopi a kumpli ku e petishon aki. Esaki a yuda e investigashon bon, i polis i Hustisia ta hopi agradesido na komunidat pa esaki.