WILLEMSTAD — Den un sala Irene Moreno kompletamente yen ku fanátikonan i hungadónan ku tin basta tempu sin dal bala, e timnan den final a duna tremendo demonstrashon riba mesa i a risibí aplouso di e públiko presente.
Nuuunka Spin ku e hungadónan, Juan Carlos Sanchez, Ravi Rajwani i Henny Metry a logra un viktoria di 3-0 riba Donic, ku a konta ku presensia di Ron van Spanje, Jaysron Mathilda i Sigmar Carmelia, pa asina bira kampion A-klasse den kampionato di tim di temporada 2026.
Smashers kampion B-klasse maskulino
Smashers ku Russel Lasten i Kim Chang a derota Mobile Link ku Dik Hendriks i Kalai ku skor di 3-1 pa bira kampion den B-klasse maskulino.
Despues di e weganan final tabatin entrega di premio na e timnan kampion i tambe na e hungadónan mas balioso di kada kategoria ku tabata:
• Dimitri Leon den A-klasse maskulino,
• Russel Lasten den B-klasse maskulino,
• Cyrella Rosalia den B-klasse damas
• Kalai den Liga Pasa Tempu.
Promé ku e weganan tabatin seremonia i entrega di plakat na e timnan Tornado, Shot i Donic pa nan kontribushon na desaroyo di tènis di mesa na Kòrsou.
Torneo Internashonal 8-11 òktober
Despues di e kampionato nashonal di tim, direktiva ta informá ku e próksimo aktividat ta e torneo internashonal kual lo tuma lugá di 8 pa 11 di òktober ku mas di 55 partisipante den e kategorianan Open, 50 plùs, 60 plùs i 70 plùs.