WILLEMSTAD — Curaçao Atletiek Bond (CAB) ta invitá mayornan, boluntarionan i entrenadó i otro interesadonan pa participá den e Kids Athletics Workshop pa Mayornan & Boluntario, riba djasabra 17 òktober 2026, na SDK Skybox, di 9.00am te 2.00pm.
Kids’ Athletics ta destiná pa introdusí muchanan na atletismo di un manera dibertido, sigur i aksesibel. Kore, salta i tira ta forma parti importante di e programa, ku énfasis tambe riba desaroyo motoriko, konfiansa den su mes, traha huntu i plaser den deporte.
Durante e workshop, partisipantenan lo haña tantu splikashon teóriko komo ehersisionan práktiko i weganan. Nan lo siña kon pa motivá i guia muchanan, organisá aktividatnan na un manera sigur, sostené e coach i adaptá aktividatnan na e edat i nivel di e mucha.
Partisipantenan tambe lo wòrdu invitá pa sostené CAB durante un gran enkuentro di Kids’ Athletics pa skolnan riba djasabra 21 novèmber 2026. Esaki ta duna nan e oportunidat pa apliká nan konosementu direktamente den práktika.
Kosto di partisipashon: Cg 75
Deadline pa inskripshon: 3 òktober 2026
Material di estudio: Online
Sertifikado: Sertifikado di partisipashon
Inskripshon: curacaoatletiekbond.com
“Learn it – Do it – Share it.”
CAB ta invitá tur hende ku ke yuda muchanan deskubrí e plaser di moveshon i atletismo pa partisipá den e workshop.