WILLEMSTAD — Den un sala yen di fanátiko di e deporte di tènis di mesa (pinpòn) tabatin e weganan final ayera den sala di rekreo Irene Moreno.
Den B-klasse damas tabata e tim Double Trouble formá pa Cyrella Rosalia i Gera Hernandez ku a derota Fortalesa ku skor di 3-1 pa bira kampion di Kòrsou miéntras den e final di Liga Pasa Tempu tabata Mobile Link, representá pa Kalai i Dik Hendriks ku a derotá Donic formá pa Rene Alfonso i Son Makaya ku skor di 3-0 pa bira kampion di Kòrsou.
E hungadó mas balioso di kampionato den B-klasse dama tabata Cyrella Rosalia ku a keda invikto den 8 wega miéntras ku den Liga Pasa Tempu Kalai a resultá e hungadó mas balioso kedando invikto den 7 partido.
Djárason anochi lo tin e weganan final den B-klasse maskulino i den A-klasse maskulino ora ku Nuuunka Spin enfrentá Donic mientras ku den B’klasse maskulino Smashers lo enfrenta Mobile Link.
E anochi aki lo ta dediká na tres klup di tènis di mesa ku a kontribuí en grandi durante tres dékada na desaroyo di e deporte di tènis di mesa na Kòrsou.
E klupnan aki, ku ta Tornado, Shot i Donic, lo haña un rekonosimentu serka federashon pa nan kontribushon na tènis di mesa ku vários kampion di Kòrsou.
Despues di e weganan final lo tin entrega di premio na e timnan kampion i sup kampion di temporada 2026 dor di un representante di MCB ku ta patrosinadó di e kampionato nashonal di tim di tènis di mesa 2026.
Direktiva ta invitá tur fanátiko di deporte pa bin presensiá e weganan final djárason pa 8’or di anochi.