WILLEMSTAD — Federashon di Vòlibòl di Kòrsou a organisá ku éksito e promé edishon di CAZOVA Men’s Final Four. Después di varios luna di preparashon intensivo, e torneo prestihioso a tuma lugá den Sala Errol Rooi, kaminda kuater paisnan fuerte di Karibe – Kòrsou, Barbados, Trinidad & Tobago i Bahamas – a kompetí pa e título.
Komo pais anfitrión, Kòrsou a tene un torneo ekselente i a keda invensibel durante e fase di round robin.
Riba e promé dia di kompetensia, djasabra, Kòrsou a kuminsá ku un viktoria konvinsente di 3-0 riba Bahamas. E prome partido di e dia, Barbados ta gana Trinidad & Tobago ku 3-0. E setnan a terminá 29-27, 27-25 i 25-23.
Djadomingu, e otro weganan di round robin a keda huga tantu mainta komo anochi. Barbados a kuminsá e dia ku un viktoria di 3-0 riba Bahamas.
Kòrsou ta tin un kuminsamentu difísil kontra Trinidad & Tobago. E bishitantenan a gana e promé set ku 25-14, pero for di e di dos set, Kòrsou a tuma kontrol kompletamente. Ku un defensa sólido, atakenan variá i hopi lucha, e selekshon di Kòrsou a gana e siguiente tres setnan i e partido ku 3-1.
Den e último partidonan di e fase di grupo, Kòrsou i Barbados a enfrentá otro pa determina ken lo terminá na promé lugá. Kòrsou a hunga un biaha mas na un nivel haltu i a derrotá Barbados ku 3-1, asegurando e promé puesto i un luga den final.
Trinidad & Tobago a e prome wega di anochi ku un viktoria di 3-0 riba Bahamas i asina a klasifiká pa e partido pa e medaya di bròns.
Djaluna, e torneo a yega na su klímax ku e weganan pa medayanan. Den e duelo pa e medaya di bròns, Trinidad & Tobago mester a lucha duru kontra Bahamas. Na fin, Trinidad & Tobago a sali viktorioso ku 3-1 i a konkista e medaya di bròns.
Pa e gran final entre Kòrsou i Barbados, Sentro Deportivo Korsou sala Errol Rooi tabata yen te na e último sèt. E publiko a krea un ambiente fabuloso pa empuha e selekshon nasional.
Kòrsou a sali forsa for di e promé sirvisio pone preshon riba Barbados i ta marka nuebe punto konsekuente. Kada atake di Barbados tabata para pa e blok fuerte di Kòrsou, loke a pone e bishitantenan kai atras hopi lèu for di kuminsamentu. Kòrsou a gana e promé set ku 25-12.
Den e di dos i di tres set, Kòrsou a sigui dominando e partido. Barbados a mustra mas resistensia, pero no por a kambia e rumbo di e dwega. Danki na e atakenan poderoso di Marlison Kleinmoedig, tambe a surf fuerte, e excelente distribushon di Raymond Marchenia i e blok sólido di Raygid Isenia i Ludrich Inocente, Kòrsou a gana tambe e siguiente setnan ku 25-18 i 25-17.
Ku e viktoria konvinsente di 3-0, Kòrsou a koroná su mes kampion di e promé CAZOVA Men’s Final Four. Asina e selekshon national maskulino a hasi historia i a duna Federashon di Vòlibòl di Kòrsou un final di ensueño di un torneo internashonal organisá na un manera ekselente.
Durante e seremonia di premiashon, e dominio di Kòrsou a keda mas kla ainda. Huntu ku e medaya di oro, e selekshon national a gana no ménos ku sinku premio individual. Marlison Kleinmoedig a wordu nombra Best Opposite i tambe Most Valuable Player (MVP) di e torneo. Raygid Isenia i Ludrich Inocente a wordu premiá komo Best Middle Blockers, mientras ku Raymond Marchenia a wordu skohe komo Best Setter.
Ku un torneo internashonal organisá na un manera ekselente, e título di kampion i sinku premio individual, Federashon di Vòlibòl di Kòrsou por mira bèk ku orguyo riba un logro históriko. E evento no solamente a mustra e kalidat di vòlibòl na Kòrsou, sino tambe ku nos isla tin e kapasidat pa organisá evento deportivo internashonal na un nivel haltu. Korsou ta posishona su mes na di 48 luga di renking mundial actualmente.
Pa tur resultado, estadístikanan i potretonan, bishitá: CAZOVA Final Four Men’s Championship 2026: https://www.cazova.net/events/cazova-final-four-mens-championship-2026#documents