Análisis di Elekshon Kòrsou 2012: Pueblo Soberano e ganadó miéntras ku PAR e pèrdèdó.

Pueblo Soberano ku su lider polítiko Helmin Wiels a bira a partido di mas grandi na Kòrsou. Esaki despues ku mester a tene elekshon adelantá pa motibu ku gabinete Schotte a pèrdè sosten di mayoria. Segun e konteo preliminar di voto hasi pa Konseho Supremo Elektoral, Pueblo Soberano a logra un kantidat di 19716 voto.

Ku e viktoria aki Pueblo Soberano ta bira e di dos partido ku den último 17 aña nan ta logra destrona PAR komo e partido di mas grandi. Frente Obrero a logra esaki den elekshon nan di 2002 i 2003. Interesante ta ku despues di e dos viktoria nan aki di Frente Obrero e partido a keda bai atras na voto.

Pueblo Soberano a krese den tur elekshon ku e la partisipá pero ningun di e kresementu nan tabata mas signifikativo ku esun di e elekshon aki. Den dos aña di tempu Pueblo Soberano a logra krese ku 5830 voto, e kresementu di mas grandi den su historia polítiko.

E elekshon aki a konta tambe ku un kantidat enorme di votadó. Tabata tin un kantidat total di 87058 voto bálido ku e keda depositá. Esaki ta un kantidat di 12718 voto bálido mas ku na elekshon di 2010 kaminda tabata tin un kantidat di 74340 voto bálido. A base di esaki no tabata hustu pa kompará e resultado di elekshon di 2010 ku esun di 2012 sin modifiká e resultado di elekshon 2010. Mester modifiká e resultado di elekshon 2010 i hasié na mesun nivel ku e kantidat di hende ku a bai vota na 2012.

Den e siguiente tabla tin e resultado di elekshon 2010 i 2012 pa tur e partido nan i tambe e diferensia di voto entre 2010 i 2012 pa kada partido. E kolumna 2010 modifiká ta representá e kantidat di voto ku kada partido lo a haña na 2010 den e kaso ku 87058 hende a vota na 2010. Diferensia modifiká ta e diferensia entre e resultado di elekshon 2012 i 2010 modifiká.

Segun e resultado nan di diferensia modifiká por wòrdu konkluí ku en realidat ta tres partido so a krese den e elekshon aki. Pueblo Soberano, MAN i PAIS ta e úniko partido nan ku a krese di bèrdat. PAIS tabata e partido ku mayor kresementu den e elekshon aki, siguí pa Pueblo Soberano.

Pa motibu ku tin un márgen di eror nos ta kalkulá ku ni MFK, ni tampoko PNP no a bai atras ni tampoko krese. E dos partido nan aki a keda básikamente mesun grandi.

E partido ku a pèrdè mas tantu voto ta PAR. Si kompará PAR entre elekshon di 2010 i esun di 2012 nan a perde 5321 voto. E pèrdida di voto di PAR ta bira aun mas grandi si modifiká e kantidat di voto ku nan a haña na 2010 i kompará esaki ku e kantidat di voto ku nan a haña na 2012.