WILLEMSTAD — Federashon Biar Kòrsou a organisá otro gran evento, e biaha aki tabata e disiplina di bola 8 kaminda un total di 32 biardista a bataya durante 4 dia pa mira ken lo bai ku e título maksimo.
Riba e último dia, e hungadónan invikto a resultá Shamir Tremus i Sybren Boekhoudt. Shamir, ku wikènt promé ku e torneo tabata na Aruba i a duna kátedra na e dos mihónan di e isla, a bin bèk kayente. Esei el a demostrá tambe den e semi final di buèlta di ganador ganando 7 – 1 di Boekhoudt.
Den buèlta di pèrdèdó David Prins, ku den e último evento a titulá kampion, a enfrentá Gregory Zimmerman i a gana ku skor di 6 – 4 i despues a topa ku Boekhoudt den semi final di pèrdèdó i aki ta gana 7 pa 5 i asina avansa pa e gran final.
Den e gran final Tremus i Prins a duna un tremendo bataya, pero finalmente tabata e hóben biardista ku ta gana e veterano i bai ku e título maksimo ku e skor final di 9 pa 7.
Resultado final Bola 8:
Shamir Tremus kampion, David Prins supkampion, di tres lugá Sybren Boekhoudt, 4 Gregory Zimmerman i empatá na puesto 5 Afmad Ibrahim i John Hernandez.
Febiko ta felisitá tur e finalistanan i ta anunsiá ku inskripshon a habri pa e evento di fin di òktober kual ta e disiplina di bola 9.