WILLEMSTAD — Den kuadro di selebrashon di 70 aniversario di Federashon Tènis di Mesa di Kòrsou direktiva lo organisá di 8 pa 11 di òktober un torneo internashonal ku partisipashon di mas di 55 partisipante den 4 kategoria kual nan ta 50 plùs riba djaweps anochi, 60 plùs riba djabièrnè anochi, 70 plùs riba djasabra mainta, Open riba djasabra anochi miéntras ku djadumingu mainta 10’or lo tin e weganan final den tur e kategorianan.
Djaweps 8 òktober lo tin e apertura ofisial ku ta kuminsá 8’or anochi den Sala di rekreo Irene Moreno ku palabranan di presidente sigui pa rekonosimentu na eks kampion, eks presidente i miembro di honor pa sigui ku e promé servisio dor di e miembro di honor, Winston Isenia.
Na e torneo lo partisipá un hungadó di Italia ku ta den ròlstul i lo bai ‘challenge’ e hungadónan den kategoria 50 plùs i Open.
Tur fanátikonan di deporte ta keda kordialmente invitá pa bin presensia e torneo internashonal den sala di rekreo Irene Moreno. Entrada ta grátis. Entrega di premio lo ta djadumingu despues di finalnan pa un representante di De Jongh Sports ku ta patrosiná e torneo internashonal aki.