WILLEMSTAD — Den wikènt último FDDK huntu ku Cubafe a drai e torneo CuraHoops National Qualifier. E torneo ei di basketbòl 3-kontra-3 kategoria U18 mucha hòmber i mucha muhé, a sirbi pa saka Kòrsou su representantenan pa CuraHoops su vershon internashonal na Novèmber próksimo riba Brionplein.
WBAC, Women Basketball Association of Curaçao, ta felisitá FDDK i e direktiva interino di Cubafe ku e bon organisashon dje torneo i e ambiente den sala Errol Rooi na SDK.
Kòrsou su representantenan pa CuraHoops International mucha muhé na Novèmber riba Brionplein lo bin di WBAC. E ekipo Storm a resulta e ganadó invikto di CuraHoops nashonal mucha muhé ku 136 punto den 7 wega, bon pa un promedio di 19.4 pa wega. E numeritonan di e sub-kampion Blue Jewels ta 12.5 punto pa wega i 100 punto total den 8 wega.
Hungadónan di e ekipo Storm ta: Caitlin “Cati” Lichtenberg, Seychelle Libier, Shenaya Dommond i Xzasha Pieters. E sub-kampion Blue Jewels ta formá pa: Lizzy Sambo Panasco, Megan Lichtenberg, Tsutae Suti Martis Guillermo i Zynha Curial.
Durante CuraHoops International na Novèmber aki, Kòrsou lo lucha kontra ekiponan di sobra di reino den laman Karibe i kontra Surnam pa disidi ken mag di partisipá den e ronda final di Hulanda su kampionato di basketbòl 3X3 kategoria U18 na 2027.
Awor WBAC, Storm i Blue Jewels lo sigui prepara pa na Novèmber duna un bon papel durante CuraHoops International Qualifier tambe.